Aliknam ta la so Liket Lapud Panangiter?

SIKATO so ngalngali 50 a taon la ed aktibon panaglingkor bilang Kristiano. Anggaman maletey lay laman to lapud inka-akulaw to, sikatoy desididon ombisita ed balon nipaalagey a Kingdom Hall. Legan ya itatabin na sakey a matulong a Kristianon agin laki, sikatoy linmoob ed hall tan kalkalnan amaarap ed pegdat to, diad kawalaan na kahon na kontribusyon. Sikatoy angipelag ditan na kabkaabigan a kantidad na kuarta a tinipon to parad sayan balon Kingdom Hall. Anggaman agto akapangiba diad impamaalagey ed hall, kinaliktan to so ontulong.

Satan a Kristianon bii so nayarin mangipanonot ed sika ed sananey nin matoor a bii​—samay “duka a biin balo” a naimatonan nen Jesus ya angipelag na duaran sinsilyo diad kaban na templo. Agtayo amta so kipapasen to, balet say pagmaliw a balo nensaman et nayarin manresulta ed pirmin panirap ed pinansyal na sakey a bii. Talagan awalaan na empatya si Jesus ed sikato, lapud atebek to so paniirap na sayan bii. Diad impangipaimano nen Jesus ed sikato bilang ehemplo ed saray babangatan to, inkuan to a say melag ya abuloy na bii et mankabaliksan na ‘amin a wala ed sikato, salanti, amin a pambilay to.’​—Marcos 12:41-44.

Akin ya ontanlay impansakripisyo na sayan duka a biin balo? Malinew, lapud sikatoy debosyonadon tuloy ed si Jehova a Dios, a say sentro na panagdayew ed Sikato et diad templo ed Jerusalem. Anggaman limitado so nayarian ton gawaen, kinaliktan to a suportaan so sagradon panaglingkor. Tan maseguron alikna to so gayaga diad impangiter ed antokaman a nasarag to.

Panangiter Pian Suportaan so Kimey nen Jehova

Say panangiter na materyal tan pinansyal iran kontribusyon so lawas makanan kabiangan na tuan panagdayew, tan satan so lawas a lapuan na baleg a gayaga. (1 Awaran 29:9) Diad kadaanan ya Israel et aglabat uusaren iray kontribusyon pian parakepen so templo noagta pian inagew-agew a nipakurang ditan so amin ya aspekto na panagdayew ed si Jehova. Inggetar na Ganggan a saray anak na Israel so mangiter na kakaplo ed bunga na tantanaman da pian suportaan iray Levita a manlilingkor diad templo. Balet saray Levita so kaukolan met a mangiter ed si Jehova na kakaplo na saray produkton naaawat da.​—Numeros 18:21-29.

Anggaman bulos la iray Kristiano ed saray kakaukolanen na Ganggan na sipanan, agnauman so prinsipyo a saray lingkor na Dios so mangiter na materyal a kontribusyon pian suportaan so tuan panagdayew. (Galacia 5:1) Niarum ni, saray  Kristiano nen inmunan siglo so maliket a nankontribusyon pian nitarya iray nakaukolan na agagi ra. (Gawa 2:45, 46) Pinanonotan nen apostol Pablo iray Kristiano a no panon a say Dios so mabunlok a mangitatarya ed sikara na maabig iran bengatla, nepeg da met so magmaliw a mabunlok ed arum. Oniay insulat to: “Dia ed saray mangayaman dia ed mundo, ibilin mo ed sikara ya ag-ira mantagey na linawa, tan agda met igaton so ilalo ra ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo. A manggawa ra komon na maabig, a mayaman ira komon ed saray maabig a gawa, a managpalangkap ira, a mainomay iran mangiter. A mantipon ira na nipaakar ed sikara ed sakey a maabig a pangiletnegan a niparaan ed panaon ya onsabi, pian nabembenan da so bilay, a sikato so bilay a peteg.” (1 Timoteo 6:17-19; 2 Corinto 9:11) On, manlapud eksperiensya ton mismo, napekderan nen Pablo iray imbalikas nen Jesus: “Lalo a mapalar so mangiter nen say mangawat.”​—Gawa 20:35.

