Kristo​—Say Tutukoyen na Saray Propesiya

‘Say panagtasi ed si Jesus sikato so espiritu na panagpropesiya.’​—APOCALIPSIS 19:10.

1, 2. (a) Kagapo na 29 K.P., anton panagdesisyon so nipaarap ed Israel? (b) Anto so konsideraen ed sayan artikulo?

 TAON 29 K.P. ed saman. Pantotongtongan a maong ed Israel so nipaakar ed insipan a Mesias. Lalon pinirawat da so isabi to lapud ministeryo nen Juan a Managbautismo. (Lucas 3:15) Imbaga nen Juan ya aliwan sikato so Kristo. Imbes, oniay imbaga to sanen tinukoy to si Jesus a taga-Nazaret: “Angiter ak na pantasi a saya sikato so Anak na Dios.” (Juan 1:20, 34) Agnambayag et tinmumbok ed si Jesus so dakel a totoo pian ondengel ed bangat to tan patambal ed sikato.

² Diad tinmumbok iran bulan et angitarya si Jehova na dakel ya ebidensya nipaakar ed Anak to. Saramay nanaral ed Kasulatan tan akaimaton ed saray ginawa nen Jesus so walaan na putel a basiyan pian manisia ed sikato. Balet, say karaklan ed akisipanan a totoo na Dios so ag-angipatnag na pananisia. Dagdaiset so amidbir a si Jesus et Kristo, say Anak na Dios. (Juan 6:60-69) Anto so gawaen yo sano nambilay kayo la ed saman? Kasin napakiwas kayon mangawat ed si Jesus bilang say Mesias insan magmaliw a matoor a patumbok to? Ikonsidera pa so ebidensya na pakabidbiran nen Jesus ya inter ton mismo sanen sikato so naakusaan a mananumlang ed Sabaton, tan imanoen so tinmumbok a prueba ya inter to ta pian napabiskeg so pananisia na saray matoor a babangatan to.

Si Jesus a Mismo so Angiter na Ebidensya

3. Antoran kipapasen so amakiwas ed si Jesus a mangiter na ebidensya nipaakar ed pakabidbiran ed sikato?

³ Panaon na Paskua ed saman nen 31 K.P. Si Jesus et walad Jerusalem. Kasumsumpal ton pinaabig so sakey a lakin mansasakit ed loob la na 38 a taon. Balet, si Jesus so pinasegsegang  na saray Judio lapud ginawa to itan ed agew na Sabaton. Sikato so inakusaan da met a managmudmora ed sagradon bengatla tan inggagaem dan pateyen lapud imbaga ton Ama to so Dios. (Juan 5:1-9, 16-18) Say impangidepensa nen Jesus ed inkasikato so angiparungtal na taloran mapuersan rason a mangombinse ed siopaman a matuan-impapuson Judio nipaakar ed tuan pakabidbiran ed si Jesus.

4, 5. Anto so gagala na ministeryo nen Juan, tan panon kaepektibo so impanumpal to ed satan?

⁴ Unona, tinukoy nen Jesus so testimonya na manangiparungtal ed sikato, si Juan a Managbautismo, a kuanto: “Nambaki kayo ed Juan, et tinasian to so katuaan. Sikato so silew nensaman a mandarlang tan onsindag, et kinaliktan yo so nanggayaga ed liwawa to ed sakey a panaon.”​—Juan 5:33, 35.

⁵ Si Juan a Managbautismo so “silew nensaman a mandarlang tan onsindag” lapud sakbay na agmakatunongan ya impangipangaw ed sikato nen Herodes, sinumpal to so ganggan na Dios ya iparaan so dalan parad Mesias. Oniay imbaga nen Juan: “Pian [say Mesias] nipatnag ed Israel, nisengeg ed saya linma ak dia a maminyag ed danum. . . . Anengneng ko so espiritu ya onleleksab a singa malapati a nanlapu ed tawen; et pinmetek ed ulo to. Et sikato so agko wari a kabat: balet say angibaki ed siak a maminyag ed danum inkuan to ed siak, Dia ed tapew na siopaman a pakanengnengan mo na espiritu ya onleksab, tan ompetek ed ulo to, sikato lanlamang so maminyag ed espiritu santo. Et anengneng ko, tan angiter ak na pantasi a saya sikato so Anak na Dios.” * (Juan 1:26-37) Si Juan so espisipikon angipabidbir ed si Jesus bilang say Anak na Dios​—say insipan a Mesias. Malinlinew so testimonya nen Juan lapud kayari na manga waloy bulan manlapud samay impatey to, oniay impatua na dakel a matuan-impanpuson Judio: “Ami’ bengabengatlan sinalita nen Juan nipaakar ed sayan too sikato so tua.”​—Juan 10:41, 42.

