Panon so Nepeg a Panalagar Mo ed si Jehova?

MASLAK a totoo natan so agmakankaanos no manaalagar ira ed sakey a too odino sakey a bengatla. Balet, papasesegen na Kasulatan iray totoo na Dios a bayuboan da so ‘panag-alagar.’ Bilang pidumaan ed saray totoon walad kaliberliber to, oniay inyabawag nen propetan Miqueas: “Alagden ko naani so Dios na kilalaban ko.”​—Miqueas 7:7; Tagleey 3:26.

Balet, anto so kabaliksan na panalagar ed si Jehova? Panon so nepeg a panalagar na sakey a Kristiano ed Dios? Kasin walaray manepeg tan agmanepeg a paraan a panag-alagar? Nipaakar ed saya, makaaral itayo na leksion manlapud eksperiensya nen propetan Jonas nen koma-siam a siglo K.K.P.

Sakey ya Alimbawa na Lingon Panag-alagar

Ingganggan nen Jehova a Dios si Jonas a pulongan iray totoo ed Ninive, say kabiseran syudad na Empiryo na Asirya. Kabkabat nensaman so Ninive bilang “syudad a marala” lapud pirmin karawalan tan inkaruksa na satan, a pinekderan itan na saray manag-awaran tan arkeologo. (Nahum 3:1) Diad gapo et sinali nen Jonas a paliisan itan ya asainmin, balet sineguro nen Jehova a makaonla a siansia so propeta diad Ninive.​—Jonas 1:3–3:2.

“Ginmapo si Jonas a linmoob ed syudad a nansanngarem a nanakar, et inyakis to, ya inkuan to, Apataplo ya agew a manlapu ed natan, et say Ninive nabagbag naani.” (Jonas 3:4) Makatantanda so resulta na saray impansagpot nen Jonas: “Saray totoo a taga-Ninive sinisia ra so Dios; et inbawag da so panayunal, tan nankawes ira na magaspang ya abel a manlapu ed katageyan angga ed kaabebaan.” (Jonas 3:5) Lapud satan, si Jehova, a Dios ya “agto labay a wala so siopaman a natawtaw noag ingen amin komon nagegemtan da so panagsibkel,” so angiliktar ed syudad.​—2 Pedro 3:9.

Anto so reaksion nen Jonas? Oniay inkuan na salaysay: “Balet si Jonas apatabang a mapalpalalo, tan apasnokan.” (Jonas 4:1) Akin? Maseguron minoria nen Jonas a lapud ag-asumpal so inyabawag ton kadederal diad aturon panaon, naandi so kagalangan to bilang propeta. Mapatnag a mas nampagaan to so dilin reputasyon to nen say panangasi tan panangilaban ed arum.

Siempre, agmet tinmunda si Jonas bilang sakey a propeta. Anggaman kuan, sikatoy nanalagar pian “nanengneng to no anto naani so nagawa ed syudad.” On, binayuboan to so masiblet ya awawey a satan so amatunda ed sikaton mankimey tan nanalagar pian nanengneng to no anto so nagawa. Sanen amoria to ya ag-agawa iray bengatla unong ed inilaloan to, sikatoy angipaalagey na alolong, yinmurong ed silong  na satan, tan mapayunget a nanalagar pian nengnengen no anto so nagawa. Balet, ag-inabobonan nen Jehova so awawey nen Jonas, kanian sikatoy maaron angipetek ed pikewet a kanonotan na propeta.​—Jonas 4:5, 9-11.

No Akin a Maanos si Jehova

Anggaman nagbabawi tan aliktar so Ninive, diad saginonor et pinmawil itan ed datin karelmengan to. Diad panamegley nen propetan Nahum tan Sofonias, impasakbay nen Jehova so kaderal na satan. Diad panutukoy to ed “syudad a marala,” inyabawag nen Jehova a deralen to so Asirya tan pagmaliwen ton kibalatar so Ninive. (Nahum 3:1; Sofonias 2:13) Nen 632 K.K.P., aderal so Ninive tan agla itan nipawil.

