Kasin Mamapawalay Bunga so Katuaan ed Saray Babangatan Mo?

SANEN imbaga na kalangweran ya Eric ya agto la labay so nakabat bilang sakey a Tasi nen Jehova, agonigon iray ateng to. Agda atalaranan itan. Sanen ugaw ni si Eric, sikatoy mibibiang ed panagaral na pamilya ed Biblia, onaatendi ed saray Kristianon miting, tan mimila met a manpulong a kaibay kongregasyon. Ompatnag a sikatoy talagan walad katuaan, a singa panangibaga. Balet natan ta tinmaynan la ed abung, amoria na atateng to ya agto impapuso so katuaan a walad Biblia. Lapud satan et talagan abigla tan adismaya ira.

Ontan met so nalilikna na arum sano ag-iilaloan ya ontunda lan paiyaralan na Biblia so babangatan. Diad ontan iran kipapasen, mabetbet ya itetepet na totoo ed inkasikara so, ‘Akin et agko iya atalaranan?’ Bueno, posible kasin antis a nagawa so espiritual a desyang et nadetermina la no kasin mamapawalay bunga so katuaan ed saray babangatan tayo? Nipaakar ed satan, panon tayon naseguro ya oneepekto so katuaan ed sikatayo ontan met ed saray babangatan tayo? Diad kabkabat a parabolo nen Jesus nipaakar ed managtanem, sikatoy angitarya na tulong pian naebatan irayan tepet.

Nepeg ya Ontanek ed Puso so Katuaan

“Say ilik sikato so salita na Dios,” so inkuan nen Jesus. “Say [nitanem] dia ed mabuna a dalin, saraya so totoo a dia ed masimpit tan maong a puso, nen nadngel da so salita, sikato so binembenan da, tan manbunga ra a maanos.” (Lucas 8:11, 15) Kanian, antis a makapawalay resulta so katuaan na Panarian ed saray iyaaralan tayo, kaukolan nin onlamot itan ed piguratibon puso ra. Pinaseguroan itayo nen Jesus a singa ed maong a bini a nitanem ed mabunan dalin, bektaman ya asabi na madibinon katuaan so sakey a maong a puso, satan so onipekto a tampol tan mamawala na bunga. Antoray nepeg tayon anapen?

Nepeg a say kondisyon na puso so imanoen tayo, aliwan say akinpaway a nengneng. Aglawas napatnagan so peteg a kipapasen na puso na sakey diad basta pantutultuloy to ed rotina na panagdayew. (Jeremias 17:9, 10; Mateo 15:7-9) Kaukolan a mas ni nen satan so imanoen tayo. Nepeg a walay pihon pananguman ed saray pilalek, motibo, tan prayuridad na iyaaralan. Kaukolan a babayuboan to so balon personalidad, a mitunosan ed linawa na Dios. (Efeso 4:20-24) Diad pangiyilustra: Sanen arengelan na saray taga-Tesalonica so maong a balita, inkuan nen Pablo ya inawat dan tampol itan bilang salita na Dios. Balet ta say sinmaginonor ya impansungdo, inkamatoor, tan panangaro ra so angombinse ed sikato ya ‘onggagawa met [odino one-epekto]’ so katuaan ed sikara.​—1 Tesalonica 2:13, 14; 3:6.

Siempre, agmanbayag et napatnagan lanlamang ed kakikiwas na iyaaralan so antokaman a walad puso to, a singa ipapanengneng na kaso nen Eric. (Marcos 7:21, 22; Santiago 1:14, 15) Makapaermen ta nayarin anggapo lay nagawaan sano binmitar la iray makapuy ya ugali ed kakikiwas na sakey a too. Say angat sirin et no panon a nabidbiran iray espisipikon kakapuyan sakbay iratan a magmaliw a pakatiroran ed espiritual. Kaukolan tayon amtaen no panon a natebek so kipapasen na piguratibon puso. Panon tayon nagawaan itan?

Manaral ed si Jesus

Siempre, sarag nen Jesus a basaen so kapusoan tekep na inkayadyari. (Mateo 12:25) Agtayo sarag itan. Ingen ta impanengneng to ed sikatayo a natebek tayo met iray pilalek, motibo, tan prayuridad  na sakey a too. No panon a manguusar so sakey a marunong a doktor na nanduruman panag-eksamin pian naamtaan so deperensya na literal a puso na pasyente, inusar nen Jesus so Salita na Dios pian “naagwat” tan niparungtal so ‘kanonotan tan getma na puso,’ anggaman saraya so agni naiimano na karaklan.​—Uliran 20:5; Hebreos 4:12.