6. Akin a saray kimey nen Jesus so nepeg ya angombinse ed saray totoo a sikato so tinulongan na Dios?

⁶ Komadua, angusar si Jesus na sananey nin rason a mamekder ed saray kualipikasyon to bilang Mesias. Impabitar to a saray mismon maabig a kimey to so ebidensya a sikatoy tutulongan na Dios. Oniay imbaga to: “Say pantasi a wala ed siak babaleg nen say pantasi nen Juan, ta saray kimey ya inter ed siak na Ama a sumpalen ko, saray dili a kimey a gawaen ko, mantasi ra ed siak, a say Ama imbaki to ak.” (Juan 5:36) Anggan saray mamubusol ed si Jesus so agmakapangiburi ed sayan ebidensya, ya angilaktip ed dakel a milagro. “Anto so gawaen tayo, ta sayan too manggawa na amayamay a tanda?” so intepet na arum. (Juan 11:47) Balet, arum so paborablin kinmiwas tan angibaga: “Sano say Kristo onsabi manggawa kasi naani dakdakel a tanda nen saratan a ginawa na sayan too?” (Juan 7:31) Saray onderengel ed si Jesus so walad alay abig a kipapasen pian natebek da iray kalidad na Ama ya ipapatnag na Anak.​—Juan 14:9.

7. Panon a papaneknekan na Hebreon Kasulatan so nipaakar ed si Jesus?

⁷ Komatlo, impaimano nen Jesus so agnasuppiat a tasi. “Saray sulsulat, . . . saraya so mantasi ed siak,” so inkuan to, tan oniay inyarum to: “Ta no sinisia yo si Moises, sisiaen yo ak met komon, ta sikato insula’to so nipaakar ed siak.” (Juan 5:39, 46) Siempre, si Moises so sakey labat ed dakel a sakbay-Kristianon tasi ya angisulat nipaakar ed Kristo. Saray sulsulat da so mangilaktip ed nilasus a propesiya tan detalyadon listaan na saray kapolian, a manutukoy ya amin ed say Mesias. (Lucas 3:23-38; 24:44-46; Gawa 10:43) Tan komusta met so Mosaikon Ganggan? “Say Ganggan sikato so managbangat ed sikatayo pian itarok to itayo ed Kristo,” so insulat nen apostol Pablo. (Galacia 3:24) On, ‘say pantasi ed si Jesus so espiritu [odino, sigpot ya akakilingan, getma, tan gagala] na panagpropesiya.’​—Apocalipsis 19:10.

8. Akin a dakel a Judio so ag-anisia ed Mesias?

⁸ Agkayo kasi nakombinse a si Jesus so Mesias lapud amin na sayan ebidensya​—say malinew a testimonya nen Juan, saray mismon  makapanyarin gawa tan maridios a kalidades nen Jesus, tan say dakdakel a paneknek na Kasulatan? Siopaman a walaan na puron panangaro ed Dios tan ed Salita to so mainomay a makatebek ed saya tan mangagamil na pananisia ed si Jesus bilang say insipan a Mesias. Balet, say ontan a panangaro so ag-impatnag na Israel. Oniay imbaga nen Jesus ed saray onsusumpa ed sikato: “Kabat ta kayo, ya anggapo ed inkasikayo so aroy Dios.” (Juan 5:42) Imbes ya anapen da so “dayew a manlapu ed Dios,” ‘aawaten da so dayew na sakey tan sakey.’ Agpankelawan sirin no akin ya ag-ira makapitunosan ed si Jesus, a mangipupulisay ed ontan a panag-isip a singa si Ama to!​—Juan 5:43, 44; Gawa 12:21-23.

Apabiskeg Lapud Mapropetikon Pasingawey

9, 10. (a) Akin a nipanpanaon so sakey a tanda parad saray babangatan nen Jesus? (b) Anto so makatantandan insipan nen Jesus ed saray babangatan to?

