“Ombiskeg Kayo Komon ed Katawan”

“Ombiskeg kayo komon ed Katawan, tan dia ed biskeg na pakayari to.”​—EFESO 6:10.

1. (a) Anton nikadkaduman impanlaban so agawa manga 3,000 taon lay apalabas? (b) Akin a nambiktorya si David?

 NGALNGALIN 3,000 taon lay apalabas, nanabet so duaran mibabakal ed baetan na duaran mankalaban ya armada diad lawak na bakalan. Say malalangwer et sakey a managpastol a balolaki a manngaran na David. Kaarap to si Goliat, sakey a mabisbiskeg tan abalbaleg a too. Say balatyang a kinlong ya akasulong ed sikato et manbelat na ngalngali 57 a kilo, tan sankabembenan to so abalbaleg a gayang tan espada. Anggapon balot so kinlong ya akasulong ed si David, tan say armas to labat et sakey a bansot odino palsot. Nainsulto so Filisteon higante a si Goliat lapud say akiarap ed sikaton Israelita et sakey labat ya ugaw a laki. (1 Samuel 17:42-44) Parad saray maniimaton ya Israelita tan Filisteo, ompatnag ya amta da la no siopa so manalo. Balet aglawas manbibiktorya ed bakal so mabiskeg. (Eclesiastes 9:11) Nambiktorya ed satan si David lapud biskeg nen Jehova. “Say bakal kien nen Jehova,” so inkuanto. Inkuan na salaysay na Biblia a “si David tinmalona ed Filisteo ed panamegley na lampasot tan sakey a bato.”​—1 Samuel 17:47, 50.

2. Anton klase na pilalaban so pibibiangan na saray Kristiano?

² Saray Kristiano so agmibibiang ed pisikal a panlalaban. Anggaman mikakareenan ira ed amin a totoo, mibibiang ira ed espiritual a pibabakal sumpad saray makapanyarin tuloy a kalaban. (Roma 12:18) Diad unor a kapitulo na sulat nen Pablo ed saray taga-Efeso, deneskribe to so bakal a kalalanoran na amin a Kristiano. Oniay insulat to: “Ag-itayo mitulot ed laman tan dala, noag ingen onsumpa itayo ed saray manunaan, onsumpa ed saray pakayari, onsumpa ed saray manuley ed mundo na sayan kabilungetan, sumpa ed saray mauges ya espiritu ed pasen a mangatatawen.”​—Efeso 6:12.

3. Unong ed Efeso 6:10, anto so nakaukolan tayo pian naseguro so italona tayo?

³ Saratan a “mauges ya espiritu” et si Satanas tan saray demonyo, a manpipilalek a maneral ed relasyon tayo ed si Jehova a Dios. Lapud mas mabiskeg ira nen say sikatayo, mipadpara so kipapasen tayo ed si David, tan ag-itayo ontalona no ag-itayo mandependi ed biskeg ya iter na Dios. On, papasesegen itayo nen Pablo a mantultuloy ya ‘ombiskeg ed Katawan, tan dia ed biskeg na pakayari to.’ (Efeso 6:10) Kayari to itan ya insimbawa, deneskribe na apostol iray espiritual a katulongan tan saray Makristianon kalidad a  makatulong pian manbiktorya itayo.​—Efeso 6:11-17.

4. Anton duaran manunan punto so konsideraen tayo ed sayan artikulo?

⁴ Surien tayo natan so ibabaga na Kasulatan nipaakar ed saray kabiskegan tan taktika na kabusol tayo. Insan konsideraen tayo so taktikan pandepensa tayo pian nasalimbengan so inkasikatayo. No tumboken tayo iray bilin nen Jehova, makapanmatalek itayo ya ag-itayo nadaeg na saray kabusol tayo.

Pipupuligesgesan ed Saray Mauges ya Espiritun Puersa

5. Panon itayon natulongan na terminon ‘pitutulot’ a nausar diad Efeso 6:12 pian natebek tayo so estratehiya nen Satanas?

