‘Panag-almo na Sakey a Mabmablin Perlas’

“Say panarian na katawenan so kalat a pampoporsigian na totoo, tan saramay mantutultuloy a manpoporsigi so makakadampot ed satan.”​—MATEO 11:12, NW.

1, 2. (a) Anton matalag a kalidad so deneskribe nen Jesus ed sakey ed saray parabolo to nipaakar ed Panarian? (b) Anto so imbaga nen Jesus ed parabolo nipaakar ed mabmablin perlas?

 WALA ta so bengatlan papablien yon maong, ya iter yo odino isakripisyo yo so amin a walad sikayo ta pian nakayarian itan? Anggaman pisalambit a naynay na totoo so panseseet dan manggegemtan ed sakey a kalat, a singa say kuarta, inkabantog, pakayari, odino posisyon, mataltalag a naromog na sakey a too so bengatlan makaroyroyo, a mabulos ton isakripisyo so amin a bengatla ta pian nakayarian itan. Satan a matalag ingen ta makapadinayew a kalidad so tinukoy nen Jesu-Kristo diad sakey ed saray makapainteres a parabolo to nipaakar ed Panarian na Dios.

² Satan imay parabolo, odino ilustrasyon, ya imbaga nen Jesus ed saray babangatan to labat, salanti, samay mabetbet a tutukoyen a parabolo nipaakar ed mabmablin perlas. Oniay inkuan nen Jesus: “Say panarian na tawen miulibay ed sakey a too a mantatagilako a manaanap na saray sankaabigan a perlas. Et sanen akalmoy sakey a perlas a baleg so bili to, linma tan inlako ton amin a walad sikato, tan sinaliw to’man.” (Mateo 13:36, 45, 46) Anto so labay nen Jesus a naaralan na saray dumerengel to nipaakar ed sayan ilustrasyon? Tan panon itayon nagunggonaan ed saray salita to?

Mablin Balor na Saray Perlas

3. Akin a mabmabli nensaman so mararakep a perlas?

³ Nensaman, saray perlas so papablien bilang dekorasyon. Inkuan na sakey a reperensya ya unong ed Romanon iskolar a si Pliny a Panguloan, saray perlas so “sankamablian ed saray mablin bengatla.” Aliwan singa say balitok, pilak, odino dakel niran ankablin bato, saray perlas so papawalaen na mabilay iran bengatla. Kabkabat a walaray klase na lukan a pagmaliwen to iray dutak​—a singa saray angkelanting a tapsing na bato​—a masileng iran perlas diad pamawala na tatawagen a nacre a maminpigan mamalkot ed saratan. Diad kadaanan iran panaon, saray sankarakpan a perlas so naala ed Ambalangan Dayat, Persian Gulf, tan Indian Ocean​—ya arawrawi ed bansa na Israel. Maseguro a satan so rason no akin a tinukoy nen Jesus so managbaroy a “mantatagilako a manaanap na saray sankaabigan a perlas.” Pian makaromog na saray peteg a mabalor a perlas, nakaukolan so pirmin panagsagpot.

4. Anto so manunan leksion ed parabolo nen Jesus nipaakar ed manbabaroy a managtagilako?

⁴ Anggaman mabmabli la nensaman iray mararakep a perlas, mabitar ya aliwan say bili na  satan so manunan leksion ed parabolo nen Jesus. Diad satan a parabolo et aglambengat inyaliling nen Jesus so Panarian na Dios ed mabmablin perlas; impaimano to met so manbabaroy a “mantatagilako a manaanap na saray sankaabigan a perlas” tan ed inkiwas to sanen walay aromog to. Aliwan singa say ordinaryon managlako, say manbabaroy a managtagilako, odino komersyante na perlas, so natawag ya eksperto ed satan ya anapan. Sarag ton kilatisen odino nibiig iray mararakep a kalidad tan detalye ya agnaimanon tampol a pakapatnagan ed sakey ya ekstraordinaryon perlas. Amta to so puron perlas sano nanengneng to itan tan agnapalikdo ed abeban klase odino peke a perlas.

5, 6. (a) Anto so nagkalautlan makatantanda nipaakar ed managtagilako diad parabolo nen Jesus? (b) Anto so ipaparungtal na parabolo na niyamot a kayamanan nipaakar ed manbabaroy a managtagilako?

