Tepetepet Manlapud Saray Managbasa

Sanen insulat nen apostol Juan a “say ayadyarin aro ipaliis to so takot,” anto so labay ton ibaga ed “ayadyarin aro,” tan anto sirin so “takot” a nipaliis odino napaandi?

“Dia ed aro anggapo so takot,” so insulat nen apostol Juan, “bangbalet say ayadyarin aro ipaliis to so takot; ta say takot wala so dusa to, kanian say ontakot ag-agawa ya ayadyari ed aro.”​—1 Juan 4:18.

Ipapanengneng na konteksto a sisingbaten nen Juan so nipaakar ed kawayangan ed pitongtong, nagkalalo la ed say pansiglaotan na aro ed Dios tan say kawayangan a mitotongtong ed Sikato. Mabitar iya diad nabasa tayo ed bersikulo 17: “Dia ed saya say aro agawan ayadyari ed sikatayo, pian wala so bayani tayo [“kawayangan a mansalita,” NW] ed agew na panangukom.” Walay direktan pisiglaotan na kinaaralem na panangaro na sakey a Kristiano ed Dios tan say pakalilikna to ed panangaro na Dios ed sikato dia ed inkamabulos odino inkamasuyat to a mangibalikas na liknaan to ed Dios sano sikatoy onasingger a manpikasi.

Say balikas ya “ayadyarin aro” so makabkabaliksan. Say inkausar na salitan “ayadyari” ed Biblia so agnaynay a mankabaliksan na absoluton inkayadyari, salanti, say sankatageyan a nengneng na inkayadyari, noagta mabetbet et tutukoyen na satan so relatibon inkayadyari. Alimbawa, dia ed Sermon nen Jesus ed palandey, oniay inkuan to: “Nayadyari kayo komon a singa say mangatatawen ya Ama yo sikato so ayadyari.” Imbaga nen Jesus ed saray patumbok to a no say aaroen da labat et saramay mangaaro ed sikara, say aro da so aliwan nagnap, kulang, tan walaay deperensya. Kaukolan dan pagmaliwen ya ayadyari, odino kompleto, so panangaro ra diad pangaro met ed saray kabusol da. Ontan met sirin, sanen insulat nen Juan so nipaakar ed “ayadyarin aro,” say tutukoyen to et say interon-puso tan sigpot ya abayuboan a panangaro ed Dios, a mangaapekta ed amin ya aspektoy bilay na sakey.​—Mateo 5:46-48; 19:20, 21.

Sano onasingger ed Dios ed pikakasi, kabat a tuloy na sakey a Kristiano a sikatoy makasalanan tan ag-ayadyari. Bangbalet, sano nagnap so panangaro to ed Dios tan sankalikna to so panangaro na Dios ed sikato, sikatoy agnatatakot ya ompan nakondena odino nipulisay. Imbes, sikatoy walaan na kawayangan a mansalita diad pangibalikas ed walad puso to tan ed ikerew na panamerdona base ed dondon bagat, a maaron intarya na Dios panamegley nen Jesu-Kristo. Sikatoy matalek a dengelen na Dios iray kerekerew to.

Panon a ‘say aro so nagawan ayadyari’ tan sirin et ‘mangipaliis’ odino mamaandi ed pakatatakot na sakey a nakondena odino nipulisay? Oniay inkuan nen apostol Juan: “Say manumpal na salita to [Dios], diad sikaton peteg so ayadyariay aro na Dios.” (1 Juan 2:5) Konsideraen pa: No say Dios so angaro ed sikatayo anta managkasalanan itayo, agta nagkalalo to itayon aroen no talagan magbabawi itayo tan panggugunaetan tayon ‘sumpalen so salita to’? (Roma 5:8; 1 Juan 4:10) Petepeteg, anggad mansiasiansia itayon matoor, makapanmatalek itayo met a singa si apostol Pablo sanen oniay inkuan to nipaakar ed Dios: “Saman so agto kinawanan so dili ya Anak to, noag ingen inyawat to lapud sikatayo ya amin, panon so agto pangiter ed sikatayo, ya anggapo so bayar, so ami ganagana a pati sikato?”​—Roma 8:32.