No Antoy Nepeg a Basaen​—Oniay Makabat a Bilin nen Solomon

“SAY panggawa ed dakerakel a libro anggapo so anggaan; et say dakel ya aral sikato so sakey a belat ed laman.” (Eclesiastes 12:12) Sanen isusulat nen Arin Solomon iratan a salita manga 3,000 a taon lay apalabas, agto ididismaya so panagbasa. Imbes et kokomentoan to so pankaukolan a magmaliw a mapili. Agaylan nipanpanaon itan a panonot natan, lapud diad tinaon et binilyon iran pahina na saray babasaen so nipapalapag ed sankamundoan!

Mapatnag a say “dakerakel a libro” a tutukoyen nen Solomon et saramay aliwan makapabiskeg odino makapaligsa. Kanian, inkatunongan to a say kigalet ed saratan et ‘makapabelat ed laman,’ imbes a pakagamoran na manbayag iran gunggona.

Balet, kasin ibabaga nen Solomon ya anggapo lay libron makapangiter na maabig, tan napanmatalkan a giya a pakagunggonaan na saray managbasa? Andi, lapud onia met so insulat to: “Saray salita na makabat sikara so singa panikil; tan singa saray pasak so saray salita na kakatawan na saray tipon, a sikara so niiter manlapu ed sakey a pastol.” (Eclesiastes 12:11) On, walaray nisulat a salita a “singa [saray] panikil” et makapangitarya na positibon impluensya. Saratan so managdag ed sakey a too diad dugan kurang. Niarum ni, “singa saray pasak,” saratan so mamabiskeg na determinasyon tan pansiansian agnagiing.

Iner so pakaromogan tayo ed saratan a makabat a salita? Unong ed si Solomon, saray sankakabatan lan salita et saramay manlalapud sakey a Pastol, si Jehova. (Salmo 23:1) Kanian, anggapo lay mas maabig nin basaen na sakey noag say libron pinuyanan na Dios, salanti, say Biblia. Say regular a pambasa ed saratan ya impuyan a salita so ontulong ed sakey pian “anggapoy pankulangan to, a nabangatan a maong ed amin a gawa a maabig.”​—2 Timoteo 3:16, 17.