⁵ Wala ni so bengatlan makatantanda nipaakar ed sayan managtagilako. Say ordinaryon managtagilako et kuentaen to ni so presyo na satan a perlas ta pian nadesidi to no pigaray panaliw to ta pian makatubo. Nayarin nonoten to met no masaliw itan a perlas ta pian nalako ton tampol. Diad arum a panangibaga, sikato so interesado ed pakatubon tampol ed walan impoonan to, aliwan diad pangayarian ed perlas. Balet aliwan ontan imay managtagilako diad parabolo nen Jesus. Sikato so ag-interesado ed kuarta odino materyal. Diad tua, sikato so mabulos ya angisakripisyo ed “amin a walad sikato”​—a posiblin amin ed personal a kaykayarian to​—ta pian nakayarian to so aanapen to.

⁶ Diad panmoria na maslak a managtagilako, nayarin makulangkulang so ginawa na saman a too ed parabolo nen Jesus. Say sakey a masilib a negosyante et agto ipalaran so iloob ed ontan a mapeligron negosyo. Ingen say managtagilako ed parabolo nen Jesus so walaan na midumaan ya estandarte. Say tumang to et aliwan say pakatubo noagta say gayaga tan inkapnek ed pakawalaan na bengatlan mabmabli. Sayan punto so nipabitar ed miulibay ya ilustrasyon nen Jesus. Inkuan to: “Say panarian na tawen kaulibay na sakey a kayamanan ya inyamot ed uma; a sikatoy nalmo na sakey a too, tan inem-eman to; et dia ed like’to onla tan ilako toy amin a walad sikato, tan saliwen to ‘man ya uma.” (Mateo 13:44) On, say liket ed pakalmo tan pangayarian na kayamanan so magenap la pian napakiwas so too a mangisakripisyo ed amin a walad sikato. Wala kasi so ontan iran totoo natan? Wala kasi so kayamanan a makanepegan na ontan a panangisakripisyo?

Saramay Angapresya ed Kablian a Tuloy na Panarian

7. Panon ya impatnag nen Jesus ya inapresya ton maong so kablian a tuloy na Panarian?

⁷ Sanen insalaysay nen Jesus so parabolo to, tinukoy to so ‘panarian ed katawenan.’ Maseguron inapresya ton mismo so kablian a tuloy na Panarian. Lugan na saray salaysay na Ebanghelyo so mapuersan paneknek nipaakar ed satan. Kayari na inkabautismoan to nen 29 K.P., si Jesus so ‘ginmapon nampulong tan angikuan, Mansibkel kayo; ta asingger la so panariay tawen.’ Diad loob na talora tan kapalduan taon, binangatan to so dakel a totoo nipaakar ed Panarian. Binaroy to so interon bansa, “a linma ed saray syudad tan aldeas, a nampupulong tan angiyakar na saray maong a balita na panarian na Dios.”​—Mateo 4:17; Lucas 8:1.

8. Anto so ginawa nen Jesus pian nipanengneng no anto so gawaen na Panarian?

⁸ Diad impanggawa to na dakel a milagro diad interon bansa​—a pinaabig to iray mansasakit, pinakan to iray narasan, kinontrol to iray tiempo, a pinaoli to ni ingen so inaatey​—impanengneng met nen Jesus no anto so gawaen na Panarian na Dios. (Mateo 14:14-21; Marcos 4:37-39; Lucas 7:11-17) Diad kaunoran, pinaneknekan to so katooran to ed Dios tan ed Panarian diad impangiter toy bilay to, ya inatey ed panamairapan a kiew bilang martir. Singa ed samay manbabaroy a managtagilako a mabulos ya angiter ed amin a walad sikato parad ‘mabmablin perlas,’ nambilay tan inatey si Jesus parad Panarian.​—Juan 18:37.

