Saray Milagro​—Katuaan Odino Istorya Labat?

NAIMANON tampol na sakey a laki so istiker ed bamper na onlalabas a kotsi, “Miracles Happen​—Just Ask the Angels” (Nagagawa Iray Milagro​—Tepetan Mo Iray Anghel). Anggaman sikatoy relihyoson too, agto naseguro no antoy kabaliksan na satan. Kasin kabaliksan na satan a panisiaan na drayber iray milagro? Odino diad tua et sakey itan a panagludlurey a mangipapatnag na agpanisia ed saray milagro tan ed saray anghel?

Nayarin paninteresan mo so inkomento na autor ya Aleman a si Manfred Barthel: “Say salitan milagro so tampol a mangaapag ed saray managbasa diad duaran mansumlangan a dapag.” Saramay manisia ed milagro so kombinsido a nagagawa iratan tan mabetbet ni ingen. * Alimbawa, nireport a diad apalabas a pigaran taon ed Gresya, ibabaga na saray mananisia a nagagawa iray milagro a maminsan ed sakey bulan. Satan so amakiwas ed obispo na Greek Orthodox Church pian mamasakbay: “Say mananisia et pagmamaliwen ton singa too so Dios, si Maria, tan saray santo. Nepeg a saray mananisia et agda lalablabasen itan.”

Diad arum a bansa et pigpigara so manisia ed saray milagro. Unong ed sakey a surbi ed Allensbach ya impalapag nen 2002 ed Alemanya, 71 porsiento ed saray ombaley so mangipapasen a saray milagro et istorya labat, aliwan katuaan. Balet, diad saramay kulang a kakatlo a manisia ed saray milagro, wala so taloran bibii a mangibabagan akaawat ira na mensahe manlapud si Birhen Maria. Kalabas na pigaran bulan ya imbaga ran pinmayawar ed sikara si Maria, a walaray kaiba ton anghel tan sakey a malapati, oniay inreport na peryodiko ed Alemanya a Westfalenpost: “Angga ni’d natan et susubaybayan a maong na ngalngalin 50,000 ya ondadayon mananisia, a manpipirawat a natambal, ontan met ed saray maupapet, iray pasingawey ya anengneng na saray bibii.” Wala ni so 10,000 a totoo ya iilaloan ya ondagsa ed satan a baryo pian nanengneng da so ipayawar lamet nen Maria. Ibabaga a walaray miparan impayawar nen Birhen Maria ya agawa diad Lourdes, Pransya, nen 1858, tan diad Fátima, Portugal, nen 1917.

Komusta Met Iray Relihyon ya Aliwan-Kristiano?

Amin lawarin relihyon et manisia ed saray milagro. Ipapalinew na The Encyclopedia of Religion a saray angiletneg na Buddhismo, Inkakristiano, tan Islam so walaan na nanduruman panmoria nipaakar ed saray milagro, balet oniay impaimano na satan: “Say sinmublay ya awaran na sarayan relihyon so seguradon mangipabitar a saray milagro tan saray istorya nipaakar ed milagro so nagmaliw lan manunan kabiangan na relihyoson bilay na too.” Ibabaga na sayan reperensya a “say Buddha a mismo so manggagawa no maminsan na saray milagro.” Diad saginonor, sanen “niletneg so Buddhismo diad Tsina, saray misionaryo na satan so mabetbet a manguusar na mamilagron pakayari.”

Kayarin tinukoy so pigara ed saratan ya ipapasen a milagro, oniay impanampot na ensayklopedia: “Nayarin agnapanisiaan a tampol na sakey a  too iyan amin ya istorya nipaakar ed milagro ya insalaysay na saray relihyoson bayograpo, balet maseguron ginawa iratan diad getman nidayew so Buddha, a makapangiter na mamilagron pakayari ed saray masimoon a patumbok to.” Oniay inkuan met na satan ya ensayklopedia nipaakar ed Islam: “Say karaklan ed komunidad na Islam so naynay a mantatalaran na saray milagro. Si Muhammad so imparungtal ed saray tradisyon (hadīths) ya aminpigan nanggawa na saray milagro diad publiko. . . . Anggan inatey laray santo, sikara so panisiaan [ni] a manggagawa na saray milagro diad mismon lubok da parad saray matoor, tan saray totoo so masimoon ya ontatawag ed saratan pian patulongan.”

Komusta Iray Milagro ed Saramay Mankuan a Kristiano

Mandurumaan so opinyon na dakel a mankuan a Kristiano. Panisiaan na arum a tua iray salaysay na Biblia nipaakar ed saray milagro a ginawa nen Jesu-Kristo odino saray lingkor na Dios sakbay na Kristianon panaon. Ingen, dakel met so mipakna ed say Protestantin Managreporma a si Martin Luther. Oniay ibabaga na The Encyclopedia of Religion nipaakar ed sikato: “Insulat di Luther tan Calvin ya anampot la so panaon na saray milagro kanian nepeg ya agla ilaloan a nagawa iratan.” Balet, say Iglesia Katolika so siansia nin manisia ed saray milagro “ya agda ipapaliwawa no panon a nagagawa iratan,” so kuan na satan a reperensya. Anggaman ontan, “sinisia na ulop na saray de-aral a Protestanti a say agamil na Inkakristiano so manunan nibase ed moralidad tan say Dios odino espiritual a mundo so andian a balot na pibibiang odino impluensya ed peteg a bilay na too.”

