‘Saray Mauyamo so Manawir ed Dalin’​—Panon?

“NAYARIN kabisadom iray makapaligsan salita nen Jesus a ‘saray mauyamo so manawir ed dalin.’ Balet nisesengeg ed gagawaen na totoo ed balang sakey tan ed dalin, anto ni kasi so nailaloan mon tawiren na saray mauyamo?”​—Mateo 5:5; Salmo 37:11.

Si Myriam, a sakey ed saray Tasi nen Jehova, so angitepet ed satan pian nigapo so tongtongan nipaakar ed Biblia. Inmebat so laki a katongtong to a no si Jesus so angisipan ed satan, maseguron getma to a say dalin so manepeg a natawag a tawir tan aliwan sakey a kibalatar odino agnapanayaman a geray.

Positibon tuloy itan ya ebat. Balet kasin walaan itayo na rason ed pakawalaan na ontan a positibon panmoria? On wala, lapud say Biblia so mangiiter ed sikatayo na mabiskeg iran rason pian manisia ya ontua itan a sipan. Diad tua, say kasumpalan na satan a sipan so misiglaotan a tuloy ed gagala na Dios ed katooan tan ed dalin. Tan nipaseguro ed sikatayo a sumpalen na Dios iray gagala to. (Isaias 55:11) Kanian, anto sirin so orihinal a gagala na Dios ed katooan, tan panon a nasumpal itan?

Say Magnayon a Gagala na Dios ed Dalin

Pinalsa nen Jehova a Dios so dalin lapud sakey ya espisipikon gagala. “Onia so inkuan nen Jehova ya amalsa ed saray tawen, say Dios ya anibukel tan nanggawa na dalin, sikato ya angiletneg ed sikato tan sikato so pinalsa to ya aliwa a kibalatar, a tinibukel to ta pian sikato so panayaman: Siak si Jehova; et anggapo la so sananey.” (Isaias 45:18) Kanian, say dalin so pinalsa pian panayaman a mismo na too. Niarum ni, gagala na Dios a say dalin so panayaman na katooan ed andi-anggaan. “Sikato ya angipasen na saray angipaletnegan na dalin, pian aglawas nagalaw.”​—Salmo 104:5; 119:90.

Say gagala na Dios parad dalin so nipabitar met diad ganggan ya inter to ed inmunan sanasawa. Oniay inkuan nen Jehova ed si Adan tan Eva: “Manbunga kayo, tan ondakel kayo, tan makmakan yo so dalin, tan sikato so patuloken yo: tan niiter ed sikayo so pakauley ed saray sirasira na dayat, tan pakauley ed saray manok ya atap ed saray tawen, tan amin a bengatla a mabilay ya onggalaw dia ed dalin.” (Genesis 1:28) Say dalin, ya inmatalek na Dios ed si Adan tan si Eva, so magmaliw ya ayaman da tan saray ilalak da ed andi-anggaan. “Saray tawen, salanti saray katawenan, kien ira nen Jehova,” so inyabawag na salmista dakel a siglo ed saginonor, “bangbalet say dalin inter to ed saray anak na totoo.”​—Salmo 115:16.

Pian nasumpal itan a makapakelaw ya ilalo, si Adan tan si Eva, ontan met ed saray ilalak da, so nepeg a mangawat ed si Jehova a Dios, say Manamalsa tan Manangiter-Bilay, bilang  Soberano ra tan nepeg a mabulos iran ontulok ed sikato. Impalinew nen Jehova iyan pamaakaran sanen inter to so onian ganggan ed laki: “Nayarian mo so mangan na labay mo ed amin a kiew na tanamanan: Ingen ta say kiew na pakaamtaan mo na maong tan mauges, agmo nepeg a panganan: ta dia ed agew a pangan mo ed satan ompatey ka.” (Genesis 2:16, 17) Pian mantultuloy a manbilay si Adan tan Eva diad hardin na Eden, nepeg dan tuloken itan a simpli tan mabitar a ganggan. Say panggawa ra ed satan et mangipatnag na pisasalamat da ed amin a ginawa na mangatatawen ya Ama parad sikara.

