Kasin Nakontrol Mo so Pansumpalan Mo?

KASIN nigeter la so pinal a pansumpalan tayo? Kasin andiay epekto ed arapen tayo iray desisyon a gagawaen tayo ed bilay?

Ipasen pan nakontrol na too so dilin kapalaran to. Diad sayan kipapasen, nayari kasi ya unona lan italaga so siopaman a too pian manggawa na partikular a kimey odino mamemben na sakey a betang? Tan panon a nasumpal na Dios so linawa to ed dalin no bulos so totoo a mangontrol ed dilin pansumpalan da? Say Biblia so mangitatarya na makapenek iran ebat ed sarayan tepet.

Predestinasyon tan Kawayangan a Manpili​—Kasin Mantunosan?

Imanoen no panon itayon ginawa nen Jehova a Dios. “Dia ed indengan na Dios [say too] so pinalsa to; say laki tan say bii pinalsa to ra,” so inkuan na Biblia. (Genesis 1:27) Lapud pinalsa itayo a kaulibay na Dios, nayarian tayon ipatnag iray kalidad to, a singa say aro, inkahustisya, kakabatan, tan pakayari. Sikatayoy niregaloan met na Dios na kawayangan a manpili. Lapud saya et nikadkaduma itayo ed saray mangaraldalin a pinalsa to. Nayarian tayon pilien so ontulok odino andi ed panangiwanwan na Dios nipaakar ed moral. Satan so rason no akin a nibaga nen propetan Moises so onia: “Tawagen ko so tawen tan say dalin a mantasi sumpa ed sika ed saya ya agew, ya inyan ko ed arap mo so bilay tan say patey, say bendisyon tan say ayew, sikato so makasengeg a pilien mo so bilay ta pian manbilay  ka, sika tan say kapolian mo; say panangaro ed Jehova a Dios mo, say pananumpal ed boses to tan say ipepeket ed sikato.”​—Deuteronomio 30:19, 20.

Balet, say regalo a kawayangan a manpili so agmankabaliksan na absoluton kawayangan. Kaukolan a tuloken tayo nin siansia iray ganggan ed pisikal tan moral a ginawa na Dios parad kaligenan tan kareenan na uniberso. Inletneg irayan ganggan parad pankaabigan tayo, tan say panumlang ed dinanman ed saratan so manresulta ed agmarakep iran pansumpalan. Isipen pa labat so nagawa no pilien tayon ibaliwala so ganggan ed grabidad tan ontaboy itayo manlapud toktok na atagey a bilding!​—Galacia 6:7.

Say kawayangan a manpili et walay katekep to met ya eebatan tayo, bengatlan anggapo ed saray pinalsa ya andian na ontan a kawayangan. Oniay intepet na managsulat a si Corliss Lamont: “Panon tayon nitetel ed totoo so ikikiwas da, tan dusaen ira ed gawan-mauges, no aaksobien tayo . . . ya akauna lan nigeter iray pipilien tan gagawaen da?” Siempre, agtayo nagawaan itan. Saray ayayep a pakikiwasen na nisipor lan ugali so andian na eebatan ed saray gagawaen da, tan agnayarin tetelen met iray kompyuter ed saray kimey ya imprograman gawaen na saratan. Kanian, say kawayangan a manpili so mangipapasakbat ed sikatayo na ambelat a responsabilidad tan eebatan parad saray kiwas tayo.

Agaylan agmaaro tan agmakatunongan si Jehova a Dios no sakbay na kianak tayo et inggeter to la so kurang a gawaen tayo insan to itayo tetelen ed saray kiwas tayo! Agto gawaen itan, ta ‘say Dios et aro,’ tan ‘maptek iray amin a dalan to.’ (1 Juan 4:8; Deuteronomio 32:4) Lapud inikdan to itayo na kawayangan a manpili, agto ‘magnayon ya igegeter no siopa so iliktar to tan no siopa so deralen to,’ unong ya ipipilit na saray mananisia ed predestinasyon. Say kawayangan a manpili so agbalot mitunosan ed predestinasyon.

