Onsabi so Panangukom nen Jehova Sumpad Saray Marelmeng
Onsabi so Panangukom nen Jehova Sumpad Saray Marelmeng
“Manparaan ka ya onabet ed Dios mo.”—AMOS 4:12.
1, 2. Akin a makapanmatalek itayo a panampoten na Dios so karelmengan?
KASIN panampoten nen Jehova so karelmengan tan kairapan diad sayan dalin? Diad gapo na koma-21 a siglo, satan a tepet so matukotukoy. Ompatnag ya anggan iner a pasen et nanenengneng tayoy paneknek na inkaruksa na too ed kapara ton too. Talagan pipirawaten tayo so mundo ya andian na karawalan, terorismo, tan inkakurakot!
2 Say maabig a balita et sikatayo so sigpot a makapanmatalek a panampoten nen Jehova so karelmengan. Saray kalidad na Dios so pakaseguroan tayo a sikatoy onkiwas sumpad marelmeng. Si Jehova et matunong tan maptek a Dios. Diad Salmo 33:5 et oniay ibabaga ed sikatayo na Salita to: “Sikato aroen to so katunongan tan kaalasan.” Onia so ibabaga ni sakey a salmo: “Saman so labalabay to so karamsakan gulaen na kamarerwa [nen Jehova].” (Salmo 11:5) Maseguron si Jehova, a makapanyarin-amin a Dios, a mangaaro ed inkatunong tan inkahustisya, so agmagnayon a mangiyabuloy ed gugulaen to.
3. Anto so nidanet ed kaaruman a pangonsidera ed propesiya nen Amos?
3 Konsideraen so sananey nin rason no akin a makaseguro itayon ekalen nen Jehova so karelmengan. Say rekord na apalabas iran impideneng to so mangigarantiya ed satan. Saray makapasagyat ya ehemplo na tuloytuloy ya impideneng nen Jehova ed saray marelmeng so naromog ed libro na Biblia ya Amos. Diad nagkalalon pangonsidera tayo ed propesiya na Amos, nidanet so taloran bengatla nipaakar ed panangukom na Dios. Unona, lawas itan a makanepegan. Komadua, ag-itan napaliisan. Tan komatlo, aliwa itan a turobos, lapud ipaakseb labat nen Jehova so panangukom ed saray mauges balet inatnat to so panangasi ed saray magbabawi tan saray totoon nikiling ed maptek.—Roma 9:17-26.
Say Madibinon Panangukom so Lawas Makanepegan
4. Iner so angibakian nen Jehova ed si Amos, tan tekep na anton gagala?
4 Diad panaon nen Amos, saray Israelita so naapag la ed duaran panarian. Sakey la so abalaten a duaran-tribu a panarian na Juda. Say sakey et say amianen a samploran-tribu na Israel. Ingganggan nen Jehova si Amos a manlingkor bilang propeta, ya imbaki to manlapud binalegan ton baley ed Juda pian onla ed Israel. Ditan so pangusaran na Dios ed si Amos pian iyabawag so madibinon panangukom.
5. Sumpad antoran nasyon so primeron nampropesiyaan nen Amos, tan anto so sakey a rason no akin a makanepegan ira ed ambelat a panangukom na Dios?
5 Ag-inggapo nen Amos so kimey to diad impangiyabawag to ed panangukom nen Jehova sumpad matungangan mamaamianen a panarian. Imbes, inggapo ton inyabawag so ambelat a panangukom na Dios ed anemiran nasyon a kakaabay na Israel. Saraya so Sirya, Filistia, Tiro, Edom, Amon, tan Moab. Balet kasin sarayan nasyon so talagan makanepegan ed ambelat a panangukom na Dios? On, talagan makanepegan ira! Sakey lan rason et sikaray nigalet lan kakabusol na totoo nen Jehova.
