Nagunggonaan Diad Pangegemtan ed Espiritual Iran Estandarte

“Say mangaro ed pilak agnapesel ed pilak; odino say mangaro ed daakan, agnapesel ed munat.”​—Eclesiastes 5:10.

SAY alabas a panagtrabaho so makapadetdet, tan sayan pakadetdetan so nayarin pansengegan na sakit, a no maminsan et mansumpal ed ipatey. Diad dakel a bansa et nabubuyak iray pamilya lapud diborsio. Kaslakan la a say sengegan na saratan a trahedya et say alablabas a panagpaga ed materyal iran bengatla. Imbes a panliketan lay walad sikato, say sakey a too a pinonot toy pangamor na kaykayarian so lawas manaanap ni na dakel, anggan anto lay isakripisyo to pian onyaman. Oniay ibabaga na sakey a manangigiya a libro: “Say pilalaslasan ed kakaabay so nagmaliw lan dibersion ed inkalapagan, anggano satan a kaabay et ngalngali la naataki ed puso anggaman ugaw ni lapud subsob ed trabaho.”

Nasabi panaon et agla napenek so toon tipon lan tipon, tan saya so mamaandi na liket a nepeg komon a nalikna to. Saray kakapuyan tayo bilang too ed sayan pamaakaran so mabetbet ya aanamoten na sakey a mabiskeg a puersa​—say panagpatalastas! Saray programa ed telebisyon so napno na saray patalastas a manasagyat ed sikan manaliw na saray bengatla ya agmo nakaukolan tan agmo anggan sarag a saliwen. Sayan amin so makapangitonton ed pirmin pakasakitan.

 Say agnapokpokan a dilin-kaalakan so nawalaan na agnaliklikas ya epekto, a makaderal ed pisikal tan moralidad tayo. Alimbawa, oniay inkuan na makabat ya Arin Solomon: “Say mareen a puso sikato so bilay na laman.” (Uliran 14:30) Diad pidumaan, say alabas a panagkimey, kapagaan, tan pananesdes a mantipon na materyal a kayamanan so nayarin maneral na bunigas tayo tan mamaandi na liket tayo. Pirmin naapektoan met iray relasyon tayo ed arum sano manunaan la ed bilay tayo so panag-anap na materyal. Tan sano nabuyak lay pamilya tan relasyon ed arum na sakey a too, naapektoan met la so interon kalidad na bilay to.

Say Kinaatagey na Espiritual Iran Estandarte

“Agkayo miaabobon unong ed sayan mundo,” so insimbawa nen apostol Pablo pigaran siglo lay apalabas. (Roma 12:2) Papablien na mundo iraman so onaabobon ed saray estandarte to. (Juan 15:19) Panggugunaetan na mundo a tangguyoren ka diad pakanengneng, pakalikna, pakataway, pakaangob, tan pakadngel mo​—ta pian aligen mo so materyalistikon estilo na panagbilay. Satan so mangipupurek ed “kilalawan na mata” ta pian sika tan saray arum so manggegemtan na materyal a gunggona.​—1 Juan 2:15-17.

Balet wala niray mas importante nen say kuarta, inkabantog, tan materyal a kayamanan. Diad apalabas a pigaran siglo, si Arin Solomon so anipon na amin a materyal a bengatla a niyopresi na mundo. Sikatoy angipaalagey na kaabungan tan awalaan na saray hardin, tanamanan, ariripen, ayayep, lalaki tan bibii a kumakanta, laktip lay dakdakel a balitok tan pilak. Apalumbasan nen Solomon so kaykayarian na amin na saramay akauna ed sikato. Sikatoy talagan mayamyaman. Agamoran nen Solomon so amin lawarin bengatla a nayarin pilaleken. Ingen, sanen inimano to iray agawaan to, oniay inkuanto: “Amin sikato nensaman so kaapaan, tan panguusil ed dagem.”​—Eclesiastes 2:1-11.

Lapud atagey a kakabatan ya impagamor ed sikato, kabat nen Solomon a say pangegemtan ed espiritual iran estandarte so panlapuan na pirmin liket. Oniay insulat to: “Saya sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan na too.”​—Eclesiastes 12:13.