Ipapalinew na Biblia a saray desisyon a gagawaen tayo so makapanguman ed pansumpalan tayo. Alimbawa, oniay inkerew na Dios ed saraman so managgaway-mauges: “Ompawil kayo natan balang sakey a manlapu ed inkauges na saray dalan to tan manlapu ed inkauges na saray gawa to . . . [pian] agak manggawa na duksa ed sikayo.” (Jeremias 25:5, 6) Magmaliw ya andi-kabaliksan iyan kerew no inggeter la na Dios so pansumpalan na kada too. Sakey ni, oniay ibabaga na Salitay Dios: “Magbabawi kayo sirin, tan manpataoli kayo, pian napunas so saray kasalanan yo: pian onsabi so saray panaon na painawa a manlapu ed arap na Katawan.” (Gawa 3:19) Akin a kerewen ni nen Jehova a magbabawi tan manpataoli iray totoo no amta to la ya anggapo lan balot so nagawaan da pian nauman so pansumpalan da?

 Sinaglawi na Kasulatan a walaray totoo ya inimbitaan na Dios a manuley bilang arari ed tawen a kaiba nen Jesu-Kristo. (Mateo 22:14; Lucas 12:32) Balet, ibabaga na Biblia a nabalang da itan a pribilehyo no ag-ira mansungdo anggad kasampotan. (Apocalipsis 2:10) Akin a sikaray imbitaan ni na Dios no denesidi to la ya ag-ira napili? Imanoen met iray salita nen apostol Pablo ed saray kapananisiaan to. Oniay insulat to: “No kasumpal tin naamtaay katuaan et gagalaen tayo ni mankasalanan anggapo lay bagat a makapaandi’d saray kasalanan tayo.” (Hebreos 10:26, Maung a Balita) Magmaliw ya andi-kakanaan itan a pasakbay no akauna lan intalaga na Dios so pansumpalan da. Balet agta akauna lan intalaga na Dios so pigaran indibidual pian magmaliw a manuley a kaiba nen Jesu-Kristo?

Akauna lan Intalaga​—Bilang Indibidual Odino Grupo?

“[Say Dios] so amendisyon ed sikatayo ed Kristo na amin a nengneng na bendisyon na espiritu ed saray kawalaan a mangatatawen,” so insulat nen apostol Pablo, “unong ed impanpili to ed sikatayo ed sikato nen agni nipasen so mundo . . . Sanen tinandaan to itayo nen una a nibilang ya anak to lapu ed Jesu-Kristo a nipaakar ed sikaton dili.” (Efeso 1:3-5) Anto so tinandaan odino akauna lan intalaga na Dios, tan antoy kabaliksan na apili la “nen agni nipasen so mundo”?

Ibabaga na sayan teksto a say Dios so amili na pigaran kapolian na inmunan too, si Adan, pian manuley a kaiba nen Kristo diad tawen. (Roma 8:14-17, 28-30; Apocalipsis 5:9, 10) Balet, say pangibagan intalaga la nen Jehova a Dios iray espisipikon indibidual nilibo lan taon antis iran nianak pian mangawat ed sayan pribilehyo et agmitunosan ed katuaan a saray totoo so inikdan na kawayangan a manpili. Say intalaga na Dios ed gapo et sakey a grupo, odino klase na totoo, aliwan saray indibidual.

Pian iyilustra: Ipasen pa a denesidi na gobierno so pangiletneg na sakey ya ahensia. Igetar la na satan iray magmaliw a betang, pakayari, tan kabaleg na ahensia. Diad kaunoran et onkurang la so ahensia pigaran taon kayarin niletneg itan, tan oniay ideklara na saray membro na satan: “Pigaran taon lay apalabas sanen inggetar na gobierno so magmaliw a trabaho mi. Gapoan mi la natan so kimey a nipabtang ed sikami.” Nibagam kasi ya inggetar la na gobierno pigaran taon ed asasakbay no sioparay indibidual a magmaliw a membro na satan ya ahensia? Seguradon andi. Mipadpara, abayag lan denesidi nen Jehova a sikatoy mangiletneg na espisyal ya ahensia pian paandien iray epekto na kasalanan nen Adan. Akauna lan intalaga to so klase na totoo a manserbi ed satan ya ahensia, balet aliwan saray indibidual. Sikaray pilien ed saginonor, tan mandependi ed saray desisyon a gawaen da ed bilay no kasin naabobonan ira odino andi diad kaunoran.

Anto so mundon tutukoyen nen apostol Pablo sanen inkuan ton: ‘Sikatayo so pinili na Dios ed sikato nen agni nipasen so mundo’? Say mundo a tutukoyen dia nen Pablo et aliwan say mundon inletneg na Dios sanen pinalsa to si Adan tan Eva. Ta saman a mundo et ‘maong a tuloy,’ a sigpot ya andian na kasalanan tan kaugsan. (Genesis 1:31) Agkinaukolan na satan so “karondon” manlapud kasalanan.​—Efeso 1:7.

