“Isulong Yo so Sankabukel a Kinlong na Dios”
“Isulong Yo so Sankabukel a Kinlong na Dios”
“Isulong yo so sankabukel a kinlong na Dios, pian nayarian yo so ontalindeg ya onsumpa ed saray pangalot na Diablo.”—EFESO 6:11.
1, 2. Diad dilin panangibaga yo, deskribien pa so espiritual a kinlong a nakaukolan ya isulong na saray Kristiano.
SAY Roma so walad kapantokan na pakayari to legan na inmunan siglo K.P. Lapud biskeg na saray armada na Roma, akontrol na sayan syudad so dakel a parte na mundo nensaman. Sayan armada so deneskribe na sakey a manag-awaran bilang “say sankatalonggaringan a naorganisan militar ed awaran.” Say larinon armada na Roma so tugyopen na saray disiplinadon sundalo a dinmalan ed mairap a panagpasal, balet say intalona ra bilang epektibon puersa na mibabakal so akadepende met ed kinlong da. Inusar nen apostol Pablo so kinlong na sakey a Romanon sundalo pian iyilustra so espiritual a kinlong a nakaukolan ya isulong na saray Kristiano pian ontalona ira a mibakal ed Diablo.
2 Naromog tayo so deskripsion ed sayan maespiritual a kinlong diad Efeso 6:14-17. Oniay insulat nen Pablo: “Talindeg kayo . . . , balkesan yo so awak yo na katuaan, tan ikawes yo so kinlong na kaptekan, bangta sinapinan yo so saray salisali yo na panangiparaan ed ebanghelyo na kareenan; nagkalalo et eegnaan yo so kinlong na pananisia, a sikato so nayarin pangerep yo naani ed saray amin a mandarlang a gayang na mauges. Tan alaen yo so pamulaw na kilalaban, tan say kampilan na espiritu, a sikato so salitay Dios.” Diad punto de bista na too, say kinlong a deneskribe nen Pablo so baleg a proteksion parad sakey a Romanon sundalo. Insan uusaren to met so kampilan odino espada to, say manunan ayura to no milaban ed arum.
3. Akin a nepeg tayon unoren iray bilin nen Jesu-Kristo tan tumboken so alimbawa to?
3 Nilikud ni ed saray kagawaan tan panagpasal, say intalona na Romanon armada so akadepende ed katutulok na saray sundalo ed komandante ra. Mipadpara, saray Kristiano so nepeg ya ontulok ed si Jesu-Kristo, a deneskribe na Biblia bilang komandante odino “managganggan ed saray baley.” (Isaias 55:4) Sikato met so “ulo na iglesia [odino kongregasyon]”. (Efeso 5:23) Si Jesus so angiter na saray bilin parad espiritual a pibabakal tayo tan angipanengneng na naspot ya alimbawa ed no panon ya isulong so espiritual a kinlong. (1 Pedro 2:21) Lapud mipadpara so singa-Kriston personalidad ed espiritual a kinlong tayo, binilin itayo na Kasulatan ya ‘agamilen’ so awawey na kanonotan nen Kristo. (1 Pedro 4:1) Kanian, legan tayon susurien so kada kabiangan na espiritual a kinlong tayo, usaren tayo so alimbawa nen Jesus pian napabitar so kaimportantian tan inkaepektibo na satan.
Panalimbeng ed Awak, Pagew, tan Salisali
4. Anto so kakanaan na sakey a balkes diad kinlong na sakey a sundalo, tan anto so iyiilustra na satan?
4 Awak ya abalkesan na katuaan. Diad panaon na Biblia, ibabalkes na saray sundalo so malapar a katat, a duara anggad anemiran pulgada so kalapar na satan. Isusuheri na arum a managpatalos a satan a bersikulo so nepeg a basaen a, “walaan na katuaan a singa balkes a malmalet ed awak yo.” Say balkes na sundalo so manalimbeng ed awak to, tan mainomay a pangisukbitan na espada to. Sano balkesan na sakey a sundalo so awak to, sikato so manpaparaan la ed bakal. Inusar nen Pablo so balkes na sundalo pian iyilustra so nepeg ya epekto na Makasulatan a katuaan diad kabibilay tayo. Nepeg a malet ya akabalkes itan ed sikatayo, a singa panangibaga, ta pian manbilay itayo unong ed katuaan tan nidepensa tayo itan diad antokaman a kipapasen. (Salmo 43:3; 1 Pedro 3:15) Lapud satan a gagala, nakaukolan a maseet tayon aralen so Biblia tan dalepdepen iray lugan na satan. Say ganggan na Dios so ‘walad dalem na puso’ nen Jesus. (Salmo 40:8) Kanian sanen sikatoy sinuppiat na saray sumusumpa, naebatan to ira diad impangaon to na Kasulatan manlapud memorya to.—Mateo 19:3-6; 22:23-32.
