Report na Saray Manangiyabawag na Panarian

Sakey a Sulat a Nanlapud si Alejandra

SAY pampulong panamegley na sulat so abayag lan epektibon paraan. Anggaman no maminsan et singano agnaseguro so resulta, saraman so mantutultuloy a manguusar ed sayan metodo so makakaawat na daakan a bendisyon. Nonodnonoten da so makabat a simbawa na Biblia: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas, no saya kasi odino saman, no sikara kasi nampadpara naani a maong.”​—Eclesiastes 11:6.

Si Alejandra, sakey a Tasi a manga samploy taon lan manlilingkor diad sangan opisina na saray Tasi nen Jehova ed Mexico, so nampa-chemotherapy lapud sakit ton kanser. Linmoor so kipapasen to, tan kinmapuy a maong ya agto la nagawaan so inagew-agew a rotina to. Balet, lapud agto labay a napaulyanan so ministeryo to, denesidi nen Alejandra so mansulat. Sikatoy nansulat nipaakar ed uksoyan a libren panangiyaral ed Biblia tan inlaktip to so numeroy telepono nen nanay to. Insan to inter iray sulat ed si nanay to pian paitilak iratan ed saray kaabungan na totoon agnasabi nen nanay to legan a mankakabkaabungan.

Kaleganan na satan, si Diojany, sakey a malangwer a biin taga-Guatemala, so nantrabaho bilang katulong diad Cancún, Mexico. Legan a wadman, sikatoy aromog na saray Tasi nen Jehova tan nanggayagaan to so impakapitongtong ed sikara nipaakar ed Biblia. Diad saginonor, denesidi na saray amo to ya onalis ed Mexico City tan sikatoy labay dan ipila. Masuyat si Diojany ya onalis lapud mankabaliksan itan na agto la pakapitongtong ed saray Tasi.

“Agka mapaga,” so impaseguro ed sikato na saray amo to, “walaray Tasi ed inerman a pasen. Anapen mi’ran tampol kasabi tayo diman.” Lapud satan a panamaseguro, inmabuloy si Diojany a mila ed sikara. Sanen wala la ra’d Mexico City, saray Tasi so inanap na saray amo nen Diojany. Lapud pigaran rason, agda ra aromog, anggaman wala lay masulok a 41,000 a Tasi tan 730 a kongregasyon diad satan a syudad.

Ngalngali la nadismaya si Diojany lapud anggapo ni iray aromog ton Tasi pian makapitongtong lamet ed sikara nipaakar ed Biblia. Aminsan ya agew, inmasingger ed sikato so amo ton bii, a kuan to: “Walay surprisak ed sika! Dinengel na Dios mo iray pikakasim.” Sanen iyaawat na amo to ed sikato so sulat, inkuan to: “Intilak na saray Tasi iyan sulat parad sika.” Si Alejandra so nanlapuan na saman a sulat.

Kinontak nen Diojany so nanay tan atsi nen Alejandra, a si Blanca, tan impaiyaralan na Biblia. Kayari na pigaran simba, akabat to si Alejandra tan malikeliket ira lapud satan. Sikato so pinaseseg nen Alejandra ya itultuloy to so panaral na Biblia ta pian onaligwas ed espiritual.

Kayari na pigaran bulan, nen Hulyo 2003, inatey si Alejandra, ya angitilak na maabig ya ehemplo na pananisia tan inkakpel ed saray kapananisiaan to. Diad ponpon, atenyeg so liknaan na dakel sanen akabat da si Diojany tan arengel da ya imbaga ton: “Alay abig ya ehemplo parad siak si Alejandra tan say pamilya to. Determinado ak a manlingkor ed si Jehova tan magano ak lan manpabautismo. Pipirawaten ko a napinengnengan lamet si Alejandra diad onsabin Paraiso!”

On, anggan say antikey a sulat so nayarin walaan na maabig tan magnayon iran epekto!