Panag-anap na ‘Mabmablin Perlas’ Natan
Panag-anap na ‘Mabmablin Perlas’ Natan
“Saya ya ebanghelyo na panarian nipulong naani ed sankamundoan ya onkanan pamintuaan.”—MATEO 24:14.
1, 2. (a) Anto so panmoria na saray Judio ed panaon nen Jesus nipaakar ed Panarian na Dios? (b) Anto so ginawa nen Jesus pian nainabang to so suston pakatalos ed Panarian, tan tekep na antoran resulta?
SAY Panarian na Dios so tema a paniinteresan a maong na saray Judio sanen linma diad dalin si Jesus. (Mateo 3:1, 2; 4:23-25; Juan 1:49) Balet, diad primero et ag-atalosan na maslak ed sikara so laknab tan pakayari na satan; agda met atalosan a sakey itan a gobierno ed tawen. (Juan 3:1-5) Anggan arum ed saray nagmaliw a patumbok nen Jesus et agsigpot ya akatalos ed no anto so Panarian na Dios odino no anto so nepeg dan gawaen pian nagamoran da so bendisyon ed pagmaliw a kaiba nen Kristo ed panuley.—Mateo 20:20-22; Lucas 19:11; Gawa 1:6.
2 Diad inlabas na panaon, dakel a leksion so maanos ya imbangat nen Jesus ed saray babangatan to, a laktip lay parabolo nipaakar ed ankablin perlas a siningbat ed inmunan artikulo, pian ipabitar ed sikara so kaimportantian na panggunaet da diad pangegemtan ed mangatatawen a Panarian. (Mateo 6:33; 13:45, 46; Lucas 13:23, 24) Seguradon satan so amakiwas a maong ed kapusoan da lapud agnambayag et nagmaliw iran maseet tan makpel a manangiyabawag na maong a balita na Panarian ed ararawin parte na dalin, unong a papaneknekan na libro na saray Gawa.—Gawa 1:8; Colosas 1:23.
3. Diad panutukoy ed panaon tayo, anto so imbaga nen Jesus nipaakar ed Panarian?
3 Komusta met natan? Saray bendisyon ed mangaraldalin a paraiso diad silong na Panarian so nipupulong ed minilyon. Diad importantin propesiya to nipaakar ed ‘panganggaan na mundo,’ et oniay espisipikon inkuan nen Jesus: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mateo 24:3, 14; Marcos 13:10) Impaliwawa to met a sayan malaklaknab a kimey so nasumpal anggaman ed mairap iran babeng tan angat, a pati panamasegsegang. Anggaman ontan, oniay impaseguro to: “Say misungdo ya angga ed kasampotan, sikato lanlamang so nilaban naani.” (Mateo 24:9-13) Amin iya so mankaukolan na panagsakripisyo ed dili tan panagseet a singa ed samay impatnag na manbabaroy a managtagilako ed parabolo nen Jesus. Wala kasi iray indibidual natan a mangipapatnag na ontan a pananisia tan seseg diad panggegemtan ed Panarian?
Say Liket ed Pakaromog na Katuaan
4. Anto so epekto na katuaan na Panarian ed totoo natan?
4 Manliket so managtagilako ed parabolo nen Jesus sanen aromog to so aanapen ton ‘ankablin perlas.’ Satan a gayaga so amakiwas ed sikaton manggawa ed anggaay nayarian to pian nakayarian itan a perlas. (Hebreos 12:1) Natan, say katuaan nipaakar ed Dios tan ed Panarian to so manasagyat tan mamapakiwas met ed totoo. Saya so mangipanonot ed saray komento nen Brother A. H. Macmillan, ya angisulat nipaakar ed personal ya impananap to ed Dios tan ed gagala To parad katooan, diad libron Faith on the March. Inkuan to: “Say aromog ko et siansia nin naroromog na dakerakel a totoo ed kada taon. Tan singa ira sikayo tan siak, a nanlalapu ed amin a nasyonalidad, rasa, kipapasen na panagbilay tan nanduruman edad. Say katuaan et agmanangidumaduma. Satan so manasagyat ed amin a klase na totoo.”
