Nipasal Pian Sigpot a Mantasi

“Sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.”​—GAWA 1:8.

1, 2. Anto so inganggan ed si Pedro, tan siopa so angiganggan ed sikato?

 “NIPAAKAR ed Jesus a taga-Nazaret, . . . imbilin to ed sikami so pampulong mi ed baley tan mantasi a sikato so inggaton na Dios, ya Ukom ed saray mabilay tan inatey.” (Gawa 10:38, 42) Diad saratan a salita et insalaysay nen apostol Pedro ed si Cornelio tan ed pamilya to so ganggan a naawat to bilang ebanghelisador.

² Kapigan so impangiter nen Jesus ed satan a ganggan? Nayarin inisip nen Pedro so imbaga nen Jesus sakbay na intokotok To ed tawen. Diad saman ya inkagawa, oniay imbaga nen Jesus ed matoor iran babangatan to: “Sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Balet ta akadkauna lan naamtaan nen Pedro, a bilang babangatan nen Jesus et kinaukolan ton itongtong ed arum so pananisia to ed si Jesus.

Taloy Taon ya Impangipasal

3. Anton milagro so ginawa nen Jesus, tan anto so inyimbita to ed si Pedro tan Andres?

³ Pigaran bulan kayari na inkabautismoan to nen 29 K.P., nampulong si Jesus diad lugar a pansisigayan nen Pedro tan say agi ton si Andres diad Dayat na Galilea. Sanlabi  la ran mansisigay balet anggapoy asiraw da. Balet, oniay inkuan nen Jesus ed sikara: “Ontaew ka, ipelag yo so saray iket yo a pansigay.” Sanen ginawa ra so imbaga nen Jesus, “akapangipukok ira na akamayamay a sira; tan apilatpilat so saray iket da.” Sanen naimatonan to so milagro, atalagnaw si Pedro, balet sikato so pinakalma nen Jesus, a kuanto: “Agka antakot; manlapud natan mansigay ka na saray totoo.”​—Lucas 5:4-10.

4. (a) Panon so impangiparaan nen Jesus ed saray babangatan to pian mantasi? (b) Panon a nikompara so ministeryo na saray babangatan nen Jesus ed ministeryo to?

⁴ Tamtampol, si Pedro tan Andres, ontan met ed si Santiago tan Juan, ya ananak a lalaki nen Zebedeo, so anaynan ed saray baloto ra tan tinmumbok ira ed si Jesus. Diad loob na ngalngali taloy taon, inulop da si Jesus diad impanpulong to ed nanduruman pasen tan nipasal ira bilang ebanghelisador. (Mateo 10:7; Marcos 1:16, 18, 20, 38; Lucas 4:43; 10:9) Diad pansampot la na saman a panangipasal, nen Nisan 14, 33 K.P., oniay imbaga nen Jesus ed sikara: “Say manisia ed siak, saray kimey a gawaen ko gawaen to met, tan angkakabaleg a kimkimey nen saraya so gawaen to.” (Juan 14:12) Singa ed ginawa nen Jesus, saray babangatan to so sigpot a mantasi balet diad mas malaknab a paraan. Naamtaan da a sikara tan amin iray magmaliw a babangatan so mantasi ed ‘amin a nasyones,’ anggad “kasampotan na mundo.”​—Mateo 28:19, 20.

5. Diad antoran paraan a nagunggonaan itayo ed impangipasal nen Jesus ed saray patumbok to?

⁵ Manbibilay itayo la ed “anggaan na mundo,” odino sistema na bengabengatla. (Mateo 24:3) Aliwan singa saray inmuunan babangatan, agtayo personal a naulop si Jesus pian naimatonan so panagpulong to ed totoo. Balet, nagunggonaan itayo ed impangipasal to diad pambasa ed Biblia no panon so impanpulong to tan no antoray imbangat to ed saray patumbok to. (Lucas 10:1-11) Balet, singbaten na sayan artikulo so sakey nin importantin tuloy a bengatla ya impatnag nen Jesus ed saray babangatan to, salanti, say dugan awawey nipaakar ed panagpulong a kimey.

Panangiyansakit ed Totoo

6, 7. Anton kalidad nen Jesus so akatulong pian magmaliw ya epektibo so ministeryo to, tan panon tayon aligen si Jesus ed satan a pamaakaran?

