Alwaran so Talindeg Tayo Bilang Kristiano

“Sikayo so saray tasik, kuan nen Jehova.”​—ISAIAS 43:10.

1. Antoran nengneng na totoo so iyaasingger nen Jehova ed sikato?

 SANO wala kayo ed Kingdom Hall, imanoen pan maong iray walad kaliberliber yo. Siopa iray nanenengneng yo ed sayan pasen a pandadayewan? Nayarin nanengneng yo iray masimoon a kalangweran ya atentibon onggagamor na kakabatan manlapud Kasulatan. (Salmo 148:12, 13) Seguradon nanengneng yo met iray ulo na pamilya a manggugunaet a mamaliket ed Dios anggaman manbibilay ira ed sakey a mundon manederal ed bilay na pamilya. Nayarin naimano yo met iray pinablin maedad la, a matoor a manbibilay unong ed dedikasyon da ed si Jehova anggaman ed saray epekto na itatakken. (Uliran 16:31) Amin da so mangaaron maong ed si Jehova. Tan panliketan to so pakawalaan na relasyon ed sikara. “Anggapo so too a makadago ed siak,” so impaseguro na Anak na Dios, “likud no say Ama ya angibaki ed siak sikato so iyasingger to.”​—Juan 6:37, 44, 65.

2, 3. Akin a nayarin mairap a pansiansiaen so malinew a pakatebek ed talindeg tayo bilang Kristiano?

² Agtayo kasi panliketan so impagmaliw tayon kabiangan na totoon aabobonan tan bebendisyonan nen Jehova? Ingen ta mairap a pansiansiaen so malinew a pakatebek ed no antoy talindeg tayo bilang Kristiano diad sarayan ‘panaon a maatap a mairap a pidenengan.’ (2 Timoteo 3:1) Saya so nagkalalo lan tua ed saray kalangweran a papabalegen ed loob na Kristianon pamilya. Oniay inaksobi na sakey a tobonbalo: “Anggano  onaatendi ak ed saray pantitipon na Kristiano, anggapo so malinew iran kalat ko ed espiritual tan, diad tua et anggapo so personal a pilalek kon manlingkor ed si Jehova.”

³ Anggaman masimoon so arum diad pampipilalek dan manlingkor ed si Jehova, sikara so nayarin nisuawi lapud pirmin pananesdes na saray kalimog, impluensya na mundo, tan saray makasalanan a tendensia. Sano nadedetdetan itayon maong, nayarin kalkalnan naderal so talindeg tayo bilang Kristiano. Alimbawa, momoriaen natan na dakel a totoo ed mundo a karaanan la odino aliwa lan realistiko ed sayan modernon mundo so estandarte na Biblia nipaakar ed moralidad. (1 Pedro 4:4) Isipen na arum ya agla importante so pandayew ed Dios unong ed paraan to. (Juan 4:24) Diad sulat to ed saray taga-Efeso, tinukoy nen Pablo a say mundo et walaan na “espiritu,” odino ontatalonan awawey. (Efeso 2:2) Satan ya espiritu so manedesdes ed totoo a mikompormi ed panag-isip na totoo ya agmikabat ed si Jehova.

4. Panon ya indanet nen Jesus so pankaukolan na panalwar tayo ed mabitar a talindeg tayo bilang Kristiano?

⁴ Balet, bilang dedikadon lingkor nen Jehova, momoriaen tayo a makapasinagem ed siopaman ed sikatayo​—malangwer man odino matatken​—a naderal so talindeg tayo bilang Kristiano. Say maabig a panmoria ed talindeg tayo bilang Kristiano so nibase lambengat ed saray estandarte nen Jehova tan ed saray iilaloan to ed sikatayo. Tua itan lapud pinalsa itayo unong ed indengan to. (Genesis 1:26; Miqueas 6:8) Inyaliling na Biblia so mapatpatnag a pakabidbiran ed sikatayo bilang Kristiano diad saray akinpaway a kawes, ya isusulong pian nanengneng na amin. Nipaakar ed panaon tayo, oniay impasakbay nen Jesus: “Nia, Siak ondago ak a singa matakew. Mapalar so manpuyat, tan isinop to so saray kawes to, ompan manakar a labos-lakseb, tan nanengneng da so kababaingan to.” * (Apocalipsis 16:15) Agtayo labay a lakseben iray Makristianon kalidad tayo tan saray estandarte na kondukta tayo insan abuloyan so mundo a manmoldi ed sikatayo. No ontan so nagawa, nabalang tayo iratan ya ‘akinpaway a kawes.’ Makapaermen tan makapabaing so ontan a situasyon.