Arum a mankuan a Kristiano, a pati say pigaran klero, so manduaruwa no kasin peteg ya agawa iray milagro ya asalambit diad Biblia. Sakey lan alimbawa so salaysay nipaakar ed mandarlang a tanaman a nikurit ed Biblia diad Exodo 3:1-5. Insalaysay na libron What the Bible Really Says ya ag-itan ipapasen na pigaran teologon Aleman  a literal ya agawan milagro. Imbes, ipapasen da itan a “simbolo na akindalem a pipupuligesgesan nen Moises lapud ot-ot tan pirmin kagogonigon na konsiensia.” Oniay inkuan ni na libro: “Say apoy so nayarin ipapasen met bilang rosas a biglan binmuskag lapud kiwawala na Dios a singa sinag na agew.”

Nayarin agmangombinse ed sika so ontan ya eksplinasyon. Kanian, anto so nepeg mon panisiaan? Kasin realistikon panisiaan a talagan agawa iray milagro? Komusta balet iray milagro ed modernon panaon? Tan lapud agtayo natepetan iray anghel, siopa so napantepetan tayo?

No Anto so Panmoria na Biblia

Anggapo so makapangiburi ya insalaysay na Biblia a walay panaon nensaman a sinmalet so Dios pian manggawa na saray bengatla ya imposible parad too. Oniay nabasa tayo nipaakar ed sikato: “Impaway mo so baley mo ya Israel a nanlapu ed dalin na Ehipto ed panamegley na saray tanda, tan pakelaw [odino milagro], tan ed sakey a baleg a mabiskeg a lima, tan ed akaunat a taklay tan ed sankabalgan a takot.” (Jeremias 32:21) Isipen pa so inkiyabeban tuloy na sankamakapanyarian a nasyon ed saman a panaon lapud samploran bakbak ya indapo na Dios, a kabiangan lay impatey na amin a panguloan ya anak ditan. Talagan milagro!​—Exodo, kapitulo 7 anggad 14.

Kalabas na dakel a siglo, deneskribe na apatiran managsulat na Ebanghelyo so manga 35 a milagro a ginawa nen Jesus. Diad tua, isusuheri na saray balikas da a mas dakel ni iray ginawa ton milagro nen saramay insalaysay da. Kasin sarayan salaysay et katuaan odino istorya labat? *​—Mateo 9:35; Lucas 9:11.

No peteg so ibabaga na Biblia bilang Salitay Dios a katuaan, sirin walaan ka na malet a basiyan pian panisiaan iray milagro a sinaglawi na satan. Malinlinew so impangisalaysay na Biblia ya agawa iray milagro nensaman a panaon​—saray mamilagron panagtambal, inkioli ed bilay, tan arum nin bengatla a mipara​—balet malinew met ya isasalaysay na satan ya agla nagagawa iray ontan a milagro. (Nengnengen so kahon a “No Akin ya Agla Nagagawa Iray Milagron Agawa Nensaman,” diad pahina 4.) Kanian kabaliksan kasi na satan ya anggan saramay manisia a matua so Biblia et agla manisia ed saray milagro ed modernon-panaon? Abuloyan ya onebat so ontumbok ya artikulo.

[Saray paimano ed leksab]

[Kahon ed pahina 4]

NO AKIN YA AGLA NAGAGAWA IRAY MILAGRON AGAWA NENSAMAN

Nanduruman klase na saray milagro so asalambit diad Biblia. (Exodo 7:19-21; 1 Arari 17:1-7; 18:22-38; 2 Arari 5:1-14; Mateo 8:24-27; Lucas 17:11-19; Juan 2:1-11; 9:1-7) Dakel ed sarayan milagro so angipabidbir ed si Jesus bilang Mesias, tan paneknek iratan a sikatoy tinulongan na Dios. Impatnag na inmunan papatumbok nen Jesus iray mamilagron langkap, a singa say pansalita na nanduruman lenguahe tan pakatebek ed saray impuyan a balikas. (Gawa 2:5-12; 1 Corinto 12:28-31) Saratan a mamilagron langkap so makanakana ed Kristianon kongregasyon sanen balo nin niletneg itan. Panon ya ontan?

Say sakey a rason et dagdaiset iray kopya na Kasulatan. Kaslakan a saray mayaman labat so walaan na anggan dinan a klase na saray lukot odino libro. Diad paganon daldalin et anggapo so makapikabat ed Biblia odino ed Autor na satan, si Jehova. Say bangat na Kristiano so kinaukolan ya ipasabi panamegley na pitongtong. Kanian saray mamilagron langkap so makanakana ed pamaneknek a say Dios so manguusar ed Kristianon kongregasyon.

Balet impalinew nen Pablo a naandi iratan a langkap sano agla nakaukolan. “Anggan wala ni so saray propesiya mangangga ira, anggan wala niray salita, ontunda ra; anggan wala niray karunongan, naerep ira. Ta amta tayo so arum, tan propetaan tayo so arum. Et bangno say ayadyari so ondateng, say agni ayadyari so naekal.”​—1 Corinto 13:8-10.

Natan et nabasa la na totoo so Biblia, ontan met iray konkordansia tan ensayklopedia. Say masulok ya anemiran milyon a nipasal a Kristiano so ontutulong ed arum a makagamor na pikakabat nipaakar ed Dios panamegley na Biblia. Kanian, agla nakaukolan iray milagro pian paneknekan a si Jesu-Kristo so tinuro na Dios a Manangiliktar odino pian mangitarya na paneknek a tutulongan nen Jehova iray lingkor to.