Saray Milagro ya Anengneng Mo La!

SAY salitan “milagro” et mankabaliksan met na “makapadinayew odino nikaduman tuloy ya ebento, bengatla, odino agawaan.” Amin tayo so akanengneng la ed sayan klase na milagro, ya ag-akibabalian na Dios.

Legan ya onlalaknab so pikakabat na totoo ed pisikal iran ganggan na palsa, nagagawaan da la iray bengatla a kaslakan a momoriaen ya agnagawaan ed apalabas. Alimbawa, nayarin isipen na maslak a totoo ed apalabas a siglo ya imposible iray kaslakan a nagagawaan natan na saray kompyuter, telebisyon, teknolohiya ed liwang, tan saray miparan inaligwasan ed modernon panaon.

Lapud bibidbiren na arum a sientista a samet labat so pikakabat da ed saray pankelawan ed siensia a naromog ed saray palsa na Dios, aaksobien da ya agda la nibaga tekep na inkaseguro ya  imposible so sakey a bengatla. Mabetbet ya ibabaga ran mairap a nagawa itan. Kanian isusuheri ra a walaray “milagro” diad arapen.

Anggano usaren tayo so manunan kabaliksan na “milagro,” a manutukoy ed saray bengatla ya ‘ipapasen a nagagawa panamegley na sakey a makapanyari nen say too,’ nibaga tayo a balang sakey ed sikatayo so akanengneng la na milagro. Alimbawa, naoobserbaan tayo so agew, bulan, tan bibitewen​—ya amin et niwala “panamegley na sakey a makapanyari nen say too,” say mismon Manamalsa. Nilikud ed satan, siopa ta so sigpot a makapangidetalye no panon ya ongagana so laman na too? no panon ya onaandar so utek? odino no panon ya ombabaleg so lukon a too? Oniay ipapabitar na libron The Body Machine: “Say laman na too a kokontrolen tan pakukurangen na central nervous system et sakey a komplikadon aparato ed pakalikna, sakey a makina a mamapaandar ed inkasikaton dili, sakey a kompyuter a makayarin mamawala lamet na inkasikaton dili​—sakey a makapakelkelaw tan diad dakel a paraan et agnipaliwawan pinalsa.” Say Dios ya amalsa ed “laman na too” so talagan nanggawa na milagro, a satan so pandidinayewan tayo lawas. Wala niray arum a klase na milagro ya anengneng mo la, anggaman nayarin agmo amoria a milagro iratan.

Kasin Nipasen a Milagro so Sakey a Libro?

Anggapo lay arum a libro a malaklaknab a nibubunog nen say Biblia. Wala ta so naimanom ditan a milagro? Nibaga tayo kasin niwala itan “panamegley na sakey a makapanyari nen say too”? Tua a say Biblia et sakey a libron insulat na totoo, balet bibidbiren dan say insulat da et saray kanonotan na Dios, aliwan dilin kanonotan da. (2 Samuel 23:1, 2; 2 Pedro 1:20, 21) Isipen pa itan. Sikara so manga 40 a totoo, a nambilay ed loob na sakey a panat na panaon a 1,600 a taon. Nanduruma so kipapasen na panagbilay da, salanti, bilang papastol, mibabakal, managsigay, empleyado na gobierno, doktor, saserdote, tan arari. Ingen, ayarian dan impasabi so mantutunosan a mensahe na ilalo a matua tan susto.

Unong ed panguusisan maong na saray Tasi nen Jehova ed Biblia, aawaten da itan ya ‘aliwan salita na totoo, balet unong ed katuaan, say salitay Dios.’ (1 Tesalonica 2:13) Saray publikasyon da so abayag lan mangipapaliwawa no panon a saray ipapasen a mansumlangan diad Biblia et napantutunosan na interon mensahe na satan. Sayan pantutunosan et paneknek lan mismo a say Dios so autor na satan. *

Anggapo lay arum a libro a pirmin nanggunaetan a deralen noag say Biblia labat. Ingen, wala nin siansia itan anggad natan tan say kabiangan na satan et wala met la ed masulok a 2,000 a lenguahe. Say pansiasiansian mismo na satan a libro tan say inkanapanmatalkan na mensahe na satan so pakapatnagan a walay pibabali na Dios. Talagan sakey a milagro so Biblia!

Sakey a Milagro a “Mabilay tan Mabiskeg”

Saray milagro nensaman a panaon, a singa say mamilagron panamaabig tan inkioli, so agla nagagawa. Balet walaan itayo na rason pian manmatalek a diad asingger lan balon mundo na Dios, et nagawa lamet iratan a milagro, a diad satan et interon globo la. Saratan so mangitarok na permanentin pakainawaan tan nairapan itayon manebek ed satan diad kaplesan.

Say Biblia, bilang sakey a milagro, so makapanggawa  met natan na saray milagro diad pamapakiwas ed totoo a mamasimbalo ed personalidad da. (Nengnengen so alimbawa diad kahon a “Say Pakapanyari na Salitay Dios,” diad pahina 8.) Oniay ibabaga na Hebreos 4:12: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” On, say Biblia so akatulong ed impanguman na kabibilay na masulok ya anemiran milyon a totoo a manaayam ed interon globo, a mamapawala na gagala ed bilay da tan mangitatarya ed sikara na makapakelaw ya ilalo ed arapen.

Akin ya ag-abuloyan so Biblia a manggawa na milagro ed bilay mo?