5, 6. Akin ya importante so kabiskegan ed espiritual?

⁵ Say malinew a pakatebek na sakey ed talindeg to bilang Kristiano so mangapektan tuloy ed direksion na bilay to. Panon ya ontan? No naandi na sakey a mandadayew ed si Jehova so malinew a pakatebek to ed talindeg to, sikato so nayarin nisuawi, a naandian lay malinew a direksion odino kalakalat. Aminpigan amasakbay so Biblia sumpad ontan a kipapasen na agpakapandesisyon. “Say sakey a manduaruwa,” so impasakbay nen babangatan a Santiago, “singa sakey a daluyon ed dayat a nagalawgalaw na dagem, tan nibantak ed biek tan biek. Kanian agpa isipen na satan a too a naawa’to so antokaman ed Katawan; say too a nankadua so kanonotan to agmakapansiansia ed amin ya awey to.”​—Santiago 1:6-8; Efeso 4:14; Hebreos 13:9.

⁶ Panon tayon naalwaran so talindeg tayo bilang Kristiano? Anto so makatulong ed sikatayo pian napabulaslas so pakatebek tayo ed baleg a pribilehyo tayo bilang managdayew ed Sankatageyan?  Ipangasin konsideraen so onggendan iran paraan.

Pekderan Yo ed Inkasikayo so Talindeg Yo Bilang Kristiano

7. Akin a makagunggonan pausisa itayo ed si Jehova?

⁷ Mantultuloy a pabiskegen so relasyon yo ed si Jehova. Say sankablian a kayarian na sakey a Kristiano et say personal a relasyon to ed Dios. (Salmo 25:14; Uliran 3:32) No walaray panduaruwa tayo ed talindeg tayo bilang Kristiano, nepeg tayon usisaen a maapit so kalidad tan kaaralem na satan a relasyon. Oniay matukoy ya inkerew na salmista: “Sumal mo ak, O Jehova, tan subok mo ak; salim so pusok tan linawak.” (Salmo 26:2) Akin ya importante so ontan a panag-usisa? Lapud agtayo napanmatalkan so inkasikatayo a mismo a manhusga ed petepeteg iran motibo tan inklinasyon tayo. Si Jehova lambengat so makatebek ed akindalem ya inkatoo tayo​—saray motibo, kanonotan, tan emosyon tayo.​—Jeremias 17:9, 10.

8. (a) Panon itayon nagunggonaan ed pananubok nen Jehova ed sikatayo? (b) Panon kayon natutulongan ya onaligwas bilang Kristiano?

⁸ No sikatayo so pausisa ed si Jehova, sikato so iimbitaan tayon manubok ed sikatayo. Nayarin abuloyan ton onlesa iray situasyon a mangiparungtal ed saray tuan motibo tan kipapasen na puso tayo. (Hebreos 4:12, 13; Santiago 1:22-25) Nepeg tayon awaten iratan a pananubok lapud mangiter iratan na pankanawnawa pian nipatnag tayo so kaaralem na katooran tayo ed si Jehova. Nipabitar na satan no kasin ‘ayadyari itayo tan napnek itayo ya andi kulang.’ (Santiago 1:2-4) Tan legan a nasusubok, ombulaslas itayo ed espiritual.​—Efeso 4:22-24.

9. Kasin nakakkaukolan a paneknekan tayo ed inkasikatayo so katuaan na Biblia? Ipaliwawa.

⁹ Paneknekan yo ed inkasikayo so katuaan na Biblia. Say panmoria tayo ed talindeg tayo bilang lingkor nen Jehova so onletey no ag-itan malet a nibase ed pikakabat ed Kasulatan. (Filipos 1:9, 10) Malangwer man odino matakken, kaukolan a napaneknekan na kada Kristiano a say papanisiaan to et talagan katuaan a naromog ed Biblia. Pinaseseg nen Pablo iray kapananisiaan: “Salsalien yo ya ami’ ganagana; et mansiansia kayo ed maong.” (1 Tesalonica 5:21) Nepeg a moriaen na saray kalangweran a Kristiano a binmaleg ed matakot ed Dios iran pamilya ya ag-ira nayarin mandependi labat ed pananisia na atateng da. Say mismon ama nen Solomon, a si David, so animbawa ed sikato ya “amtaen mo so Dios na amam, tan manlingkor ka ed sikato ed ayadyari a puso.” (1 Awaran 28:9) Aglabat magenap so panimaton na malangwer a Solomon ed no panon a pinabiskeg na ama to so pananisia to ed si Jehova. Kinaukolan ton kabaten a mismo si Jehova, tan ontan so ginawa to. Oniay inyey-ey to ed Dios: “Ikdan mo ak natan komon na kakabatan tan pakatalos, pian makapaway ak tan makaloob ak ed arap na saya a baley.”​—2 Awaran 1:10.