⁹ Masulok a sakey taon lay linmabas manlapu la’d inter nen Jesus imay asalambit a prueba na inka-Mesias to. Linmabas lay Paskua na taon 32 K.P. Dakel ed saray anisia so agla tinmumbok ed sikato, a nayarin makasengeg ed panamasegsegang, materyalismo, odino saray kapagaan ed bilay. Arum so nayarin awetwet odino adismaya lapud ag-inawat nen Jesus iray pansasagpot na totoo a sikatoy gawaen dan ari. Sanen susuboken na saray Judion relihyoson lider, agto angiparungtal na tanda manlapud tawen a kigloriaan ton dili. (Mateo 12:38, 39) Nayarin awetwet so arum lapud agto itan ginawa. Niarum ni, ginapoan nen Jesus ya imparungtal ed saray babangatan to so bengatlan mairap dan natalosan, salanti, ‘kaukolan toy onla ed Jerusalem, tan mantepel na amayamay a bengatla ed saray mamasiken, tan ed manunaan iran saserdote tan eskribas, tan sikatoy pateyen da.’​—Mateo 16:21-23.

¹⁰ Manga siamera anggad samploran bulan ni so palabasen insan la “ontaynan [si Jesus] ed sayan mundo ya onla ed Ama.” (Juan 13:1) Lapud papagaan to iray matoor a babangatan to, insipan nen Jesus ed arum ed sikara so mismon bengatla ya agto imparungtal ed saray andiay-pananisian Judio​—sakey a tanda manlapud tawen. “Tua kuan ko’d sikayo,” so imbaga nen Jesus, “walaray arum ed saray wadia, ya anggan panon agda naani natawayan so patey, anggad pakanengneng da ed Anak na too ya onsabi ed panarian to.” (Mateo 16:28) Mapatnag ya aglabay ya ibaga nen Jesus a walaray babangatan to ed saman a manbilay ni sano niletneg so Mesianikon Panarian ed 1914. Say gagala nen Jesus et pian ipanengneng to ed taloran maapit a babangatan to so makapakelkelaw a pagpaunan kiparungtal na gloria to ed pakayari na Panarian. Sayan pasingawey et tinawag a transpigurasyon.

11. Deskribien pa so nipasingawey a transpigurasyon.

¹¹ Kayari na anem agew, inawit nen Jesus si Pedro, Santiago, tan Juan ed atagtagey a palandey​—a nayarin diad toktok na Palandey Hermon. Diman et “nauman so nengneng [nen Jesus] ed arap da; et say lupa to sinminag a singa say banwa, tan saray kawes to nagmaliw ya amputi a singa liwawa.” Pinmayawar met ed saman si propeta Moises tan Elias, a mitotongtong ed si Jesus. Sayan makapakelkelaw ya ebento so posiblin agawa ed labi kanian lalon nagmaliw itan a maliwliwawa. Diad tua, petepeteg so nengneng na satan kanian inyopresi  nen Pedro so pangipaalagey na taloran tolda, a sansasakey ira di Jesus, Moises, tan Elias. Sanen mansasalita si Pedro, walay maliwliwawan lurem ya anakbong ed sikara tan oniay imbaga na boses manlapud lurem: “Sikato’ya so inarok ya Anak, a sikatoy panliketan kon maong; sikato so dengelen yo.”​—Mateo 17:1-6.

12, 13. Anto so epekto na nipasingawey a transpigurasyon ed saray babangatan nen Jesus, tan akin?

¹² On, si Pedro so agano nin amaneknek a si Jesus so “Kristo, ya Anak na Dios a mabilay.” (Mateo 16:16) Balet isipen pa so pakadngel ed mismon testimonya na Dios, a mamepekder ed pakabidbiran tan betang na alanaan ya Anak to! Agaylan makapabiskeg-pananisian eksperiensya parad si Pedro, Santiago, tan Juan so pakanengneng ed nipasingawey a transpigurasyon! Lapud apabiskeg a maong so pananisia ra, sikara ed saman so lalon akaparaan ed walan nagawa ed arapen tan ed importantin betang da ed iletneg nin kongregasyon.

¹³ Nipaslep a maong ed saray babangatan so transpigurasyon. Kayari na masulok a 30 a taon, oniay insulat nen Pedro: “Inawat [nen Jesus] ed Dios Ama so galang tan gloria, nen sinmabi ed sikato a nanlapu ed Sankatagyan a gloria so sakey a boses a nankuan; Saya sikato so Anak’ko ya inararo, diad sikato apaliket ak a maong: Et sikami nadngel mi so sayan boses a nanlapu ed tawen, nen iba to kami a wala ed masantos a palandey.” (2 Pedro 1:17, 18) Nandinayew met si Juan ed saman ya ebento. Masulok a 60 a taon kayari na saman ya inkagawa, sikato so mapatnag ya anaglawi ed satan panamegley na saray salitan: “Anengneng mi so gloria to, singa gloria na bogbogtong a nanlapu ed Ama.” (Juan 1:14) Ingen, say transpigurasyon et aliwan say unor ed saray pasingawey a nipanengneng ed saray patumbok nen Jesus.

