‘Matamoy Komon so Panamabli na Sakey tan Sakey’

“Nipaakar ed aroan na sanaagi, matamoy komon so aroan [“panamabli,” NW] na sakey tan sakey.”​—ROMA 12:10.

1, 2. Anton pisisiglaotan ed agagi ra so nanggayagaan na sakey a misionaryo tan si apostol Pablo?

 DIAD interon 43 a taon na impanlingkor to bilang misionaryo diad Arawin Bukig, kabkabat si Don lapud inkamaapit to ed saramay nanlingkoran to. Sanen aanosan to so sakit ya inateyan to ed saginonor, arum ed saray datin inyaralan to na Biblia so nambiahe na nilibon kilometro pian sikatoy bisitaen da pian mangibagay, “Kamsahamnida, kamsahamnida!”​—“Salamat, salamat!” diad Koreano. Say matamoy a panamabli nen Don so amakiwas ed kapusoan da.

² Sayan alimbawa a nipaakar ed si Don et aliwan nikadkaduma. Nen inmunan siglo, impalikna nen apostol Pablo so pirmin panamabli ed saramay nanlingkoran to. Si Pablo et masakripisyo. Anggaman sikato so walaan na mabiskeg a kombiksion, sikato so matamoy tan manangiyansakit, “a singa sakey a sigsiwa a managano na dilin anak to.” Oniay insulat to ed kongregasyon na Tesalonica: “Ontan mi met, maib-ibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.” (1 Tesalonica 2:7, 8) Diad saginonor, sanen imbaga nen Pablo ed saray agagi ton taga-Efeso a sikatoy agda la napinengnengan lamet, “sikara ya amin nannangis ira na baleg, et nilakap da ed beklew si Pablo, tan sikato so inangoban da.” (Gawa 20:25, 37) Malinew, say relasyon nen Pablo tan saray agagi to so aglambengat makasengeg ed parehon pananisia. Walaan ira na matamoy a panamabli ed sakey tan sakey.

Matamoy a Panamabli tan Aro

3. Panon a mansiglaotan iray termino na Biblia a panamabli tan aro?

³ Diad Kasulatan, say matamoy a panamabli, empatya, tan panangabagey so maapit a misiglaotan ed sankatalonggaringan a kalidad na Kristiano ​—say aro. (1 Tesalonica 2:8; 2 Pedro 1:7) Singa saray nanduruman anggulo na alay dakep a diamante, amin na sarayan maridios a kalidad so parparehon mamapawala na alay abig iran resulta. Saratan so mas mamaapit ed saray Kristiano aliwa labat a diad balang sakey noagta ontan met ed mangatatawen ya Ama ra. Kanian, oniay impaseseg nen apostol Pablo ed saray kapananisiaan to: “Say aro aleg a tekepan na pangunkunwari. . . . Nipaakar ed aroan na sanaagi, matamoy komon so aroan [“matamoy a panamabli,” NW] na sakey tan sakey.”​—Roma 12:9, 10.

4. Anto so labay ya ibaga na balikas a “matamoy a panamabli”?

⁴ Say Griegon salita ya inusar nen Pablo parad “matamoy a panamabli” so tugyopen na duaran kabiangan, say sakey et mankabaliksan na pikakaaro tan say sananey et mankabaliksan na panangaro ed pamilya. Unong ed salaysay na iskolar na Biblia, saya so mankabaliksan a saray Kristiano et “nepeg a nabidbiran na debosyon a pakapatnagan na maaro, maapit, tan mantutulongan a pamilya.” Ontan kasi so nalilikna yo ed saray Kristianon agagi yo? Say maapit a kaliberliber​—sakey a liknaan na pankakanayon​—so nepeg a napatnagan ed loob na Kristianon kongregasyon. (Galacia 6:10) Sirin, oniay impangipatalos na The New Testament in Modern English, nen J. B. Phillips, ed Roma 12:10: “Nawalaan itayo komon na peteg ya ampetang a panamabli ed balang sakey a singa ed sanaagi.” Tan oniay nabasa ed Maung a Balita: “Manaaroan kayo na malet, a singa dilin sanaagi.” On, manaaroan iray Kristiano ed balang sakey aliwa labat a lapud makatunongan odino obligado iran manggawa ed satan. “Aleg a tekepan na pangunkunwari,” nepeg tayon ‘manaaroan komon a malet ya angga ed utel na puso tayo.’​—1 Pedro 1:22.