10. Akin ya aliwan makapuy so matuan pantepet tekep na suston motibo?

¹⁰ Say mabiskeg a pananisia so nibase ed pikakabat. Inkuan nen Pablo: “Say pananisia manlapu ed pandengel.” (Roma 10:17) Anto so labay ton ibaga ed satan? Say labay ton ibaga et no mantultuloy itayon manaral na Salitay Dios, napabiskeg so pananisia tan panagmatalek tayo ed si Jehova, ed saray sipan to, tan ed organisasyon to. Say matua iran tepet nipaakar ed Biblia so makapangitonton ed saray manamaseguron ebat. Niarum ni, diad Roma 12:2, nabasa tayo so bilin nen Pablo: ‘Salien yo no anto so maong, tan makapaliket, tan nasnaspot a linawa na Dios.’ Panon tayon nadampot itan? Diad igamor na suston “pikakabat ed katuaan.” (Tito 1:1) Say espiritu nen Jehova so makatulong ed sikatayo pian natalosan iray mas mairap ni ingen a tema. (1 Corinto 2:11, 12) Nepeg itayon onkerew na tulong na Dios sano naiirapan tayon talosan so sakey a bengatla. (Salmo 119:10, 11, 27) Labay nen Jehova a natalosan, panisiaan, tan unoren tayo so Salita to. Aawaten to iray matuan pantepet tekep na suston motibo.

Determinadon Mamaliket ed Dios

11. (a) Anton natural a pilalek so nayarin mamatit ed sikatayo? (b) Panon tayon makapanpakpel pian nalabanan so pananesdes na saray kalimog?

¹¹ Panggunaetan a paliketen so Dios, aliwan say too. Anggan panon et natural lambengat ya iletneg tayo so pakabidbiran tayo diad piulop ed sakey a grupo. Amin so mankaukolan na kakaaro, tan panliketan tayo no sikatayo so naawat. Legan  na inkatayatdang, tan anggan diad saginonor a parte na bilay, say pananesdes na saray kalimog so mabiskeg, a mamawala na pirmin pampilalek ya onalig odino paliketen so arum. Balet saray kaaro tan kalimog so aglawas mannononot ed pankaabigan tayo. No maminsan et labay da lambengat a walay nakaiba ran manggawa na makapuy. (Uliran 1:11-19) Sano onsuko so sakey a Kristiano ed negatibon pananesdes na kalimog, kaslakan et salien ton iyamot so talindeg to. (Salmo 26:4) “Agyo aaligen so walna na mundon walad kaliberliber yo,” so impasakbay nen apostol Pablo. (Roma 12:2, The Jerusalem Bible) Iiter nen Jehova ed sikatayo so biskeg a nakaukolan tayo ta pian nalabanan tayo so antokaman a pananesdes na saray taga-paway.​—Hebreos 13:6.

12. Anton prinsipyo tan anton ehemplo so mamabiskeg ed talindeg tayo sano nalalanor lay panagmatalek ed Dios?

¹² Sano napepeligro so talindeg tayo bilang Kristiano lapud pananesdes na saray taga-paway, nepeg tayon nodnonoten a say katooran tayo ed Dios so mas importante nen say opinyon na totoo odino say tutumboken na karaklan. Saray salita ed Exodo 23:2 so onkanan mananalimbeng a prinsipyo: “Agmo nepeg so ontumbok ed saray dakel a totoo a managgawa na mauges.” Sanen nanduaruwaan na karaklan ed saray kapara ton Israelita so pakayari nen Jehova a manoor ed saray sipan To, si Caleb so mapekder ya agtinmumbok ed karaklan. Sikato so segurado a napanmatalkan iray sipan na Dios, tan sikato so mayaman ya atumangan lapud talindeg to. (Numeros 13:30; Josue 14:6-11) Ontan met kasi so inkamabulos yon manresisti ed pananesdes na opinyon na karaklan ta pian naalwaran so relasyon yo ed Dios?