⁵ Insalaysay nen Pablo a walaan itayo na ‘pitutulot . . . sumpa ed saray mauges ya espiritu ed pasen a mangatatawen.’ Siempre, say manunan mauges ya espiritu et si Satanas a Diablo, say manuley odino “katawan na saray demonyo.” (Mateo 12:24-26) Iyaaliling na Biblia so pibabakal tayo bilang ‘pitutulot,’ odino pibabalsakan. Diad saray pagalaw a balsakan ed kadaanan a Gresya, panggunaetan na kada atleta a paandien so inkabalanse na kalaban to pian nibalsak to. Ontan met, labay na Diablo a naandi so inkabalanse tayo ed espiritual. Anto so gagawaen to pian magmaliw itayon ontan?

6. Ipabitar manlapud Kasulatan no panon ya uusaren na Diablo so nanduruman taktika ta pian napakapuy so pananisia tayo.

⁶ Say Diablo so nayarin onakto a singa sakey a serpiente, sakey a managlem a leon, odino sakey ni ingen ya anghel na liwawa. (2 Corinto 11:3, 14; 1 Pedro 5:8) Nayarian ton usaren iray totoo pian mamasegsegang tan manismaya ed sikatayo. (Apocalipsis 2:10) Lapud kokontrolen nen Satanas so interon mundo, nayarian ton usaren iray pilalek tan saray pananagyat na satan ta pian napatitan itayo. (2 Timoteo 2:26; 1 Juan 2:16; 5:19) Nayarian ton usaren so minumundo odino apostatan panag-isip ta pian nibalang itayo, a singa impamalikdo to ed si Eva.​—1 Timoteo 2:14.

7. Antoray limitasyon na saray demonyo, tan antoray bentaha tayo?

⁷ Anggaman ompatnag a mabiskeg iray uusaren tan pakayari nen Satanas tan saray demonyo, wala iray limitasyon na saratan. Ag-itayo napaskar na sarayan mauges ya espiritu a manggawa na mauges iran bengatla ya agmakapaliket ed mangatatawen ya Ama tayo. Walaan itayo na kawayangan a mandesisyon, tan nakontrol tayo so kanonotan tan kiwakiwas tayo. Niarum ni, agtayo bukbukor so mibabakal. Onaplika met ed sikatayo natan so nibaga ed si Elias nensaman: “Saray wala ed sikatayo sikara so dakdakel nen saray wala ed sikara.” (2 Arari 6:16) Papaseguroan itayo na Biblia a no manpasakop itayo ed Dios tan sumpaen tayo so Diablo, sikato so ontaynan ed sikatayo.​—Santiago 4:7.

Sikakabat Itayo ed Saray Pakana nen Satanas

8, 9. Antoran subok so indapo nen Satanas ed si Job pian nabuyak so katooran to, tan antoran kapeligroan ed espiritual so kipapaarapan tayo natan?

⁸ Aliwa itayon mangamanga ed saray pakana nen Satanas lapud ipaparungtal na Kasulatan so  manuna iran taktika to. (2 Corinto 2:11) Diad matunong a too a si Job, inusar na Diablo so pirmin kairapan ed panagbilay, impatey na saray inad-aro, isusumpa na pamilya, impanirap ed pisikal, tan andiay-basiyan a panagkritiko na saray palson kakaaro. Agonigon a maong si Job tan inisip to a sikatoy inkaindan la na Dios. (Job 10:1, 2) Anggaman aliwan si Satanas so direktan pansesengegan na amin a problema natan, saratan a kairapan so talagan mangaapekta ed dakel a Kristiano, tan nayarin anamoten iratan na Diablo parad pakagunggonaan to.

⁹ Saray kapeligroan ed espiritual so ondarakel ed sayan panaon na anggaan. Manbibilay itayo ed mundo a manuna iray materyalistikon gegemtan imbes a saray espiritual a kalat. Naynay ya ipaparungtal na media so sebel a pisesekso bilang lapuan na liket imbes a sakit na linawa. Tan say karaklan ed totoo so nagmaliw a “maaro ed saray likeliket, a lalo nen say dia ed Dios.” (2 Timoteo 3:1-5) Sayan paraan na panag-isip so mameligro ed espiritual ya inkabalanse tayo nilikud no ‘mibangal itayo nisesengeg ed pananisia.’​—Judas 3.