6. Akin ya itarok na Dios so desyang ed Sirya, Filistia, tan Tiro?
6 Alimbawa, kinondena nen Jehova iray taga-Sirya “lapud inilik da so Galaad.” (Amos 1:3) Sinamsam na saray taga-Sirya so teritorya manlapud Galaad—sakey a rehyon ed Israel diad bukig na Ilog Jordan—tan nilames daray totoo na Dios diman. Komusta met so Filistia tan Tiro? Saray Filisteo so nankasalanan diad impangidestiero odino impangautibo ra ed saray Israelita, tan inlako da ira ed saray taga-Edom, tan arum ya Israelita so inyawat da ed saray taga-Tiro a managlakoy aripen. (Amos 1:6, 9) Isipen pa itan—inlako ra so totoo nen Jehova pian aripenen! Pankelawan ni kasi no akin ya idapo nen Jehova so desyang ed Sirya, Filistia, tan Tiro?
7. Anto so pisiglaotan na Edom, Ammon, tan Moab ed Israel, balet panon so impantrato ra ed saray Israelita?
7 Say Edom, Amon, tan Moab so walaan na pipadparaan ed Israel tan ed balang sakey. Sarayan taloran nasyon so pikanayonan na saray Israelita. Saray Edomita so kailalakan nen Abraham diad panamegley nen Esau, a lason nen Jacob. Kanian nibagan sikaray agagi na Israel. Saray Amonita tan saray Moabita so kailalakan nen Lot, a kaanakan nen Abraham. Balet, kasin say Edom, Amon, tan Moab so maaro ed saray Israelitan kakanayon da? Andin balot! Say Edom so maruksan angusar ed ayura sumpad “agi to,” tan saray Amonita so marukruksa ed panagtrato ra ed saray akautibon Israelita. (Amos 1:11, 13) Anggaman agdirektan sinalambit nen Amos so impanmaltrato na Moab ed totoo na Dios, saray Moabita so abayag lan onsusumpa ed Israel. Ambelat so dusa parad saratan a taloran mankakanayon a nasyon. Ipaakseb nen Jehova so mangapuy-apoy a kadederal ed sikara.
Agnapaliisan so Panangukom na Dios
8. Akin a saray panangukom na Dios ed anemiran nasyon a walad kabangibang na Israel et agnaliktaran?
8 Malinew, say anemiran nasyon ya akadkaunan sinalambit ed propesiya nen Amos so makanepegan na ambelat a panangukom na Dios. Niarum ni, agdan balot naliktaran itan. Manlapud Amos kapitulo 1, bersikulo 3, tan anggad kapitulo 2, bersikulo 1, oniay aminem ya imbaga nen Jehova: “Agko naani ilegyas so dusa to.” Unong ed salita to, agto pinugeran so ambelat a pananusa to ed saratan a nasyon. Paneknekan na nikurit ya awaran a balang sakey ed saratan so anagmak na desyang ed saginonor. Agayla, apatira ed sikara—say Filistia, Moab, Amon, tan Edom—so diad kaunoran et naandi la!
9. Anto so makanepegan ed saray manaayam ed Juda, tan akin?
9 Insan inyapasakey na say propesiya nen Amos so komapiton nasyon, salanti, say Juda a binalegan ton teritorya. Saray ondedengel ed si Amos diad mamaamianen a panarian na Israel so nayarin abigla ed impakadngel da ed pangiyaabawag to na panangukom ed panarian na Juda. Akin a saray manaayam ed Juda so makanepegan na ambelat a panangukom? “Lapu ed imbeneg to so tunong nen Jehova,” so inkuan na Amos 2:4. Ag-imbaliwala nen Jehova so ontan a ginagalan panangibaliwala ed Ganggan to. Unong ed Amos 2:5, oniay impasakbay to: “Payakar ko naani so sakey ya apoy ed Juda, et akmonen to naani so saray palasyo na Jerusalem.”
10. Akin ya agnaliktaran na Juda so desyang?
10 Agnaliktaran na agmatoor a Juda so onsasabin desyang. Diad komapiton danay et onia so imbaga nen Jehova: “Agko ilegyas naani so dusa to.” (Amos 2:4) Asagmak na Juda so nipasakbay a kadusa sanen sikatoy impankibalatar na saray taga-Babilonia nen 607 K.K.P. Aminsan lamet ya anengneng tayo ya agnaliktaran na saray marelmeng so panangukom na Dios.
11-13. Manunan nampropesiya si Amos sumpad anton nasyon, tan antoran nengneng na panaglames so niwala diman?
