‘Say Tulong Ko et Manlalapu ed si Jehova’

Sano Magmaliw a “Balanget na Gayaga” so Inkatakken

“SATAN la so sankaabigan a bilay,” so inkuan na 101 años a si Muriel. Oniay impanukoy ed satan na 70 años a si Theodoros: “Talagan sakey a pribilehyo!” Oniay inkuan met nen Maria a 73 años: “Anggapo lay magmaong ya akapangusaran koy bilay ko.” Amin da so nanlingkor ed si Jehova a Dios legay bilay da.

Kaslakan la iray ontan a maedad la ed dakel ya aktibon mandadayew ed si Jehova ed sankamundoan. Anggaman ed itatakken, saray kapagaan ed bunigas, tan arum niran mairap a kipapasen, siansia nin manlilingkor ira ed Dios diad interon-kamarerwa. Diad loob na Kristianon kongregasyon, saray matoor a maedad la so galgalangen ya ehemplo na maridios a debosyon. Si Jehova so mamapablin tuloy ed serbisyo na saray maedad la, anggaman sikaray nayarin lilimitaan na saray sirkumstansya ra. *​—2 Corinto 8:12.

Say libro na saray Salmo so matukotukoy ya anaglawi ed kalidad na bilay a nailaloan na saray matoor a maedad la a niwala ed sikara. Nayarian day magmaliw a singa sakey a matakken tan abalbaleg a kiew a siansia nin manbubunga. Oniay inkanta na salmista nipaakar ed saray matoor a maedad la: “Sikara manbunga ni ran siansia ed inkamasiken; sikara makbol tan malangbot ira.”​—Salmo 92:14.

Napapagaan so arum ompan sikaray ikaindan tan ibaliwala sano onkapuy la ra lapud itatakken. Oniay inkerew nen David ed Dios: “Agmo ak ipulisay naani no panaon na inkamasiken la; agmo ak ikaindan naani no say biskeg ko et onkulang la.” (Salmo 71:9) Panon itayon onaligwas imbes ya onkapuy anggaman ontatakken? Diad pangipatnag na maridios a kalidad ya inkatunong. “Say matunong onsalindak a singa say kiew a palma,” so inkanta na salmista.​—Salmo 92:12.

Saramay manguusar ed bilay da diad matoor a panaglingkor ed Dios so kaslakan a manbunga ni na maabig anggan sano ontakken ira. Bilang resulta, dakel ed saray bini ya intanem da parad inkasikara odino parad arum so ontutubo tan ombabaleg a manbubunga na kaabigan. (Galacia 6:7-10; Colosas 1:10) Siempre, saray totoo a mamiperdi ed bilay da ed saray sinisiblet a gegemtan a mangibabaliwala ed saray dalan na Dios, so kaslakan a samet labat lay kablian da sano ontakken ira.

Say inkatunong bilang adorno na inkatakken so nidanet met ed libro na Biblia ya Uliran. Oniay nabasa tayo ditan: “Say ubanan ya ulo sikato so balanget na gayaga; naromog ed dalan na inkatunong.” (Uliran 16:31) On, say inkatunong so pakapatnagan na akindalem a karakpan. Say pankurang a matunong legan na andukey a bilay so mangitarok na galang. (Levitico 19:32) Sano say ubanan ya ulo et atekepan na kakabatan tan kasimpitan, satan so kigalangan.​—Job 12:12.

Parad si Jehova, say maptek a panagbilay ya inusar diad panlingkor ed sikato so makapalikliket. Oniay ibabaga na Kasulatan: “Angga ni ed inkamasiken Siak iman [si Jehova], tan angga ni ed panuban awiten ta kayo: ginawak la, tan awiten ko naani; on, awiten ko naani tan yawak.” (Isaias 46:4) Agaylan makaligliwan naamtaan ya isisipan na maaron mangatatawen ya Ama tayo a sustunien tan tulongan to iray matoor ed sikato diad itakken da!​—Salmo 48:14.

 Lapud momoriaen nen Jehova a makapalikliket so bilay ya uusaren ed matoor a panaglingkor ed sikato, agta makanepegan met itan na panagrespeto na arum? Diad pangipatnag ed panmoria na Dios, pablien tayo iray maedad lan kapananisiaan. (1 Timoteo 5:1, 2) Mananap itayo sirin na praktikal iran paraan pian nipatnag so Makristianon aro diad pangasikaso ed saray pankaukolan da.

Pankurang ed Dalan na Inkatunong Diad Saginonor a Parte na Bilay

“Dia ed dalan na inkatunong wala so bilay,” so ipapaseguro ed sikatayo nen Solomon. (Uliran 12:28) Say itatakken so agmangamper ed siopaman pian makapankurang ed sayan basbas ed saginonor a parte na bilay. Singa bilang, diad Moldova, wala so 99-años a laki ya angusar ed inkatobonbalo to pian iyalibansa iray ugagep na Komunista. Ikikinon to so personal ya impakapitongtong to ed saray bantog a lider na Komunista, a singa si V. I. Lenin. Anggaman ontan, diad inkapuy tan inkagba na Komunismo, say bilay na sayan masiken so naandian na gagala tan direksion. Balet sanen impaliwawa ed sikato na saray Tasi nen Jehova a say Panarian na Dios lambengat so peteg a makaresolbi ed saray problema na katooan, inawat to so katuaan ed Biblia tan maseeseet a nanaral ed Kasulatan. Say patey lambengat so akaamper ed sikaton magmaliw a bautismadon lingkor nen Jehova.

Sanen naaralan na sakey ya 81-años ya akulaw diad Hungary iray kakaukolanen na Dios nipaakar ed moral, atalosan to a nepeg toy mikasal ed laki a pigay taon lan piaamongan to. Makmakpel ton impaliwawa ed lakin kaamong to so panmoria to a nibase ed Biblia. Sikato so asurprisa tan aliketan lapud inmabobon so laki a sikaray mankasal. Sanen nagmaliw lan legal so panaamong da, sikatoy maples ya inmaligwas ed espiritual. Kayari na waloy bulan a panaaral to ed Biblia, sikatoy nagmaliw ya agbautismadon manangipalapag, tan ag-abayag et sikato lay abautismoan. Peteg a say inkatunong so mangiter na balanget na tuan gayaga odino karakpan ed saray maedad la!

On, makaseguro iray matoor a maedad lan Kristiano ya interesado so Dios ed sikara. Ag-ikaindan nen Jehova iraman so mansiasiansian matoor ed sikato. Imbes, isisipan to a sikaray iwanwan, tulongan, tan sustunien to anggan sano maedad la ra. Diad ontan et napaneknekan da a tua iray salita na salmista: ‘Say tulong ko et manlalapu ed si Jehova.’​—Salmo 121:2.

[Paimano ed leksab]

[Blurb ed pahina 9]

“Say ubanan ya ulo sikato so balanget na gayaga; naromog ed dalan na inkatunong.”​—ULIRAN 16:31

[Kahon ed pahina 8]

IYAANSAKIT NEN JEHOVA IRAY MAEDAD LAN LINGKOR TO

“Onalagey ka naani ed arapan na ubanan ya ulo, et pagalangan mo naani lupa na masiken.”​—Levitico 19:32.

“Angga ni ed inkamasiken Siak iman, tan angga ni ed panuban awiten ta kayo: ginawak la, tan awiten ko naani.”

​—Isaias 46:4.