Naromog so kayamanan a mas mabli nen say balitok tan pilak diad saray pahina na Salitay Dios, say Biblia. (Uliran 16:16) Singa saray mablin bato, naromog mo ditan so araralem a katuaan. Labay mo ta ya anapen tan kotkoten iratan? (Uliran 2:1-6) Ontan so ipapaseseg ed sika na Manamalsa tayo, say Lapuan na peteg iran estandarte, tan tulongan to ka. Panon?

Si Jehova so mangitatarya na saray mablin katuaan panamegley na Salita, espiritu, tan organisasyon to. (Salmo 1:1-3; Isaias 48:17, 18; Mateo 24:45-47; 1 Corinto 2:10) Say pangusisa ed sarayan mataltalag tan mabmablin katuaan so mangiter ed sika na pankanawnawa pian napilim a maong  so sankaabigan tan makapatumang a tuloy a panagbilay. Tan aliwan mairap itan lapud kabat nen Jehova, a Manamalsa tayo, no antoray nakaukolan tayo pian magmaliw a peteg a maliket.

Ipapaseseg na Biblia so Sankatageyan Iran Estandarte

Say makatunongan a bilin, odino simbawa, a nidatak ed Biblia so praktikal tan agnaparaan. Saray estandarte ed moral ya itatandoro na satan so agnatalonaan. Lawas makagunggona so simbawa na satan. Satan so abayag lan napapaneknekan a matua tan praktikal. Kabiangan ed saray makatunongan a simbawa na Biblia et say pagmaliw a makuli, matua, makabat ed panangusar ed kuarta, tan agpagmaliw a mangiras.​—Uliran 6:6-8; 20:23; 31:16.

Mitunosan ed satan, oniay inkuan nen Jesus: “Agkayo mantipon a nipaakar ed sikayo na kaykayamanan ed tapew na dalin, a sikaray deralen na saray bokbok tan lati, tan sikaray kotkoten tan takewen dia na saray matakew. Noag say mantipon kayo a nipaakar ed sikayo na kaykayamanan ed tawen, a diman agderalen na saray bokbok tan lati, tan diman agkotkoten tan agtakewen na saray matakew.”​—Mateo 6:19, 20.

Satan a nipanpanaon a simbawa so onaaplika met natan a singa met ed apalabas a 2,000 a taon. Imbes a magmaliw ya okupado ed pananap na materyal a kayamanan, nagunggonaan itayo natan diad pangegemtan ed magmaong a dalan na bilay. Say tombok et say pantipon na espiritual iran kayamanan, a mangitonton ed bilay a peteg a maliket tan makapenek. Panon tayon nagawaan itan? Diad pambasa ed Salitay Dios, say Biblia, tan diad pangiyaplika ed saray ibabangat na satan.

Makapatumang Iray Espiritual ya Estandarte

Sano suston niyaplika, saray espiritual ya estandarte so mangunggona ed sikatayo diad pisikal, emosyonal, tan espiritual a paraan. No panon a say ozone layer ed tagey na dalin so manproprotekta ed sikatayo manlapud makaderal iran sinag na agew, saray maabig a prinsipyo ed moral so manproprotekta met ed sikatayo diad pangipaparungtal na satan ed saray mapeligron epekto na materyalismo. Oniay insulat na Kristianon apostol a si Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang. Ta say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum, abalbalang ira ed pananisia, tan atalos ira na dakel a kaermenan.”​—1 Timoteo 6:9, 10.

Say aro ed kuarta so manatangguyor ed totoo a mananap na mas dakel a kayamanan, mas atagey a posisyon, tan mas baleg a pakayari. Kaslakan lan uusaren iray mapalikdo tan agmatuan paraan pian nadampot iratan a kalat. Say panggegemtan ed materyal iran bengatla so nayarin manamsam ed panaon, biskeg, tan saray abilidad na sakey a too. Sikatoy agni ingen makaugip a maitlep ed labi. (Eclesiastes 5:12) Peteg a mangamper ed iyaligwas ed espiritual so pananap na dakel a materyal. Si Jesu-Kristo, a sankatalonggaringan a toon nambilay, so angipabitar ed magmaong a dalan: “Maliket iray mamibidbir na pankaukolan da’d maespiritu ran bengatla.” (Mateo 5:3, Maung a Balita) Kabat to a saray espiritual a kayamanan so mangitarok na magnayon iran tumang tan importantin tuloy iratan nen say temporaryon pakagamor na materyal.​—Lucas 12:13-31.

