Say Pikakasi na Katawan​—Say Kabaliksan na Satan ed Sika

SAY Pikakasi na Katawan, ya indatak nen Jesu-Kristo diad Sermon ed Palandey, so nikurit ed Biblia diad Mateo kapitulo 6, bersikulo 9 anggad 13. Antis ton indatak itan a pikakasi, oniay inkuan nen Jesus: “Diad panagpikasi, agmo agamilen so andi kakanaan a pangolioli na salita, a singa gawa na saray Gentiles lapud isisipen dan natalineng ira nisengeg ed dakel a panagsalita ra.”​—Mateo 6:7.

Malinew sirin ya agginetma nen Jesus ya ibalikas so Pikakasi na Katawan a salita por salita. Tua a diad saginonor et inulit to itan a pikakasi parad pakagunggonaan na sananey iran dumerengel. (Lucas 11:2-4) Balet ta mandumaan so inkisalita na pikakasi diad saray salaysay na Ebanghelyo nen Mateo tan Lucas. Niarum ni, saray saginonor a pikakasi nen Jesus tan saray apostol to so ag-eksakton angusar ed saray salitan walad modelon pikakasi to.

Akin a nikurit so Pikakasi na Katawan diad Biblia? Diad panamegley na sayan modelon pikakasi, ibabangat ed sikatayo nen Jesus so panagpikasin aabobonan na Dios. Naromog tayo met ed sayan pikakasi iray ebat ed pigaran manunan tepet nipaakar ed bilay. Konsideraen tayo sirin so kada kabiangan na Pikakasi na Katawan.

Anto so Ngaran na Dios?

“Ama min wala ka ed tawen, Nagalang komon so ngaran mo.” (Mateo 6:9) Sarayan primeron balikas ed modelon pikakasi so mamaapit ed sikatayo ed Dios diad panukoy ed sikato bilang ‘Ama mi.’ Singa sakey ya ugaw, a sipor lan maasingger ed maaro tan makatalos ya ateng, nayarian tayo met so onasingger ed mangatatawen ya Ama tayo, a matalek a dengelen to itayo. “O sika a dengelen mo so pikakasi,” so inkanta nen Arin David, “amin a laman ondago ed sika.”​—Salmo 65:2.

Imbangat itayo nen Jesus ya ipikasi so kapasantos na ngaran na Dios. Balet anto so ngaran na Dios? Oneebat so Biblia diad oniaran salita: “Say ngaran mo a bukbukor et Jehova, sankatageyan ka a manuna nen say amin a dalin.” (Salmo 83:18) Abasam ta la so ngaran a Jehova diad Biblia?

 Diad tua, say ngaran na Dios, a Jehova, so ngalngali 7,000 a danay a pinmatnag diad kadaanan iran manuskrito na Biblia. Balet ta inekal na arum a managpatalos iyan ngaran manlapud saray bersion na Biblia ra. Kanian, makatunongan ya ipikasi tayo a pasantosen na Manamalsa tayo so ngaran to. (Ezequiel 36:23) Say sakey a paraan pian makakiwas itayo unong ed satan a pikakasi et say pangusar ed ngaran a Jehova sano manpipikasi itayo ed Dios.

Sakey a biin manngaran na Patricia so pinabaleg a Katoliko tan kabkabisado to so pikakasi ya “Ama Mi.” Anto so reaksion to sanen impanengneng ed sikato na sakey a Tasi nen Jehova so ngaran na Dios diad Biblia? “Agak makapanisia!” so inkuan to. “Kanian ninengneng ko itan ed mismon Bibliak, tan wadtan met. Insan impanengneng ed siak na Tasi so Mateo 6:9, 10 tan impaliwawa to ya atukoy so ngaran na Dios ed pikakasi ya Ama Mi. Aliketan ak a maong kanian impaiyaralan ak na Biblia ed sikato.”

Nagawa Diad Dalin so Linawa na Dios

“Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:10) Panon kasin nasumpal iyan kabiangan na modelon pikakasi nen Jesus? Iisipen na maslak a totoo a diad tawen so kawalaan na kareenan tan inkaligen. Tutukoyen na Kasulatan a say tawen so ‘panag-ayaman na inkasanto tan gloria’ nen Jehova. (Isaias 63:15) Agpankelawan no akin ya ipipikasi tayon nagawa komon so linawa na Dios diad dalin “unong ed tawen”! Balet kasin nagawa ni itan?