Alimbawa, diad aminsan ya inkagawa et tinulongan nen Jesus si Pedro a natebek so sakey a kakapuyan a nagmaliw a pakagapolan diad saginonor. Amta nen Jesus a sikatoy inaro nen Pedro. Diad tua, diad saman et kapkapangipudir nen Jesus ed si Pedro so “tombok na panariay tawen.” (Mateo 16:13-19) Balet, kabat met nen Jesus, a pupuntiryaen nen Satanas iray apostol. Onsabi panaon et sikaray nidunget ed pirmin desdes a mikompromiso. Mapatnag ya atebek nen Jesus a walaray kakapuyan na pananisia na pigara ed saray babangatan to. Kanian agto nansuyat ya impaimano no antoy kaukolan dan paaligwasen. Imanoen no panon to itan ya imparungtal ed sikara.

Oniay ibabaga na Mateo 16:21: “Nanlapud saman a panaon ginapoan nen Jesus ya impatnag ed saray babangatan to, a kaukolan toy . . . mantepel . . . tan sikatoy pateyen.” Imanoen ya aglabat imbaga nen Jesus ed sikara no antoy nagawa ed sikato, noagta impatnag odino impanengneng to met itan ed sikara. Maseguron sikatoy angusar na saray teksto ed Biblia a singa say Salmo 22:14-18 odino Isaias 53:10-12, a mangipapatnag a say Mesias so kaukolan a napairap tan ompatey. Antokaman niray inusar nen Jesus, diad impangibasa odino direktan impangaon ed Kasulatan, sikatoy angiter ed si Pedro tan ed arum nira na pankanawnawan onkiwas unong ed walad puso ra. Panon kasi ikiwas da ed onsabin panamasegsegang?

Makapasurprisa ta anggaman apatnagan la ed si Pedro so inkakpel tan inkaseseg, say bengat-bengat ya inkiwas to ed sayan pankanawnawa so angiparungtal na sakey a baleg a kakapuyan ed kaisipan to. “Niyarawi komon ed sika [iya], Katawan,” so inkuan to, “saya agkomon nagawa anggan kapigan ed sika.” Malinew ya apikewet so panagnonot nen Pedro, lapud unong ya impabitar nen Jesus, agnononoten nen Pedro iray “bengatlan nipaakar ed Dios, noag saray bengatlan nipaakar ed saray totoo”​—sakey a baleg a lingo a makapangitonton ed grabe iran pansumpalan. Kanian anto so ginawa nen Jesus? Kayarin binaat nen Jesus si Pedro, oniay inkuan to ed sikato tan ed saray arum nin babangatan: “No siopaman a too et labay toy ontumbok ed siak, benegan toy dili ya inkasikato et laen to so krus to [“panamairapan a kiew,” NW] tan tumboken to ak.” Diad impangaon to ed Salmo 49:8 tan 62:12, sikatoy mapangasin angipanonot ed sikara a say andi-anggaan ya ilalo ra so akadepende ed Dios, aliwan diad totoo ya agmakapangitarya na kilalaban.​—Mateo 16:22-28.

Anggaman diad onsaginonor et temporaryon adaeg si Pedro na takot tan amitlo ton imburi si Jesus, saya tan say arum niran impantotongtong da so andi-duaruwan tinmulong ed si Pedro pian napaabig a tampol so espiritualidad to. (Juan 21:15-19) Kayarin tuloy na 50 ya agew, si Pedro so makpel ya inmalagey ed arapan na karaklan diad Jerusalem pian tasian so inkioli nen Jesus. Diad tinmumbok iran simba, bulan, tan taon, sipapakpel ton inarap so aminpigan inkaerel, impamekpek, inkipangaw, sirin et angiletneg na matalonggaring ya ehemplo na andi-takot ya impanmatoor.​—Gawa 2:14-36; 4:18-21; 5:29-32, 40-42; 12:3-5.