10-12. (a) Anto so sakey ya impasakbay nen Jesus diad ilustrasyon to nipaakar ed managtanem? (b) Iyilustra no panon a napugeran iray espiritual ya aktibidades.

¹⁰ Sakey ed saray matalonan tuloy a taktika nen Satanas et say kigalet tayo ed sayan mundo tan saray materyalistikon gegemtan na satan. Diad ilustrasyon to nipaakar ed managtanem, impasakbay nen Jesus a diad pigaran kipapasen et “say kapagaan ed mundo, tan say panamalingo na saray kayamanan, leneren da so salita [na Panarian].” (Mateo 13:18, 22) Say Griegon salita dia a nipatalos a “leneren” so mankabaliksan na “sigpot a panikel.”

¹¹ Diad saray katakelan ed tropiko et walay naromog a sakey a klase na balete. Kalkalna itan ya ontubo legan ton kukulapotan so sengeg na kiew a pineketan to. Satan a klase na wakal so kalkalnan mangulapot ed kiew panamegley na saray oneelet a lamot to. Diad saginonor et sepsepen na dakerakel a lamot na satan so maslak ed saray sustansia na dalin diad sengeg na kiew, bangta sasakbongan to so pineketan ton kiew. Insan diad kaunoran et ompatey so kiew.

¹² Diad ontan met a paraan, saray kapagaan ed sayan sistema tan say panaanap ed kayamanan tan mainawan panagbilay so kalkalnan mangupot ed mas dakel a panaon tan biskeg tayo. No niyapasakey lay imano tayo ed saray bengatla ed mundo, magmainomay tayo lan napaulyanan so personal a panagbasa tayo na Biblia tan naynay tayo lan onsaew ed saray Makristianon pantitipon, a manresulta ed agtayo la pakatagano ed espiritual. Insan la onsalat iray materyalistikon kalat ed espiritual iran gegemtan, tan diad kaunoran et mainomay itayo lan nabiktima nen Satanas.

Nakaukolan Itayon Ontalindeg a Malet

13, 14. Anton talindeg so nakaukolan tayo sano aatakien itayo nen Satanas?

¹³ Pinaseseg nen Pablo iray kapananisiaan to ya “ontalindeg ya onsumpa ed saray pangalot na Diablo.” (Efeso 6:11) Siempre, agtayo naderal so Diablo tan saray demonyo to. Impabtang itan na Dios ed si Jesus. (Apocalipsis 20:1, 2) Balet, anggad agni aderal si Satanas, nakaukolan ya “ontalindeg” itayon malet ta pian ag-itayo nadaeg ed saray panangataki to.

 ¹⁴ Indanet met nen apostol Pedro so pankaukolan ya ontalindeg a malet sumpa ed si Satanas. “Mandangka kayo, manbantay kayo,” so insulat nen Pedro. “Say kabusol yo, say Diablo, wala ed kaliberliber yo a singa omoang a leon a mananap na buagen to: A sikato so sumpaen yo na mabiskeg a pananisia yo, amta yo a peteg ta saratan a kairapan nagawa met ira ed utel na agagi yo a wala ed mundo.” (1 Pedro 5:8, 9) Diad tua, say tulong na saray agagi tayo ed espiritual so importante pian makatalindeg itayon malet sano onataki so Diablo a singa managlem a leon.

15, 16. Mangiter na alimbawa ed Kasulatan a mangipapabitar ed no panon itayon natulongan na saray kapananisiaan pian makatalindeg itayon malet.