13. Akin a makabat ya ipaamta so talindeg tayo bilang Kristiano?

¹³ Ipaamta so talindeg yo bilang Kristiano. Tua so diparan a say sankaabigan a depensa et say maong ya opensa legan tayon itatandoro so talindeg tayo bilang Kristiano. Sanen nipaarap ira ed isusumpa diad pansasagpot dan gawaen so linawa nen Jehova ed panaon nen Esdras, oniay inkuan na saray matoor ya Israelita: “Ariripen kami na Dios ed tawen tan dalin.” (Esdras 5:11) No apektado itayo ed saray reaksion tan panagkritiko na saray agmakaaron totoo, sikatayo so onkapuy lapud takot. No say pinonot tayo et say pamaliket ed amin, ag-itayo magmaliw ya epektibo. Kanian agkayo ontatalaw. Lawas maabig so malinew a pangipaamta ed arum a sakey kayon Tasi nen Jehova. Diad marespeto balet ta mapekder a paraan, nipaliwawa yo ed arum so nipaakar ed saray estandarte, sisiaen, tan talindeg yo bilang Kristiano. Ipaamta ed arum a determinado kayon mamasiansia ed atagey iran estandarte nen Jehova nipaakar ed saray isyu na moralidad. Ipabitar a say talindeg yo bilang Kristiano et agnikompromiso. Tan, ipanengneng yo ya ikikinon yo iray estandarte yo ed moral. (Salmo 64:10) No nipatnag yon mapekder kayon Kristiano, satan so mamabiskeg ed sikayo, manalimbeng ed sikayo, tan mamakiwas ni ingen ed arum a manusisa nipaakar ed si Jehova tan ed totoo to.

14. Nepeg itayo kasin nadismaya ed panagbalaw odino isusumpa? Ipaliwawa.

¹⁴ On, arum so nayarin mamalaw odino onsumpa ed sikayo. (Judas 18) Agkayo nadidismaya  no aliwan marakep so ikiwas na arum ed saray sagpot yon mangipaliwawa ed sikara nipaakar ed saray estandarte yo. (Ezequiel 3:7, 8) Lapud anggan panon lay inka-determinado yo, agyon balot nakombinse so totoon agmalabay a pakombinse. Nodnonoten pa si Faraon. Anggapo so salot odino milagro​—anggan say impatey a mismo na panguloan ya ilalak to​—ya angombinse ed sikato a si Moises so pinagkasangiyan nen Jehova. Kanian, agyo aabuloyan so takot ed too a mamakapuy ed sikayo. Say panagmatalek tan pananisia ed Dios so ontulong ed sikatayo pian natalonaan so takot.​—Uliran 3:5, 6; 29:25.

Makaaral ed Apalabas, Manpabiskeg Parad Arapen

15, 16. (a) Anto so espiritual a tawir tayo? (b) Panon itayon nagunggonaan ed panmorekdek ed espiritual a tawir tayo diad panamegley na Salitay Dios?

¹⁵ Pablien yo so espiritual a tawir yo. Diad pangusar ed Salitay Dios, nagunggonaan iray Kristiano ed panmorekdek ed mayaman a tawir da ed espiritual. Sayan tawir so mangilaktip ed katuaan na Salita nen Jehova, say ilalon andi-anggaan a bilay, tan say pribilehyon mangirepresenta ed Dios bilang manangiyabawag na maong a balita. Kasin natetebek yo so betang yo ed limog na saray Tasi to, diad apribilehyoan a grupo na totoo a niganggan a manumpal ed manangiliktar-bilay a panangipulong ed Panarian? Tandaan, si Jehova labat so mangipapaseguron: “Sikayo so saray tasik.”​—Isaias 43:10.

¹⁶ Nayarian yon itepet iraya: ‘Kaunongan kamabli ed siak iyan espiritual a tawir? Kasin mabmabli itan ed siak kanian manunaan ed bilay ko so panggawa ed linawa na Dios? Kasin mabiskeg a tuloy so apresasyon ko ed satan pian naresistian  so antokaman a tukso a nayarin mansumpal ed pakabalang ko ed satan?’ Lapud espiritual a tawir tayo, nipaslep met a maong ed sikatayo so aralem a pakatebek ed espiritual a kaligenan a napanggayagaan lambengat ed loob na organisasyon nen Jehova. (Salmo 91:1, 2) Say panrepaso ed makatantanda iran ebento ed modernon-agew ya awaran na organisasyon nen Jehova so mangipurek ed sikatayo ya anggapo so siopaman odino antokaman a makapagit ed totoo nen Jehova manlapud dalin.​—Isaias 54:17; Jeremias 1:19.