 Peteg Kasin Makagunggona Itan?

“Saray ateng ko so nanggunaet a mangombinse ed siak ya aliwan praktikal iray espiritual ya estandarte,” so nanonotan ni nen Greg. “Ingen, agamoran ko so pirmin kareenan na nonot diad impangegemtan ko na espiritual iran kalat lapud agak nadedetdetan na pilalaslasan parad kayamanan.”

Niwala met so magmaong a personal a pisisiglaotan panamegley na espiritual iran estandarte. Nasagyat ed sika iray tuan kakaaro lapud personalidad mo, aliwan lapud say bengatlan walad sika. Oniay irerekomenda na Biblia: “Miulop ka ed saray makabat et magmaliw kan makabat.” (Uliran 13:20, Maung a Balita) Niarum ni, say matalonan pamilya so niletneg ed kakabatan tan aro, aliwan diad materyal a kaykayarian.​—Efeso 5:22–6:4.

Ag-itayo nianak a walaan la na saray estandarte. Nepeg tayon aralen iratan manlapud saray kalimog tayo odino manlapud atagtagey a lapuan. Kanian nayarian na edukasyon a nibase ed Biblia so mamasimbalo ed interon panmoria tayo nipaakar ed materyal a bengabengatla. “Atulongan ak ya usisaen lamet iray estandartek, tan naaralan koy mankontento ed saray bengatlan kakkaukolan,” so inkuan nen Don, a datin mangipapakurang na banko.

Gegemtanen so Magnayon ya Espiritual Iran Kayamanan

Ipupurek na espiritual iran estandarte iray manbayag a tumang, aliwan say temporaryon pakapenekan. Oniay insulat nen Pablo: “Saray nanengneng [materyal a bengatla] ag-ira maando, balet saray agnanengneng [espiritual a bengatla] maando ra.” (2 Corinto 4:18) Tua a say pangegemtan na materyal so temporaryon mamenek ed saray pilalek tayo, balet agmangitarok na permanentin gunggona so inkaagum. Saray espiritual ya estandarte so maando.​—Uliran 11:4; 1 Corinto 6:9, 10.

Kokondenaen na Biblia so inka-materyalistiko a kasmak diad sayan panaon. Ibabangat itayo na satan  no panon a paliisan so sinisiblet a pilalek diad pamasiansian simpli ed mata tayo, a niyapasakey ed mas importante iran bengatla, salanti, saray espiritual a kayamanan. (Filipos 1:10) Iwawalwal na satan so peteg a kabaliksan na inkaagum, salanti, dilin-panagtalintao. No iyaplika tayo iray naaaralan tayo ed Salitay Dios, nalikna tayo so pirmin liket. Niyapasakey tayoy kanonotan tayo ed panangiter aliwan diad panangawat. Agaylan saya so mabiskeg a mamakiwas ed sikatayo pian iwaklit so dilin-kaalakan tan gegemtanen iray espiritual ya estandarte!

Tua a diad sakey a laknab et nayarin onkanan sakurong so kuarta. (Eclesiastes 7:12) Balet oniay realistikon ibabaga na Biblia: “Nayarin naandi lay kuartam diad sakey labat a kakirem, a singa nampayak tan ontekkiab ya agila.” (Uliran 23:5, Maung a Balita) Baleg so isasakripisyo na totoo pian makagamor labat na dakel a materyal a bengatla​—bunigas, saray pamilya, pati say maabig a konsiensia​—ingen makapadesyang iray resulta. Diad biek a dapag, say pakawalaan na espiritualidad so mamepenek ed sankaimportantian iran pankaukolan tayo, salanti, say pankaukolan tayo parad aro, gagala, tan pandayew ed maaron Dios, si Jehova. Satan so mangitonton met ed bilay ya andi-anggaan tekep na ayadyarin kipapasen na too diad paraison dalin​—say ilalo ya itatarya na Dios parad sikatayo.

Agla manbayag et sigpot lan nagawa so pipirawaten na katooan ya inkaaligwas diad balon mundo na Dios. (Salmo 145:16) Diad satan a panaon, say interon dalin so ‘napano na pikakabat ed si Jehova.’ (Isaias 11:9) Onaligwas iray espiritual ya estandarte. Sigpot lan naandi so materyalismo tan saray makaderal ya epekto na satan. (2 Pedro 3:13) Tan saray bengatla a manggawa ed bilay tayo a nagkalalon makabaliksan​—salanti, say ayadyarin bunigas, makapenek a trabaho, maabig a panliliket, maaron siglaotan na pamilya, tan magnayon a pikakaaro ed Dios​—so mangitarok na tuan liket ed katooan diad ando lan ando.