Say Makristianon Panangiter Natan

Natan, saray lingkor nen Jehova so mantutultuloy a manguusar ed materyal a kayarian da pian tulongan so balang sakey tan pian suportaan so kimey na Dios. Anggan saramay mairap-bilay so mangiiter na nasarag da. Momoriaen na “matoor tan makabat ya aripen” a responsabilidad da ed si Jehova so pangusar ed amin na sarayan indonasyon a pundo diad sankaabigan a paraan. (Mateo 24:45) Uusaren iray pundo parad pangipakurang ed saray sangan opisina, pangipatalos tan pamawala na saray Biblia tan literatura ed Biblia, pangiyarunsa na angkakabaleg a Kristianon pantitipon, pangipasal tan pangibaki na saray ombiabiahen manangasikaso tan misionaryo, pangitarya na tulong ed panaon na desyang, ontan met ed dakel niran makanan gagala. Iyapasakey tayo pa ed sakey a gagala, salanti, say itulong pian napawala iray pasen a pandayewan.

Saray Tasi nen Jehova so maminpiga a mantitipon ed loob na sakey simba diad saray Kingdom Hall da pian nagunggonaan ed espiritual a panangibangat tan maabig a panlilimog. Balet, lapud kairapan na panagbilay et agnayarian a gastosan na saray lokal a Tasi ed dakel a daldalin so pamaalagey na saray Kingdom Hall no anggapo so naawat da a pinansyal a tulong. Kanian nen 1999, saray Tasi nen Jehova so angigapo na programan mangusar ed saray pundo a manlalapud mas maaligwas a daldalin parad pangipaalagey na saray Kingdom Hall diad mas mairap iran bansa. Niarum  ni, nilibo a boluntaryo so manguusar ed panaon tan dunong da, a mabetbet a mankikimey ed saray nisulinek a lugar ed sarayan bansa. Legan na konstruksion, naaaralan na saray lokal a Tasi iray dunong ed panagpaalagey tan panagmintina, tan diad panamegley na Pundo Parad Kingdom Hall et nasasaliw iray nakaukolan a kagawaan tan materyales. Saray Tasi a manguusar la natan ed sarayan balon Kingdom Hall so misalsalamat a tuloy lapud saray kapananisiaan da so angidonar na panaon tan kuarta ra. Saray Tasi ed lokal so mankokontribusyon met a binulan pian namintina so balon Kingdom Hall tan pian nasalipotpotan iray gastos ed impanpaalagey, diad ontan et ontulong iratan ed pamaalagey na dakel niran Kingdom Hall.

Saray Kingdom Hall so ipapaalagey ya uusaren iray lokal a metodo tan materyales. Anggaman simpli labat irayan hall, saraya so marakdakep, praktikal, tan komportable. Sanen ginmapo so programan panagpaalagey nen 1999, manga 40 a bansa a limitado ed pundo so nibilang. Manlapud saman et linmaknab so programan panagpaalagey ya anggad 116 a daldalin, a nalalanor so masulok a kapaldua ed saray kongregasyon na saray Tasi nen Jehova ed sankamundoan. Diad apalabas a limay taon, masulok lan 9,000 a Kingdom Hall so nipaalagey panamegley na sayan uksoyan, a wala so promedyon masulok a 5 balon hall kada agew! Diad sarayan 116 a daldalin, nakaukolan ni so 14,500 a balon Kingdom Hall. Lapu ed panamendisyon nen Jehova tan ed inkamabulos tan inkamabunlok na saray Tasi ed sankamundoan, iilaloan a niwala so magenap iran pundo pian nasalipotpotan iyan pankaukolan.​—Salmo 127:1.