5. Antoran maabig a resulta so anengneng diad report ed 2004 a serbisyon taon?
5 Say katuaan na saratan a salita so nanenengneng lapud diad kada taon et nilasus nilibon matuan-impanpuso a totoo so napapakiwas ed maong a balita na Panarian na Dios pian idedika so bilay da ed si Jehova tan gawaen so linawa to. Napaneknekan itan diad 2004 a serbisyon taon, a manlapud Setyembre 2003 anggad Agosto 2004. Diad loob na satan a 12 bulan, 262,416 a totoo so mapublikon angisimbolo na dedikasyon da ed si Jehova diad panamegley na bautismo ed danum. Saya so agawa ed 235 a daldalin, a ditan et sinimban ikokondukta na saray Tasi nen Jehova so 6,085,387 a panangiyaral na Biblia ta pian natulongan so totoo manlapud amin a kipapasen na panagbilay tan manlapud dakel a nasyon, tribu, tan pansasalita pian onggamor na manangiter-bilay a katuaan manlapud Salitay Dios.—Apocalipsis 7:9.
6. Antoray sengegan ed tuloytuloy ya indaak diad apalabas iran taon?
6 Panon iratan a nagmaliw a posible? Andi-duaruwa ya iyaasingger nen Jehova ed sikato iratan a totoo a nikiling ed kaptekan. (Juan 6:65; Gawa 13:48) Balet, agtayo nibaliwala so mabulos ya espiritu tan maseet a panagsagpot na saramay angisekar ed inkasikara diad pangegemtan ed Panarian. Diad edad ton 79 et oniay insulat nen Brother Macmillan: “Manlapu la’d primeron impakaaral ko ed sipasipan parad saray mansasakit tan ompapatey a katooan, agtinmayer so ilalok ed ipaparungtal na satan a mensahe na Biblia. Diad saman a panaon et denesidik ya amtaen a nagkalalo so nipaakar ed ibabangat na Biblia ta pian natulongan ko so arum a kaparak a manaanap na pikakabat nipaakar ed Makapanyarin-amin a Dios, si Jehova, tan ed saray maong a gagala to parad katooan.”
7. Anton eksperiensya so mangiyiilustra ed liket tan inkagunaet na saramay manaanap na katuaan na Biblia?
7 Satan ya inkagunaet so nanenengneng met ed limog na saray lingkor nen Jehova natan. Sakey lan alimbawa si Daniela a taga-Vienna, Austria. Inkuan to: “Manlapu la’d inkaugaw ko, say Dios so sankaapitan a kaarok. Labalabay kon nakabatan so ngaran to lapud ipapasen ko a say titulon ‘Dios’ et aliwan magenap pian nawalaan ak na personal a relasyon ed sikato. Balet kinaukolan ko ni so manalagar anggad edad a 17, sanen walaray Tasi nen Jehova a tinmoktok ed puerta mi. Impaliwawa ran amin so labay kon nakabatan nipaakar ed Dios. Aromog kon siansia so katuaan, tan alay abig itan! Malikeliket ak kanian ginapoan kon pinulongan so anggan siopa.” Lapud inkaseseg to, sikato so balbalawen na saray kaklase to. “Balet, parad siak et singa iman impakaimaton ed kasumpalan na sakey a propesiya na Biblia,” so intuloy nen Daniela, “lapud naeksperiensyak so imbaga nen Jesus a saray patumbok to so busolen tan pasegsegangen nisesengeg ed ngaran to. Malikeliket ak tan mandinayew ak.” Agnambayag et indedika nen Daniela so bilay to ed si Jehova, abautismoan, tan inggapo ton dampoten so kalat bilang misionaryo. Kayari na kasal to, si Daniela, kaiba so asawa ton si Helmut, so nampulong ed limog na saray Aprikano, Tsino, Filipino, tan Indian a manaayam ed Vienna. Si Daniela tan Helmut so misionaryo la natan ed abalaten-sagur ya Aprika.
Ag-ira Sinmuko
8. Anto so sakey a makapatumang a paraan ya ipapatnag na dakel so aro ra ed Dios tan katooran da ed Panarian to?
8 On, say panagmisionaryo et sakey ed saray paraan a nipapatnag natan na totoo nen Jehova so aro ra ed Dios tan katooran da ed Panarian to. Singa say managtagilako ed parabolo nen Jesus, saramay linmoob ed sayan serbisyo so mabulos a manbiahe ed ararawin pasen nisesengeg ed Panarian. Siempre, sarayan misionaryo so agmanbabaroy pian anapen so maong a balita na Panarian; ipapasabi da itan ed saray totoo a walad ararawin pasen na dalin, ya ibabangat tan tutulongan da ira a magmaliw a babangatan nen Jesu-Kristo. (Mateo 28:19, 20) Diad dakel a daldalin, kinaukolan dan sungdoan so alablabas a kairapan. Balet say pansusungdo ra so mayaman a natutumangan.