Diad mipadparan paraan, say mundo natan so nigalet lan tuloy ed pirmin panagpaagus na dala a malaklaknab nen say diad kadaanan a Ninive. Lapud saya tan arum niran rason, impaakseb nen Jehova a mamantok iyan peles a marelmeng a sistema na bengabengatla diad agnaparaan a ‘baleg a kairapan.’​—Mateo 24:21, 22.

Anggaman ontan, agni indapo nen Jehova so insipan ton kadederal ta pian makapambabawi tan makaliktar iray masimoon a totoo natan, a singa saramay nagbabawi ed Ninive. Onia so impaneskribe nen apostol Pedro nipaakar ed inkamaanos na Dios: “Say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.”​—2 Pedro 3:9, 10, 13.

Manalagar Diad Dugan Paraan

Oniay intuloy ya inkuan nen Pedro: “Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan simpitan, dia ed panalagar tan pampilalek yo ed isabi agew na Dios?” (2 Pedro 3:11, 12) Imanoen a legan itayon manaalagar ed agew nen Jehova, nepeg tayon ipatnag so “masantos a panagbilay” tan saray gawa a nipaakar ed maridios a debosyon, kanian matukoy so pagmaliw ya aktibo, aliwan inaktibo.

On, say dugan awawey ed panag-alagar so mangipapatnag na sigpot a kompiyansa a seguradon onsabi so agew nen Jehova unong ed inggagala to. Say ontan a pananisia so mamawala na saray masanton kondukta tan maridios a gawa, tan manunaan ed saratan so panangipulong na maong a balita na Panarian na Dios. Angipatnag si Jesus na maabig ya ehemplo ed panagpulong, tan oniay imbilin to ed saray alanaan a papatumbok to: “Balkesan yo so saray awak yo; tan akaselsel so saray silew yo; et sikayo komon so singa saray totoo a manaalagar ed katawan da, no kapigan so ipawil ton manlapu ed bansal; pian sano ompawil et ontoktok, tampol a sikato so lukasan da. Mapalar so saray ariripen, a sano onsabi katawan da naromog to ra a manpupuyat.”​—Lucas 12:35-37.

Saray ariripen nen inmunan siglo et kaukolan dan ‘balkesan iray awak da’ diad pangikalenken ed saray saloy na aysing da tan isayakop iratan ed balkes da ta pian makapankimey ira ya impasya. Kanian, kaukolan a magmaliw ya alisto tan maseseg so sakey a Kristiano ed maabig iran gawa. Nepeg ton labanan so  antokaman a tendensian ‘manngiras’ a pagmaliwan to lan inaktibo ed espiritual, a say pangegemtan na likeliket odino materyal so pangusaran to la na amin a biskeg to. Imbes, nepeg a sikatoy nawalaan na ‘daakan a kimey na Katawan’ legan a manaalagar ed baleg tan makapataktakot ya agew nen Jehova.​—Roma 12:11; 1 Corinto 15:58.

Aktibo Legan a Manaalagar

Saray Tasi nen Jehova so mansiasiansian okupado legan iran manaalagar ed agew nen Jehova. Singa bilang, nen 2003 et wala so 3,383,000 a promedyo na oras kada agew ya inusar da ed panangipulong na salita nen Jehova. No iyaliling et kaukolan ya ag-ontundan manpulong so sakey a Tasi ed loob na 386 a taon pian nasumpal to so kimey ya agawaan ed sanagew!

Anggaman kuan, nepeg tayon tepetan so inkasikatayo, ‘Anton awawey na panag-alagar so walad siak a mismo?’ Angiter si Jesus na parabolo a mangiyiilustra ed inkakuli ya iilaloan ed saray matoor ya alanaan a Kristiano. Sinaglawi to so nipaakar ed taloran aripen: “Inter [na katawan so] limaran talento ed sakey, duaran talento ed sananey, tan sakey a talento ed sakey; ed balang sakey unong ed nambabangil a nasamel to; tan linma ed kurang to. Tampol a samay angawat na limaran talento linma tan sikaray inyanap to et akatoboy sananey a limaran talento. Ontan to met na samay angawat na duara anobo na sananey a duara. Balet say angawat na sakey linma tan nankotkot ed dalin, et inyamo’to so pilak nen katawan to. Natan kayari andukey a panaon say katawan na saraman ya ariripen onsabi, tan mibilangan ed sikara.”​—Mateo 25:15-19.