⁶ Akin ya ontan lan kaepektibo so impantasi nen Jesus? Sakey lan rason et say puron interes tan panangiyansakit to ed totoo. Impasakbay na salmista a si Jesus et kasian to odino “ilagak to so makabos tan naukolan.” (Salmo 72:13) Maseguron sinumpal to itan a propesiya. Oniay inkuan na Biblia nipaakar ed sakey ya inkagawa: “Sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:36) Anggan saray makaskasalanan so akalikna ed panangiyansakit to tan inmapit ira ed sikato.​—Mateo 9:9-13; Lucas 7:36-38; 19:1-10.

⁷ Sikatayo natan so magmaliw met ya epektibo sano ipatnag tayo so miparan panangiyansakit ed totoo. Sakbay a mibiang ed ministeryo, akin ta no isipen nin magano no panon kaimportante ed totoo so impormasyon ya ipaamta yo ed sikara? Isipen pa iray problema a nayarin kidudungetan da a naresolbi lambengat na Panarian. Nawalaan na positibon awawey ed amin a too, lapud agyo amta no siopa so onkiwas ed mensahe. Nayarin say ontumbok a toon nakatongtong yo et abayag lan manpipikasi a walay onasingger tan ontulong ed sikato!

Apakiwas Lapud Aro

8. Bilang pangalig ed si Jesus, anto so mamapakiwas ed saray patumbok to pian ipulong da so maong a balita?

⁸ Say maong a balita ya inyabawag nen Jesus et nipaakar ed pakasumpal na linawa nen Jehova, kapasantos na ngaran To, tan kiyalangon na inkasoberano To​—saray sankaimportantian ya isyu a nipaarap ed katooan. (Mateo 6:9, 10) Lapud inaro to so Ama to, si Jesus so apakiwas a manmatoor anggad kasampotan tan sigpot a mantasi nipaakar ed Panarian, a manresolbe ed saratan ya isyu. (Juan 14:31) Lapud ontan met so mamapakiwas ed saray patumbok nen Jesus natan, maseet iran mibibiang ed ministeryo. Oniay imbaga nen apostol Juan: “Saya so aro na Dios, a sumpalen tayo so saray ganggan to,” a kabiangan so ganggan ya ipulong so maong a balita  tan manggawa na babangatan.​—1 Juan 5:3; Mateo 28:19, 20.

9, 10. Nilikud ed panangaro ed Dios, anto nin aro so mamakiwas ed sikatayo pian sigpot a mantasi?

⁹ Oniay imbaga nen Jesus ed saray patumbok to: “No inaro yo ak, sumpal yo so saray ganggan ko. Say walaan na ganggan ko, et sumpalen to ra, sikato so mangaro ed siak.” (Juan 14:15, 21) Kanian, say aro ed si Jesus so nepeg a mamakiwas ed sikatayon mantasi ed katuaan tan mangunor ed arum niran ingganggan to. Diad sakey ed saray inkagawa sanen pinmayawar si Jesus kayari na inkioli to, oniay impaseseg to ed si Pedro: “Pakan mo so saray karnerok. . . . Ipakabkab mo so saray karnerok. . . . Pakan mo so saray karnerok.” Anto so nepeg a mamakiwas ed si Pedro pian gawaen itan? Impabitar nen Jesus so ebat sanen aminpigan tinepetan to si Pedro: “Inaro mo ak? . . . Inaro mo ak? . . . Inaro mo ak?” On, say panangaro nen Pedro ed si Jesus, say panamabli to ed sikato, so mamakiwas ed sikato pian sigpot a mantasi, ya anapen iray “karnero” nen Jesus, insan kayari na satan et sikatoy magmaliw ya espiritual a pastol da.​—Juan 21:15-17.

¹⁰ Natan, agtayo personal ya akabat si Jesus a singa ed impakapikabat nen Pedro. Balet, walay aralem a pakatalos tayo ed ginawa nen Jesus parad sikatayo. Apakiwas so kapusoan tayo lapud aralem a panangaro to ya angitonton ed sikaton ‘natawayan so ipapatey lapu ed amin a too.’ (Hebreos 2:9; Juan 15:13) Nalilikna tayo so alikna nen Pablo sanen insulat ton: “Say aro nen Kristo pasooten to kami . . . Sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed [sikato].” (2 Corinto 5:14, 15) Nipatnag tayo met a papablien tayon maong so panangaro nen Jesus tan sikato so aaroen tayon maong diad masimoon a panumpal ed ganggan a sigpot a mantasi. (1 Juan 2:3-5) Agtayon balot labay a paspasaray itayo ed panagpulong a kimey, a singano ipapasen tayon melmelag so kablian na bagat nen Jesus.​—Hebreos 10:29.

