‘Anap Yo No Siopa so Makana’

SAY Damasco et sakey a maaligwas a syudad nen inmunan siglo na Komon a Panaon tayo. Lapud apaliberan na saray kakiewan, nagmaliw itan a painawaan na saray onsasabin ulop na managbaroy a manlalapud bukig. Ag-abayag kayari na impatey nen Jesu-Kristo, niwalay Kristianon kongregasyon ed Damasco. Kabiangan ditan iray Judio a nayarin nagmaliw a patumbok nen Jesus legan na Piesta na Pentecostes ed Jerusalem nen 33 K.P. (Gawa 2:5, 41) Pigaran babangatan ed Judea so nayarin inmalis ed Damasco sanen niwalay panamasegsegang kayari na impantupak ed si Esteban.​—Gawa 8:1.

Nen manga koma-34 K.P., akaawat na nikadkaduman asainmin so sakey a Kristianon taga-Damasco a manngaran na Ananias. Oniay inkuan na Katawan ed sikato: “Alagey ka, tan onla ka ed lansangan ya inngaran a Maptek, et anapen mo ed abung nen Judas so sakey a manngaran na Saulo, sakey a taga-Tarso, ta nia, sikato so mikakasi.”​—Gawa 9:11.

Samay dalan ya atawag a Maptek et manga sakey tan kapalduan kilometro ed karukey tan binmeltang ed sentro na Damasco. Diad sayay inyukit a litrato nen koma-19 a siglo a nitekep dia, makala itayo na ideya ed no antoy itsura na saman a dalan nensaman. Lapud inkagawa na satan a dalan, nayarin abayagan si Ananias a nananap ed abung nen Judas. Balet ta aromog nen Ananias itan, tan lapud satan ya imbisita to, si Saulo so nagmaliw ya apostol Pablo, sakey a maseseg a manangiyabawag na maong a balita.​—Gawa 9:12-19.

Imbaki nen Jesus iray babangatan to tan inkuan to ed sikara ya ‘anapen da no sioparay makana’ ed maong a balita. (Mateo 10:11) Mapatnag a si Ananias so literal a nananap ed si Saulo. Singa si Ananias, maliket ya aanapen na saray Tasi nen Jehova iray makanan indibidual tan naliliketan ira sano aawaten na totoo so maong a balita na Panarian. Makagunggona so amin a pansasagpot da lapud pakaroromog da ed saratan a sinansakey.​—1 Corinto 15:58.

[Litrato ed pahina 32]

Say “lansangan ya inngaran a Maptek” natan

[Picture Credit Line ed pahina 32]

Nanlapud libron La Tierra Santa, Tomo II, 1830