Nanalagar so taloran aripen ed ipawil na katawan. Sanen sinmabi so katawan, oniay inkuan to ed duaran aripen a nansiansian okupado legan na panaalagar da: “Maabig a gawa, maong tan napanmatalkan ya aripen!” Balet, say sakey ya agnankimey legan a manaalagar so akaawat na duman tratamento. Oniay inkuan na katawan: “Ibantak yo so andi-kakanaan ya aripen ed kabilungetan na paway.”​—Mateo 25:20-30.

Anggaman saray alanaan a Kristiano so kiyaplikaan na sayan parabolo, makaaral itayon amin na leksion antokaman so ilalo tayo. Balang sakey ed sikatayo so iilaloan na Katawan, si Jesu-Kristo, a mankimey a sikukuli diad serbisyo to legan itayon manaalagar ed isabi to diad baleg ya agew nen Jehova. Papablien to so kimey na balang sakey “unong ed nambabangil a nasamel  to” odino abilidad tan sirkumstansya to. Talagan makapaliket a narengel ya ibaga na Katawan a “maabig a gawa” sano manampot a siansia so panaalagar tayo!

Mankabaliksan na Kilalaban so Inkamaanos na Katawan Tayo

Panon to no mas ombayag ni iyan sistema na bengabengatla nen say datin inisip odino inilaloan tayon kabayag na satan? Saya so walaan na makatunongan a rason. Oniay insulat nen apostol Pedro: “Ibilang yo a sikatoy kilalaban so sungdo na Katawan.” (2 Pedro 3:15) Say suston pikakabat ed gagala na Dios tan ed mapaabeban pamidbir a mas importante ni so pakasumpal na gagala na Dios nen say sikatayo so ontulong ed sikatayon mananos anggad momoriaen nen Jehova a nepeg nin mananos ed sayan daan a sistema.

Say managsulat na Biblia a si Santiago so angiter na sakey ya ilustrasyon pian pasesegen iray Kristiano a mansungdo. Oniay insulat to: “Nia, say tomatalon alagden to so mablin bunga na dalin, ya anosan to ya alagden, angga ed panggawa’to na masakbay tan unor ya uran. Maanos kayo met komon; iteen yo ray puspuso yo: ta say isasabi Katawan manasingger.”​—Santiago 5:7, 8.

Aglabay nen Jehova a Dios a sikatayoy onkesaw odino onsuko legan na panaalagar tayo. Walay kimey a pagagawa to ed sikatayo tan sikatoy naliketan sano usaren tayo so panaon na panaalagar tayo diad makulin pibibiang ed satan a kimey. Labay to a nibilang itayo ed saramay deneskribe nen apostol Pablo diad sulat to ed saray taga-Hebreo: “Pampirpirawatan mi a balang sakey ed sikayo ipanengneng to so onman a seet nipaakar ed inkapno na andi-kaatapan ya ilalo angga ed kasampotan: Ya agkayo mangiras, noag ingen umaalig ed saraman so lapu ed pananisia tan anos tawiren da so saray sipasipan.”​—Hebreos 6:11, 12.

Kanian ag-itayo komon onkekesaw. Imbes, say personal a relasyon tayo ed si Jehova a Dios, pananisia tayo ed dondon bagat nen Jesus, tan masnag ya ilalo tayo diad balon sistema na bengabengatla so magmaliw komon a manamabiskeg ed sikatayo. Singa saray “maong tan napanmatalkan” ya aripen ed parabolo nen Jesus, paneknekan tayo komon a makanepegan itayo ed komendasyon tan tumang diad pansiansian okupado ed panangidayew ed Dios tayo, a singa ed ginawa na salmista a nansulat: “Manilalo ak a lanang ed sika, tan idayew ta ka a nagkalalo ni nen nagkalalo.”​—Salmo 71:14.

[Litrato ed pahina 21]

Lapud si Jonas so dismayado, sikatoy nanalagar pian nanengneng to so nagawa ed Ninive

[Saray litrato ed pahina 22, 23]

Ipatnag tayo so maridios a debosyon legan itayon manaalagar ed agew nen Jehova