Iyapasakey ed Importantin Bengatla

11, 12. Anto so gagala na inyakar nen Jesus diad mundo, tan panon ton inyapasakey so imano to ed satan?

¹¹ Sanen si Jesus so walad arap nen Poncio Pilato, oniay inkuan to: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan.” (Juan 18:37) Ag-inabuloyan nen Jesus so antokaman a mangisuawi ed sikato manlapud pantasi nipaakar ed katuaan. Satan so linawa na Dios parad sikato.

¹² Maseguron sinubok nen Satanas si Jesus ed sayan pamaakaran. Kayarin tuloy na inkabautismoan nen Jesus, inyopresi ed sikato nen Satanas so pagmaliw a bantog ed interon mundo, ya iter to ‘iray amin a panarian na mundo, tan say dayew da.’ (Mateo 4:8, 9) Diad saginonor, labay na saray Judio a gawaen ya ari si Jesus. (Juan 6:15) Arum so nayarin nanumameng ed saray posiblin nagunggona no inawat nen Jesus iratan ya opresi, a nayarin inkatunongan da a bilang toon ari et dakel so nagawaan nen Jesus parad katooan. Balet, impulisay nen Jesus so ontan a panag-isip. Inyapasakey to so imano to ed panagtasi nipaakar ed katuaan.

13, 14. (a) Anto so ag-angisuawi ed si Jesus manlapud manunan kimey to? (b) Anggaman pobri, anto so agawaan to?

¹³ Niarum ni, si Jesus so agnisuawi ed panaggegemtan ed kaykayamanan. Bilang resulta et agto nambilay a mayaman. Anggapo ni ingen so dilin ayaman to. Diad aminsan ya inkagawa et oniay imbaga to: “Saray kuyangen walay balaong da, tan saray manok ed tawen walaan iray ubong; balet say Anak na too anggapoy pangisaralan to na ulo to.” (Mateo 8:20) Sanen inatey si Jesus, say alenleneg a mablin kayarian to a nikurit ed Biblia et samay kawes ton nan-aapagan na saray sundalon Romano. (Juan 19:23, 24) Kasin pakaskasi so bilay nen Jesus? Andin balot!

¹⁴ Mas malaknab so agawaan nen Jesus nen say nagawaan na sankayamanan lan pilantropo. Oniay inkuan nen Pablo: “Amta yo so grasya  na Katawan a Jesu-Kristo, ya, anggan, mayaman nensaman, ingen nisengeg ed sikayo nagmaliw a duka, pian sikayo lapu ed kadukaan to onyaman kayo komon.” (2 Corinto 8:9; Filipos 2:5-8) Anggaman pobri, inlukas nen Jesus so pankanawnawa pian panggayagaan na mapaabeban totoo so andi-anggaan a bilay tekep na inkayadyari. Agaylay pisasalamat tayo ed sikato! Tan agaylay panliket tayo ed tumang a naawat to lapud inyapasakey to so imano to ed panggaway linawa na Dios!​—Salmo 40:8; Gawa 2:32, 33, 36.

15. Anto so mas mabli ni nen say kayamanan?

¹⁵ Saray Kristiano natan a magunaet a mangaalig ed si Jesus so agmet paisuawi ed panaggegemtan na kayamanan. (1 Timoteo 6:9, 10) Aksobien da a komportable so bilay no walaan na kayamanan, balet amta ra ya ag-akadepende ed kayamanan so andi-anggaan ya arapen da. Sano ompatey so sakey a Kristiano, anggapo lay kakanaan na materyal a kayamanan to a singa met say kawes nen Jesus sanen sikatoy inatey. (Eclesiastes 2:10, 11, 17-19; 7:12) Sano ompatey so sakey a Kristiano, say alenleneg a mabmablin bengatla a walad sikato et say relasyon to ed si Jehova tan ed si Jesu-Kristo.​—Mateo 6:19-21; Lucas 16:9.