9, 10. Antoran makapaliket ya eksperiensya so nanggayagaan na saray misionaryo diad ararawin pasen a singa say Central African Republic?
9 Alimbawa, diad Central African Republic et walay 16,184 ya inmatendi ed Memoryal na impatey nen Kristo nen imbeneg a taon, ngalngali maminpiton danay a karakel na saray manangipalapag na Panarian ed satan a bansa. Lapud anggapoy koryenti ed dakel a parte na satan a bansa, saray totoo so kaslakan a manggagawa ed inagew-agew a kimey da diad paway na abung tan diad silong na kiew. Kanian natural lambengat a saray misionaryo so manpulong ed ontan met a paraan—a mangiyaral ira na Biblia diad silong na masirom a kiew. Aliwa lambengat a maliwawa tan presko ed paway noagta wala ni so sakey a bentaha. Saray totoo so walaan na aralem a panamabli ed Biblia, tan say pantotongtong nipaakar ed relihyon et kaslakan la a singa say pantotongtong nipaakar ed saray isport odino kipapasen na panaon ed arum a kultura. Mabetbet et naiimano na saray ondadalan so nagagawa tan mibiang la ira ed panagaral.
10 Kanian, sanen walay sakey a misionaryo a mangiyaaral na Biblia diad paway, walay inmasingger a malangwer a laki a manaayam ed biek a karsada tan imbaga ton anggapo ni so binmisita ed sikato, kanian ombisita komon so misionaryo pian mangiyaral met na Biblia ed sikato. Siempre, maliket so misionaryo a gawaen itan, tan maples so inyaligwas na malangwer a laki. Diad satan a bansa, mabetbet a patundaen na saray polis iray Tasi diad dalan, aliwan pian patawag odino panmultaen ira, noagta pian onkerew na sankabaloan iran isyu na Panag-Bantayan tan Awake! a magasin odino misalamat ed sikara lapud sakey ya artikulo a nanggayagaan dan binasa.
11. Anggaman ed saray subok, anto so alikna na saray abayag lan misionaryo nipaakar ed serbisyo ra?
11 Dakel ed saramay linmoob ed panagmisionaryo, 40 odino 50 taon lay linmabas, so siansia nin matoor a manlilingkor ed lawak. Alay abig itan ya alimbawa na pananisia tan inkaseet parad sikatayon amin! Diad inlabas na 42 a taon, sakey a sanasawa so nanlingkor bilang misionaryo ed taloran nanduruman bansa. Oniay inkuan na asawan laki: “Walaray kairapan. Alimbawa, akipuligesgesan kami ed malaria diad loob na 35 taon. Ingen, agmin balot nagbabawian so desisyon min manmisionaryo.” Oniay inyarum na asawan bii: “Dakdakel a bengatla so pisasalamatan mi. Say lawak na ministeryo et makapaliket, tan mainomay so mangigapo na panangiyaral na Biblia. Kapagno nanengneng mo iray iyaaralan ya onaatendi ed saray pantitipon tan makapankakabat ira, singa itan pandaragup na pamilya.”
‘Imbilang Da ya Onlereg so Amin a Bengatla’
12. Panon a nibalikas so tuan apresasyon ed kablian na Panarian?
12 Sanen aromog na manbabaroy a managtagilako so mabmablin perlas, sikato so “linma tan inlako ton amin a walad sikato, tan sinaliw to’man.” (Mateo 13:46) Say ontan ya inkamabulos a pangisakripisyo ed bengatlan ipapasen a mabli so pakabidbiran ed saramay peteg a mangaapresya ed kablian na Panarian. Bilang sakey ed saray nakaiba nen Kristo diad gloria na Panarian, oniay imbaga nen apostol Pablo: “Peteg, tan ibilang ko ra so ami’ bengatla ya onlereg nipaakar ed ontan la a karlangan na pikakabat ed Kristo Jesus a Katawan ko: a lapud sikato intepel ko so inkalereg na ganagana tan ibilang ko ra ya andi kakanaan a dutak, pian nagamoran ko si Kristo.”—Filipos 3:8.