Oniay impasakbay na propeta nen Jehova a si Daniel: “Say Dios na tawen mamaalagey naani na sakey a panarian ya anggan kapigan agnaani naderal tan say pananguley to agnaani niiter ed sananey a baley: Balet buybuyaken to naani tan upoten to naani so saraya ya amin [a mangaraldalin] a panarian, et sikato so mansiansia lawas.” (Daniel 2:44) Sayan mangatatawen a Panarian, odino gobierno, so magano lan mangitarok na sankamundoan a kareenan diad panamegley na matunong ya uley.​—2 Pedro 3:13.

Say pangipikasi ya onsabi so Panarian na Dios tan nagawa diad dalin so linawa to et sakey a panangipatnag na pananisia ya agmansumpal ed pakadismaya. Oniay insulat na Kristianon apostol a si Juan: “Nadngel ko so sakey a baleg a boses ed tawen, a kuanto, Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray  una a bengatla sikara so linmabas la.” Insan inyarum nen Juan: “Tan say manyurong ed trono kuanto: . . . Isulat mo; ta saraya a salita sikara so matoor tan matua.”​—Apocalipsis 21:3-5.

Say Pikakasi Parad Pisikal Iran Pankaukolan Tayo

Diad saray balikas nen Jesus ed modelon pikakasi, impatnag to a say manunan nonoten tayo sano manpipikasi et nepeg a misiglaotan ed ngaran tan gagala na Dios. Ingen, kabiangan met ed modelon pikakasi iray personal a kerew a manepeg ya itongtong ed si Jehova.

Nia so primero ed saratan: “Say kanen min agew-agew iter mo’d sikami ed agew aya.” (Mateo 6:11) Aliwa iyan pankekerew na materyal a kayamanan. Pinaseseg itayo nen Jesus a mangipikasi ed ‘kanen tayo ya inagew-agew.’ (Lucas 11:3) Mitunosan ed Pikakasi na Katawan, nayarian tayoy manpikasi tekep na pananisia ya itarya na Dios so inagew-agew iran pankaukolan tayo no sikatoy aaroen tan tutuloken tayo.

Say alablabas a panagpaga ed saray problema ed panagbilay so nayarin pansengegan a napaulyan tayo lay pankaukolan tayo ed espiritual, kanian agtayo la nagawaan iray kakaukolanen na Dios ed sikatayo. Balet no iyuna tayo ed bilay tayo so panagdayew ed Dios, makaseguro itayo a dengelen to iray kerew tayo parad materyal iran pankaukolan, a singa say tagano tan kawesen. Oniay inkuan nen Jesus: “Anapen yo nin unona so panarian, tan say inkatunong [na Dios]; et amin iraya a bengatla niarum ira ed sikayo.” (Mateo 6:26-33) Aliwan mainomay so pananap ed inkatunong na Dios, lapud amin tayo so makasalanan tan mankakaukolan na panamerdona. (Roma 5:12) Nilaktip met itan a pamaakaran diad Pikakasi na Katawan.

Saray Pikakasi Tayo Parad Kaperdona

“Perdonam iray utang mi a singa say impamerdona mi met ed saray akaotang ed sikami.” (Mateo 6:12) Diad salaysay nen Lucas nipaakar ed Pikakasi na Katawan, sarayan “utang” so manutukoy ed saray “kasalanan.” (Lucas 11:4) Peteg kasin perdonaen nen Jehova iray kasalanan tayo?

Anggaman akagawa na saray graben kasalanan si Arin David na kadaanan ya Israel, sikatoy nagbabawi tan matalek a nampikasi: “Sika, Katawan, maong ka tan maparaan ka a mamerdona, tan napnapno ka na maaron abig na linawa ed amin na saray ontawag ed sika.” (Salmo 86:5) Agaylan makaligliwa itan! Say mangatatawen ya Ama tayo so ‘akaparaan a mamerdona’ ed saray kasalanan na saramay magbabawin ontatawag ed sikato. No panon a nayarin sigpot a nakansela so sakey ya utang, nayarian met nen Jehova a sigpot a perdonaen iray kasalanan tayo.

Balet, sinalambit nen Jesus so sakey a kondisyon: Pian perdonaen itayo na Dios, nepeg tayon perdonaen so arum. (Mateo 6:14, 15) Anggaman say matunong a Job et minaltrato na taloran kakaiba to, sikara so pinerdona to tan impikasi to nira ingen. (Job 42:10) No perdonaen tayo iraman so nankasalanan ed sikatayo, napaliket tayo so Dios tan sikatayoy makaawat na panangasi to.