Agnaamper na Isusumpa

16. Panon ya inarap nen Jesus so isusumpa?

¹⁶ Say isusumpa so ag-angikasipa ed si Jesus manlapud panagtasi nipaakar ed katuaan. Sikato so ag-adismaya anggaman amta to a manampot so mangaraldalin a ministeryo to diad ipatey to bilang bagat. Oniay imbaga nen Pablo nipaakar ed si Jesus: “Lapud gayaga a niyan ed arap to sinungdoan to so krus, ya imbantak to so baing, et yinmurong ed kawanan na trono na Dios.” (Hebreos 12:2) Imanoen pa ya ‘imbantak nen Jesus so baing.’ Agto nampagaan no anto so nonoten ed sikato na saray onsusumpa ed sikato. Say angiyapasakeyan toy imano to et say panggawa ed linawa na Dios.

17. Anto so naaralan tayo ed impansungdo nen Jesus?

¹⁷ Pian niyaplika so leksion nipaakar ed impansungdo nen Jesus, oniay impaseseg nen Pablo ed saray Kristiano: “Motektek yo sirin so nansungdo ed ontan la ya insumlang na saray managkasalanan ed sikaton dili, pian agkayo komon nakesawan, ya onkapuy kayo ed saray kamarerwa yo.” (Hebreos 12:3) Tua, makapakapuy so inagew-agew a kidunget ed isusumpa odino panagbalaw. Makapakesaw so panresisti ed saray pananagyat na mundo, a nayarin pakadismayaan ni na kakanayon a mamapaseseg ed sikatayon onasenso. Balet, singa si Jesus et manilalo itayo ed tulong nen Jehova legan a determinado tayon iyuuna so Panarian ed bilay tayo.​—Mateo 6:33; Roma 15:13; 1 Corinto 2:4.

18. Anton maabig a leksion so naaralan tayo manlapud saray salita nen Jesus ed si Pedro?

¹⁸ Apatnagan so determinasyon nen Jesus ya agto labay so paisuawi sanen imbaga to ed saray babangatan to so asingger lan ipapatey to. Pinaseseg nen Pedro si Jesus a “kasian” toy inkasikato tan kokombinsien ton agto la nepeg a ‘sagmaken ni itan a kasumpalan.’ Agdinengel nen Jesus so  antokaman a mamakapuy ed determinasyon ton manggawa ed linawa nen Jehova. Imbeneg to si Pedro tan inkuan to: “Ompasen ka ed benegan ko, Satanas! Sika so pakagapolan ko, lapud iisipen mo, aliwan saray kanonotan na Dios, noagta kanonotan na totoo.” (Mateo 16:21-23, NW) Komon ta determinado tayo met ya ipulisay iray kanonotan na totoo. Imbes, lawas itayon paigiya ed saray kanonotan na Dios.

Mangitarok na Peteg Iran Gunggona

19. Anggaman sikato so nanggawa na saray milagro, anto so sankaimportantian a kabiangan na ministeryo nen Jesus?

¹⁹ Dakel a milagro so ginawa nen Jesus pian nipanengneng to a sikato so Mesias. Pinaoli to ni ingen iray inaatey. Asagyat so dakel a totoo ed saratan a gawa, balet aglinma diad dalin si Jesus pian manggawa labat na kimey parad komunidad. Sikato so linma dia pian mantasi nipaakar ed katuaan. Amta ton temporaryo labat so antokaman a materyal iran gunggona ya intarya to. Anggan saramay pinaoli to et inatey lamet. Diad panamegley lambengat na pantasi nipaakar ed katuaan a natulongan to so arum a makagamor na andi-anggaan a bilay.​—Lucas 18:28-30.

20, 21. Anton inkasimbang so pansiasiansiaen na saray Kristiano nipaakar ed maabig iran kimey?

²⁰ Natan, arum ya indibidual so manggugunaet a mangalig ed saray maabig a kimey nen Jesus diad pampapaalagey da na saray ospital odino panggagawa ra na arum nin serbisyo ed komunidad na saray mairap-bilay. Diad arum a kipapasen et panggagastosan da itan na baleg, tan nakomendaan so inkasimoon da; balet ta antokaman ya inawa a nitarya ra et temporaryo lambengat. Say Panarian lambengat so mangitarok na permanentin inawa. Kanian, singa ed ginawa nen Jesus, iyaapasakey na saray Tasi nen Jehova so imano ra ed panagtasi ed katuaan nipaakar ed Panarian.

²¹ Siempre, saray tuan Kristiano so manggagawa na maabig iran kimey. Insulat nen Pablo: “Unong a wala so kiambegya manggawa itayo na maabig ed saray amin, nagkalalo ed saray kaamong na pananisia.” (Galacia 6:10) Diad panaon na irap odino sano walay mankaukolan, ag-itayo masuyat a ‘manggawa na maabig’ ed kapara tayon totoo odino ed saray Kristianon agagi tayo. Anggaman kuan, say nepeg a manunan pangiyapasakeyan tayoy imano et say panagtasi nipaakar ed katuaan.