5. Ipaliwawa no panon itayon natulongan na Makasulatan a bilin sano nasusubok odino natutukso.
5 Sano paigiya itayo ed katuaan na Biblia, satan so manalimbeng ed sikatayo manlapud palson panagkatunongan tan ontulong ed sikatayon manggawa na makabat iran desisyon. Sano natutukso odino nasusubok, saray totontonen ed Biblia so mamabiskeg ed determinasyon tayon manggawa na maptek. Singano nanenengneng tayo so Manunan Managbangat tayo, si Jehova, tan narerengel tayo so salita ed benegan tayo a kuanto: “Saya so dalan, ondalan kayo ed sikato.”—Isaias 30:20, 21.
6. Akin a say piguratibon puso tayo et mankaukolan na proteksion, tan panon ya epektibon nasalimbengan itan na inkatunong?
6 Kabal na inkatunong. Say kabal odino samben ed pagew na sundalo so manalimbeng ed importantin organo, say puso. Say piguratibon puso tayo—say inkatoo tayo—so mankakaukolan na nikaduman proteksion lapud walay mauges a tendensia na satan. (Genesis 8:21) Nepeg tayo sirin ya aralen tan aroen iray matunong ya estandarte nen Jehova. (Salmo 119:97, 105) Say aro ed inkatunong so mangigiya ed sikatayo a mangipulisay ed saray minumundon panag-isip a mangibabaliwala odino mamuburagas ed malinew iran totontonen ya inter nen Jehova. Niarum ni, sano aroen tayo so maptek tan busolen tayo so mauges, napaliisan tayo met so pangegemtan ed kurang a maneral ed bilay tayo. (Salmo 119:99-101; Amos 5:15) Si Jesus so napanuliranan ed sayan pamaakaran, lapud oniay inkuan na Kasulatan nipaakar ed sikato: “Sika inarom so katunongan, tan binusol mo so kaugsan.”—Hebreos 1:9. *
7. Akin a kinaukolan na sakey a Romanon sundalo so maabig a sandalyas, tan anto so iyiilustra na satan?
7 Salisali ya asapinan na kagawaan na maong a balita na kareenan. Nakaukolan na saray Romanon sundalo so malet iran sapatos odino makapal iran sandalyas, lapud ta no panaon na bakal et mabetbet iran manmartsa na 30 kilometro ed kada agew, ya akasulong ira odino awit-awit da so ngalngali 27 a kilo na kinlong tan kagawaan. Matukoy so impangusar nen Pablo ed sandalyas pian irepresenta so pagmaliw tayon akaparaan a mangipulong ed mensahe na Panarian ed amin ya ondengel. Importante itan lapud ta panon so pakapikabat na totoo ed si Jehova no ag-itayo akaparaan tan mabulos a manpulong?—Roma 10:13-15.
8. Panon tayon naalig so alimbawa nen Jesus bilang manangipulong na maong a balita?
8 Anto so sankaimportantian a kimey ed bilay nen Jesus? Oniay inkuan to ed Romanon Gobernador a si Poncio Pilato: “Linma ak dia ed mundo, pian tasian ko so katuaan.” Si Jesus so nampulong ed inerman a pakaromogan to na saray ondengel, tan nanliketan ton maong so ministeryo to kanian manunaan itan ed sikato nen saray pankaukolan to ed pisikal. (Juan 4:5-34; 18:37) Singa si Jesus, no magunaet itayon mangiyabawag ed maong a balita, nawalaan itayo na dakel a pankanawnawa pian inabang itan ed arum. Niarum ni, say pagmaliw tayon okupado ed ministeryo tayo so ontulong pian makapantultuloy itayon mabiskeg ed espiritual.—Gawa 18:5.