¹⁵ Sano walay onaglem a leon diad kalawakan na Aprika, onkuyakuyat iray usa anggad makaarawi ira ed kapeligroan. Balet, saray elepanti so angipatnag na alimbawa nipaakar ed pantutulongan ed balang sakey. Oniay insalaysay na libron Elephants​—Gentle Giants of Africa and Asia: “Say depensa a kaslakan ya ikakana na sakey a grupo na saray elepanti et manbebenegan ira, ya akaarap iray angkakabaleg ya elepanti ed kaatapan tan protektaan da iray malangwer nin elepanti a walad leet da.” No nipaarap iray leon ed ontan a pakapatnagan na biskeg tan pantutulongan, mataltalag iran onataki anggano ed saray kilaw nin elepanti.

¹⁶ Sano sesesgaen nen Satanas tan saray demonyo to, nakaukolan met a maniiba itayo, a benebenek itayon miulop ed saray agagi a malet ed pananisia. Binidbir nen Pablo a walaray kaparan Kristiano ya apaneknekan a “manamabiskeg a tulong” ed sikato legan na inkipangaw to diad Roma. (Colosas 4:10, 11) Say Griegon salita a nipatalos a “manamabiskeg a tulong” so aminsan labat a nausar ed Kristianon Griegon Kasulatan. Unong ed Expository Dictionary of New Testament Words nen Vine, “say verbal form na sayan salita so mankabaliksan na saray tambal a mamapakepa ed pambarbaraan.” Singa say makapainawan ipupuyok, say tulong na matakken-ed-espiritual iran mandadayew ed si Jehova so mamakepa ed ot-ot ya epekto na emosyonal odino pisikal a paniirap.

17. Anto so makatulong pian makapanmatoor itayo ed Dios?

¹⁷ Say panamaseseg na saray kaparan Kristiano natan so mamabiskeg ed determinasyon tayo a sitotoor a manlingkor ed Dios. Nagkalalo la ed Kristianon mamatatken a magunaet ya ontutulong ed espiritual a paraan. (Santiago 5:13-15) Saray katulongan pian makapanmatoor itayo et say regular a panagaral na Biblia tan iyaatendi ed Makristiano iran miting, asamblea, tan kombension. Say maapit a relasyon tayo ed Dios so ontulong met pian makapansiansia itayon matoor ed sikato. On, balanglan mamangan, oniinum, odino manggagawa na antokaman a bengatla, nepeg tayon gawaen so amin a bengatla diad kigloriaan na Dios. (1 Corinto 10:31) Siempre, say panagmatalek ed si Jehova tekep na saray pikakasi so importante ta pian makapantultuloy itayo ed kurang a makapaliket ed sikato.​—Salmo 37:5.

18. Akin ya ag-itayo nepeg ya onsuko anggaman onkakapuy itayo la ed makapagonigon iran kipapasen?

¹⁸ No maminsan et onataki si Satanas sano onkakapuy itayo ed espiritual. Tetekmelan na leon so sakey a kinmapuy lan ayep. Saray problema ed pamilya, kairapan ed panagbilay, odino sakit so mamakapuy ed espiritualidad tayo. Balet ag-itayo  onsuko ed panggawa na makapaliket ed Dios, lapud oniay inkuan nen Pablo: “Sano siak so makapuy, dia ed satan mabiskeg ak.” (2 Corinto 12:10; Galacia 6:9; 2 Tesalonica 3:13) Anto so labay ton ibaga? Kabaliksan na satan ya ontulong so pakayari na Dios ed saray kakapuyan tayo bilang too, daput no onkerew itayo na biskeg ed si Jehova. Say impanbiktorya nen David ed si Goliat so mangipatnag a nayarian na Dios a pabiskegen so totoo to tan mantultuloy ton gawaen itan. Napekderan na saray modernon-agew a Tasi nen Jehova a diad panaon na pirmin problema et alikna ra so panamabiskeg na Dios.​—Daniel 10:19.

19. Mangiter pa na alimbawa no panon a papabiskegen nen Jehova iray lingkor to.

¹⁹ Nipaakar ed impanulong na Dios ed sikara, oniay insulat na sakey a sanasawa: “Diad inlabas na dakel a taon, nanlingkor kamin sanasawa ed si Jehova tan nanliketan mi so dakel a panamendisyon tan dakel so akabat mi ya alay abig iran totoo. Impasal tan pinabiskeg kami met nen Jehova pian nasungdoan mi iray kairapan. Singa si Job, agmi natatalosan a naynay no akin a nagagawa iray bengatla, balet amta mi a si Jehova et lawas akaparaan ya ontulong ed sikami.”