Makaaral Manlapud Ehemplo nen Jesus

22. Akin a pupulongan na saray Kristiano iray kapara ran totoo?

²² Insulat nen Pablo: “Abagey ak la no agko ipulong so ebanghelyo.” (1 Corinto 9:16) Sikato so aliwan paspasaray nipaakar ed maong a balita lapud say pangipulong ed satan et mankabaliksan na bilay to tan ed saramay ondengel ed sikato. (1 Timoteo 4:16) Moriaen tayo so ministeryo  tayo ed ontan met a paraan. Labay tayon tulongan iray kapara tayon totoo. Labay tayon ipatnag so panangaro ed si Jehova. Labay tayon paneknekan so panangaro tayo ed si Jesus tan say panamabli tayo ed aralem a panangaro to ed sikatayo. Kanian, ipupulong tayo so maong a balita tan manbilay itayo la sirin ya “aleg ed gawa na lawan na katooan, noag dia ed linaway Dios.”​—1 Pedro 4:1, 2.

23, 24. (a) Anton leksion so naaralan tayo manlapud milagro nipaakar ed sira? (b) Siopa natan so sigpot a mantatasi?

²³ Singa si Jesus, agtayo paisuawi manlapud manunan kimey tayo sano balbalawen itayo na arum odino maingongot iran mangipupulisay ed mensahe tayo. Makaaral itayo na leksion ed milagron ginawa nen Jesus sanen tinawag to si Pedro tan Andres ya ontumbok ed sikato. Amta tayo a sano unoren tayo si Jesus, ya ipelag tayo iray iket tayo ed singano aliwan masiran danudanum, a singa panangibaga, say panagsigay tayo so nayarin mamawala na saray resulta. Dakel a Kristianon managsigay so akala na dakel kayari na pigay taon ya impankimey da ed singano aliwan masiran danudanum. Arum so inmalis ed lugar a mas dakel so naerel a sira tan dakel ditan so asigay da. Antokaman so gawaen tayo, ag-itayo ontutundan mangipelag ed saray iket tayo. Amta tayo ya agni indeklara nen Jesus ya asumpal la so panagpulong a kimey diad inerman a pasen na dalin.​—Mateo 24:14.

²⁴ Masulok ya anemiran milyon a Tasi nen Jehova so okupado natan ed masulok a 230 a daldalin. Say Pebrero 1, 2005, ya isyu na Say Panag-Bantayan so mangiparungtal ed tinaon a report ed sankamundoan a kimey da legan na 2004 a serbisyon taon. Satan a report so mangipabitar ed mayaman a panamendisyon nen Jehova ed panagpulong a kimey. Diad panaon a nakekeraan parad sayan sistema na bengabengatla, komon ta itultuloy tayon ipapuso iray makapasagyat a salita nen Pablo: “Ipulong mo so salita; manseet ka.” (2 Timoteo 4:2) Komon ta itultuloy tayo so sigpot a pantasi anggad ibaga nen Jehova ya asumpal la so kimey.

Onggapo ed sayan taon, say Tinaon a Report na Serbisyo na Saray Tasi nen Jehova ed Sankamundoan so agla ompaway ed Enero 1 a paway na Say Panag-Bantayan. Imbes et ipalapag la itan ed paway na Pebrero 1.

Kasin Naebatan Yo?

• Panon itayon nagunggonaan ed impangipasal nen Jesus ed saray babangatan to?

• Anto so awawey nen Jesus ed totoon pinulongan to?

• Anto so mamakiwas ed sikatayo pian sigpot a mantasi?

• Diad antoran paraan a napantultuloy tayon niyapasakey so imano tayo ed panggawa na linawa na Dios, a singa ginawa nen Jesus?

[Tepetepet Parad Panagaral]

[Litrato ed pahina 15]

Magmaliw itayon epektibo ed ministeryo tayo no ipatnag tayo so panangiyansakit ed totoo a singa impatnag met nen Jesus

[Litrato ed pahina 16, 17]

Say manunan gagala nen Jesus diad dalin et say pantasi nipaakar ed katuaan

[Saray litrato ed pahina 17]

Iyaapasakey na saray Tasi nen Jehova so imano ra ed sigpot a panagtasi