Agew na Pangraduar​—Sakey a Makapaliket ya Agew

“SIKATAYO so apalaboan na makapaliket ya agew. Maliwliwawa so sinag na agew. Asul so tawen. Birdi so karikaan. Manuni iray kamanokan. Say agew tayo natan et makapaliket, tan ag-itayo nadismaya. Si Jehova et aliwan Dios a pakadismayaan. Sikato so Dios a manamalabo.”

Diad panamegley na saratan a komento, inggapo nen Brother Samuel Herd, a membro na Mananguley ya Ulop na saray Tasi nen Jehova, so programa ed pangraduar na koma-117 a klase na Watchtower Bible School of Gilead. Agawa itan nen Setyembre 11, 2004. Kabiangan ed alay abig a programa so makapabiskeg a simbawa a nibase ed Biblia ontan met iray eksperiensya ed lokal tan eksperiensya na saray misionaryo. Talagan makapaliket iman ya agew parad amin a 6,974 ya inmatendi diad Watchtower Educational Center ed Patterson, New York, tan diad saray nantitiponan a pasen ed Brooklyn tan Wallkill, a nikonekta panamegley na audio tan video.

Makapaseseg Iran Balikas Parad Saray Estudyante

Si John Kikot, a membro na Komite na Sanga ed Estados Unidos so anginabang na makapaseseg iran balikas diad teman “Pansiansiaen so Gayaga Bilang Misionaryo.” Impabitar to a saray estudyante ed Gilead so kabkabat a magayaga, unong a napatnagan ed sayan agew na pangraduar. Say instruksion manlapud Kasulatan legan na impanaral da so angitarok na gayaga ed saray estudyante, tan natan et sarag da lan tulongan so arum a makaeksperiensya met na ontan a gayaga. Panon? Diad pangisekar day inkasikara ed ministeryo ra bilang misionaryo. Oniay inkuan nen Jesus: “Lalo a mapalar so mangiter nen say mangawat.” (Gawa 20:35) Napansiansia na saray balon misionaryo so mismon gayaga ra legan dan aaligen si Jehova a Dios, say mabunlok tan “maliket a Dios,” a mangipapaamta na katuaan ed arum.​—1 Timoteo 1:11, NW.

Sinmublay a nampaliwawa so sakey nin membro na Mananguley ya Ulop, a si David Splane, a say tema to et “Panon Kayon Makapitunosan ed Arum?” Talagan alay abig tan makapaliket so panayam ed inkasaksakey, anggaman nayarin mankaukolan iya na pagmaliw ya “ami ganagana ed amin day totoo.” (1 Corinto 9:22; Salmo 133:1) Sinalambit nen Brother Splane a saray mangraduar ya estudyante so mideneng ed nanduruman totoo diad misionaryon kimey, salanti, ed saray totoo diad teritorya, ed kaparan misionaryo, ed agagin lalaki tan bibii diad balon kongregasyon da, tan ed saraman so walad sangan opisina a mangididirehi ed panagpulong tan panagbangat a kimey. Sikatoy anginabang na praktikal iran suhestion no panon dan nagawa a makapaliket anggad posible so pisisiglaotan ed arum a totoo: Aralen so lokal a lenguahe, magmaliw ya akaparaan ya onadapta ed saray lokal a kustombre, respetoen so pribadon bilay na kapara ran misionaryo, tan magmaliw a matulok ed saraman so mangidadaulo.​—Hebreos 13:17.

Kayari to, say instruktor ed Gilead a si Lawrence Bowen so nantepet, “Anto so Nononoten  Yo?” Impanonot to ed saray estudyante a saramay ‘angukom ed kanengnengan’ odino akinpaway a nengneng, so ag-angawat ed si Jesus bilang Mesias. (Juan 7:24) Bilang ag-ayadyarin totoo, amin tayo so kaukolan a manalwar ed ‘pannonot na saray bengatlan nipaakar ed totoo’ imbes a saray “bengatlan nipaakar ed Dios.” (Mateo 16:22, 23) Anggan saray maespiritual a totoo so nepeg a mantultuloy a mangitukoy ed kanonotan da. Singa ed sakey a barko diad dayat, saray panangiyarunsa so nayarin manresulta ed balanglan pakadampot ed saray kalat odino pakakneb ed espiritual. Say pantultuloy a panaral ed Biblia unong ed konteksto na satan so ontulong ed sikatayon nonoten iray “bengatlan nipaakar ed Dios.”

Sayan parte na programa so sinampotan nen Wallace Liverance, a sakey met ya instruktor ed Gilead School. Say tema to a nibase ed Isaias 55:1 et “Anto so Saliwen Yo?” Pinaseseg to iray estudyante a “manaliw” na pakarepreskoan, gayaga, tan espiritual a tagano a manlalapud mapropetikon mensahe na Dios parad panaon tayo. Say propesiya nen Isaias so angiyaliling ed sayan salita na Dios ed danum, alak, tan gatas. Panon itan a nasaliw ya “anggapo so pilak tan anggapo so bayar”? Impaliwawa nen Brother Liverance a nasaliw itan diad pangimanon maong ed propesiya na Biblia tan pannonot ed saray kanonotan tan daladalan na Dios imbes a saray agmaespiritual a kanonotan tan daladalan. (Isaias 55:2, 3, 6, 7) Diad panggawa ed  saya, saray balon misionaryo so natulongan ed saray asainmin da ed arum a bansa. Mabetbet a momoriaen na ag-ayadyarin totoo a say liket so mandependi ed panggegemtan na pakainawaan ed materyal. “Agyo sasaliwen itan,” so impaseseg na espiker. “Iwaklit yo so ontan a kanonotan. Seguroen a walay panaon yo parad makabaliksan a panagaral ed mapropetikon Salita na Dios. Satan so manrepresko, mamabiskeg, tan mangitarok na gayaga ed sikayo bilang misionaryo.”