9. Anton matalag a kalidad so anengneng ed limog na saray akadkaunan babangatan nen Jesus?

⁹ Aglambengat insentro nen Jesus so dilin  bilay to ed Panarian noagta tinugyop to met so melag a grupo na saray patumbok to. Sikara met so angapresya a maong ed kablian a tuloy na Panarian. Kabiangan ed saratan si Andres, a datin babangatan nen Juan a Managbautismo. Sanen nadngel to so testimonya nen Juan a si Jesus so “Kordero na Dios,” si Andres tan say sakey nin babangatan nen Juan, a nayarin sakey ed saray ilalak nen Zebedeo ya inngaran met na Juan, so tinmumbok a tampol ed si Jesus tan nagmaliw iran mananisia. Balet aliwa labat a satan. Si Andres so linman tampol ed agi ton si Simon tan inkuan to: “Aromog mi Mesias.” Kayarin tuloy na satan, si Simon (ya akabkabat bilang Cefas, odino Pedro) ontan met ed si Felipe tan say kaaro ton si Natanael so akabidbir met ed si Jesus bilang say Mesias. Diad tua, si Natanael so apakiwas a mangibaga ed si Jesus: “Sika so Anak na Dios, sika so Ari na Israel.”​—Juan 1:35-49.

Asagyat ya Onkiwas

10. Panon so inkiwas na saray babangatan sanen sinmabi si Jesus tan tinawag to ra pigaran panaon kayari na inmunan impakapitongtong to ed sikara?

¹⁰ Say liket ya alikna di Andres, Pedro, Juan, tan arum nira sanen aromog da so Mesias et niyaliling ed alikna na samay manbabaroy a managtagilako sanen nalmo to so mabmablin perlas. Anto so ginawa ra? Aliwan detalyado so imbaga na Ebanghelyo nipaakar ed ginawa ran tampol kayari na inmunan impakapitongtong da ed si Jesus. Mapatnag a maslak ed sikara so pinmawil ed normal a kurang na bilay da. Balet, kayari na manga anem bulan ya anggad ngalngali sakey a taon, inasinggeran lamet nen Jesus si Andres, Pedro, Juan, tan say agi nen Juan a si Santiago diad pansisigayan da ed Dayat na Galilea. * Sanen anengneng to ra, oniay inkuan nen Jesus: “Tumbo’kayo ed siak, tan gawaen ta kayon sumisigay na totoo.” Panon so inkiwas da? Nipaakar ed si Pedro tan Andres, oniay inkuan na salaysay na Mateo: “Tampol a tinaynan da so saray iket da, tan tinmumbok ira ed sikato.” No nipaakar ed si Santiago tan Juan, oniay nabasa tayo: “Tampol a tinaynan da so paraw tan si ama ra, et tinmumbok ira ed sikato.”  Inyarum na salaysay nen Lucas a “tinaynan da ya amin, tan tinmumbok ira ed sikato.”​—Mateo 4:18-22; Lucas 5:1-11.

11. Antoy nayarin rason no akin a kinmiwas a tampol iray babangatan ed imbitasyon nen Jesus?

¹¹ Kasin say tampol ya inkiwas na saray babangatan et kalimbuatan a desisyon? Andin balot! Anggaman pinmawil ira ed anapan na pamilya ra bilang managsigay kayari na inmunan impakapitongtong da ed si Jesus, maseguron nipaslep a maong ed puso tan kanonotan da so anengneng tan nadngel da ed saman ya inkagawa. Say inlabas na ngalngali sakey taon so angitarya ed sikara na magenap a panaon pian morekdeken a maong iratan. Insan sinmabi so panaon na pandesisyon da. Kasin nagmaliw ira a singa samay manbabaroy a managtagilako ya apakiwas a tuloy so puso to sanen aromog to so mabalobalor a perlas, ya unong ed impaneskribe nen Jesus et sikato so linma tan kinmiwas a tampol pian saliwen iman a perlas? On. Say anengneng tan nadngel da so anagyat ed puso ra. Atebek da ya asabi lay panaon na ikiwas da. Kanian, unong ed imbaga na salaysay, sikara so mabulos ya angisakripisyo ed amin a bengatla tan nagmaliw iran papatumbok nen Jesus.

12, 13. (a) Panon so inkiwas na dakel ya akadngel ed si Jesus? (b) Anto so imbaga nen Jesus nipaakar ed saray matoor a babangatan to, tan anto so kabaliksan na saray salita to?