“Binangatan Kayo la na Dios a Mangaro ed Sakey tan Sakey”

5, 6. (a) Panon ya inusar nen Jehova iray internasyonal a kombension pian ibangat so totoo to nipaakar ed Makristianon panamabli? (b) Panon a lalon onapit so siglaotan na saray agagi ed andukey a panaon?

⁵ Anggaman ombebetel ed sayan mundo so ‘aro na amayamay,’ ibabangat nen Jehova so totoo to natan a “mangaro ed sakey tan sakey.” (Mateo 24:12; 1 Tesalonica 4:9) Saray internasyonal a kombension na saray Tasi nen Jehova so mangitatarya na alay abig iran pankanawnawa parad sayan panangipasal. Diad sarayan kombension, aabeten na saray Tasi ed lokal iray agagin nanlapud ararawin bansa, tan dakel so namparawes ed saray sankailin delegado. Diad sakey ya apalabas a kombension, arum so nanlapu ed saray bansa a saray totoo et agtanton mangipapatnag ed liknaan da. “Sanen sinmabi irayan delegado, mannerbiyos tan nababaingan ira,” so inkuan na sakey a Kristiano ya ontutulong ed uksoyan na panagpundoan. “Balet kayari labat na anemiran agew sanen nampatanir la ra, sikara tan saray anankaili ed sikara so nanlalakapan tan mannangnangis. Nanggayagaan da so sakey a klase na Makristianon aro ya agdan balot nalingwanan.” Say pamarawes ed saray agagi tayo, antokaman so nanlapuan da, so mangitarok na sankaabigan ya epekto ed namparan sankaili tan anankaili.​—Roma 12:13.

⁶ Makapaliket iratan ya eksperiensya ed kombension, balet ta mas maapit a relasyon so nabayuboan sano sankakaiba iray Kristiano a  manlingkor ed si Jehova diad andukey a panaon. Sano nakabat tayon maong iray agagi tayo, mas naapresya tayo so mabmabli iran kalidad da​—say inkamatua, inkanapanmatalkan, katooran, kaabigan, inkamabunlok, konsiderasyon, panangabagey, tan ag-inkamasiblet. (Salmo 15:3-5; Uliran 19:22) Si Mark, a nanlingkor bilang misionaryo ed Bukig Aprika, so angikuan: “Say pankimey a benebenek a kaiba iray agagi tayo so mamawala na maap-apit a siglaotan.”

7. Anto so nakaukolan a gawaen tayo pian napanggayagaan so Makristianon panamabli ed loob na kongregasyon?

⁷ Pian nagegemtan tan napansiansia so ontan a relasyon ed loob na kongregasyon, saray membro so nepeg a maapit ed balang sakey. Diad regular ya iyaatendi ed saray Makristianon pantitipon, napaelet tayo so relasyon tayo ed saray agagi tayo. Diad kiwala tan pilimog tayo sakbay, legan, tan kayari na saray aral et napaseseg tan manaayatan itayo ed balang sakey diad “aro tan dia ed saray maabig iran gawa.” (Hebreos 10:24, 25) Oniay inkuan na sakey a matatken ed Estados Unidos: “Maliket kon nanonotan a sanen ugaw ak ni et say pamilyak so naynay a nauunor ya ompaway ed Kingdom Hall, a panliliketan mi so makaaro tan makabaliksan a pitotongtong anggad posible.”

Kasin Nakaukolan Yo so Manpalaknab?