Lalon Impakaliwawaan na Saray Matoor ed Dios

14, 15. Diad anton dalan a nambilay ni si apostol Juan anggad insabi nen Jesus?

¹⁴ Kayari na inkioli to, si Jesus so pinmayawar ed saray babangatan to diad gilig na Dayat na Galilea. Oniay imbaga to ed si Pedro diman: “No labay ko a [si Juan] natilak ya angga ed yakar ko dia, anto so wala ed satan ed sika?” (Juan 21:1, 20-22, 24) Kasin say kabaliksan na saratan a salita et mas andukey so pambilay nen Juan nen say arum ya apostoles? Ompatnag ya ontan, lapud sikato so matoor ya akapanlingkor ni ed si Jehova ed ngalngali 70 a taon. Balet, wala ni so kabaliksan na imbaga nen Jesus.

¹⁵ Ipapanonot ed sikatayo na balikas ya “angga ed yakar ko” so impanukoy nen Jesus ed ‘isabi na Anak na too ed panarian to.’ (Mateo 16:28) Nambilay ni si Juan anggad insabi nen Jesus diad pantalos ya anengneng nen Juan ed saginonor so mapropetikon pasingawey nipaakar ed si Jesus ya onsasabi bilang manuley ed Panarian. Diad pansamposampot lay bilay nen Juan, sanen sikatoy nibantak ed isla na Patmos, inawat to so Apocalipsis tekep na amin a makapakelaw iran mapropetikon tanda na saray ebento a nagawa legan na “agew na Katawan.” Apakiwas a tuloy si Juan ed saratan a makapakelkelaw a pasingawey lapud sanen imbaga nen Jesus ya: “On: peteg, onla ak dian magano,” oniay inkelyaw nen Juan: “Amen! Gala, Katawan a Jesus.”​—Apocalipsis 1:1, 10; 22:20.

16. Akin ya importante a mantultuloy tayon pabiskegen so pananisia tayo?

¹⁶ Saray matuan-impanpuso a nambilay nen inmunan siglo so angawat ed si Jesus bilang say Mesias tan anisia ira ed sikato. Lapud kasmak a kakulangan ed pananisia ed kaliberliber da, say kimey a nepeg dan gawaen, tan subsubok a  manatalaran ed sikara, saramay nagmaliw a mananisia so kaukolan a manpabiskeg. Si Jesus so angiter na daakan a paneknek nipaakar ed inka-Mesias to ontan met ed saray mapropetikon pasingawey a pakaliwawaan pian napaseseg iray matoor a patumbok to. Natan, abayag itayo lan manbibilay ed “agew na Katawan.” Magano lan deralen nen Kristo so interon marelmeng a sistema na bengabengatla tan iliktar to so totoo na Dios. Nepeg a pabiskegen tayo met so pananisia tayo diad panganamot ed amin a probisyon nen Jehova parad espiritual a pankaabigan tayo.

Niliktar Manlapud Kabilungetan tan Kairapan

17, 18. Anton baleg a pandumaan so apatnagan nen inmunan siglo diad baetan na papatumbok nen Jesus tan saramay onsusumpa ed gagala na Dios, tan anto so nansumpalan na kada grupo?

¹⁷ Kayari na impatey nen Jesus, makpel ya inunor na saray babangatan so ganggan ton mantasi nipaakar ed sikato dia “ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Anggaman pinasya so panamasegsegang ed saman, bebendisyonan nen Jehova so kapkapangiletneg a Kristianon kongregasyon na espiritual a pakaliwawaan tan dakel nin balon babangatan.​—Gawa 2:47; 4:1-31; 8:1-8.