Say Samper, say Helmet, tan Say Kampilan
9. Anton proteksion so itatarya na baleg a samper parad sakey a Romanon sundalo?
9 Say kinlong odino baleg a samper na pananisia. Say Griegon salita a nipatalos a “kinlong” so manutukoy ed sakey a malapar a samper pian nasakbongan so kabalgan na laman. Proteksion itan sumpad saray “mandarlang a gayang” ya atukoy ed Efeso 6:16. Diad panaon na Biblia, uusaren na saray sundalo iray anlemew a gayang a gawa ed tanubong a walaan na melag a balatyang a napanginan na mandarlang a petrolyo. Deneskribe na sakey ya iskolar irayan anlemew a gayang bilang “sakey ed saray makapatey ya ayura diad panlalaban nensaman.” No say sundalo et andian na baleg a samper pian protektaan so inkasikato manlapud saratan a gayang, sikato so graben nasugatan odino ompatey ni ingen.
10, 11. (a) Antoran “mandarlang a gayang” so uusaren nen Satanas pian napaletey so pananisia tayo? (b) Panon a nipatnag ed alimbawa nen Jsus so kaimportantian na pananisia legan na panaon na subok?
10 Antoran “mandarlang a gayang” so uusaren nen Satanas pian napaletey so pananisia tayo? Nayarin pawalaen to so panamasegsegang odino isusumpa na pamilya, saray katrabahoan, odino kaeskuela. Say pilalek a nawalaan na mas dakel a materyal a bengatla, tan say pananagyat na imoralidad so akaderal met ed espiritualidad na arum. Pian nasalimbengan itayo manlapud saratan a kapeligroan, ‘nagkalalo et [nepeg tayon] egnaan so kinlong na pananisia.’ Niwala so pananisia no manaral itayo nipaakar ed si Jehova, maparanay a mitongtong ed sikato diad pikakasi, tan tebeken no panon to itayon sasalimbengan tan bebendisyonan.—Josue 23:14; Lucas 17:5; Roma 10:17.
11 Sanen wadiad dalin si Jesus, impatnag to so kaimportantian na pakawalaan na mabiskeg a pananisia legan na maatap iran panaon. Sikato so sigpot a nanmatalek ed saray desisyon nen Ama to tan maliket ton ginawa so linawa na Dios. (Mateo 26:42, 53, 54; Juan 6:38) Anggan sanen sikatoy pirmin nagogonigon diad hardin na Getsemani, oniay inkuan nen Jesus ed Ama to: “Aliwan unong ed kaliktan ko, ingen unong ed kaliktan mo.” (Mateo 26:39) Agbalot alingwanan nen Jesus so kaimportantian na pansiansian matoor tan pamaliket ed Ama to. (Uliran 27:11) No ontan met so pankompiyansa tayo ed si Jehova, agtayo abuloyan so kritisismo odino isusumpa a mamaletey ed pananisia tayo. Imbes, say pananisia tayo so napabiskeg sano sikatayo so manmatalek ed Dios, ipatnag so aro ed sikato, tan unoren iray ganggan to. (Salmo 19:7-11; 1 Juan 5:3) Anggaporay materyal a gunggona odino temporaryon liket ed mundo a makapipara ed saray bendisyon ya ipaparaan nen Jehova ed saramay mangaaro ed sikato.—Uliran 10:22.
12. Anton importantin kabiangan na laman tayo so sasalimbengan na piguratibon helmet tayo, tan akin a makanakana itan a proteksion?
12 Say pamulaw odino helmet na kilalaban. Say helmet so manalimbeng ed ulo tan utek na sundalo—say pinagkasentro na pikakabat. Say ilalo tayo bilang Kristiano so nikompara ed helmet lapud sasalimbengan na satan so nonot tayo. (1 Tesalonica 5:8) Anggaman nauman tayo la so kanonotan tayo diad panamegley na suston pikakabat ed Salitay Dios, sikatayo so siansia nin maletey tan ag-ayadyari. Say nonot tayo so mainomay a naimpluensyaan na mauges. Saray kalat ed sayan sistema na bengabengatla so nayarin mangisuawi ed sikatayo odino onsalat ni ingen ed inter na Dios ya ilalo tayo. (Roma 7:18; 12:2) Sinali na Diablo ya isuawi si Jesus diad impangiyopresi to na “amin a panarian na mundo.” (Mateo 4:8) Balet ta impulisay a tampol nen Jesus so opresi ed sikato, tan oniay inkuan nen Pablo nipaakar ed sikato: “Lapud gayaga a niyan ed arap to [si Jesus] sinungdoan to so krus, ya imbantak to so baing, et imyurong ed kawanan na trono na Dios.”—Hebreos 12:2.