20. Anton Makasulatan a prueba so mangipabitar a lawas tutulongan nen Jehova so totoo to?

²⁰ Mabunlok si Jehova ya ontulong tan mamabiskeg ed saray matoor a totoo to. (Isaias 59:1) Oniay inkanta nen salmistan David: “Si Jehova sampaten to so saray amin a niparukol, tan itagey to so saray amin a naruknot.” (Salmo 145:14) On, say mangatatawen ya Ama tayo so ‘inagew-agew a manlilibit ed awit tayo’ tan itatarya to iray peteg a nakaukolan tayo.​—Salmo 68:19.

Nakaukolan Tayo so “Sankabukel a Kinlong na Dios”

21. Panon ya indanet nen Pablo so pankaukolan parad espiritual a kinlong?

²¹ Kinonsidera tayo so pigara ed saray metodo nen Satanas tan atebek tayo so pankaukolan na malet ya italindeg ed saray panangataki to. Natan et nepeg tayon konsideraen so sakey nin importantin tulong pian matalona tayon nidepensa so pananisia tayo. Diad sulat to ed saray taga-Efeso, amiduan sinalambit nen apostol Pablo so sakey ya importantin sengegan a makatalindeg itayon malet sumpad saray pakana nen Satanas tan ontalona itayo diad pitutulot sumpad saray mauges ya espiritun puersa. Oniay insulat nen Pablo: “Isulong yo so sankabukel a kinlong na Dios, pian nayarian yo so ontalindeg ya onsumpa ed saray pangalot na Diablo . . . Alaen yo so sankabukel a kinlong na Dios, pian nayarian yo so mitalindegan ed mauges ya agew, tan, sano agawa yo la ‘yan amin, wala kayo a sitatalindeg.”​—Efeso 6:11, 13.

22, 23. (a) Anto so laktipen na espiritual a kinlong tayo? (b) Anto so konsideraen tayo ed ontumbok ya artikulo?

²² On, nakaukolan tayon isulong so “sankabukel a kinlong na Dios.” Sanen sinulat nen Pablo iray taga-Efeso, sikato so guaguardiaan na sakey a  Romanon sundalo, a panapanaon ya akasulong na kompleton kinlong. Anggaman ontan, say apostol so pinuyanan na Dios a mangisingbat ed espiritual a kinlong a kakkaukolan na kada lingkor nen Jehova.

²³ Sayan inter na Dios a kinlong so mangilaktip ed saray kalidad a nepeg ya ipatnag na sakey a Kristiano ontan met ed espiritual iran probisyon nen Jehova. Diad ontumbok ya artikulo et usisaen tayo so kada sakey ed saray kabiangan na espiritual a kinlong. Saya so ontulong ed sikatayo pian nadetermina no kaunongan itayon akinlongan parad espiritual a pibabakal tayo. Ontan met, natalosan tayo no panon a makatulong ed sikatayo so alay abig ya alimbawa nen Jesu-Kristo pian nalabanan tayo si Satanas a Diablo.

Panon Yon Ebatan?

• Anton pilalaban so pibibiangan na amin a Kristiano?

• Deskribien so pigara ed saray taktika nen Satanas.

• Panon itayon napabiskeg ed tulong na saray kapananisiaan?

• Siopan biskeg so nepeg a pandependian tayo, tan akin?

[Tepetepet Parad Panagaral]

[Saray litrato ed pahina 11]

Saray Kristiano so ‘mitutulot ed saray mauges ya espiritu’

[Litrato ed pahina 12]

Saray kapagaan ed sayan sistema so nayarin manlener ed salita na Panarian

[Litrato ed pahina 13]

Saray kaparan Kristiano so nayarin magmaliw a “manamabiskeg a tulong”

[Litrato ed pahina 14]

Kasin onkekerew kayo na biskeg ed Dios?