¹⁸ Diad biek a dapag, mas ombibilunget so manatalaran ed saramay onsusumpa ed maong a balita. “Say dalan na marelmeng sikato so singa bilunget,” so inkuan na Uliran 4:19. “Agda amta no anto so kagapolan da.” Linmoor so “bilunget” nen 66 K.P. sanen kinobkob na saray puersa na Roma so Jerusalem. Kayari na temporaryon inyatras na saray Romano lapud ag-amtan rason, pinmawil ira nen 70 K.P., a ginaygay da la ed saman so syudad. Unong ed Judion manag-awaran a si Josephus, masulok a sakey milyon a Judio so inatey. Balet, akaliktar iray matoor a Kristiano. Akin? Lapud sanen ag-atuloy so inmunan impangubkob, inunor da so ganggan nen Jesus ya ombatik ira.​—Lucas 21:20-22.

19, 20. (a) Akin ya agnepeg ya ontakot iray totoo na Dios diad panasingger lay anggaan na kaplesan a sistema? (b) Anton nikabkabiig ya aralem a pakatalos so inter nen Jehova ed totoo to diad saray dekada sakbay na 1914?

¹⁹ Mipadpara so kipapasen tayo. Say onsabin baleg a kairapan so mankabaliksan lay anggaan na interon marelmeng a sistema nen Satanas. Balet agnakaukolan ya ontakot so totoo na Dios, lapud oniay insipan nen Jesus: “Nia, wala ak a naynay ed sikayo, ya angga ed kasampotan na mundo.” (Mateo 28:20) Pian napabiskeg so pananisia na inmuunan babangatan to tan niparaan ira ed nagawa ed arapen, inter nen Jesus ed sikara so pagpaunan panangiparungtal na mangatatawen a gloria to bilang Mesianikon Ari. Komusta met natan? Nen 1914 et satan a pagpaunan panangiparungtal so nagmaliw a petepeteg. Tan agaylan makapabiskeg-pananisia parad saray totoo na Dios a petepeteg la itan! Isisipan na satan so alay abig ya arapen, tan lalon inmaralem so pakatalos na saray lingkor nen Jehova ed satan a petepeteg lan nagagawa. Diad onloloor a kipapasen na mundo natan, “say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.”​—Uliran 4:18.

²⁰ Sakbay ni ingen na 1914, atalosan la na melag a grupo na saray alanaan a Kristiano iray importantin katuaan nipaakar ed ipawil na Katawan. Singa bilang, atebek da ya ag-itan nanengneng, unong ya impabitar na samay duaran anghel a nampanengneng ed saray babangatan nen 33 K.P. legan ya onsesegep si Jesus  ed tawen. Sanen asaniban lay lurem si Jesus manlapud pakanengneng na saray babangatan, oniay imbaga na saray anghel: “Saya si Jesus, a naawat ed tawen a nanlapud sikayo, ontan so isabi to unong na anengneng yo ya inyakar to ed tawen.”​—Gawa 1:9-11.

21. Anto so singbaten ed ontumbok ya artikulo?

²¹ Say inyakar nen Jesus ed tawen so naimatonan lambengat na saray matoor a patumbok to. Singa ed transpigurasyon, ag-itan niparungtal ed publiko; agni ingen amta na interon mundo so agawa ed saman. Ontan met ed ipawil nen Kristo ed pakayari na Panarian. (Juan 14:19) Saray matoor lambengat ya alanaan a babangatan to so makatebek ed maarin kiwawala to. Diad ontumbok ya artikulo, nengnengen tayo no panon a satan ya aralem a pakatalos so walaan na mabiskeg ya epekto ed sikara, a mamantok ed katipon na minilyon a magmaliw a mangaraldalin ya uuleyan nen Jesus.​—Apocalipsis 7:9, 14.

[Paimano ed leksab]

Kasin Natandaan Yo?

• Sanen inakusaan si Jesus a manusumlang ed Sabaton tan managmudmora ed sagradon bengatla, anton ebidensya so impatnag to ta pian napabitar a sikato so Mesias?

• Panon ya agunggonaan ed transpigurasyon iray inmuunan babangatan nen Jesus?

• Anto so labay ya ibaga nen Jesus sanen inkuan ton manbilay ni si Juan anggad isabi to?

• Nen 1914, anton pagpaunan panangiparungtal so nagmaliw a petepeteg?

[Tepetepet Parad Panagaral]

[Saray litrato ed pahina 10]

Impabitar nen Jesus iray kualipikasyon to bilang Mesias

[Litrato ed pahina 12]

Say nipasingawey a transpigurasyon so makapabiskeg na pananisia

[Litrato ed pahina 13]

Nambilay ni si Juan anggad ‘insabi’ nen Jesus