Say inkamabulos na Dios ya ondengel ed saray ey-ey tayo so nepeg a mamakiwas ed sikatayon anapen so panangabobon to. Tan nagawaan tayo itan anggaman sikatayoy ag-ayadyari. (Mateo 26:41) Natulongan itayo nen Jehova ed sayan pamaakaran, unong ya impabitar nen Jesus diad impanampot to ed modelon pikakasi panamegley na makanan kerew.

Tulong Pian Makapankurang a Matunong

“Agmo kami yabuloy ed tukso, ilaban mo kami ingen ed mauges.” (Mateo 6:13) Ag-itayo papaulyanan nen Jehova a nadaeg na tukso odino napelag ed kasalanan. Oniay ibabaga na Salita to: “Say Dios agnayari a tuksoen na mauges tan agmet manukso na siopaman a too.” (Santiago 1:13) Sikatayo so aabuloyan na Dios a natukso, balet nayarian to itayon ilaban sumpad Baleg a Mananukso​—say sakey a “mauges,” salanti, si Satanas a Diablo.

Pinaseseg nen apostol Pedro iray kapananisiaan to: “Mandangka kayo, manbantay kayo; ta say kabusol yo, say Diablo, wala ed kaliberliber yo a singa omoang a leon a mananap na buagen to.” (1 Pedro 5:8) Diad tua, anggan si Jesu-Kristo ya ayadyarin too so tinukso nen Satanas! Anto so getma na Diablo? Pian iyarawi si Jesus manlapud tuan panagdayew ed si Jehova a Dios. (Mateo 4:1-11) No sikay manggugunaet a manlingkor ed  Dios, getma nen Satanas ya iyarawi ka met manlapud satan!

Diad panamegley na mundo a kontrolado na Diablo, sikatoy nayarin manukso ed sikatayo a mibiang ed saray ag-agamil ya ag-aabobonan na Dios. (1 Juan 5:19) Kanian importante a sikatayoy naynay ya onkerew na tulong ed Dios, nagkalalo la sano mabetbet itayon nipapaarap ed tukso. Tan no mandayew itayo ed si Jehova unong ed impuyan a Salita to, say Biblia, ilaban to itayo diad panulong to ed sikatayon naresistian so Diablo. Ibabaga ed sikatayo na Biblia a ‘matoor so Dios, tan agto itayo paulyan a natukso na onlabas ed nayarian tayo.’​—1 Corinto 10:13.

Makana so Pananisia ed Dios

Agaylan makapaligsan naamtaan ya interesado ed balang sakey ed sikatayo so mangatatawen ya Ama tayo! Imbaki to ni ingen so Anak to, si Jesu-Kristo, a mangibangat ed sikatayo no panon so manpikasi. Seguradon saya so mamakiwas ed sikatayon kaliktanen so pamaliket ed si Jehova a Dios. Panon tayon nagawaan itan?

Oniay ibabaga na Biblia: “No anggapo so pananisia agnayarin paliketen [so Dios]: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) Panon a niwala so ontan a pananisia? “Say pananisia manlapu ed pandengel,” so kuan na Biblia. (Roma 10:17) Maliket iray Tasi nen Jehova a mangitongtong na Makasulatan iran bengatla ed amin na saramay manpipirawat a manlingkor ed Dios tekep na tuan pananisia.

Iilaloan a sayan impaningbat ed Pikakasi na Katawan so amaaralem na pakatalos mo ed kabaliksan na satan. Diad igamor mo na kaaruman nin pikakabat nipaakar ed si Jehova tan ed panutumang to ed saraman so masimoon a “manaanap ed sikato,” napabiskeg mo so pananisiam ed Dios. Komon ta dakel ni so naaralan mo nipaakar ed sikato tan ed saray gagala to ta pian napanggayagaan mo so maapit a pisisiglaotan ed mangatatawen ya Amam diad ando lan ando.​—Juan 17:3.

[Blurb ed pahina 5]

“Ama min wala ka ed tawen, Nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin. Say kanen min agew-agew iter mo’d sikami ed agew aya. Tan perdonam iray utang mi a singa say impamerdona mi met ed saray akaotang ed sikami. Tan agmo kami yabuloy ed tukso, ilaban mo kami ingen ed mauges.”​—Mateo 6:9-13

[Litrato ed pahina 7]

Itatarya nen Jehova so pankaukolan na saramay mangaaro ed sikato

[Litrato ed pahina 7]

Sikatayo so tutulongan met na Dios a naresistian so Diablo

[Litrato ed pahina 7]

Singa si Job, no perdonaen tayo iraman so nankasalan ed sikatayo, nagunggonaan itayo ed panangasi na Dios