Say mundon tutukoyen nen Pablo et samay mundon niwala kayarin nanrebelde si Adan tan Eva diad Eden, a midumaan a tuloy ed samay mundo ya orihinal a ginetma na Dios. Ginmapo itan a mundo diad impanilalak di Adan tan Eva. Satan a mundo et tugyopen na saray totoon nisian ed Dios tan naaripen ed kasalanan tan kaugsan. Sakey iyan mundo na totoo a narondon, aliwan singa si Adan tan si Eva a sigagagalan nankasalanan.​—Roma 5:12; 8:18-21.

Niresolbi a tampol nen Jehova a Dios so situasyon a resulta na impanrebelde ed Eden. Sanen linmesa so pankaukolan, sikatoy angitalaga a tampol na espisyal ya ahensia​—say Mesianikon Panarian ya uleyan nen Jesu-Kristo​—ya usaren to parad karondon na katooan manlapud kasalanan ya impatawir nen Adan. (Mateo 6:10) Ginawa itan na Dios “nen agni nipasen so mundo” na narondon a katooan, salanti, sakbay a nanilalak so rebelyoson sanasawa, si Adan tan Eva.

Kaslakan et kaukolan na totoo so manplano ta pian nasumpal so kaliktan dan gawaen. Say predestinasyon et isisiglaot ed ideyan say Dios so walaan na detalyadon plano parad uniberso a ditan  et inggeter la so amin a bengatla diad gapo. Oniay insulat nen Roy Weatherford: “Parad dakel a pilosopo, antokaman a bengatla ya andiay kompleton detalye na kada ebento et agmitukoyan ed Soberanon pakapanyari na Dios.” Talaga kasin nakaukolan na Dios a masakbay lan idetalye so kada ebento?

Si Jehova, a walaan na agmanganggan pakapanyari tan agnaparaan a kakabatan, so makayarin mangarap ed antokaman a biglaan tan ag-iilaloan a nagawa a nayarin resulta na pangaagamil na saray pinalsa to ed kawayangan dan manpili. (Isaias 40:25, 26; Roma 11:33) Nagawaan to iyan tampol anggan anggapoy detalyadon plano to. Aliwan singa saray makabos a totoo a limitado iray abilidad da, agla nakaukolan na Makapanyarin-amin a Dios so detalyado tan espisipikon plano a mangidadatak ed pansumpalan na kada indibidual diad dalin. (Uliran 19:21) Diad pigaran patalos ed Biblia, say Efeso 3:11 so anaglawi ed Dios a walaan na “andi-anggaan a pilalek” imbes a walaan na nigeter a plano.

No Panon Mon Naapektoan so Arapen Mo

Wala so gagala na Dios parad dalin, tan satan a gagala et niletneg la ed gapo. Oniay ibabaga na Apocalipsis 21:3, 4: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” On, sayan dalin so magmaliw a paraiso, unong a ginetma nen Jehova ed gapo. (Genesis 1:27, 28) Say tepet et, Kasin wadman ka? Mandependi itan ed saray desisyon a gagawaen mo natan. Ag-inggeter nen Jehova so pansumpalan mo.

Lapud dondon bagat na Anak na Dios a si Jesu-Kristo, siopaman a mangaagamil na pananisia ed sikato so nayarin makagamor na bilay ya andi-anggaan. (Juan 3:16, 17; Gawa 10:34, 35) “Say manisia ed Anak walay bilay ton andi-anggaan,” so kuan na Biblia. “Balet say agmangunor ed Anak agto nanengneng so bilay.” (Juan 3:36) Nayarian mon pilien so bilay diad panaral mo nipaakar ed Dios, ed Anak to, tan ed linawa To manlapud Biblia tan diad pangiyaplika ed naaaralan mo. Say toon onkikiwas a mitunosan ed tuan kakabatan a nikurit ed Salitay Dios so napapaseguroan a “sikato naani mareen ya andi-takot ed mauges.”​—Uliran 1:20, 33.

[Saray litrato ed pahina 5]

Aliwan singa saray ayep, saray totoo so walaan na moral ya eebatan ed saray kiwas da

[Credit Line]

Agila: Foto: Cortesía de GREFA