[Paimano ed leksab]

[Kahon/Litrato ed pahina 7]

INATEY LA ODINO MABILAY NI?

Unong ed Juan 19:33, 34, si Jesus so inatey la sanen “sakey ed saray sundalo sinegkal to na sakey a gayang so diking, et tampol walay pinmaway a dala tan danum.” Balet, diad arum a patalos et ipapatnag na Mateo 27:49, 50 a si Jesus et mabilay ni sanen agawa itan. Akin a mandumaan?

Insebel na Mosaikon Ganggan so pamaulyan ed sakey a kriminal a sanlabin akabitin diad panamairapan a kiew. (Deuteronomio 21:22, 23) Kanian, diad panaon nen Jesus, no mabilay ni so impasak a kriminal anggad mansirunget la, kaslakan a pipileyen iray sali to pian napapeles so ipatey to. Agto la nitarangka iray sali to kanian agla makalinawa na susto. Say impamiley na saray sundalo ed saray sali na duaran managgaway mauges ya impasak ed abay nen Jesus balet ta agda piniley iray sali to so mangipapatnag ya inisip dan sikatoy inatey la. Posiblin dinuyok na sundalo so diking to pian naseguro ran inatey la tan pian aglan balot nabilay ed saginonor a nayarin lingon ipakabat bilang inmoli ed bilay.

Say teksto ed Mateo 27:49, 50, ed arum a patalos so mangisasalaysay na duman pantutumbokan na ebento. Oniay ibabaga na satan: “Sakey nin laki so angala na gayang tan induyok to ed diking to, tan pinmaway so dala tan danum. Et kinmelyaw lamet si Jesus ed maksil a boses, tan naandi so espiritu to.” Balet, saray aka-italikon balikas so agpinmatnag ed amin a kadaanan a manuskrito na Biblia. Panisiaan na dakel ya autoridad ya insalet itan diad saginonor manlapud Ebanghelyo nen Juan balet ta aliway angisaletan. Kanian, dakel a patalos so angibiig ed saratan a balikas diad saray braket odino parentesis, angiyan na paimano’d leksab bilang panangipalinew, odino sigpot lan angekal ed saratan a balikas.

Say orihinal a teksto nen Westcott tan Hort, a malaknab ya inusar bilang basiyan na New World Translation, so angiyan ed saratan a balikas ed loob na doblin braket. Impaimano na satan a saray balikas et “maseguron nibase ed malet a padesir ya insalet iratan na saray managkopya.”

Mabiskeg sirin so ebidensya a say Juan 19:33, 34 et katuaan tan si Jesus et inatey la sanen dinuyok na Romanon sundalo so diking to panamegley na gayang.

 [Kahon/Litrato ed pahina 8]

SAY PAKAPANYARI NA SALITAY DIOS

Bilang sakey a tin-edyer a nanlapud pamilya a sian iray ateng, si Detlef so alanor ed saray druga, alak, tan heavy metal. * Sikatoy nagmaliw a membro na grupon skinhead, tan ag-abayag et sikatoy akapi-enkuentro ed saray popolis lapud inkabusangel to.

Nen 1992, alanor so 60 ya skinhead ed labolabon panlalaban na manga 35 a membro na gang diad sakey a restawran tan bar diad amianen-bukig ya Alemanya. Si Thomas, a sakey ed saray membro na gang, so binabatla a sengegan na impatey to. Pigara ed saray angigaulo, a kaibay Detlef, so senentensiaan a nipriso kayari na impan-usay a saya so malaknab ya imbabalita na media.

Ag-abayag sanen akapaway lay Detlef ed prisoan, sikatoy inikdan na saray Tasi nen Jehova na sakey a pampleta. Say pampleta so apauloan na “Akin a Napno na Saray Problema so Bilay?” Akombinse a tampol si Detlef a katuaan iray ibabaga na satan, tan sikatoy impaiyaralan na Biblia ed saray Tasi. Saya so sengegan na sigpot ya impanguman na kabibilay to. Manlapu nen 1996 et sikato lay maseseg a Tasi nen Jehova.

Si Siegfried, a datin membro na sakey a gang, so maapit a kaaro nen Thomas, samay kalangweran a lakin pinatey; sikatoy nagmaliw met a Tasi diad saginonor tan sakey la natan a matatken ed kongregasyon. Sanen dinmalaw si Siegfried ed kongregasyon nen Detlef pian manpaliwawa a nibase ed Biblia (a nibanan wadman so nanay nen Thomas, a sagpaminsan ya onaatendi ed saray pantitipon), sikatoy inimbitaan nen Detlef a mangugto. Manga samploy taon ed apalabas, say pambusol da so agnapokpokan. Balet natan et mapatpatnag lay aroan da bilang sanagi ed espiritual.

Si Detlef tan Siegfried so maniilalon mangabet ed si Thomas ya onoli ed bilay diad mangaraldalin a paraiso. Oniay inkuan nen Detlef: “Siak so makalua sano isipen ko labat itan. Agaylan pagbabawian ko so ginawak.” Diad ontan et pilalek dan dua a tulongan si Thomas, a singa panutulong da met ed arum natan, a makapikabat ed si Jehova tan manggayaga ed ilalo ya itatarya na Biblia.

Peteg a pakapanyari itan na Salitay Dios!

[Paimano ed leksab]

[Litrato ed pahina 6]

Say laman na too so makapakelkelaw a palsa

[Credit Line]

Anatomy Improved and Illustrated, London, 1723, Bernardino Genga