Kasin Naeksperiensya Tayo ni so Peteg ya Inkaligen?

SIOPA ta so agmanliket ed pakanengneng ed ananak a malikeliket a migagalaw ed maaron atateng da? Saray anak so makalilikna na peteg ya inkaligen no kaiba daray mataliman ateng da. Balet parad dakel ya ugugaw et mataltalag so pakaeksperiensya ed ontan a maliket iran pankanawnawa. Walaray ugugaw a kaukolan da ni manpaga ed kada agew no iner so ugipan da no labi. Wala ni kasi ilalo na saratan ya ugugaw ya andian na ayaman tan arum nin totoon manbibilay ya andiay inkaligen?

Anggaman singano anggapo lay ilalo ed arapen, say Salita na Dios so mangitatarya na ilalo. Impasakbay nen propeta Isaias ya onsabi so panaon ya amin so manbilay la ed sigpot ya inkaligen. Oniay insulat to: “Ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey et sananey so manayam; ag-ira naani mantanem et sananey naani mangan.”​—Isaias 65:21, 22.

Balet kasin walaan na malet a basiyan iyan ilalo? Imanoen a say salitan “ilalo” so aglawas mankabaliksan na pakaseguro. Alimbawa, diad Brazil et naynay a narerengelan so diparan ya: “A esperança é a última que morre.” Say literal a kabaliksan na satan et “Say ilalo so sankaunoran a bengatla a naandi.” Ipapatnag na saya a dakel a totoo so mailalo nin siansia anggaman anggapo so peteg a basiyan pian manilalo. Balet, duma so ilalo ya itatarya ed sikatayo na Dios. Oniay insulat nen apostol Pablo: “Siopaman a manisia ed [Dios], ag-ira nabaingan.” (Roma 10:11) Papaseguroan itayo na saray asumpal lan propesiya ed Biblia a nasumpal met so arum niran insipan nen Jehova a Dios. No ontua la iratan a sipasipan, naandi laray kipapasen a mamapaskar ed saray ugugaw a manayam ed karsada.

Anggan natan et makatulong la iray praktikal a simbawa ed Biblia ed saramay naandian na ilalo pian napaaligwas so bilay da tan nawalaan na peteg a kaligenan. Panon itan a magmaliw a posible? Saray Tasi nen Jehova ed lugar yo so maliket ya ontulong ed sikayon naromog so ebat ed sayan tepet.