13. Panon ya impatnag na sakey ya indibidual ed Czech Republic so panamabli to ed Panarian?
13 Diad ontan met a paraan, dakel natan so mabulos a manggagawa na baleg iran pananguman ed bilay da ta pian nagamoran da iray bendisyon na Panarian. Alimbawa, nen Oktubre 2003, say 60 años a prinsipal ed sakey ya eskuelaan diad Czech Republic so akabasa na uusaren ed panagaral na Biblia a Pikakabat a Mangitonton ed Andi-Anggaan a Bilay. Kayari ton binasa itan, sikato so tampol ya akitalosan ed saray Tasi nen Jehova ed lugar da pian paiyaralan na Biblia. Maabig so inyaligwas to ed espiritual tan ag-abayag et aatendian to la so amin a pantitipon. Balet, komusta iray plano ton mankandidato bilang mayor insan magmaliw a senador? Sananey a karera so pinili to, salanti, say lumba parad bilay, bilang sakey a manangiyabawag na Panarian. Oniay inkuan to: “Dakdakel so nipalimak a literatura na Biblia ed saray estudyantek.” Insimbolo to so dedikasyon to ed si Jehova panamegley na bautismo ed danum diad sakey a kombension nen Hulyo 2004.
14. (a) Anto so ginawa na minilyon a totoo lapud maong a balita na Panarian? (b) Antoray nayarin seryoson itepet tayo ed inkasikatayo?
14 Ontan met so inkiwas na minilyon a totoo ed interon mundo nipaakar ed maong a balita na Panarian. Sikara so pinmaway ed marelmeng a mundo, nilakseb da so daan a personalidad da, tinaynan da iray datin kaulop da, tan intalirak da so minumundo iran karera ra. (Juan 15:19; Efeso 4:22-24; Santiago 4:4; 1 Juan 2:15-17) Akin a gagawaen dan amin itan? Lapud manunan papablien da iray bendisyon na Panarian na Dios nen say antokaman a niyopresi na sayan kaplesan a sistema na bengabengatla. Ontan met kasi so nalilikna yo nipaakar ed maong a balita na Panarian? Kasin papakiwasen kayo na satan a manggawa na nakaukolan iran pananguman ed kabibilay yo, estandarte yo, tan saray kalat yo pian mitunosan ed kakaukolanen nen Jehova? Say panggawa ed satan so manresulta ed dakel iran bendisyon ed sikayo, natan tan diad arapen.
Magano lan Nasumpal so Panag-ani
15. Anto so nipropesiya a gawaen na totoo na Dios ed kaunoran iran agew?
15 Oniay insulat na salmista: “Say katooan mo yapay da so inkasikara a mabulbulos dia ed agew na pakayarim.” Saramay angiyapay na inkasikara so mangilaktip ed ‘[ulop] na saray kaugawan a singa linaew’ tan “abalbaleg ya ulop” na “saray bibii a mangipapaamta na saray [maong a] balbalita.” (Salmo 68:11; 110:3) Anto so resulta na panseseet tan pansasakripisyo na totoo nen Jehova—lalaki tan bibii, kalangweran tan wala la’d edad—diad sarayan kaunoran ya agew?
16. Mangiter na alimbawa no panon a natulongan na saray lingkor na Dios so arum a totoo pian makaaral nipaakar ed Panarian.
16 Sakey a payunir, odino sigpot-panaon a manangiyabawag na Panarian, diad India so mapaga no panon ton natulongan so masulok a duaran milyon ya emel ed satan a bansa pian naamtaan da so nipaakar ed Panarian. (Isaias 35:5) Denesidi to so manpalista ed sakey ya eskuelaan diad Bangalore pian manaral na sign language. Nipanabang to ed dakel ya emel so ilalo ed Panarian, tan walaray aporman grupo na panangiyaral na Biblia. Diad loob na pigaran simba, masulok a labinduan totoo so inmatendi ed saray pantitipon diad Kingdom Hall. Saginonor, diad sakey a bansal et akabat na payunir so sakey ya emel a balolaki a taga-Calcutta. Say emel so walaan na dakel a tepet tan interesadon maong a makaaral ni nipaakar ed si Jehova. Balet ta wala so problema. Satan a balolaki so kinaukolan lan ompawil ed Calcutta, manga 1,600 a kilometro ed kaarawi, pian manaral ed kolehyo, tan anggapo diman so Tasi a makaamta na sign language. Diad impansagpot ton maong, kinombinse to so ama to a dia la’d Bangalore so panaralan to ta pian nituloy toy panaral na Biblia. Maabig so inyaligwas to ed espiritual, tan kayari na manga sakey taon et indedika toy bilay to ed si Jehova. Bilang resulta, inyaralan to na Biblia so dakel ya emel, pati say abayag lan kaaro to. Say sangan opisina ed India so mangiyuuksoy natan na panagaral na sign language parad saray payunir pian natulongan ira ed satan a lawak.