8. (a) Anto so labay ya ibaga nen Pablo sanen pinaseseg to iray taga-Corinto ya “ombaleg” odino manpalaknab? (b) Anto so nagawaan tayo pian nipaseseg so panamabli ed loob na kongregasyon?

⁸ Pian sigpot tayon nipatnag so ontan a panamabli, nayarin nakaukolan tayo so “ombaleg” odino manpalaknab ed kapusoan tayo. Diad kongregasyon ed Corinto, oniay insulat nen apostol Pablo: “Say puso mi binmaleg. Sikayo agkayo naeletan ed sikami.” Sikara so pinaseseg nen Pablo ya “ombaleg” odino manpalaknab met. (2 Corinto 6:11-13) Kasin ‘papabalegen’ odino papalaknaben yo so panamabli yo? Agyo la nakaukolan ya alagaren ni so arum a mangipatnag ed satan ed sikayo. Diad sulat to ed saray taga-Roma, insiglaot nen Pablo so pankaukolan na pakawalaan na matamoy a panamabli diad sayan bilin: “Manuunaan kayo ed pangiter na dayew ed sakey tan sakey.” (Roma 12:10, Maung a Balita) Pian nipatnag so galang ed arum, nayarian yo lay onkiwas ya unona pian ibano ira ed saray aral. Nayarian yo met ya imbitaan ira a miulop ed sikayo diad lawak na kimeyan odino diad panangiparaan ed aral. Say panggawa ed satan so mamabulaslas ed matamoy a panamabli.

9. Antoran kundang so ginawa na arum pian magmaliw a mas maapit a kakaaro na saray kapara ran Kristiano? (Ilaktip so antokaman iran alimbawa ed lokal.)

⁹ Saray pamilya tan indibidual diad kongregasyon so nayari ya “ombaleg” odino manpalaknab diad pambisita ra ed sakey tan sakey, nayarin mandurungo ira ed panangan, tan sankakaiban mibiang ed makagunggona iran aktibidad. (Lucas 10:42; 14:12-14) Si Hakop so tunggal paminsan a mangiyaarunsa na saray piknik parad angkelag iran grupo. “Kaiba iray kalangweran tan maedad la, ontan met ed saray mansusulon atateng,” so insalaysay to. “Kada sakey so onsempet a walaan na maliket a pakanodnonotan, tan lalon inmapit ira ed balang sakey.” Bilang Kristiano, nepeg tayon panggunaetan so magmaliw ya aliwa lambengat a kapananisiaan noagta tuan kakaaro met.​—3 Juan 14.

10. Anto so nagawaan tayo sano walaray probleman onlesa ed baetan na agagi tayo?

¹⁰ Balet, no maminsan et walaray onlelesan problema diad pamabayubo ed pikakaaro tan panamabli lapud ag-inkayadyari. Anto so gawaen tayo? Unona, nayarian tayon ipikasi so pakawalaan na maabig a relasyon ed saray agagi tayo. Linawa na Dios a saray lingkor to et magmaliw a mankakaaro, tan ebatan to iratan a masimoon a pikakasi. (1 Juan 4:20, 21; 5:14, 15) Nepeg tayo met so onkiwas unong ed saray pikakasi tayo. Nanonotan nen Ric, sakey ya ombiabiahen ministro ed Bukig Aprika, so sakey ya agin laki a prangka tan mabiskeg so personalidad to kanian  sikatoy mairap a piulopan. Oniay insalaysay nen Ric: “Imbes a paliisan ko so agi, determinado ak a sikatoy nakabat kon maong. Naamtaan ko a say ama na saman ya agi et sakey manaya ya estrikton managdisiplina. Sanen atalosan ko no panon kairap so pipupuligesgesan na saman ya agi pian natalonaan to itan ya abenegan to tan no kaunongan lay inyaligwas to, sikato so pandinayewan ko. Nagmaliw kamin sankaaro.”​—1 Pedro 4:8.

Ibalikas Moy Liknaan Mo ed Arum!

11. (a) Anto so nakaukolan ta pian ombulaslas so panamabli ed loob na kongregasyon? (b) Akin a say pagmaliw ya agmaesel so makaderal ed espiritual?

