Panon Kamabli so Bilay Mo?
Panon Kamabli so Bilay Mo?
BANGTA dakerakel a bilay so insakripisyo ed Europa legan na Guerra Mundial I, ginawa so makapadinayew iran sagpot pian iliktar iray bilay ed Antartika. Say Anglo-Irish a managdiskobre a si Ernest Shackleton tan saray kakaiba to so adisgrasya sanen linmereg so barko ra ya Endurance lapud dinmumbo ed balbaleg a yelo. Anggan panon et nisakbit nen Shackleton iray tripulante to, diad Islan Elephant. Balet mapeligro nin siansia so kipapasen da.
Naisip nen Shackleton a say ultimon remedyo pian makaliktar ira et say iyakar to a kaiba so pigara ed tripulante to diad panagpartian na saray balyina diad isla na Abalaten a Georgia pian patulongan. Manga 1,100 a kilometro so kaarawi na satan, tan say 22-piye a baloto a nisalba to manlapud Endurance so nausar da labat. Agda naseguro no makasabi ira.
Anggaman ontan, nen Mayo 10, 1916, kayari na 17 a makapagonigon ya agew, si Shackleton tan say melag a grupo to so akasabi ed Abalaten a Georgia, balet apilitan iran onsadsar ed sananey a parte na isla lapud mabagyon dayat. Kinaukolan da so manakar ni na 30 kilometro ed kapalandeyan
ya anggapo’d mapa tan asakbongay yelo pian makasabi ra ed destinasyon da. Anggaman ed pirmin irap lapud makaketel a temperatura tan inkaandi na matukoy a kagawaan parad pankalab, si Shackleton tan saray tripulante to so akasabi ed destinasyon da, tan nisalba ton siansia so amin a tripulante to a nisakda ed Islan Elephant. Akin ya ontanlay impansagpot nen Shackleton? “Say alenleneg a kalat to,” so insulat na bayograpon si Roland Huntford, et “say pangisalba ed amin a tripulante to.”“Anggapo so Kulang Anggan Sakey”
Antoy akatulong ed saray tripulante nen Shackleton pian ag-iran balot naandian na ilalo legan iran nankukumpog tan nanalagar diad “ambetebetel tan mairap a nasabin lugar a mabato tan asakbongay yelo a 30 kilometro manlapud sampot tan sampot”? Say kompiyansa ra a tooren na lider da so sipan ton isalba ira.
Saray totoo natan so mipadpara ed saramay lalaki a nisadsar ed Islan Elephant. Dakel so manbibilay ed pinasyan kairapan tan mitatalikarkaran pian nabilay labat. Ingen, sikaray sigpot a makapanmatalek a say Dios et “ilaban to so saray pinairap” manlapud panaglames tan gonigon. (Job 36:15) Napaseguroan ka a momoriaen na Dios a mabmabli so bilay na balang sakey. “Tawag ka ed siak ed agew na gonigon,” kuan nen Jehova a Dios, tan “ilegyas ta ka.”—Salmo 50:15.
Kasin mairap mon panisiaan a sikan mismo bilang indibidual ed binilyon a totoo ed dalin et momoriaen na Manamalsa a mabmabli? No ontan, imanoen so insulat nen propetan Isaias nipaakar ed binilyon a bitewen ed binilyon a galaksi diad maaw-awang a uniberso ed kaliberliber tayo. Oniay nabasa tayo: “Itangay yo so saray mata yo ed tagey, tan nengnengen yo no siopa so amalsa ed saraya, a sikato alaen to so saray ehersito ra ed bilang; sikato tawagen to ra ya amin ed ngaran; ed pakapanyari, tan lapu ed mabiskeg ed pakayari, anggapo so kulang anggan sakey.”—Isaias 40:26.
Kasin natetebek mo so kabaliksan na satan? Say galaksi tayo a Milky Way—a melag labat a kabiangan na satan so solar system tayo—so walaan na ag-onkulang ed 100 bilyon a bitewen. Tan pigara niray arum a galaksi? Anggapo so makaseguro, balet walaray kalkulasyon a mangibabagan 125 bilyon iratan. Segurado ya agaylay karakel na bibitewen! Ingen, ibabaga ed sikatayo na Biblia ya amta na Manamalsa na uniberso so ngaran na kada bitewen.
