Oras na Panangan​—Aliwa Labat a Panaon Pian Mangan!

LABALABAY na amin so masamit a panangan. No kabiangan ed panangan so maabig a pantotongtong tan maligsan pililimog ed saray inad-aro yo, magmaliw itan a makapaliket a pankanawnawa ya aglambengat mamenek ed eras. Dakel a pamilya so angiyugalin mandurungo ed panangan anggan maminsan labat ed sanagew. Say oras na panangan so mangiiter ed pamilya na pankanawnawan napantongtongan iray gawaen odino agawgawa ed sanagew. Saray ateng ya ontatalineng ed saray komento tan ibebesngaw na saray anak da so makatetebek ed panag-isip tan liknaan na saray kalangweran da. Diad ilabas na panaon, lapud maliket tan relaks a panlilimog a napanggagayagaan leleg na panangan, nalikna ed loob na pamilya so inkaligen, panagmatalek, tan aroan a lalon mamabiskeg ed pamilya.

Natan, lapud dakel a membro na pamilya so okupado tan naynay a manaapura, mairap dan niliwas so pakapandurungo pian mangan. Diad arum a parte na mundo, walaray kultura a babandayen day pandurungo na pamilya odino anggan say pantongtong legay panangan. Niyugali met na arum a pamilya so pambantay na telebisyon legay panangan, sirin et nasasamsaman ira na pankanawnawa parad makabaliksan a pantotongtong.

Balet, saray Kristianon ateng so naynay ya alerto ed saray pankanawnawa pian pabiskegen so sankaabungan da. (Uliran 24:27) Nensaman, imbilin ed saray ateng a say sakey ed saray sankaabigan a pankanawnawa pian nitongtong so Salitay Dios ed ananak et ‘kapagno manyurong ira ed abung da.’ (Deuteronomio 6:7) Say regular a pandurungo ed panangan so mangiiter ed saray ateng na nikadkaduman pankanawnawa pian nipurek ed ananak da so aralem a panangaro ed si Jehova tan ed saray matunong a prinsipyo to. Diad pamawala yoy maliket tan makaparepreskon atmospera, napagmaliw yo met a makapagayaga tan makapabiskeg ed pamilya yo so oras na panangan. On, gawaen so oras na panangan ya aliwa labat a panaon pian mangan!