Innabang To ed Saray Kaklase To so Pananisia To

LABAY mo ta’n tulongan iray kaklasem a nawalaan na magmaong a pakatalos ed pananisiam a nibase ed Biblia? Si Magdalena, a 18 años a haiskul diad Polandya, so naynay a mangitotongtong ed saray kaklase to nipaakar ed sisisiaen to bilang sakey ed saray Tasi nen Jehova. Lapud satan et sikatoy naynay a natetepetan na, ‘Antoy kabaliksan na pagmaliw a Tasi nen Jehova?’ tan ‘Agkayo ta manisia ed si Jesus?’ Panon ton natulongan iray kaklase to? Nampikasi si Magdalena ed si Jehova parad panangiwanwan tan kinmiwas unong ed satan.​—Santiago 1:5.

Sakey ya agew, kinerew nen Magdalena ed maestra to, a manrerespeto ed pananisia to, no nayari ton ipabantay ed klase so video a Jehovah’s Witnesses​—The Organization Behind the Name. * Inmabuloy so maestra ed saya. Insan onia so imbaga nen Magdalena ed saray kaklase to: “Walay inimbitaan kon kaarok a mangipresenta na 90-minuto a programa diad klase. Laktipen na satan so pambantay na video tan sakey a diskusyon nipaakar ed saray Tasi nen Jehova. Labay yoy onla?” Inmabobon so amin. Kanian, ginapoan nen Magdalena tan Wojciech, a sakey ya eksperiensyadon sigpot-panaon ya ebanghelisador, ya iparaan so presentasyon.

Implano ran gapoan so presentasyon diad 20-minuton paliwawa a nibase ed brosyur a Jehovah’s Witnesses​—Who Are They? What Do They Believe? * tan tumbokan na tepet-tan-ebat a diskusyon. Insan, ipalabas so video ed librarya na eskuelaan. Balang estudyante ed klase so ikdan na regalo​—sakey a baleg a sobre ya akargaan na pigaran brosyur, say libron Questions Young People Ask​—Answers That Work, * tan pigaran tract tan magasin.

Diad samay agew na presentasyon, inmatendi so 14 a kaklase to, say maestra to, tan 4 niran estudyante a nibanbanan walad librarya. Unonan impaliwawa nen Wojciech a pigaran Polako iran manag-anlong tan managsulat so angusar ed madibinon ngaran a Jehova diad saray sulsulat da. Binitla to met so pigaran daan iran katekismo na Katoliko a mankargay madibinon ngaran. Diad impangipaliwawa to ed modernon-agew iran aktibidad na saray Tasi nen Jehova, impanengneng to iray brosyur na nanduruman sangan opisina tan saray litrato na pigaran Assembly Hall.

Tinmumbok so sakey a maligsan diskusyon. Inusar di Magdalena tan Wojciech so Biblia diad impangebat ed saray tepet. Asagyat iray dumerengel lapud saya tan sikaray akombinse ya ag-ipupulong na saray Tasi nen Jehova so dili ran ideya. Antoray pigaran nitepet, tan panon dan inebatan iratan?

Tepet: Diad Biblia et amayamay so agmalinew iran balikas tan metapora, a nayarin ikdan na nanduruma ya interpretasyon. Panon sirin a posible so pambilay a mitunosan ed ibabaga na Biblia?

Ebat: Walaray mangibabaga a say Biblia et singano sakey a violin a nayarian mon patogtogen ed anggan anton tono a labay mo. Balet nonoten pa: No labay yon naamtaan no antoy labay ya ibaga na autor ed saray insulat to, agta sankaabigan lay panepet a mismo  ed sikato? Aliwan singa saray inatey lan managsulat na saray libro, say Autor na Biblia, a si Jehova a Dios, so mabilay. (Roma 1:20; 1 Corinto 8:5, 6) Say konteksto na sakey a teksto so makapangiparungtal ed dugan interpretasyon. Niarum ni, mabetbet a sisingbaten na Biblia so parehon tema ed nanduruman parte na satan, kanian makatulong no pankokomparaen iratan. Diad ontan et paiwawanwan tayoray kanonotan tayo ed Dios, a singano sikaton mismo so mangipapaliwawa ed sikatayo na teksto. Diad panggawa ed satan et naamtaan tan makapambilay itayo unong ed linawa to a singa niparungtal ed Biblia, agta ontan?

Tepet: Antoy pandumaan na saray Kristiano tan saray Tasi nen Jehova?

Ebat: Kristiano kami! Balet agmi labat basta ibabagan Kristiano kami, saray Tasi nen Jehova so manggugunaet a manbilay unong ed sisiaen da tan ed ibabangat na Dios ed sikara a pakagunggonaan da. (Isaias 48:17, 18) Lapud nibase ed Biblia so amin a bangat da, amta ran walad sikara so katuaan.​—Mateo 7:13, 14, 21-23.

Tepet: Akin ya aasinggeran yo iray agyo kabat insan yo ipipilit so mitongtong ed sikara? Agta singa yo la ipapasoot so pananisia yo ed arum?

Ebat: Antoy nikuan yo, mauges kasi no walay mapagalang a mitongtong ed sikayo diad karsada tan kerewen to no antoy opinyon yo ed sakey a bengatla? (Jeremias 5:1; Sofonias 2:2, 3) (Insan indemostra di Wojciech tan Magdalena no panon dan tinepetan iray ondadalan no iyaansakit kasi na Dios iramay abiktima ed agano nin delap ed Polandya.) Kayari min narengel so opinyon to, ipaimano mi so Biblia. No aglabay na sakey so mitongtong, manpatanir kami ed sikato insan kami mitongtong ed sananey. (Mateo 10:11-14) Kasin panamilit itan ed arum pian mitongtong ed sikami? Odino agla sirin nepeg a man-eeselan iray totoo?

Tepet: Akin et agyo seselebraan iray holiday?

Ebat: Seselebraan mi so alenleneg ya ebenton ingganggan na Biblia a selebraan tayo​—say Pannodnonot ed impatey nen Jesu-Kristo. (1 Corinto 11:23-26) No nipaakar ed saray holiday, naromog yo iray nanlapuan na saratan diad pansukimat ed saray ensayklopedia tan arum niran napanmatalkan a reperensya. No ontan so gawaen yo, natalosan yon tampol no akin ya agmi seselebraan iratan ya ebento.​—2 Corinto 6:14-18.

Dakel niray nitepet a naebatan. Abaybayag so diskusyon kanian kinaukolan ya iguntang ni pambantay ed video.

Antoray reaksion na saray estudyante? Paulyan tayon si Magdalena so mangibaga ed sikatayo: “Abigla ak ta arum a lokolokon estudyante tan mamabalaw ed arum so nantepet na saray seryoson tepet. Anggano ibabaga ran ateista ira, impatnag day pananisia ed Dios kaleganan na diskusyon mi!” Misalsalamat iramay inmatendi ya angawat ed saray regalo​—wala so dagup a 35 a libro, 63 a brosyur, tan 34 a magasin a nipalima ed sikara.

Talagan alay abig so resulta na satan a proyekto ed eskuelaan! Aglabat tinulongan na satan iray kaklase nen Magdalena a lalon makapikabat tan natalosan iray Tasi nen Jehova noagta satan met so amaseseg ed dakel iran kalangweran a manisip nipaakar ed gagala na bilay. Akin ya agpampelengan a tulongan iray kaklasem a lalon makaaral nipaakar ed pananisiam?

[Saray paimano ed leksab]

[Litrato ed pahina 31]

Manpaparaan si Magdalena tan Wojciech parad diskusyon