Antoy naaralan tayo ed saya? Naimanom ta no antoy ginawa nen Jesus pian naagwat tan  niparungtal so walad puso nen Pedro? Unona, sikatoy amili na matukoy iran teksto pian niyapasakey so imano nen Pedro ed samay labay Ton ipabitar. Komadua, inikdan to si Pedro na pankanawnawan onkiwas manlapud puso to. Kaunoran, sikato so angitarya na kaaruman niran Makasulatan a simbawa pian natulongan si Pedro ya umanen so panagnonot tan liknaan to. Nayarin isipen mo ya agmo nayarian so onian paraan na panagbangat, balet ta konsideraen tayo pa so duaran eksperiensya a mangipapanengneng no panon a say panagparaan tan panagmatalek ed si Jehova so ontulong ed sikatayon amin pian naalig so ehemplo nen Jesus.

Agwaten so Wala ed Puso

Sanen naamtaan na sakey a Kristianon ama a say duaran ilalak ton laki, a walad unona tan komadua a grado, so anikot na kendi ed lamisaan na maestra ra, pinayurong to ira tan akikatunongan ed sikara. Imbes ya ipasen to labat itan bilang agmakapuy tan inuugaw a kagagawa, oniay inkuan na ama: “Nanggunaetan kon paibalikas manlapud puso ra no antoy amakiwas ed sikaran gawaen iyan makapuy a bengatla.”

Impanonot na ama ed sikara imay agawa ed si Akan, unong a nisalaysay ed Josue kapitulo 7. Atebek a tampol na saray ugugaw so punto tan inaksobi ray lingo ra. Nakokonsiensia la ra. Kanian impabasa na ama ed sikara so Efeso 4:28, ya oniay ibabaga na satan: “Saman so matakew nensaman agkomon la mantakew: noag mansagpot . . . pian wala so niiter to ed satay walay pankaukolan to.” Diad impangibaki to ed ananak to a manaliw na kendi pian iter ed maestra bilang kasalat na inala ra, lalon nidanet so Makasulatan a simbawa.

“Panggugunaetan min ekalen ed ananak mi so antokaman a makapuy a motibo bektaman ya atebek mi iratan,” so inkuan na ama, “tan sasalatan mi iratan na maabig tan maralus iran motibo diad pikakatunongan mi ed sikara.” Diad pangaalig da ed si Jesus sano babangatan da iray anak da, agamoran na sarayan ateng iray maabig a resulta diad inlabas na panaon. Diad kaunoran, sayan sanagi so naimbitaan a magmaliw a kabiangan ed saray manbubulontaryo ed Brooklyn Bethel, a say sakey et manlilingkor ni kayari na 25 a taon.

Imanoen no panon ya atulongan na sananey nin Kristiano so iyaaralan to na Biblia. Satan ya iyaaralan so onaatendi la ed pantitipon, mibibiang la diad ministeryo, tan imbalikas to lay pilalek ton nabautismoan. Balet, ompatnag a sikatoy manmamatalek a maong ed inkasikato imbes a diad si Jehova. “Agto namomoria a sobra lay inka-independente to lapud sikatoy sakey a marikit,” so nanonotan na Tasi. “Apagaan ak ta ompan sikatoy mansakit la odino naderal lay espiritualidad to.”

Kanian ginapoan na Tasi so mikatunongan ed iyaaralan base ed Mateo 6:33, a sikatoy pinaseseg ton manguman ed saray prayuridad to, mangiyuna ed Panarian, tan imatalek ed si Jehova so sankaabigan a pangasikaso ed saray pamaakaran. Oniay prangkan intepet na agi ed sikato: “Kasin satay pagmaliw mon independente et sengegan no maminsan a naiirapan kan onsaral ed arum, a pati ed si Jehova?” Inaksobi na iyaaralan a ngalngali to la itunday manpikasi. Diad ontan et sikatoy pinaseseg na manangipalapag a tumboken so simbawa ed Salmo 55:22 tan ipaawit so pakabebelatan to ed si Jehova lapud ipapaseguro ed sikatayo na 1 Pedro 5:7 ya “asikasoen to kayo.” Atenyeg so puso to ed saratan a balikas. Oniay inkuan na Tasi, “Sakey itan ed saray mataltalag a pankanawnawa a sikatoy anengneng kon manakis.”