Makapaliket Iran Eksperiensya na Saray Estudyante tan Saray Interbio

Saray estudyante so regular ya akibiang ed panagpulong a kimey. Diad panangidaulo nen Mark Noumair, a sakey met ya instruktor ed Gilead, inyakto na pigara ed saray estudyante iray eksperiensya ya angipabitar ed teman “Ag-ibaing so Ebanghelyo.” (Roma 1:16) Saray dumerengel so aliketan ed intalineng da ed sarayan eksperiensyadon ministro no panon iran nampulong diad kabkaabungan, diad karsada, tan diad saray sentro na panagsaliwan. Saray estudyante a makapansalita na arum a lenguahe so nambulon pian nakatongtong da iray totoon mansasalita na saratan a lenguahe diad teritorya na kongregasyon ya akaasainan da. Arum so epektibon angusar ed saray publikasyon a nibase ed Biblia ya impalapag na saray Tasi nen Jehova, ya inusar da iratan diad saray panagpawil tan sano mangigapo na saray panangiyaral ed Biblia. Sikara so ‘ag-angibaing’ a mangipulong ed maong a balita.

Si Brother William Nonkes, a niasain ed Service Department, so anginterbio ed saray eksperiensyadon misionaryo a nanlapud Burkina Faso, Latvia, tan Russia. Sikaray angiter na praktikal a simbawa ya akasentro ed teman “Si Jehova so Maaron Manutumang ed Saray Matoor.” Sakey ed saray agagi ya ininterbio so amaseseg ed saray estudyante a nodnonoten so armada nen Gideon a tugyopen na 300 a sundalo. Kada sundalo so walaan na betang ya akatulong ed intalona na pibabakal nen Gideon. (Uko-ukom 7:19-21) Mipadpara, saray misionaryo a mansiasiansia ed saray asainmin da so natutumangan.

Say teman “Magmaliw ya Ami Ganagana ed Amin Day Totoo” so nipabitar ed sinmublay iran interbio ya indaulo nen Samuel Roberson, sakey ya instruktor diad Patterson. Ininterbio to so apatiran membro na Komite na Sanga ed Senegal, Guam, Liberia, tan Madagascar. Wala so dagup a 170 a misionaryon manlilingkor diad sarayan bansa. Saray nangraduar ya estudyante so akaaral ed saray komento no panon a tutulongan na saray Komite na Sanga iray balon misionaryo pian makaadapta ed saray asainmin da. Mabetbet a mankabaliksan itan na panaral ed saray kustombre ya ompatnag a nidumaruma ed saray estandarte na saray bansa ed Sagur. Alimbawa, diad arum a daldalin et kaslakan la so pakanengneng ed lalaki, pati saramay kabiangan na Kristianon kongregasyon, a mambenbenan na lima bilang sankaaro legan iran manaakar. Diad arum a pasen a nasasakopan na sanga ed Guam et ipaparungo iray nikaduman tagano. Balet arum so akaadapta, kanian nayarian met itan na saray balon misionaryo.

Si Guy Pierce, a membro na Mananguley ya Ulop, so angipaliwawa ed teman “Mansiansian Matoor ed ‘Panarian na Katawan Tayo.’” Pinanonotan to iray dumerengel: “Amalsa si Jehova a walaan na gagala. Walay nononoten to parad saray pinalsa to. Agni anguman so gagala to ed sayan dalin. Satan so nasusumpal ya agbalot naamper. Anggapo so makapanguman ed satan.” (Genesis 1:28) Amin so pinaseseg nen Brother Pierce a matoor a manpasakop ed inkasoberano na Dios anggaman ed saray kairapan ya onlelesa lapud impankasalanan na inmunan too, si Adan. “Manbibilay itayo la ed panaon na panangukom. Antiktikey la so nakekeraan a panaon tayo a nakatongtong iray matuan-impanpuson totoo pian tulongan iran makaamta ed katuaan. Usaren ya epektibo so panaon pian nipasabi ed arum so maong a balita na Panarian,” so impaseseg nen Brother Pierce. Saraman so matoor a manusuporta ed Panarian na Dios et makapanilalo ed tulong to.​—Salmo 18:25.

Diad kaunoran a parte, imbasa na tsirman iray pabano tan panamaseseg a nanlalapud saray sanga ed sankamundoan. Kayari na satan, inyawat to iray diploma ed saray nangraduar ya estudyante, insan imbasa na sakey ed sikara so sulat a nanlapud klase, a mangibabalikas na impapuson apresasyon ed naawat dan panangipasal. Matukotukoy itan a konklusyon parad sankaliketan ya agew ya agnalingwanan na amin ya inmatendi.

[Kahon ed pahina 23]

SARAY ESTADISTIKA NA KLASE

Bilang na saray nirepresentan bansa: 11

Bilang na saray bansan angiyasainan: 22

Bilang na saray estudyante: 48

Promedyon edad: 34.8

Promedyon taon ed katuaan: 18.3

Promedyon taon ed sigpot-panaon a ministeryo: 13.4

[Litrato ed pahina 24]

Koma-117 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pasener, tan saray ngaran so akalista manlapud kawigi a manpakawanan ed kada dasig.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerli, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.