¹² Agaylay pidumaan na sarayan matoor manlapud arum ya asalambit ed saginonor diad saray salaysay na Ebanghelyo! Dakel a totoo so pinaabig tan pinakan nen Jesus balet ta nantultuloy labat ira ed inagew-agew a kimey da. (Lucas 17:17, 18; Juan 6:26) Arum ni ingen so nambaraan sanen inimbitaan ira nen Jesus a magmaliw a patumbok to. (Lucas 9:59-62) Diad pirmin pidumaan, oniay imbaga nen Jesus ed saginonor nipaakar ed saray matoor: “Manlapu la’d saray agew nen Juan a Managbautismo ya anggad natan say panarian na katawenan so kalat a pampoporsigian na totoo, tan saramay mantutultuloy a manpoporsigi so makakadampot ed satan.”​—Mateo 11:12, NW.

¹³ “Pampoporsigian” tan “mantutultuloy a manpoporsigi”​—anto so kabaliksan na sarayan termino? Nipaakar ed Griegon verb ya angaonan ed saratan a balikas, oniay inkuan na Vine’s Expository Dictionary of Old and New Testament Words: “Isusuheri na verb so mapuersan panagsagpot.” Tan oniay inkuan na iskolar na Biblia a si Heinrich Meyer nipaakar ed sayan bersikulo: “Diad onian paraan so inkadeskribe na satan a magunaet, agnapokpokan a pambabanikel tan pipupuligesgesan parad manasingger lan Mesianikon panarian . . . Ontan lay inkagunaet tan inkaseet (ya aliwa lan kalmado tan mailalo) so interes nipaakar ed panarian.” Singa say manbabaroy a managtagilako, sarayan pigaran indibidual et tampol ya akabidbir ed no anto so talagan ankabli, tan sikara so mabulos ya angisakripisyo ed amin a walad sikara nisesengeg ed Panarian.​—Mateo 19:27, 28; Filipos 3:8.

Akila so Arum ed Panag-anap

14. Panon so impangiparaan nen Jesus ed saray apostol parad panangipulong ed Panarian, tan anto so resulta?

¹⁴ Diad impantultuloy nen Jesus ed ministeryo to, impasal tan tinulongan to so arum a makadampot ed Panarian. Unona et pinili to so 12 ed limog na saray babangatan to tan tinuro to ira bilang apostol, odino saray ibabaki to. Inter nen Jesus ed sikara so detalyadon bilibilin no panon dan sumpalen so ministeryo ra tan saray pasakbay nipaakar ed saray angat tan kairapan a manatalaran ed sikara. (Mateo 10:1-42; Lucas 6:12-16) Diad tinmumbok a duay taon, inulop da si Jesus ed impanpulong to diad interon bansa, a nanggayagaan da so maapit a siglaotan ed sikato. Nadngel da iray salita to, naimatonan da iray milagron ginawa to, tan anengneng da so alimbawa ton mismo. (Mateo 13:16, 17) Amin na satan so maseguron amakiwas a maong ed sikara, kanian singa samay manbabaroy a managtagilako, sikara so maseseg tan interon-puso ed impanggegemtan da ed Panarian.

15. Anto so imbaga nen Jesus a peteg a basiyan na panliket na saray patumbok to?

 ¹⁵ Nilikud ed 12 ya apostol, si Jesus so “anuro na arum a pitomplo, tan imbaki to ra a sanderwa ed arap to, ed amin a syudad tan pasen, a sikaton dili asingger la a laen to.” Imbaga to met ed sikara so nipaakar ed saray subok tan kairapan ed arapen tan binilin to ra ya oniay ibaga ra ed totoo: ‘Say panarian na Dios so inmasingger la.’ (Lucas 10:1-12) Sanen pinmawil so 70, malikeliket ira tan oniay inreport da ed si Jesus: “Katawan, anggan saray demonyo apatulok mi ra lapud ngaran mo.” Balet nayarin asurprisa ira ed imparungtal nen Jesus a wala ni ingen so babaleg a gayaga a manatalaran ed sikara lapud seseg da ed Panarian. Inkuan to ed sikara: “Agkayo manliket nisengeg ed saya, a saray espiritu ontulok ira ed sikayo; manliket kayo ingen ta saray ngaran yo nisulat ira ed tawen.”​—Lucas 10:17 20.

16, 17. (a) Anto so imbaga nen Jesus ed saray matoor ya apostol to diad samay unor a labi a kaiba to ra? (b) Anton gayaga tan panamaseguro so nipabitar ed saray imbaga nen Jesus ed saray apostol?