¹¹ Dakel a totoo natan so manbibilay ya andian a balot na maapit a kakaaro. Agaylan makapaermen! Agnakaukolan tan agnepeg ya ontan so kipapasen ed loob na Kristianon kongregasyon. Say peteg ya aroan na sanaagi so aliwa lambengat a magalang a pantotongtong tan masimpit iran awawey; nisay alablabas a panangipatnag na liknaan ed arum. Imbes, nepeg itayon mabulos a mangibalikas ed liknaan tayo, a singa ginawa nen Pablo ed saray taga-Corinto, tan ipatnag tayo ed saray kapananisiaan a talagan iyaansakit tayo so pankaabigan da. Anggaman aliwan sipor a makaaro odino maistorya so balang sakey, makaderal so pagmaliw ya alablabas ya agmaesel. Onia so impasakbay na Biblia: “Say onsian anapen to so dili a pilalek to, tan misangsangan sumpa ed amin ya aralem a kakabatan.”​—Uliran 18:1.

12. Akin a say maabig a pitatalosan so makana ed maapit iran relasyon ed loob na kongregasyon?

¹² Say matuan pitatalosan so makana ed tuan pankakaaro. (Juan 15:15) Amin tayo so mankakaukolan na kakaaro a napangibagaan tayo na akindalem iran kanonotan tan liknaan tayo. Niarum ni, no lalon kabkabat tayo so balang sakey, mas mainomay tayon nitarya iray pankaukolan na arum. Sano iyaansakit tayo so pankaabigan na arum ed onian paraan, niyalibansa tayo so matamoy a panamabli, tan naeksperiensya tayo so katuaan na saray salita nen Jesus: “Lalo a mapalar so mangiter nen say mangawat.”​—Gawa 20:35; Filipos 2:1-4.

13. Anto so nagawaan tayo ta pian nipatnag tayo so tuan panamabli ed saray agagi tayo?

¹³ Pian mas makagunggona so panamabli tayo, nakaukolan tayon ipatnag itan. (Uliran 27:5) Sano petepeteg so panamabli tayo, napatnagan itan ed lupa tayo, tan mamakiwas itan ed kapusoan na arum pian ipatnag da met itan. Oniay insulat na sakey a makabat a too: “Say liwawa na saray mata panliketen to so puso.” (Uliran 15:30) Saray manangiyansakit a kiwas so mangiyalibansa met na matamoy a panamabli. Anggaman anggapo so makasaliw na tuan panamabli, say langkap a niiter manlapud puso so importantin tuloy. Say kard, sulat, tan “say salita a nibalikas ed dugarugan panaon”​—amin na saratan so  pakapatnagan na aralem a panamabli. (Uliran 25:11, NW; 27:9) No agamoran tayo la so pikakaaro na arum, nepeg tayon pansiansiaen itan diad pantultuloy a pangipatnag na agmasiblet a panamabli. Nagkalalo la ed panaon na pankaukolan, kaliktan tayo so ontulong ed saray kakaaro tayo. Oniay ibabaga na Biblia: “Say kaaro mangaro ed saray amin a panaon, et say agi nianak nipaakar ed kasumlangan” odino gonigon.​—Uliran 17:17.

14. Anto so nayarin gawaen tayo no ompatnag a walay ag-onkikiwas ed panamabli tayo?

¹⁴ Diad realistikon paraan, agtayo nailaloan a magmaliw itayon maapit ed amin ya agagi diad loob na kongregasyon. Walaray agagi a mas maapit tayo ed sikara nen say arum. Kanian no walay ompatnag ya agtanton makaaro ed sikayo, anggaman kaliktan yo komon a nakaaro, agtampol iisipen a walay problema ed sikayo odino ed saman a too. Tan agyo sasalien a paskaren so pakawalaan na maapit a pisisiglaotan ed saman ya agi. No ipatnag yo lambengat so pagmaliw a makaaro unong ed iyaabuloy to, nayarian yoy nawalaan na mas maapit a siglaotan ed sikato diad arapen.