Sanen ginagala nen Adan tan Eva so tinmunganga ed Dios diad impanumlang da ed ganggan ya inter to ed sikara, peteg ya impulisay da so Dios ya angitarya ed sikara na amin a walad sikara. (Genesis 3:6) Bilang resulta, abalang da so marakdakep a Paraison ayaman ya aliwa labat a parad sikara noagta parad saray ilalak da met. (Roma 5:12) Kasin say intunganga na inmunan sanasawa so angamper ed gagala na Dios ed impamalsa to na dalin?

Sakey a Dios ya Ag-anguman

Diad panamegley nen propetan Malaquias, oniay inyabawag na Dios: “Siak si Jehova, agak manguman.” (Malaquias 3:6) Bilang komento ed sayan bersikulo, inkuan na sakey a Pranses ya iskolar na Biblia a si L. Fillion a sayan panangiyabawag so misiglaotan a tuloy ed pakasumpal na saray sipan na Dios. “Nayarian la komon nen Jehova a deralen so rebelyoson totoo to,” so insulat nen Fillion, “balet lapud sikatoy agmanguuman ed saray sipan to, antokaman iray sirkumstansya, sikato so matoor ed saray insipan to diad apalabas.” Saray sipan na Dios, balanglan parad indibidual, sakey a nasyon, odino amin a katooan, so agnalingwanan noagta nasumpal diad aturon panaon to. “Sikato ninodnonot to so sipan to lawas, say salita ya ingganggan to ed saray sanlibo a kailalakan.”​—Salmo 105:8.

Balet, panon itayon makaseguro ya ag-inuman nen Jehova so orihinal a gagala to parad dalin? Makaseguro itayo ed saya lapud diad interon apuyanan a Salita na Dios, say Biblia, naromog tayo so impanalambit ed gagala na Dios ya iter to so dalin ed matulok a katooan. (Salmo 25:13; 37:9, 22, 29, 34) Sakey ni, deneskribe na Kasulatan iraman so benendisyonan nen Jehova a manayam ed kaligenan, a balang sakey et ‘onyurong naani ed silong na kiew to ya ubas tan ed silong na kiew to a higos,’ tan “anggapo ni manaktakot ed sikara.”  (Miqueas 4:4; Ezequiel 34:28) Saramay pinili nen Jehova so ‘mangipaalagey na saray abung tan manayam ed satan; tan mantanem na saray ubas, tan mangan naani ed saray bunga ra.’ Panggayagaan da so pikareenan anggan diad saray ayayep ed uma.​—Isaias 11:6-9; 65:21, 25.

Say Biblia so mangitatarya na pagpauna nipaakar ed sipan na Dios diad sananey nin paraan. Legan na uley nen Arin Solomon, nanggayagaan na nasyon na Israel so panaon na kareenan tan inkaaligwas. Legan na uley to, ‘say Juda tan say Israel so manaayam a matalek, balang sakey a too ed silongan na ubasan to tan higos to, manlapu ed Dan angga ed Beerseba, ed saray amin ya agew nen Solomon.’ (1 Arari 4:25) Ibabaga na Biblia a si Jesus et “babaleg nen si Solomon,” tan bilang panutukoy ed uley to, oniay mapropetikon inyabawag na salmista: “Dia ed saray agew to say matunong manaligwas, tan say inkadaakan na kareenan, angga ed kaandi na bulan.” Diad satan a panaon, “wala so daakan ya ilik ed tapew na dalin ed tapew na toktok na saray palandey.”​—Lucas 11:31; Salmo 72:7, 16.