¹⁶ Diad kaunoran, diad samay unor a labi a kaiba nen Jesus iray apostol to, nen Nisan 14, 33 K.P., inletneg to so tinawag a Pangdem na Katawan tan ingganggan to ira a nodnonoten da itan ya ebento. Diad saman a labi, oniay inkuan nen Jesus ed 11 a nansiansia: “Sikayo so nansiansia ed siak ed saray inkatuktukso. Et manuro ak ed sikayo na sakey a panarian, a singa say Amak anuro ed siak. Pian makapikan tan makapiinum kayo ed dulang ko dia ed panarian ko; et onyurong kayo ed saray trono a mangukom ed labindua a poli na Israel.”​—Lucas 22:19, 20, 28-30.

¹⁷ Peteg a pirmin liket tan inkapnek so alikna na saray apostol sanen nadngelan da iratan a salita nen Jesus! Sikara so naikdan na sankatageyan a galang tan pribilehyo a niwala ed siopaman a too. (Mateo 7:13, 14; 1 Pedro 2:9) Singa saman a manbabaroy a managtagilako, baleg so insakripisyo ra pian ontumbok ed si Jesus diad panadampot da ed Panarian. Diad saman et sikara so apaseguroan a saray insakripisyo ra et aliwan maapa.

18. Siopa nilikud ed 11 ya apostol so nagunggonaan met ed Panarian diad kaunoran?

¹⁸ Aliwa lambengat a saramay apostol a kaiba nen Jesus ed saman a labi so agunggonaan ed Panarian. Linawa nen Jehova a say dagup a 144,000 so nitarok ed sipanan ed Panarian bilang manuley a kaiba nen Jesu-Kristo diad maglorian mangatatawen a Panarian. Niarum ni, anengneng nen apostol Juan ed pasingawey so “sakey a baleg ya ulop, a sikato so agnayari a bilangen na too . . . a manalalagey ira ed arap na trono, tan ed arap na Kordero . . . a kuanda, Say  inkilaban ed Dios tayo a wala a manyurong ed trono, tan dia ed Kordero.” Saraya so mangaraldalin a sakop na Panarian. *​—Apocalipsis 7:9, 10; 14:1, 4.

19, 20. (a) Anton pankanawnawa so nilukas ed totoo ed amin a nasyones? (b) Anton tepet so konsideraen ed ontumbok ya artikulo?

¹⁹ Sakbay na intokotok nen Jesus ed tawen, ingganggan to iray matoor a patumbok to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.” (Mateo 28:19, 20) Kanian, ondagsa iray totoo manlapud amin a nasyones pian magmaliw a babangatan nen Jesu-Kristo. Iteen met na saraya so kapusoan da ed Panarian​—balanglan mangatatawen odino mangaraldalin so tumang da​—a singa ginawa na samay manbabaroy a managtagilako parad sankaabigan a perlas.

²⁰ Impabitar na saray salita nen Jesus a say kimey a panaggaway-babangatan so mantultuloy ya anggad “kasampotan na mundo.” Kanian diad panaon tayo, wala nira kasi so indibidual a singa say manbabaroy a managtagilako, a mabulos a mangisakripisyo ed amin a walad sikara pian nadampot da so Panarian na Dios? Konsideraen itan a tepet ed ontumbok ya artikulo.

[Saray paimano ed leksab]

Kasin Nipaliwawa Yo?

• Anto so manunan leksion ed parabolo nipaakar ed manbabaroy a managtagilako?

• Panon ya impatnag nen Jesus ya inapresya ton maong so kablian a tuloy na Panarian?

• Anto so amakiwas a tampol ed si Andres, Pedro, Juan, tan arum nira sanen tinawag ira nen Jesus?

• Anton alay abig a pankanawnawa so mantatalaran ed saray totoo ed amin a nasyon?

[Tepetepet Parad Panagaral]

[Litrato ed pahina 10]

‘Tinaynan da so amin a bengatla tan tinmumbok ira ed si Jesus’

[Litrato ed pahina 12]

Sakbay a tinmokotok ed tawen, ingganggan nen Jesus iray patumbok to a manggawa na babangatan