Saray Kingdom Hall so Sengegan na Idaraak

Antoy epekto na sayan pinasyan pansasagpot ed saray Tasi ed lokal tan ed kimey a panangipulong ed Panarian? Diad dakel a pasen et wala so makatantandan indakel na saray onaatendi ed pantitipon kayari a nipaalagey so balon Kingdom Hall. Naromog so sakey lan alimbawa diad sayan report a nanlapud Burundi: “Kayarin tuloy a nipaalagey so Kingdom Hall, dakdakel lay onaatendi. Alimbawa, sakey a Kingdom Hall so impaalagey parad sakey a kongregasyon a manga 100 so promedyo na onaatendi diad saray pantitipon da. Diad balon Kingdom Hall da et komportablen makayurong so 150 a totoo. Sanen asumpal itan, 250 so onaatendi ed saray pantitipon.”

Akin ya ontanlay idarakel? Sakey lan rason et saray grupo na manangipalapag na Panarian ya  andian na pormal a pasen a pantitiponan balet ta kapilitan a mantitipon diad silong na kiew odino diad alog so paniinapan no maminsan. Diad sakey a lugar et isisiglaot so etnikon karawalan ed ontan iran angkekelag a relihyoson grupo, tan kakaukolanen na ley a nepeg a gawaen so amin a relihyoson pantitipon diad loob na abung a panagdayewan.

Lapud pakakawalaan na saray dilin hall et nipapanengneng met na saray Tasi nen Jehova ed komunidad ya aliwa iran babangatan na sakey a pastor. Oniay insulat na sangan opisina na saray Tasi nen Jehova ed Zimbabwe: “Nensaman, saray agagi ed sayan lugar so mantitipon diad saray pribadon ayaman, tan isisiglaot na saray totoo ditan so kongregasyon ed makankayarian na abung a pantitiponan da. Tutukoyen da iray agagi bilang membro na iglesia nen Mr. ___________. Nauuman la iyan amin natan legan a nanenengneng na totoo iray karatula a malinew a mangipapabidbir ed kada hall bilang ‘Kingdom Hall of Jehovah’s Witnesses.’”

Saray Maliket a Mangiiter

“Say Dios aroen to so sililiket a mangiter,” so insulat nen apostol Pablo. (2 Corinto 9:7) Siempre,  baleg a tulong iray angkabaleg a donasyon. Balet say babaleg a kabiangan na saray pundon uusaren ed kimey na saray Tasi nen Jehova so manlalapud saray kahon na kontribusyon diad Kingdom Hall. Baleg man odino melag, amin a kontribusyon so importante tan ag-iratan ibabaliwala. Tandaan ya inimano nen Jesus so dukan bii a balo ya angipelag na duaran melag a sinsilyo to. Sikato so anengneng met na saray anghel tan si Jehova. Agtayo amta so ngaran na saman a balo, balet sineguro nen Jehova a say andi-siblet a kiwas to so permanentin nikurit diad Biblia.

Nilikud ed pamaalagey na Kingdom Hall, susuportaan na saray kontribusyon so arum niran aspekto na makanan kimey ed Panarian. Say pikoopera ed onian paraan so mangiiter ed sikatayo na rason pian manliket tan “ondaak met ed dakel a pisasalamat ed Dios.” (2 Corinto 9:12) Oniay inreport na saray Kristianon agagi tayo ed Benin: “Kada agew et dakel a pikakasi na pisasalamat so ipapaarap ed si Jehova lapud pinansyal a tulong a naaawat a manlapud internasyonal ya impanaagi.” Ontan met, amin tayo a manusuporta ed kimey ed Panarian diad pinansyal a paraan so makalilikna na liket lapud Makristianon panangiter!

[Kahon/Litrato ed pahina 22, 23]

Saray Paraan a Pinili na Arum Pian Mangiter na

SARAY KONTRIBUSYON PARAD SANKAMUNDOAN A KIMEY

Dakel so mangigagana, odino mangigegetar, na kantidad ya ipelag da ed saray kahon na kontribusyon ya atatakan na “Contributions for the Worldwide Work​—Matthew 24:14.”