Lapud matoor ed salita to, seguroen nen Jehova a Dios a say nisipan a tawir so aglambengat niwala noagta nipawil met ed sigpot a karakpan na satan. Diad Apocalipsis 21:4, ibabaga ed sikatayo na Salitay Dios a diad insipan a balon mundo, say Dios “punasen to so amin a lua ed kamataan [na totoo]; tan anggapo la naani ipatey; tan anggapo la naani onnangis o dageyem, o ot-ot.” Say insipan et sakey a peteg a Paraiso.​—Lucas 23:43.

No Panon Mon Nagamoran so Insipan a Tawir

Say pagmaliw na dalin a sakey a paraiso so nagawa panamegley na sakey a gobierno a manuley manlapud tawen, sakey a Panarian a si Jesu-Kristo so Ari. (Mateo 6:9, 10) Unona, satan a Panarian so ‘mamagbag ed saramay mamabagbag ed dalin.’ (Apocalipsis 11:18; Daniel 2:44) Insan, say “Prinsipe na Kareenan,” si Jesu-Kristo so manumpal ed sarayan mapropetikon salita: “Diad ibaleg na pananguley to tan kareenan anggapo naani anggaan.” (Isaias 9:6, 7) Legan na uley na satan a Panarian, minilyon a totoo, a kabiangan iramay bilayen panamegley na kioli, so nawalaan na pankanawnawan manawir ed dalin.​—Juan 5:28, 29; Gawa 24:15.

Sioparay nayarin manggayaga ed satan ya alay abig a tawir? Imanoen pa iray salita  nen Jesus: “Mapalar iray mauyamo: ta tawiren day dalin.” (Mateo 5:5) Anto so kabaliksan na pagmaliw a mauyamo? Kaslakan ya uukeran na saray diksionaryo so salitan “mauyamo” bilang matamoy, kabkaabigan, mapasakop, mareen, tan mabaing ni ingen. Balet, mas ni so kabaliksan na orihinal a Griegon salita ya inusar. “Wala so inkamatamoy” ed satan a salita, so imbaga na New Testament Wordbook nen William Barclay, “balet wala so inkaputel a singa balatyang diad kalidad na inkamatamoy.” Tutukoyen na satan so disposisyon na kanonotan ya ontulong ed sakey pian nasungdoan so impakasakitan to ya agmaneem-em odino mannononot ya ombales, ya amin itan et resulta na maabig a relasyon to ed Dios, tan satan a relasyon so panlalapuan na biskeg to.​—Isaias 12:2; Filipos 4:13.

Say toon mauyamo so mapaabeban mangaawat ed saray estandarte na Dios diad amin ya aspekto na personal a bilay to; agto ipilit so onkiwas unong ed saray dilin panmoria to odino unong ed saray opinyon na arum a totoo. Sikatoy mainomay met ya ibangat, mabulos a paibangat ed si Jehova. Oniay insulat nen salmistan David: “Say mauyamo itonton [nen Jehova] ed panamatunong: tan ibangat to ed mauyamo so dalan to.”​—Salmo 25:9; Uliran 3:5, 6.

Kasin kabiangan ka ed saray “mauyamo” a manawir ed dalin? Diad igamor na pikakabat ed si Jehova tan ed linawa to panamegley na maseet a panaral na Salita to tan diad pangiyaplika ed naaaralan mo, sika met so makapanilalo a manawir ed mangaraldalin a paraiso tan manbilay ya andi-anggaan ed satan.​—Juan 17:3.

[Litrato ed pahina 5]

Napatnagan so gagala na Dios ed dalin diad ganggan ya inter to ed si Adan tan Eva

[Litrato ed pahina 6, 7]

Say kareenan tan kaligenan legan na uley nen Solomon so pagpauna na insipan a tawir

[Credit Lines]

Saray karnero tan say pukdol ed benegan: Pictorial Archive (Near Eastern History) Est.; saray usa ed Arabia: Hai-Bar, Yotvata, Israel; dumaralos a manbabaka: Garo Nalbandian

[Litrato ed pahina 7]

Sakey a matunong a balon mundo ed arapen​—kasin wadman ka?