“Anggan Saray Buek na Ulo Yo Abilang Ira ya Amin”
‘Balet,’ nayarin walay mangisuppiat a ‘say pikabat lambengat ed kangaranan na binilyon a bibitewen—odino binilyon a totoo—so agmankabaliksan ya aasikasoen ira bilang indibidual.’ Say kompyuter a walaan na baleg a memorya so makapangisimpen ed kangaranan na binilyon a totoo. Ingen, anggapoy toon manisip ya aasikasoen na kompyuter so siopaman ed sikara. Balet, ibabaga na Biblia a si Jehova a Dios so aglambengat makaamta ed kangaranan na binilyon a totoo noagta aasikasoen to met ira bilang indibidual. Oniay insulat nen apostol Pedro: “Imatalek yo ya amin ed sikato so kapagaan yo; ta sikato asikasoen to kayo.”—1 Pedro 5:7.
Oniay inkuan met nen Jesu-Kristo: “Agta nalako so duaran anuyaw ed sakey a kuarta? Et agnapelag naani sakey ed sikara ed dalin no agyabuloy nen Ama yo. Et anggan saray buek na ulo yo abilang ira ya amin. Agkayo antakot sirin; ta mamabli kayo nen saray amayamay ya anuyaw.” (Mateo 10:29-31) Imanoen ya ag-imbaga nen Jesus a kabat lambengat na Dios so nagagawa ed saray anuyaw tan ed saray totoo. Say inkuan to et: “Mamabli kayo nen saray amayamay ya anuyaw.” Akin a mas mabli ka? Lapud sika so pinalsa “dia ed indengan na Dios” —a nayarian mon bayuboan tan ipatnag iray kalidad ed moral, intelektual, tan espiritual a mangisisindag ed atagey iran kalidad na Dios.—Genesis 1:26, 27.
“Produkto na Intelihentin Kimey”
Agka papapalikdo ed saray panangipilit na totoo a mangibuburin wala so Manamalsa. Unong ed sikara, sika so apalesa na saray puersan agnakontrol tan aliwan persona. Ibabaga ra a sikay agbalot ginawa “dia ed indengan na Dios,” ya anggapo so pidumaan mo ed bilay na amin nin ayep diad sayan planeta—a pati saray anuyaw.
Kasin makatunongan parad sika a basta labat apawala dia so bilay panamegley na kibanbana, odino agnakontrol a puersa? Unong ed say molekular a biologon si Michael J. Behe, satan ya ideya et sigpot ya agmakatunongan lapud “inkakomplikado a tuloy na saray biokemikal a proseso” a mangokontrol ed bilay. Inkuan to a say paneknek na biochemistry so mangitonton ed agnapaliisan a konklusyon ya “anggan say sankasimplian a nengneng na bilay diad dalin . . . so produkto na intelihentin kimey.”—Darwin’s Black Box—The Biochemical Challenge to Evolution.
Ibabaga ed sikatayo na Biblia ya amin a nengneng na bilay diad dalin et produkto na intelihentin kimey. Tan ibabaga na satan ed sikatayo a say Lapuan na sayan amin ya intelihentin kimey et si Jehova a Dios, say Amalsa na uniberso.—Salmo 36:9; Apocalipsis 4:11.
Tua a kaukolan itayon mananos ed mundo a napno na ot-ot tan kairapan, balet agmo aabuloyan itan a mangamper ed sikan manisia a wala so Amalsa tan Nandesinyo na dalin tan amin a bilay a wadtan. Tandaan so duaran manunan katuaan. Say sakey et agdenisinyo na Dios so ag-inkayadyari a walad kaliberliber tayo. Tan say sananey et walaan na saray maabig a rason so Manamalsa tayo ed temporaryon pangiyaabuloy to ed satan. Unong a mabetbet lan sisingbaten na sayan magasin, inabuloyan nen Jehova a Dios a niwalay kaugsan ed antikey labat a panaon ta pian nasolbar a maminpinsan iray isyu nipaakar ed moral a linmesa sanen inmunan impulisay na totoo so inkasoberano to. *—Genesis 3:1-7; Deuteronomio 32:4, 5; Eclesiastes 7:29; 2 Pedro 3:8, 9.