11 Kapkapangiyabawag lambengat nen propeta Amos so panangukom nen Jehova ed pitoran nasyon. Balet, nalilingo so siopaman a manisip ya asumpal la nen Amos so panagpropesiya to. Agni asumpal si Amos! Sikato so manunan niganggan a mangiyabawag ed ampait a mensahe na panangukom sumpad mamaamianen a panarian na Israel. Tan makanepegan so Israel ed ambelat a panangukom lapud makapasinagem so inkabulok na nasyon ed moral tan espiritual.
12 Inwalwal na panagpropesiya nen Amos so panaglames a nagmaliw a kaslakan ed panarian na Israel. Nipaakar ed saya, oniay nabasa ed Amos 2:6, 7: “Onia so kuan nen Jehova: lapu ed talora ya impakasumlang na Israel, on, lapu ed apatira, agko naani ilegyas so dusa to, lapu ed inlako ra ed pilak so too a matunong, tan say duka ed sankatupag a sapin. Sikara a manpilalek a wala komon so dabok na dalin ed tapew na ulo na saray duruka, tan pikeweten da so dalan na saray mauyamo.”
13 Saray matunong so ilalako “ed pilak,” a nayarin mankabaliksan a saray ukom ya angawat na pilak bilang pasuksok so manesentensia ed saray andian na kasalanan. Saray managpautang so mangilalako ed saray mairap-bilay ed inkaaripen parad presyon “sankatupag a sapin [sandalyas],” a nayarin lapud angkelag iran impakautang. Saray anggapoy panangasin totoo so ‘nampilalek,’ odino nanggunaet, a mangimedmer ed saray “duruka” a sarayan mairap-bilay so mangisabuyag lay dabok ed mismon kauloan da, a pakapatnagan na pakakagonigon, paneermen, odino inkipabpaabeba ra. Kasmak a maong so inkakurakot a “saray mauyamo” so andian la na ilalon makaromog na antokaman ya inkahustisya.
14. Siopa so mamaltratoen ed samploran-tribun panarian na Israel?
14 Imanoen no siopa iramay amaltrato. Sikara et matunong, mairap-bilay, duruka, tan mauyamon manaayam ed dalin. Kakaukolanen na Ganggan nen Jehova ed impisipanan to ed Israel ya ipanengneng so panangabagey ed saray pakaskasi tan mankaukolan. Balet, parad saratan ya indibidual a walad sakop na samploran-tribun panarian na Israel et alodloor iray kipapasen.
“Manparaan Ka ya Onabet ed Dios Mo”
15, 16. (a) Akin a pinasakbayan iray Israelita a: “Manparaan ka ya onabet ed Dios mo”? (b) Panon ya ipapanengneng na Amos 9:1, 2 a saray marelmeng so agmakapaliis ed kipaakseb na panangukom na Dios? (c) Anto so agawa ed samploran-tribun panarian na Israel nen 740 K.K.P.?
15 Lapud kasmak ed Israel so imoralidad tan arum niran kasalanan, makatunongan a pinasakbayan nen propeta Amos so rebelyoson nasyon: “Manparaan ka ya onabet ed Dios mo.” (Amos 4:12) Say agmatoor ya Israel so agmakaliktar ed manasingger lan kipaakseb na panangukom na Dios lapud oniay inyabawag nen Jehova diad koma-walon pankanawnawa: “Agko naani ilegyas so dusa to.” (Amos 2:6) Nipaakar ed saray marelmeng a manasalin onamot, oniay inkuan na Dios: “Anggapo naani so anggan sakey ed sikara a makaliktar, tan anggan sakey ed sikara agmakataynan. Anggan mankotkot nira angga ed Sheol, diman say limak sikara naani alaen to, tan anggan onkalab nira ed tawen, manlapud’man sikara naani so ilasor ko.”—Amos 9:1, 2.
16 Saray marelmeng so agmakaliktar ed panangukom nen Jehova diad pankotkot da “angga ed Sheol,” a piguratibon mangipapatnag na getman onamot diad sankaaraleman a parte na dalin. Agda met naliktaran so panangukom na Dios “anggan onkalab nira ed tawen,” salanti, pian salien day onsalimbeng ed saray atagey a kapalandeyan. Malinew so pasakbay nen Jehova: Anggapoy napan-amotan a pasen ya agto nasabi. Kakaukolanen na estandarte na Dios ed inkahustisya a say mamaamianen a panarian so mikuentaan lapud marelmeng iran gawa to. Tan talagan sinmabi itan a panaon. Nen 740 K.K.P., manga 60 taon kayarin inkurit nen Amos so propesiya to, say panarian na Israel so tinalo na onlulusob iran Asiryano.
