Tepetepet Manlapud Saray Managbasa

Anto so panmoria na Kristianon kongregasyon ed inkasiba?

Parehon kokondenaen na Salitay Dios so inkabuanges tan inkasiba bilang ugalin agmanepeg parad saramay manlilingkor ed Dios. Kanian, pareho so panmoria na Kristianon kongregasyon ed sakey a kabkabat lan masiba tan ed sakey a buanges. Agnayarin magmaliw a kabiangan na Kristianon kongregasyon so buanges nisay masiba.

Oniay inkuan na Uliran 23:20, 21: “Agka miulop ed saray mainum na alak, ed saray masiba a mangan na laman. Ta say managbuek tan say masiba onduka ra; tan say kayepyep kawesen to so too ed pilatpilat.” Diad Deuteronomio 21:20 et nabasa tayo so nipaakar ed sakey a “masugnar tan masumpa” ya indibidual, a makanepegan a napapatey base ed Mosaikon Ganggan. Unong ed sayan bersikulo diad New World Translation, say duaran pakabidbiran ed satan ya indibidual a masugnar tan masumpa et sikatoy ‘masiba tan buanges.’ Malinew a diad kadaanan ya Israel, say inkasiba so impasen ya agmanepeg ya agamil parad saramay nampilalek a manlingkor ed Dios.

Balet, anto so inkasiba, tan anto so ibabaga na Kristianon Griegon Kasulatan nipaakar ed saya? Say masiba so uukeran bilang “sakey a niyugali to lay maagum tan alablabas a panangan tan panag-inum na alak.” Sirin say inkasiba et sakey a nengneng na inkaagum, tan ibabaga ed sikatayo na Salitay Dios a “saray maagum”  et agda natawir so panarian na Dios. (1 Corinto 6:9, 10; Filipos 3:18, 19; 1 Pedro 4:3) Niarum ni, sanen pinasakbayan nen apostol Pablo iray Kristiano sumpad pangagamil ed “saray gawa na laman,” binitla to so “panagbuanges, panduroypo, tan saray miulibay ed saraya.” (Galacia 5:19-21) Say alablabas a panangan so mabetbet a kabiangan na panagbuanges tan maingal a panduroypo. Sakey ni, seguradon kabiangan so inkasiba ed say balikas nen Pablo a “tan saray miulibay ed saraya.” No nipaakar met ed arum niran “gawa na laman,” say sakey a Kristianon kabkabat a tuloy ed inkasiba to tan agto labay ya umanen so inkaagum to so nepeg ya ekalen ed kongregasyon.​—1 Corinto 5:11, 13. *

Anggaman pareho so pangipapasen na Salitay Dios ed sakey a buanges tan ed sakey a masiba, mas mainomay a nabidbir so buanges nen say masiba. Kaslakan lan sankapatnagan iray sinyalis na inkabuanges. Balet, mas mairap a nadetermina so sinyalis a mamaneknek a talagan masiba so sakey lapud ag-itan basta naamtaan ed akinpaway ya itsura. Kanian, say pangasikaso ed oniaran kaso so mankaukolan na pirmin panag-alwar tan pakatebek ed biang na saray mamatatken ed kongregasyon.

Alimbawa, nayarin sinyalis na inkasiba so pagmaliw a matabataba, balet aliwan naynay ya ontan. Say sobran belat na sakey a too so nayarin resulta na sakit. Nayari met ya atawir toy inkataba to. Nepeg ya agtayo met lilingwanan a say inkataba et sakey a kipapasen na laman, bangta say inkasiba et disposisyon na kanonotan. Say inkataba et say pakawalaan na sobran taba ed laman, bangta say inkasiba et maagum tan alablabas a panamenek. Kanian, agnadetermina so inkasiba diad kabaleg na sakey noagta diad awawey to ed panangan. Nayarin dugaruga labat so kabaleg na sakey a too odino mabeng ni ingen balet ta masiba. Niarum ni, diad nanduruman pasen et nanduruma so estandarte no nipaakar ed kabkaabigan a belat odino kabaleg na laman.

Antoray sinyalis na inkasiba? Say sakey a masiba et niyugali to lay agmankontrol, a samokal lan samokal ya anggad punton aliwliwa lay liknaan to odino mansakit la. Say inkaandian toy dilin-panangontrol so mangipapatnag ya agto nononoten so kababaingan ya itarok to ed si Jehova tan ed maabig a reputasyon na saray totoo To. (1 Corinto 10:31) Diad biek a dapag, say too a nalabas toy pangan to a sagpaminsan so agtampol nipasen a “maagum.” (Efeso 5:5) Anggaman kuan, base ed prinsipyo na Galacia 6:1, nayarin nakaukolan na satan a Kristiano so tulong. Oniay inkuan nen Pablo: “Agagi, no wala so nasagmakan ed anton pankasalanan, sikayo a naespirituan sikato komon so ipawil yo ed espiritu na tayadno.”

Akin a nagkalalo lan importante natan so konseho na Biblia a paliisan so alablabas a panangan? Lapud oniay impasakbay nen Jesus nagkalautla nipaakar ed panaon tayo: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo a kasanlilikna so saman ya agew a singa sakey a patit.” (Lucas 21:34, 35) Say ipaliis ed alablabas a panangan et sakey ya importantin dalan pian naarawian so estilo na kabibilay a makaderal ed espiritual.

Say pagmaliw a kabkaabigan et maabig ya ugali parad saray Kristiano. (1 Timoteo 3:2, 11) Kanian, seguradon tulongan nen Jehova iramay manggugunaet a mangiyaplika ed simbawa na Biblia nipaakar ed kabkaabigan a panangan tan kakainum.​—Hebreos 4:16.

[Paimano ed leksab]