13. Panon tayon napansiansia so kompiyansa tayo ed ilalo tayo ed arapen?
13 Aliwan nisipor so panagmatalek a walad si Jesus. No saray ugagep tan kalat na sayan sistema na bengabengatla so ipaslep tayo ed kanonotan tayo imbes a say ilalo ed arapen, onletey so pananisia tayo ed saray sipan na Dios. Ompano onsabi so panaon et sigpot ni ingen a naandi so ilalo tayo. Diad biek a dapag, no regular tayon dalepdepen iray sipan na Dios, mantultuloy itayon manliket ed ilalo a niparungtal ed sikatayo.—Roma 12:12.
14, 15. (a) Anto so piguratibon kampilan tayo, tan panon itan ya usaren? (b) Iyilustra no panon a say kampilan na espiritu so makatulong ed sikatayo pian naresistian so tukso.
14 Say kampilan na espiritu. Say salita, odino mensahe na Dios, a nikurit ed Biblia et singa makdem a duaray-tarem a kampilan a nayarin maneral ed relihyoson katilaan tan ontulong ed maptek-impanpuson totoo a makaromog ed espiritual a kawayangan. (Juan 8:32; Hebreos 4:12) Sayan espiritual a kampilan so makapangidepensa met ed sikatayo sano natutukso itayo odino sasalien na saray apostata a deralen so pananisia tayo. (2 Corinto 10:4, 5) Agaylay pisasalamat tayo ya ‘amin a Sulat et impuyan na Dios tan mangibangat a maong ed sikatayo parad amin a gawan maabig’!—2 Timoteo 3:16, 17.
15 Sanen sikatoy tinukso nen Satanas diad kalawakan, epektibon inusar nen Jesus so kampilan na espiritu pian suppiaten so palson panagkatunongan tan masilib iran tukso. Diad kada tukso nen Satanas et oniay ebat nen Jesus: “Walan nisulat.” (Mateo 4:1-11) Amoria met nen David, sakey ed saray Tasi nen Jehova ed España, a sikatoy atulongan na Kasulatan a manalona ed tukso. Sanen sikatoy manedad na 19, insagyat na sakey a magangganan bii a katrabahoan to diad sakey a kompanyan managlinis a “man-good time iran dua.” Impulisay nen David so pangakarinyo na saman a bii tan sikatoy impaiyalis ed superbaysor to diad sananey a pasen ta pian agla naulit iman. “Anonotan ko so alimbawa nen Jose,” so inkuan nen David. “Impulisay to so imoralidad tan sikatoy tampol ya inmarawi. Onman met so ginawak.”—Genesis 39:10-12.
16. Ipaliwawa no akin a nakaukolan itayon manpasal ta pian ‘naagamil a matunong so salita a tua.’
16 Inusar met nen Jesus so kampilan na espiritu pian ontulong ed arum a makapaliis ed panangontrol nen Satanas. “Say bangat ko agko kien,” so kuan nen Jesus, “balet kien na angibaki ed siak.” (Juan 7:16) Pian naalig so marunong a panagbangat nen Jesus, nakaukolan tayo so panangipasal. Nipaakar ed saray Romanon sundalo, oniay insulat na Judion manag-awaran a si Josephus: “Kada sundalo et agew-agew a mane-ehersisyo, tan maseeseet da itan a gagawaen, a singano wala la ra ed bakal, kanian maininomay dan nasungdoan iray pakakesawan ed saray bakal.” Diad espiritual a pibabakal tayo, nakaukolan tayon usaren so Biblia. Niarum ni, nepeg itayon ‘manseet a sikukuli ya ompatnag a naabobonan ed arap na Dios, a singa tometeger ya anggapo so ibaing to, ya agamilen a matunong so salita a tua.’ (2 Timoteo 2:15) Insan makakaliket itayo sano usaren tayo so Kasulatan a mangebat ed masimoon a tepet na interesadon too!
Manpikasi ed Amin a Panaon
17, 18. (a) Anto so betang na pikakasi pian naresistian si Satanas? (b) Mangiter na alimbawa a mangiyilustra ed kaimportantian na pikakasi.