Aliwan Turobos so Panangukom na Dios
17, 18. Anto so ipaparungtal na Amos kapitulo 9 nipaakar ed panangasi na Dios?
17 Say propesiya nen Amos so ontulong ed sikatayo a makatebek a say panangukom na Dios et lawas makanepegan tan agnaliktaran. Balet ipapabitar met na libro na Amos a say panangukom nen Jehova et aliwan turobos. Nayarian na Dios ya anapen iray marelmeng tan ipaakseb so panangukom ed sikara anggan iner so amotan da. Naromog to met iray magbabawi tan maptek—saramay pilien ton pangipanengnengan toy panangasi. Saya so alay abig a nipabitar ed unor a kapitulo na libro na Amos.
18 Unong ed Amos kapitulo 9, bersikulo 8, oniay inkuan nen Jehova: “Agko naani bagbagen ya amin so abung nen Jacob.” Unong ed bersikulo 13 anggad 15, insipan nen Jehova ya ‘ipawil to iray adakep’ a totoo to. Sikara so nakasian tan panggayagaan da so kaligenan tan inkaaligwas. “Say manbabaka naabot to naani so manani,” so insipan nen Jehova. Isipen pa itan—daakan a tuloy so aanien ya arum ed satan et agni atipon sanen sinmabi so ontumbok a panagbaka tan panagtanem!
19. Anto so agawa ed say nakdaan na Israel tan Juda?
19 Nibaga a say panangukom nen Jehova sumpad saray marelmeng ed parehon Juda tan Israel so aliwan turobos, a nakasian iray magbabawi tan maptek a totoo. Bilang kasumpalan na sayan propesiya nipaakar ed panangipawil a nikurit ed Amos kapitulo 9, say magbabawin nakdaan na Israel tan Juda so akapawil a siansia manlapud impangautibo na Babilonia nen 537 K.K.P. Kapawil da ed binalegan dan dalin, impawil da so puron panagdayew. Diad maligen a kipapasen, angipaalagey lamet ira na saray kaabungan da tan nantanem ira na saray ubasan tan hardin.
Onsabi so Ambelat a Panangukom nen Jehova!
20. Anto so impaseguro ed sikatayo na impaningbat ed saray mensahe na panangukom ya inyabawag nen Amos?
20 Say impaningbat tayo ed saray mensahe na panangukom na Dios ya inyabawag nen Amos so mangipaseguro ed sikatayo a panganggaen nen Jehova so karelmengan ed panaon tayo. Akin a napanisiaan tayo itan? Unona, sarayan alimbawa na apalabas ya impideneng nen Jehova ed saray marelmeng so mangipabitar ed no panon so ikiwas to ed panaon tayo. Komadua, say inkipaakseb na panangukom na Dios ed apostatan panarian na Israel so mangipaseguro a deralen na Dios so Kakristianoan, say makaskasalanan a kabiangan na “Babilonia a Baleg,” say sankamundoan ya empiryo na palson relihyon.—Apocalipsis 18:2.
21. Akin a makanepegan so Kakristianoan ed ambelat a panangukom na Dios?
21 Agpanduaruwaan a say Kakristianoan so makanepegan ed panangukom na Dios? Say mabanbanday a relihyoso tan moral iran kipapasen to so mapatpatnag la. Makanepegan so panangukom nen Jehova sumpad Kakristianoan tan say arum a kabiangan na mundo nen Satanas. Agmet itan naliktaran, lapud sano panaon la pian ipaakseb so panangukom, saray salita na Amos kapitulo 9, bersikulo 1, so onaplika: “Anggapo naani anggan sakey ed sikara a makaliktar, tan anggan sakey ed sikara agmakataynan.” On, anggan iner so amotan na saray marelmeng, naromog ira nen Jehova.
