Aliwa Labat a Panaggalaw-galaw

LABALABAY na saray ugugaw so manggalaw. Balet, impaliwawa na libron The Developing Child ya “aliwa iyan maapa odino andiay-kana ya aktibidad. Sakey iyan aktibidad a pakaaligwasan a tuloy na panmoria na ugaw ed kaliberliber to.” Diad panggagalaw et naaralan na ugugaw ya usaren so pakalikna ra, talosan so kaliberliber da, tan say pimogelmogel ed arum.

Manlapu ed edad ya apatira odino limara, onggapon aligen na saray ugugaw so gagawaen na saray wala la’d edad diad saray panaggalaw da. Aminsan et sinaglawi nen Jesus so nipaakar ed saray manggagalaw ya ugugaw. Labay na arum so manggalaw a kunwarin mangakasal, labay met na arum so manggalaw a kunkunwarin manpapaliwawa ira ed ponpon tan, singa mabetbet lan gagawaen na saray ugugaw et mansasangsangan ira no aglabay na arum so mibiang. (Mateo 11:16, 17) Sarayan klase na galaw so makapangipaslep na makabaliksan iran betang ed panag-isip na onaaligwas ya ugaw.

Sarayay ugugaw a walad litrato so manggagalaw, ya aaligen da so sakey a manangiyaral na Biblia tan sakey ya iyaaralan. Aliwan tudtuan panagaral na Biblia iya, balet malinlinew a walad kanonotan da so ideya na pananginabang na mensahe na Biblia. Tan importante iyan leksion, lapud ingganggan nen Jesus so amin a papatumbok to a manggawa na babangatan tan ibangat iray totoo a gawaen so amin a bengatlan imbangat to ed sikara.​—Mateo 28:19, 20.

Manepeg a manliket iray atateng a saray ananak da et labalabay day mankunkunwarin mangikokondukta na panangiyaral na Biblia, manpapaliwawa, odino manpupulong ed kaabungan. Kaslakan lan aaligen na saray ugugaw no anto so naiimano ran gagawaen na saray baleg la a walad kaliberliber da. Saray galaw na ugugaw a nibase ed Biblia so mangipapatnag a sikaray napapabaleg ed “nengneng na edukasyon tan panamilin ya aabobonan na Katawan.”​—Efeso 6:4, Charles B. Williams.

Kaliktan nen Jehova a mibiang iray ugugaw ed tuan panagdayew. Binagaan toy Moises ya ipila ‘iray angkelag’ no ibasa so Ganggan. (Deuteronomio 31:12) No nalikna na saray ugugaw a kabiangan ira, maseguron napatnagan itan ed saray galaw da. Tan say ugaw a mangaalig ed sakey a ministro na Dios diad saray panaggalaw to so manggagawa na primeron kundang pian magmaliw ya ontan.