Kada bulan et ipapawit na saray kongregasyon irayan kantidad diad sangan opisina na saray Tasi nen Jehova a manlilingkor ed mismon bansa ra. Saray boluntaryon donasyon a kuarta so nayari met a direktan ipawit ed Watch Tower Bible and Tract Society of the Philippines, Inc., c/o Office of the Secretary and Treasurer, P.O. Box 2044, 1060 Manila, odino diad sangan opisina a manlilingkor ed bansa yo. Saray tseke so kaukolan ya ingaran ed “Watch Tower.” Saray alahas odino arum niran ankablin bengatla so nayari met ya idonasyon. Nepeg ya itekep ed sarayan kontribusyon so sakey ya antikey a sulat a mangibabagan satan so sakey a direktan langkap.

UKSOYAN NA KONDISYONAL A DONASYON

Nayari met ya imatalek ed Watch Tower so kuarta pian nausar da. Bangbalet, satan so ipawil sano kerewen la na angimatalek. Parad kaaruman ya impormasyon, ipangasin mitalosan ed Office of the Secretary and Treasurer diad address a nipaimano ed tagey.

NIPLANON PANANULONG

Bilang kaaruman ed saray direktan langkap a kuarta, wala niray arum a paraan na panangiter parad sankamundoan a serbisyo ed Panarian. Kabiangan ed saraya so:

Insurance: Say Watch Tower so nayarin ingaran bilang benepisyaryo ed life insurance policy odino retirement/pension plan.

Saray Deposito ed Bangko: Saray deposito ed bangko, saray kaletan nipaakar ed deposito, odino indibidual a deposito ed panretiro so nayarin imatalek odino ingaran ed Watch Tower diad ipatey, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.

Lote tan Abung: Say lote tan abung a nilako so nayarin iter balanglan direktan langkap odino, no abung et ireserba itan a panayaman na angidonar, a makapantultuloy a manayam ditan legan a mabilay. Mitalosan ed sangan opisina diad bansam sakbay ya iyalis so titulo na antokaman a lote tan abung.

Gift Annuity: Say gift annuity et sakey a reglamento a niyalis na sakey so kuarta odino saray seguridad diad korporasyon na Watchtower. Bilang kasalat, say angidonar, odino siopaman a pangipiyaan to, so makaawat na pihon bayar ya annuity a tinaon legay bilay. Say angidonar so makaawat na income-tax deduction diad taon a niyareglo so gift annuity.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a legal a testamento, odino nayarin ingaran so Watch Tower Society bilang benepisyaryo ed paknaan a pangimatalek. Say inmatalek a parad sakey a relihyoson organisasyon so nayarin mamawala na pigaran bentaha ed panag-buis.

Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian natulongan iray indibidual a malabay ya ontulong ed sankamundoan a kimey na saray Tasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so inimprinta pian mangitarya na impormasyon diad nanduruman paraan a saray langkap so niiter la natan odino ipatawir diad ipatey. Kayari ran abasa so brosyur tan tinmupleg ed saray legal a managkonseho ra ed panag-buis, dakel la so makakatulong pian suportaan so kimey na saray Tasi nen Jehova ed sankamundoan tan nagagamoran da met so dakel a benepisyo ed buis legan a gagawaen da itan. Makala ka na sayan brosyur panamegley na ikerew na kopya manlapud mismon Charitable Planning Office.

Parad kaaruman ya impormasyon, nayarian moy mitalosan diad Charitable Planning Office, balanglan diad pansulat odino itawag ed telepono, diad address a nilista ed leksab odino diad opisina na Saray Tasi nen Jehova a manlilingkor ed bansa yo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telephone: (02) 411-6090

[Saray litrato ed pahina 20, 21]

Say daan tan balo iran pasen a pantitiponan na saray Tasi nen Jehova

Zambia

Republika na Sentral Aprika