‘Apaliket Ak a Maong ed Sika’

15. Anto so epekto ed arum na komendasyon, odino agpangomenda?

¹⁵ Agaylay panliket nen Jesus sanen sikatoy abautismoan et nadngel to iray salitan nanlapud tawen: “Napaliket ak a maong ed sika.” (Marcos 1:11) Sayan balikas na panangabobon so talagan amaaralem ed kombiksion nen Jesus a sikato so aaroen na Ama to. (Juan 5:20) Makapaermen, arum so agbalot makakarengel na ontan a komendasyon manlapud saramay rerespetoen tan aaroen da. “Dakel a kalangweran a singa siak so andian na saray kapamilyaan a mangaawat ed Makristiano iran sisiaen da,” so inkuan nen Ann. “Diad abung, say narerengelan mi labat et panagkritiko. Makapaermen itan ed sikami.” Balet, sanen nagmaliw iran kabiangan na kongregasyon, alikna ra so inkamaapit na sakey a matulong, manangiyansakit a maespiritual a pamilya​—saray kaamaan tan kainaan tan agagin lalaki tan bibii ed pananisia.​—Marcos 10:29, 30; Galacia 6:10.

16. Akin ya agmakatulong so pangipatnag na makritikon awawey ed arum?

¹⁶ Diad arum a kultura, saray atateng, saray maedad la, tan saray managbangat so mataltalag a mangibabalikas na impapuson panangabobon da ed saray kalangweran lapud iisipen dan say ontan a panangirayew et pagmaliwen ton kampante odino mapaatagey iray kalangweran. Say ontan a panag-isip so nayarin mangapekta ni ingen ed saray Kristianon pamilya tan ed kongregasyon. No kokomentoan da so sakey a paliwawa odino arum niran nansagpotan, nayarin walaray wala la’d edad a mangibagan: “Marakep met so agawaan mo, balet naparakep mo ni itan!” Odino diad arum a paraan et nayari ni ingen ya ipalikas da so agda panlabay ed sakey a kalangweran. Diad panggawa ed satan, dakel so manisia a napakiwas da iray kalangweran a mandampot ed sankaabigan a nagawaan da. Balet sayan paraan so mabetbet a walaan na negatibon epekto, lapud saray kalangweran so nayarin ompaliis odino nalikna ran ag-ira kualipikado.

17. Akin ya anapen tayo iray pankanawnawa a mangomenda ed arum?

¹⁷ Balet, say pangomenda so agnepeg lambengat a gawaen ya entrada sakbay a manimbawa. Say masimoon a komendasyon so mangiyalibansa  na matamoy a panamabli ed loob na pamilya tan kongregasyon, kanian napaseseg iray kalangweran ya onasingger ed saray eksperiensyadon agagi pian onkerew na simbawa. Kanian imbes ya abuloyan so kultura a mandikta no panon so pantrato tayo ed arum, ‘ikawes tayo so too a balo, a sikato so pinalsay Dios ed loob na kaptekan tan matuan kasantosan.’ Mangomenda itayo a singa gagawaen nen Jehova.​—Efeso 4:24.

18. (a) Sikayoran kalangweran, panon yon moriaen so simbawa na saray maedad la? (b) Akin a maalwar iray mamatatken sano manisimbawa ira?

¹⁸ Diad biek a dapag, sikayoran kalangweran, agyo iisipen a no korehien odino bilinen kayo na saray maedad la et mankabaliksan itan ya agda kayo labay. (Eclesiastes 7:9) Aliwan ontan! Nayarin ginawa ra itan lapud iyaansakit tan papablien da kayon maong. Ta no andi, akin et pansagpotan da ni so mitongtong ed sikayo nipaakar ed satan? Lapud amta na saray maedad la​—nagkalalo la ed saray matatken ed kongregasyon​—a saray salita so walaan na epekto kanian mabetbet dan ipapanaon so pannonot tan pampikasi sakbay iran manimbawa, lapud labay da lambengat so manggawa na maong.​—1 Pedro 5:5.