“Sikato Iliktar To so Naukolan no Oney-ey”
Siempre, anggaman ed makapasinagem iran kipapasen a kaukolan a sagmaken na totoo natan, say bilay et siansia nin alay abig a regalo. Kanian gawaen tayo so anggaay nayarian tayo pian simpitan itan. Say bilay ed arapen ya insipan na Dios so nagkalalo ni nen say pitatalikarkaran pian nabilay labat ed maruksa tan makapaot-ot iran kipapasen, a singa ed kipapasen na saray tripulante nen Shackleton diad Islan Elephant. Gagala na Dios ya iliktar itayo manlapud kaplesan a nalilikna tayon ot-ot tan inkaandi kakanaan ta pian ‘nabembenan tayo [a malet] so bilay a peteg’ ya orihinal a getma na Dios parad totoon pinalsa to.—1 Timoteo 6:19.
Gawaen iyan amin na Dios lapud momoriaen to a mabmabli so kada sakey ed sikatayo. Intarya to so Anak to, si Jesu-Kristo, bilang dondon bagat a kinaukolan pian nibulos itayo ed kasalanan, ag-inkayadyari, tan ipapatey ya atawir tayo ed saray inmunan ateng tayo, si Adan tan Eva. (Mateo 20:28) “Ontan lay impangaro na Dios ed mundo,” so kuan nen Jesu-Kristo, “ya inter to so bogbogtong ya Anak to, pian siopaman a manisia ed sikato . . . wala so bilay ton andi-anggaan.”—Juan 3:16.
Antoy gawaen na Dios ed saraman so manasagmak natan na ot-ot tan kairapan ed bilay? Oniay ibabaga ed sikatayo na impuyan a Salitay Dios nipaakar ed Anak to: “Sikato iliktar to so naukolan no oney-ey, say makabos met, ya anggapo so mananulong ed sikato. Sikato ilagak to so makabos tan naukolan, tan ilaban to so kamarerwa na naukolan. Sikato dondonen to so kamarerwa ra a yarawi ed panamalingo tan panamasoot.” Akin a gawaen to itan? Lapud say ‘dala ra [odino, bilay da] et mabli ed mata to.’—Salmo 72:12-14.
Abayag lan nabebelatan so katooan lapud kasalanan tan ag-inkayadyari, a singa ra “maningel” ed pirmin ot-ot tan paniirap. Iyaabuloy lambengat itan na Dios lapud kabat to a nayarian ton apigeren so antokaman a deral a resulta na satan. (Roma 8:18-22) Natan et maganggano to lan itarok so “kipawil na ami’ ganagana” diad panamegley na gobierno na Panarian to ya uuleyan na Anak ton si Jesu-Kristo.—Gawa 3:21; Mateo 6:9, 10.
Kabiangan ed satan so pamaoli ed saray totoo a nanirap tan inatey nensaman. Seguradon wala ra’d pakanodnonotan na Dios. (Juan 5:28, 29; Gawa 24:15) Agla manbayag et naawat da so bilay ‘ed inkadaakan,’ salanti, ayadyarin bilay ya andi-anggaan diad paraison dalin ya anggapo la so ot-ot tan panirap. (Juan 10:10; Apocalipsis 21:3-5) Amin a mabilay so sigpot lan makapanggayaga ed bilay da tan makabayubo ed alay abig iran kalidad tan abilidad a pakapatnagan ed saraman so pinalsa unong “ed indengan na Dios.”
Kasin wadman ka pian panggayagaan so bilay ya insipan nen Jehova? Mandependi itan ed sika. Papasesegen mi kan manganamot ed saray probisyon ya itatarya na Dios pian napawala iyan amin a bendisyon. Saray manangipalapag ed sayan magasin so maliket ya ontulong ed sika a manggawa ed satan.
[Paimano ed leksab]
^ par. 17 Parad detalyadon impaningbat ed sayan punto, nengnengen so kapitulo 8 ya “Akin ya Aabuloyan na Dios so Panirap?” diad libron Pikakabat a Mangitonton ed Andi-Anggaan a Bilay, ya impalapag na saray Tasi nen Jehova.
[Litrato ed pahina 4, 5]
Matalek iray nisakdan tripulante a tooren nen Shackleton so sipan ton isalba ira
[Credit Line]
© CORBIS
[Litrato ed pahina 6]
“Mamabli kayo nen saray amayamay ya anuyaw”