17. Isalaysay no anto so aromog yon makapaseseg a tuloy nipaakar ed report ed 2004 a serbisyon taon diad pahina 19 anggad 22.
17 Diad pahina 19 anggad 22 na sayan magasin, nanengneng yo so sankamundoan a report na kimey na saray Tasi nen Jehova diad lawak parad 2004 a serbisyon taon. Ipanaon so panusisa ed satan, tan nengnengen yon mismo so ebidensya ya akasentron tuloy iray totoo nen Jehova diad interon dalin pian anapen so ‘mabmablin perlas’ natan.
Mantultuloy ya ‘Anapen nin Unona so Panarian’
18. Anton impormasyon so ag-inlaktip nen Jesus ed parabolo na manbabaroy a managtagilako, tan akin ya agto inlaktip itan?
18 No nodnonoten tayo lamet so parabolo nen Jesus nipaakar ed manbabaroy a managtagilako, naimano tayon anggapoy imbaga nen Jesus nipaakar ed no antoy napambilay na managtagilako kayari ton inlako so amin a walad sikato. Diad realistikon paraan, arum so nayarin mangitepet: ‘Panon nin makalmo so managtagilako na taganoen, kawesen, tan siroman to anta asimot lay amin a walad sikato? Anto so nagunggona to ed satan ya ankablin perlas?’ Saratan so makatunongan a tepet unong ed punto de bista na too. Balet agta pinaseseg nen Jesus iray babangatan to ya: “Anapen [da] nin unona so panarian, tan say inkatunong to; et amin iraya a bengatla niarum ira ed sikayo”? (Mateo 6:31-33) Say manunan punto na parabolo et nakaukolan ya ipatnag so interon-puson debosyon ed Dios tan seseg ed Panarian. Wala kasi so leksion a naaralan tayo?
19. Anton importantin leksion so naaralan tayo ed parabolo nen Jesus nipaakar ed mabmablin perlas?
19 Balanglan agano ni labat so impakaamta tayo ed makapakelaw a maong a balita odino manbubunek itayo la parad Panarian tan ibabaga tayo ed arum so nipaakar ed saray bendisyon na satan diad loob na pigara lan dekada, nepeg tayon itultuloy ya iyapasakey so interes tan imano tayo ed Panarian. Wala itayo la ed mairap a panaon, balet walaan itayo na putel iran rason pian manisia a say aanapen tayo et tudtua tan agnaparaan—singa say perlas ya aromog na managtagilako. Saray ebento ed mundo tan saray asumpal lan propesiya na Biblia so mangitatarya na makakombinsin prueba a manbibilay itayo la ed ‘panganggaan na mundo.’ (Mateo 24:3) Singa say manbabaroy a managtagilako, ipatnag tayo so interon-puson seseg ed Panarian na Dios tan panliketan so pribilehyo a mangiyabawag ed maong a balita.—Salmo 9:1, 2.
Kasin Natandaan Yo?
• Diad apalabas iran taon, anto so akatulong ed indaak ed limog na saray tuan managdayew?
• Anton awawey so naimano ed limog na saramay manlilingkor bilang misionaryo?
• Antoran pananguman so ginawa na saray indibidual lapud maong a balita na Panarian?
• Anton importantin leksion so naaralan tayo ed parabolo nen Jesus nipaakar ed mabmablin perlas?
[Tepetepet Parad Panagaral]
[Tsart ed pahina 19-22]
2004 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Litrato ed pahina 14]
“Say katuaan . . . so manasagyat ed amin a klase na totoo.”—A. H. Macmillan
[Litrato ed pahina 15]
Nampulong si Daniela tan Helmut ed lawak a sananey so lenguahe diad Vienna
[Saray litrato ed pahina 16, 17]
Singa say manbabaroy a managtagilako, saray misionaryo natan so daakan a nabebendisyonan
[Litrato ed pahina 17]
‘Saray totoom et iyapay da so inkasikara a mabulbulos’