Tepetepet Manlapud Saray Managbasa

Akin ya inabuloyan iray Israelitan lalaki a mangasawa na saray akautibon sankailin bibii anta diad Mosaikon Ganggan et niganggan ya ag-ira miasawa ed saray partikular a sankaili?​—Deuteronomio 7:1-3; 21:10, 11.

Walaray espisyal a kipapasen a nalalanor no akin ya inabuloyan iya. Ingganggan nen Jehova iray Israelita a gebaen iray syudad na pitoran nasyon ed dalin na Canaan, tan pateyen so amin a manaayam ditan. (Deuteronomio 20:15-18) Nipaakar ed arum iran nasyon, maseguron saray adakep a birhen a bibii labat so aliktar a wala la’d edad. (Numeros 31:17, 18; Deuteronomio 20:14) Nayarin asawaen na sakey ya Israelita itan a bii, daput no sumpalen to so pigaran totontonen.

Nipaakar ed saray kundang a kaukolan a gawaen na satan a bii, oniay ibabaga na Biblia: “Sikato kiskisan to so ulo to, tan mankuko; tan ekalen to naani kawes to ed inkadakep to ya asamsam ed bakal, insan natilak la a manayam ed abung mo, et mannangis ed satan a paninateyan to ra di ama to tan ina to na nagnap a sakey bulan: et dia ed kasapo’to, insan mo la tiponan, et sika la so laki ya asawa to ed satan tan sikato met la so bii ya asawam.”​—Deuteronomio 21:12, 13.

Say sakey ya adakep a birhen a labay ya asawaen na sakey ya Israelita so kaukolan a mankiskis na ulo to. Say pamuklis ed buek et panangipatnag na panermen odino gonigon. (Isaias 3:24) Singa bilang, sanen inatey ya amin so anak nen Job tan abalang so amin a kayarian to, pinuklis toy buek to pian ipatnag so paneermen to. (Job 1:20) Kaukolan met ya asikasoen na sankailin bii iray kuko to, a nayarin ‘kukoan’ to iratan, pian anggan sano nakoloran iratan et ag-ondakep iray lima to. (Deuteronomio 21:12) Anto imay ‘kawes ed inkadakep to’ a nepeg ya ekalen na biin adakep? Kustombre nensaman na saray bibii ed saray syudad na Canaan so mansulong na sankarakpan lan kawes sano asingger la ran nakautibo. Ginawa ra iya diad paniilalon nasagyat da iray mangautibo ed sikara. Satan ya aysing so kaukolan ya ekalen na akautibon bii diad panermen to.

Say akautibon bii a magmaliw ya asawa na sakey a lakin Israelita so nepeg a mannangis parad saray inatey a pinabli to diad loob na sakey a lunar a bulan. Talagan kinaukolan so sigpot a panderal ed saray syudad na Canaan a naandi lan amin so datin kakanayon tan kakaaro to. Lapud deralen na saray Israelitan sundalo so amin ya imahen na dirios to, anggapo la so pandayewan to. Say bulan na panermen so onkana met a panaon na panaggogol a kaleganan na satan et italirak la na akautibon bii so amin ya agagamil ed datin relihyon to.

Balet, duma so kipapasen na saray sankailin bibii ed inkalapagan. Nipaakar ed saya, onia so ingganggan nen Jehova: “Agka miaasawa ed sikara naani; agmo iiter naani bii ya anak mo ed laki ya anak to, odino agka naani mangala na bii ya anak to a yasawam ed laki ya anak mo.” (Deuteronomio 7:3) Anto so rason ed sayan panameget? Oniay inkuan na Deuteronomio 7:4: “Ta paarapen to ed sananey so anak mo a laki pian ag-ontumbok ed siak, pian manlingkor ira ed sananey a dirios.” Say gagala sirin na panameget et pian protektaan iray Israelita manlapud pakarutakan na panagdayew da. Balet, anggapoy ontan a pakasesgaan ed kipapasen na akautibon bii ya adeskribe diad Deuteronomio 21:10-13. Inatey la so amin a kakanayon to, tan aderal la iray talintao na dirios to. Anggapo lay pisisiglaotan to ed saray manag-agamil na palson relihyon. Naabuloyan so sakey ya Israelita a mangasawa na sakey a sankaili a walad ontan a kipapasen.