Tepetepet Manlapud Saray Managbasa

Panon a nansiansia nin Nazareo si Samson kayari ton diniwit iray bangkay na saray pinatey to?

Nensaman, saray indibidual ed Israel so makapanboluntaryon mansamba tan magmaliw a sakey a Nazareo ed partikular a peryodo na panaon. * Oniay sakey a panameget ed sakey a nanggawa na ontan a samba: “Amin na saray agew na insian to nipaakar ed kinen Jehova, agnaani onaasingger ed bangkay na inatey. Agto naani tilolan so inkasikato nisengeg ed kinen ama to, odino ed kinen ina to, nisengeg ed lakin agi to odino dia ed biin agi to, no ompatey ira.” Panon balet no walay too ya “ompatey a bigla ed abay to”? Say ontan ya agginagalan pakadiwit ed bangkay so mantilol ed inka-Nazareo to. Kanian, oniay nibaga: “Saray una ya agew andi biang to [odino agnibilang] naani.” Kaukolan to so ondalan ed panaggogol tan gapoan to lamet so peryodo na inka-Nazareo to.​—Numeros 6:6-12.

Duma balet so kipapasen na inka-Nazareo nen Samson. Sakbay a nianak si Samson, oniay inkuan na anghel nen Jehova ed ina to: “Nia, manlukon ka, mangiyanak ka na sakey a laki: et anggapo so pangiskis ya onlabas ed ulo to, ta say ugaw sikato naani Nazareo ed Dios a manlapu ed eges: et igapo to naani ya ilaban so Israel ed lima na saray Filisteo.” (Uko-ukom 13:5) Si Samson so agnansamba nipaakar ed inka-Nazareo. Say Dios so angitalaga ed sikaton magmaliw a Nazareo, tan say inka-Nazareo to et legay-bilay. Say panameget nipaakar ed paniwit ed bangkay so ag-onaplika ed kipapasen to. Ta no ontan, insan sikatoy agginagalan makadiwit na bangkay, panon to nin nigapo lamet so legay-bilay ya inka-Nazareo a nisipor ed inkianak to? Mapatnag sirin a diad pigaran dalan et midumaan iray kakaukolanen ed saray legay-bilay a Nazareo ed saramay boluntaryon Nazareo.

Imanoen so ingganggan nen Jehova ed saray taloran Nazareo ed legay-bilay ya abitla ed Biblia​—si Samson, Samuel, tan Juan a Managbautismo. Singa nipaimano la niman, kinaukolan ya agmanpapuklis si Samson. Nipaakar ed inginew ni labat ya anak to, si Samuel, oniay insamba nen Ana: “Sikato so iter ko ed Jehova ed saray amin ya agew na bilay to tan anggapo so pangiskis ya onlabas ed ulo to.” (1 Samuel 1:11) Nipaakar met ed si Juan a Managbautismo, oniay inkuan na anghel nen Jehova: “Ag[to nepeg] ya oninum na alak tan iinumen a mabayani.” (Lucas 1:15) Niarum ni, “si Juan nankawes na bagoy kamelyo, tan sakey a balkes a katat so niliber ed awak to; et say tagano  to nensaman saray duron tan dilo ed takel.” (Mateo 3:4) Anggapo ed sikaran talo so niganggan ya ag-onasingger ed bangkay.

Anggaman sakey a Nazareo, sakey si Samson ed saray ukom a tinuro nen Jehova pian iliktar iray Israelita manlapud saray managsamsam da. (Uko-ukom 2:16) Tan diad panusumpal ed sarayan asainmin et sikatoy akabemben na saray bangkay. Diad sakey ya inkagawa, amatey si Samson na 30 a Filisteo insan to ira nilakseban. Diad saginonor, sikatoy angabil ed saray kalaban, ya imbunton ‘to ray tapi tan ulpo ra ed baleg ya impamatey.’ Sikatoy angala met na tariwan panga na asno ya impamatey to ed sanlibo a lalaki. (Uko-ukom 14:19; 15:8, 15) Ginawa nen Samson iyan amin diad panangabobon tan pananulong nen Jehova. Sikato so tinukoy ed Kasulatan bilang toon walaan na napanuliranan a pananisia.​—Hebreos 11:32; 12:1.

Kasin say balikas a binalongatngat nen Samson so sakey a leon a singa ‘impamalongatngat ed sakey a kilaw a kanding’ et mangisusuheri a kaslakan lan gagawaen so pamalongatngat ed kilaw a kanding nen panaon to?

Anggapoy ebidensya a diad panaon na saray Ukom na Israel et kaslakan la ed totoo so pamalongatngat ed saray kilaw a kanding. Oniay ibabaga na Uko-ukom 14:6: “Say espiritu nen Jehova linma a sankamakapanyarian ed [si Samson], et [say kilaw a leon] so binalongatnga’to a singa impamalongatnga’to komon na sakey a kilaw a kanding; et anggapo nensaman so bengatla a wala ed lima to.” Sayan komento et nayarin sakey a panangiyilustra.

Say balikas a “binalongatnga’to” et nayarin walaay duaran kabaliksan. Nayarin binalongatngat to iray panga na leon odino biningbingkas to itan ed antokaman a paraan. No say tutukoyen na sayan balikas et samay inmuna, andi-duaruwan sara-sarag na sakey a too a gawaen so ontan ed sakey a kilaw a kanding. Diad sayan kipapasen, say panangipareng so mangiyiilustra ya anggaman kalimaliman tinalo nen Samson so leon et main-inomay ton ginawa itan a singano sakey labat a kilaw a kanding so leon. Panon to balet no si Samson so amatey ed leon diad impamingbingkas to ed satan? Diad ontan et nepeg a talosan so komento bilang sakey a panangikompara (simile). Say punto la’d satan na panangikompara et say espiritu nen Jehova so amabiskeg ed si Samson pian nagawaan to so sakey a kimey a mankaukolan na ekstraordinaryon biskeg. Diad dinanman a kipapasen, say panangikompara a nikurit ed Uko-ukom 14:6 so mangiyiilustra a diad tulong nen Jehova et atalo nen Samson so mabisbiskeg tan masebeg a leon a singa nagawaan na sakey ya ordinaryon too ed kilaw a kanding.

[Paimano ed leksab]