‘Onia so Pampikasi Yo’

KASIN kabisadom so pikakasi ya “Ama Mi”? Satan so modelon pikakasi ya imbangat nen Jesu-Kristo. Diad bantog a Sermon ed Palandey, inkuan nen Jesus: “Onia sirin no mikasi kayo.” (Mateo 6:9) Si Jesus so angibangat ed satan, kanian tatawagen met itan a Pikakasi na Katawan.​—Paternoster diad Latin.

Dakdakel a totoo ed sankamundoan so mangipapatlep ed dasal ya Ama Mi tan uulit-uliten da itan, a nayarin inagew-agew. Diad agano niran taon, dakel so maksil a mangidadasal ed saya diad saray eskuelaan tan diad mapubliko iran pasen. Akin ya ontan lay panamabli ed pikakasin Ama Mi?

Oniay insulat na komatlon-siglo a teologo a taga-Chipre: “Anto ni so mas maespiritual a pikakasi noagta samay indatak ed sikatayo nen Kristo. . . ? Anto ni so mas matuan panagpikasi ed Ama noagta samay indalatdat ed sikatayo na Anak a sikato so Katuaan?”​—Juan 14:6.

Diad katekismo na Iglesia Katolika Romana, say Ama Mi so ipapasen a “manunan dasal na Kristiano.” Bibidbiren na The World Book Encyclopedia so kaimportantian na sayan pikakasi diad amin a relihyon ed Kakristianoan, a tutukoyen da itan bilang sakey ed “saray manunan panangideklara na pananisia na Kristiano.”

Anggaman ontan, nepeg a bidbiren a dakel ed saramay mangidadasal ed Ama Mi et agda sigpot a natatalosan itan. “No bilang sakey ka ed saramay  mankuan a Kristiano, maseguro a maples mon nibalikas so Ama Mi a dirediretso,” so kuan na Ottawa Citizen a peryodiko ed Canada, “balet nayarin nairapan kan mangibalikas ed satan diad paraan a matayam tan tekep na pakatalos.”

Talaga kasin importante a talosan iray pikakasi tayo ed Dios? Akin ya imbangat ed sikatayo nen Jesus so pikakasi ya “Ama Mi”? Antoy kabaliksan na satan ed sika? Imanoen tayo pa irayan tepet.