Pansiansiaen so Kikukurang na Katuaan ed Sikayo

Agaylay liket tayo sano nanenengneng tayon onkikiwas ed katuaan na Biblia iray iyaaralan  tayo. Balet, pian ontalona so pansasagpot tayon ontulong ed arum, kaukolan a mangipanengneng itayon mismo na maong ya ehemplo. (Judas 22, 23) Kaukolan tayon amin a ‘sumpalen so dilin kilalaban tayo tekep na takot tan giwgiw.’ (Filipos 2:12) Laktipen na satan so naynay a pangiyabuloy ed liwawa na Kasulatan ya ontalos ed kapusoan tayo, a sukimaten na satan iray awawey, pilalek, tan liknaan a nayarin kaukolan ya ipetek.​—2 Pedro 1:19.

Singa bilang, kasin diad agano ni et abawasan so seseg mo ed saray Kristianon aktibidad? No ontan, antoy makasengeg? Ompan say sakey a rason et masyado ka lan mandedependi ed inkasika. Panon mo ta’n nibaga no satan lay makasengeg? Basaen so Aggeo 1:2-11, tan matuan morekdeken so panagkatunongan nen Jehova ed saray akapawil a Judio. Insan itepet ed inkasika: ‘Pinonot ko la kasin naynay so nawalaan na dakel a kuarta tan pagmaliw a komportabli? Peteg kasin manmamatalek ak ya asikasoen nen Jehova so pamilyak no iyunak iray espiritual a bengatla? Odino isipen kon kaukolan ya asikasoen ko nin unona so inkasiak?’ No nakaukolan so panguman ed panagnonot tan liknaan mo, gawam a tampol itan. Itatarya na Makasulatan a simbawa ed Mateo 6:25-33, Lucas 12:13-21, tan 1 Timoteo 6:6-12 iray prinsipyo pian nawalaan itayo na balansen panmoria ed saray materyal a pankaukolan tan kaykayarian, a mangipaseguro itan ed mantultuloy a panamendisyon nen Jehova.​—Malaquias 3:10.

Nayarin pannonoten kan maong na sayan matuan panangusisa ed dili. Nayarin mairap so pangaksobi ed partikular iran kakapuyan sano nipaimano iratan ed sikatayo. Balet, sano manbulon ka la pian simamaaron tulongan so anak mo, iyaaralan mo na Biblia, odino anggan sika a mismo​—anggan panon lay inkapersonal odino inkasensitibo na sakey a pamaakaran​—nayarin gagawaen mo la so unonan kundang pian nisalbam so bilay to odino say bilay mon mismo.​—Galacia 6:1.

Panon balet no singa anggapoy gunggona na pansasagpot mo? Ag-onsusuko a tampol. Say pangipetek ed ag-ayadyarin puso et nayarin sensitibo, mankaukolay panaon, tan no maminsan et makapadismayan gegemtan. Balet ta makapatumang met itan.

Say kalangweran a si Eric ya abitla diad gapo so akanonot a siansia tan ginapoan to lamet so ‘manakar ed katuaan.’ (2 Juan 4) “Pinmawil ak labat ed si Jehova sanen amoriak no anto lay abalang ko,” so inkuan to. Diad tulong na atateng to, si Eric so matoor la natan a manlilingkor ed Dios. Anggaman diad primero et binarongan to so aminpigan impanggunaet na atateng to pian usisaen to so puso to, natan et aapresyaen to a maong so ginawa ra. “Maomaong iray ateng ko,” so inkuan to. “Ag-iran balot tinmundan angaro ed siak.”

Say pangisindag na liwawa na salitay Dios ed kapusoan na saray babangatan tayo et panangipanengneng na maaron-kaabigan. (Salmo 141:5) Itultuloy mon usisaen so kapusoan na ananak mo tan saray iyaaralan mo na Biblia pian naseguro no peteg a nababayuboan da so balon Kristianon personalidad. Itultuloy mon pabungaen so katuaan ed arum tan ed sikan dili diad ‘suston pangusar ed salita na katuaan.’​—2 Timoteo 2:15, NW.

[Litrato ed pahina 29]

Imparungtal na saray balikas nen Jesus so sakey a kakapuyan nen Pedro

[Litrato ed pahina 31]

Usaren so Biblia pian agwaten so wala ed puso