17. Anto ni so nakaukolan nilikud ed pandepende lambengat ed espiritual a tawir tayo?

¹⁷ Siempre, ag-itayo lambengat akadepende ed espiritual a tawir tayo. Kada sakey ed sikatayo so nepeg a mamayubo ed maapit a relasyon to ed Dios. Kayari na impamabiskeg nen Pablo ed pananisia na saray Kristiano diad Filipos, oniay insulat to ed sikara: “Kanian, inararok, anggan singa sikayo so wala lawas ed katutulok, aliwa a diad akaarap ak labat, noag ingen nagkalalo natan ed kaandik ed arap yo, isumpal yo so dili a kilalaban yo ed takot tan giwgiw.” (Filipos 2:12) Agtayo makapanmatalek ed siopaman parad kilalaban tayo.

18. Panon a saray Makristianon kimey so lalon mamalinew ed pakatebek ed no antoy talindeg tayo bilang Kristiano?

¹⁸ Maparanay a mibiang ed saray kimey na Kristiano. Nibaga a say “kimey so mabiskeg a mangimpluensya ed pakabidbiran na sakey.” Saray Kristiano natan so niganggan a manggawa na importantin kimey a panangipulong ed maong a balita na niletneg lan Panarian na Dios. Oniay inyabawag nen Pablo: “Unong sirin ya apostol ak na saray Gentiles, say kipapasen ko galangen ko.” (Roma 11:13) Say panagpulong a kimey tayo so mangibiig ed sikatayo manlapud mundo, tan say pibibiang tayo ed satan so mamabiskeg ed talindeg tayo bilang Kristiano. Say maparanay a pibiang tayo ed arum niran teokratikon kimey, a singa saray pantitipon na Kristiano, saray programa ed panagpaalagey na saray pasen na panagdayewan, itulong ed saramay mankaukolan, tan arum nira, so lalon mamalinew ed pakatebek ed talindeg tayo bilang Kristiano.​—Galacia 6:9, 10; Hebreos 10:23, 24.

Mapatpatnag a Talindeg, Petepeteg Iran Bendisyon

19, 20. (a) Antoran gunggona so personal a panggagayagaan yo bilang Kristiano? (b) Anto so mangiiter ed sikatayo na basiyan parad tuan pakabidbiran tayo?

¹⁹ Morekdeken pan magano so dakel a bendisyon tan bentaha a panggagayagaan tayo lapud tua itayon Kristiano. Walaan itayo na pribilehyon bidbiren a mismo nen Jehova. Inkuan nen propeta Malaquias: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakey a libro a pakanodnonotan so sinulatan ed arap to, nipaakar ed saray tinmakot ed Jehova, tan saray nannonot ed ngaran to.” (Malaquias 3:16) Sikatayo so nayarin ipasen na Dios bilang kakaaro to. (Santiago 2:23) Maliket so bilay tayo lapud walaan itan na malinew a gagala, peteg a kabaliksan, tan makagunggona tan produktibo iran kalat. Tan naikdan itayo na sakey ya ilalon magnayon ya arapen.​—Salmo 37:9.

²⁰ Tandaan a say tuan pakabidbiran yo tan estandarte yo so akadepende ed nausisa na Dios a kablian yo, aliwan unong ed nayarin isipen na arum. Arum so nayarin manhusga ed sikatayo base ed limitado iran estandarte na too. Balet say aro tan personal ya interes na Dios so mangiiter ed sikatayo na peteg a basiyan no anto so kablian tayo​—a sikatayo so totoo to. (Mateo 10:29-31) Bilang resulta, say mismon panangaro tayo ed Dios so makapangitarya ed sikatayo na sankabiskegan a pakatebek ed no antoy talindeg tayo tan sankalinewan a direksion na bilay tayo. “No siopaman a too kaba’to [“aaroen to,” NW] so Dios, ontan met a sikatoy kabat na Dios.”​—1 Corinto 8:3.

[Paimano ed leksab]

Kasin Natandaan Yo?

• Akin ya importante parad saray Kristiano ya alwaran so talindeg da ed espiritual?

• Panon tayon pekderan ed inkasikatayo so talindeg tayo bilang Kristiano?

• Sano nipaarap itayo ed no siopa so paliketen tayo, antoran punto so makatulong ed sikatayo pian makapanggawa itayo na dugan desisyon?

• Panon a say malinew a pakatebek ed no antoy talindeg tayo so makapangimpluensya ed arapen tayo bilang Kristiano?

[Tepetepet Parad Panagaral]

[Saray litrato ed pahina 21]

Say maparanay a pibiang ed saray kimey na Kristiano so lalon mamalinew ed pakatebek ed no antoy talindeg tayo bilang Kristiano