Say “Katawan Maabagey a Tuloy”

19. Akin a saramay adismaya so makapanilalo ed tulong nen Jehova?

¹⁹ Lapud walaray agmarakep a naeksperiensya na arum a totoo diad impangipatnag da na matamoy a panamabli, arum so maniisip a lalon pakadismayaan lambengat so pangipatnag ed satan. Mankaukolan ira na inkakpel tan mabiskeg a pananisia pian nibalikas da lamet so liknaan da ed arum. Balet agdan balot nepeg a lilingwanan a si Jehova et “ag-arawi ed sinansakey ed sikatayo.” Iimbitaan to itayo ya onapit ed sikato. (Gawa 17:27; Santiago 4:8) Natatalosan to met so katatakot tayon nasakitan, tan isisipan to a suportaan tan tulongan to itayo. Oniay ipapaseguro ed sikatayo nen salmistan David: “Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.”​—Salmo 34:18.

20, 21. (a) Panon tayon naseguro a nayarian tayo so nawalaan na maapit a siglaotan ed si Jehova? (b) Anto so nakaukolan pian napanggayagaan tayo so maapit a relasyon ed si Jehova?

²⁰ Say maapit a pikakaaro ed si Jehova so sankaimportantian a relasyon a nabayuboan tayo. Balet talaga kasin posible itan a pisisiglaotan? On. Ipaparungtal na Biblia no panon ya inmapit a maong iray matunong a lalaki tan bibii ed mangatatawen ya Ama tayo. Say maligsan balikas da so nikurit pian mangiter ed sikatayo na kompiyansa a nayarian tayo met so onapit ed si Jehova.​—Salmo 23, 34, 139; Juan 16:27; Roma 15:4.

²¹ Saray kakaukolanen nen Jehova pian onapit ed sikato et nayarian na amin a kapeten. “O Jehova, siopa naani manayam ed tabernakulom?” so intepet nen David. “Say manakar a mapmaptek, tan manggawa na matunong, tan mansalita na matua ed puso to.” (Salmo 15:1, 2; 25:14) Diad pakakaimaton tayo a say panaglingkor ed Dios et mamawala na maabig a resulta tan pakagamoran tayo na panangigiya tan proteksion to, naamtaan tayo a “say Katawan maabagey a tuloy.”​—Santiago 5:11.

22. Anton nengneng na pisisiglaotan so kaliktan nen Jehova a panggayagaan na totoo to?

²² Agaylan abendito itayo lapud pilalek nen Jehova so pakawalaan na personal a pisisiglaotan ed saray ag-ayadyarin totoo! Agta nepeg sirin ya ipatnag met so matamoy a panamabli ed balang sakey? Diad tulong nen Jehova, kada sakey ed sikatayo so makapangipatnag tan makapanggayaga ed matamoy a panamabli a pakabidbiran ed Kristianon impanaagi tayo. Diad silong na Panarian na Dios, amin a totoo diad dalin so makalikna ed sayan panamabli diad andi-anggaan.

Kasin Nipaliwawa Yo?

• Anton nengneng na kaliberliber so nepeg a napatnagan ed loob na Kristianon kongregasyon?

• Panon so pakatulong na kada sakey ed sikatayo pian niwala so matamoy a panamabli ed loob na kongregasyon?

• Panon a niyalibansa na masimoon a komendasyon so Makristianon panamabli?

• Panon itayon natulongan tan napabiskeg ed matamoy a panamabli nen Jehova?

[Tepetepet Parad Panagaral]

[Litrato ed pahina 15]

Say aro ed limog na saray Kristiano so aglambengat ipapatnag lapud obligasyon itan

[Saray litrato ed pahina 16, 17]

Sarag yo kasin ‘pabalegen’ odino palaknaben so panamabli yo?

[Litrato ed pahina 18]

Kasin makritiko odino makapaseseg kayo?