[Kahon/Litrato ed pahina 6]

Usaren so Kuartam ed Makabat a Paraan!

Amtaen iray nakaukolan mo. Imbangat itayo nen Jesus ya ipikasin: “Iter mo ed sikami komon ya agew-agew so kanen mi ya inagew-agew.” (Lucas 11:3) Agmo ipapasen a saray bengatlan kaliktan mo et talagan kaukolan mo. Tandaan a say bilay mo so agmandedependi ed bengatlan walad sika.​—Lucas 12:16-21.

Manbadyet. Paliisan so pansaliw ya ag-implano. Oniay ibabaga na Biblia: “Saray kaisipan na saray makuli arap ira lambengat ed inkadaakan; balet balang sakey a mangganat, mangganat lambengat a naukolan.” (Uliran 21:5) Binilin nen Jesus iray dumerengel to a kuentaen da ni so bili antis dan gapoan so proyekton panggastosan.​—Lucas 14:28-30.

Paliisan so agkapilitan ya iyutang. Kapiganman a posible, mantipon na kuartan isaliw imbes ya onutang. Onia so ibabaga na proverbio: “Say akautang sikato so aripen ed amautang.” (Uliran 22:7) No dangkaan mo so inkasika tan mansiansia ka ed badyet mo, anggan saray baleg a sasaliwen so niganaan mo.

Paliisan so pandarak. Simpitan a maong so wala la’d sika a kayarian mo pian manbayag, diad ontan et daiset so nadarak. Impatnag nen Jesus so manepeg a panmoria ed panaggimper nipaakar ed bengatlan inusar to.​—Juan 6:10-13.

Lawas iyuna iray manunan bengatla. Say makabat a too so ‘manganamot ed panaon’ pian gegemtanen iray mas importantin kalat.​—Efeso 5:15, 16.

[Kahon/Litrato ed pahina 7]

Wala ni Magmaong nen say Pakaaral Manlapud Eksperiensya

Say personal ya eksperiensya​—maong man odino mauges​—so makapangibangat ed sikatayo na makana iran leksion. Balet kasin tua a sankaabigan lan pakaaralan so eksperiensya, unong ya ibabaga ra? Andi, walay mas atagey a lapuan na panangiwanwan. Binidbir itan na salmista sanen impikasi to: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.”​—Salmo 119:105.

Akin a lalon magmaong so pakaaral manlapud panangibangat na Dios nen say pakaaral manlapud personal ya eksperiensya? Say sakey a rason et nayarin magastos tan ansakit so pakaaral manlapud eksperiensya​—a sakey a pipapalaran. Sakey ni, ag-itan nakaukolan a nagawa. “O no komon ta dinengel mo so saray bilin ko!” so kuan na Dios ed saray Israelita nensaman. “Dia ed ontan say deen mo singa komon sakey ya ilog, tan say inkatunong mo singa komon daluyon na dayat.”​—Isaias 48:18.

Say sakey a rason no akin a matalonan lapuan na panamilin so Salitay Dios et lapud lugan na satan so sankadaanan tan sankasustoan a salaysay nipaakar ed eksperiensya na too. Nayarin bidbiren mo ya agmakapasakit tan magmaong ni so pakaaral ed saray intalona tan insaew na arum nen say pangulit a mismo ed saray lingo ra. (1 Corinto 10:6-11) Nagkalalon importante, diad Biblia et itatarya na Dios ed sikatayo iray matalonggaring a ganggan tan manangigiyan prinsipyo a sigpot a napanmatalkan. “Say katunongan nen Jehova nagnap . . . Say panamatua nen Jehova matua, gawaen to a makalakal so andi amta.” (Salmo 19:7) Petepeteg a sankaabigan a paraan so pakaaral manlapud kakabatan na maaron Manamalsa tayo.

[Saray litrato ed pahina 4]

Kaliktan na mundo a sikay mangalig ed materyalistikon estilo na panagbilay na satan

[Litrato ed pahina 5]

Naromog diad Biblia so kayamanan a mas mabli nen say balitok odino pilak