Sakey a Tawir a Nailaloan Mo

“NO MAKAAWAT ka na sulat a mangipapakabat a wala so agni nalan tawir a parad sika, manalwar ka. Nayarin sika so puntirya na masilib a managpalikdo.”

Ontan so impasakbay na United States Postal Inspection Service diad Web site na satan. Akin? Lapud nilibon totoo so makakaawat na sulat a mangibabagan, ‘Walay inatey a kanayon mo tan wala so impatawir to ed sika.’ Bilang resulta, dakel so angipawit na $30 (U.S.) odino masulok ni bilang bayar parad ‘estate report’ a kunwarin mangipaliwawa no iner so kawalaan na tawir tan no panon itan a naala. Sikara so adismayan tuloy. Amin ya amales ed sulat so akaawat na pareparehon report​—tan say ilalo na sakey a makaawat na tawir et pabes.

Saratan a pakana so mangaanamot ed nisipor lan pilalek na totoo a makaawat na tawir. Ingen, say Biblia so paborablin anukoy ed saraman so mangipapatawir sanen inkuan na satan: “Say maong a too mangitilak na tawir ed saray anak na saray anak to.” (Uliran 13:22) Diad katuaan to, anggan si Jesu-Kristo a mismo so angibaga na onian bantog tan pinabpablin balikas diad Sermon to ed Palandey: “Mapalar iray mauyamo: ta tawiren day dalin.”​—Mateo 5:5.

Saray salita nen Jesus so mangipapanonot ed say nipuyan ya insulat nen Arin David na kadaanan ya Israel pigaran siglo ed asasakbay: “Saray mauyamo tawiren da naani dalin: tan manliket ira a dili ed inkadaakan na kareenan.”​—Salmo 37:11.

‘Tawiren so dalin’​—agaylan makapaliket ya ilalo! Balet kasin makaseguro itayo ya aliwa lamet iyan masilib a pakana a denesinyon mamalikdo ed totoo? On, makaseguro itayo. Lapud kabiangan so dalin ed makapakelaw a palsa nen Jehova, sikato bilang Managgawa tan Makankayarian so walaan na legal a kanepegan a mangipatawir ed satan ed siopaman a pilien to. Diad panamegley nen Arin David, oniay mapropetikon insipan nen Jehova ed inad-aro Ton Anak, si Jesu-Kristo: “Kerew ka ed siak, et iter ko ed sika so saray nasyon ya onkana a tawir mo, tan say kasampotan a kabiangan na dalin ya onkana a kayarian mo.” (Salmo 2:8) Lapud saya, deneskribe nen apostol Pablo si Jesus “a sikato so tinuro [na Dios a] manawir ed saray amin a bengatla.” (Hebreos 1:2) Kanian, sigpot itayon makapanmatalek a si Jesus so matua sanen inkuan to a ‘saray mauyamo so manawir ed dalin,’ tan sikatoy walaan na manepeg ya autoridad a manumpal ed sipan to.​—Mateo 28:18.

Sirin, onia so importantin tepet, Panon ya ontua itan a sipan? Diad inerman a pasen natan, ompatnag a saray agresibo tan mapaatagey a totoo so mas ontatalona tan naaala ra so labay da. Anto ni kasi so akera a tawiren na  saray mauyamo? Sakey ni, say dalin so sasaloten na grabe iran problema tan polusyon, tan saray natural a kayamanan na satan so dederalen na saray totoon maagum tan agmannononot ed arapen. Niwala ni kasi so dalin a makanan tawiren? Pasesegen mi kan manbasa ed onsublay ya artikulo pian naromog moy ebat ed saraya tan arum niran importantin tepet.

[Litrato ed pahina 3]

Kasin sakey ka ed saramay mangawat na peteg a tawir?