17 Kayari ton kinonsidera so interon espiritual a kinlong, wala ni so inyarum nen Pablo ya importantin bilin. Pian naresistian si Satanas, nepeg ya anamoten na saray Kristiano so “amin a nengneng na pikakasi tan pikekerew.” Kaunongan kabetbet? “Onkerew kayo ed espiritu . . . ed amin a panaon.” (Efeso 6:18) Sano nipapaarap itayo ed saray tukso, subok, odino pakadismayaan, napabiskeg itayon maong na pikakasi. (Mateo 26:41) Si Jesus so “angibagat na pikakasi tan pikekerew, a tekep na mabiskeg a tagleey tan saray lua, ed saman so makapanyarin mangilaban ed sikato ed ipapatey, tan sikato so nadngel lapud masanton panaglikas to.”—Hebreos 5:7.
18 Si Milagros, ya angasikaso ed mansasakit a masiken to ed loob la na masulok a 15 taon, so angikuan: “Sano nadidismaya ak, onaasingger ak ed si Jehova diad pikakasi. Sikato lambengat so makatulong a maong ed siak. Tua, walaray bekta a naliliknak ya agak la makaanos. Balet ta aminpigan naeksperiensyak a no kayarik a manpikasi ed si Jehova et binmiskeg ak lamet tan linmemew so liknaan ko.”
19, 20. Anto so nakaukolan pian manbiktorya itayo ed pibabakal tayo sumpad si Satanas?
19 Amta na Diablo ya antikey lay panaon to, tan papalooren to iray sagpot to pian nadaeg to itayo. (Apocalipsis 12:12, 17) Nakaukolan tayon resistian iyan makapanyarin kabusol tan ‘mibakal ed maabig a pibabakal na pananisia.’ (1 Timoteo 6:12) Kakaukolanen na saya so biskeg a labas nen say nayarian na too. (2 Corinto 4:7) Nakaukolan tayo met so tulong na masanton espiritu na Dios tan nepeg tayo sirin ya ipikasi itan. Inkuan nen Jesus: “No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?”—Lucas 11:13.
20 Mabitar, importante ya isulong tayo so kompleton kinlong ya itatarya nen Jehova. Pian nisulong tayo iyan espiritual a kinlong, nakaukolan tayon bayuboan iray maridios a kalidad, a singa say pananisia tan inkatunong. Kakaukolanen na satan ya aroen tayo so katuaan a singa akabalkes itan ed sikatayo, ya akaparaan itayon mangikayat ed maong a balita diad amin a pankanawnawa, tan sinononot tayo lawas ed ilalo tayo ed arapen. Nepeg tayon aralen so marunong a pangusar ed kampilan na espiritu. Diad pangisulong tayo ed kompleton kinlong a nanlapud Dios, manbiktorya itayo diad pitutulot tayo ed mauges iran espiritun puersa tan nigloria tayo so masanton ngaran nen Jehova.—Roma 8:37-39.
[Paimano ed leksab]
^ par. 6 Diad propesiya nen Isaias, si Jehova so adeskribe ya akasulong na “inkatunong a singa sakey a kabal.” Kanian kakaukolanen to ed saray manangasikaso na kongregasyon ya agamilen da so inkahustisya tan inkatunong.—Isaias 59:14, 15, 17.
Panon Yon Ebatan?
• Siopa so angiter na sankaabigan ya alimbawa ed pangisulong na espiritual a kinlong, tan akin a nepeg tayon maalwar ya ikonsidera so alimbawa to?
• Panon tayon nasalimbengan so nonot tan say piguratibon puso tayo?
• Panon itayon magmaliw a marunong ed pangusar na kampilan na espiritu?
• Akin a nepeg itayon mantultuloy a manpikasi ed amin a panaon?
[Tepetepet Parad Panagaral]
[Saray litrato ed pahina 17]
Say maseet a panagaral na Biblia so mamakiwas ed sikatayon mangiyabawag ed maong a balita ed amin a pankanawnawa
[Saray litrato ed pahina 18]
Say seguradon ilalo tayo so ontulong ed sikatayon mangarap ed saray subok
[Saray litrato ed pahina 19]
Kasin uusaren yo so “kampilan na espiritu” diad ministeryo?