22. Antoran punto nipaakar ed panangukom na Dios so nipabitar ed 2 Tesalonica 1:6-8?
22 Say panangukom na Dios so lawas makanepegan, agnaliktaran, tan aliwan turobos. Nanengneng iya ed saray salita nen apostol Pablo: “Matunong ed Dios so pamales na kaermenan ed saray mamaermen ed sikayo. Tan dia ed sikayo ya apaermen mipainawa kayo ed sikami, sano ompayawar so Katawan tayo a Jesus a manlapu ed tawen ya iba to so saray angheles na pakayari to, a dia ed mandarlang ya apoy. Iter to so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.” (2 Tesalonica 1:6-8) “Matunong ed Dios” a singilen iramay makanepegan na ambelat a panangukom to lapud impamairap da ed saray alanaan to. Agnapaliisan itan a panangukom, lapud agmakaliktar iray marelmeng ‘sano ompayawar si Jesus ya iba to iray angheles na pakayari to, dia ed mandarlang ya apoy.’ Aliwa met a turobos so panangukom na Dios lapud itarok nen Jesus so panamales ed “saray agmikabat ed Dios, tan dia ed saray ag-ontulok ed ebanghelyo.” Tan say kipaakseb na panangukom na Dios so manligliwa ed saramay matakot ed Dios a manasagmak na kairapan.
Ilalo Parad Saray Maptek
23. Anton ilalo tan ligliwa so nagamoran tayo ed libro na Amos?
23 Say propesiya nen Amos so walaan na alay abig a mensahe na ilalo tan ligliwa parad saray indibidual a nikiling ed kaptekan. Unong a nipasakbay ed libro nen Amos, agsigpot a dineral nen Jehova so totoo to nensaman. Diad kaunoran et tinipon to iray akautibon totoo na Israel tan Juda, ya impawil to ira ed binalegan dan dalin tan benendisyonan to ira na daakan a kaligenan tan aligwas. Anto so kabaliksan na saya ed panaon tayo? Satan so mangipaseguro ed sikatayo a diad kipaakseb na panangukom na Dios, naromog nen Jehova iray marelmeng inerman so amotan da tan anapen to iray totoo ya ipapasen ton makanepegan na panangasi to, inerman so panaayaman da diad dalin.
24. Diad antoran paraan a nabebendisyonan iray modernon-agew a lingkor nen Jehova?
24 Legan tayon tatalaranan so isabi na panangukom nen Jehova sumpad saray marelmeng, anto so naeeksperiensya tayo bilang matoor iran lingkor to? On, bebendisyonan itayo nen Jehova tekep na agnasabsabaan ya inkaaligwas ed espiritual! Panliliketan tayo so paraan na panagdayew tayo ya andian na katilaan tan inkapikewet ya epekto na palso iran bangat na Kakristianoan. Bebendisyonan itayo met nen Jehova na daakan ya espiritual a tagano. Balet tandaan a diad sarayan mayaman a bendisyon nen Jehova et wala met so baleg a responsabilidad. Iilaloan itayo nen Jehova a pasakbayan so arum nipaakar ed onsabin panangukom. Labay tayon gawaen so anggaan na nayarian tayo pian anapen iramay “suston nikiling parad andi-anggaan a bilay.” (Gawa 13:48, NW) On, labay tayon tulongan so dakel anggad posible pian nagunggonaan ira ed espiritual ya inkaaligwas a panggagayagaan tayo natan. Tan labay tayo ira a makaliktar ed manasingger lan kipaakseb na panangukom na Dios sumpad marelmeng. Siempre, pian nagunggonaan itayo ed saratan a bendisyon, nepeg a nawalaan itayo na suston kipapasen na puso. Unong a naimano tayo ed ontumbok ya artikulo, saya so nipabitar met ed propesiya nen Amos.
Panon Yon Ebatan?
• Panon ya ipapabitar na propesiya nen Amos a lawas makanepegan iray ambelat a panangukom nen Jehova?
• Anton prueba so itatarya nen Amos pian nipabitar ya agnaliktaran so panangukom na Dios?
• Panon ya ipapabitar na libro na Amos a say kipaakseb na panangukom na Dios et aliwan turobos?
[Tepetepet Parad Panagaral]
[Litrato ed pahina 16, 17]
Say panarian na Israel so ag-akaliktar ed panangukom na Dios
[Litrato ed pahina 18]
Nen 537 K.K.P., say nakdaan na Israel tan Juda so pinmawil manlapud impakakautibo ed Babilonia