Say Intatdang ed “The Bottom” na Saba
Say Intatdang ed “The Bottom” na Saba
SAY isla na Saba ya uuleyan na Ulandes so datin nankutaan na saray pirata a nanlalayag ed Dayat na Caribbean pian mananap na nasamsam. Natan, sayan melag ya isla, a walad 240 a kilometro ed bukig na Puerto Rico, so panaayaman na manga 1,600 a totoo, a 5 ed sikara et Tasi nen Jehova. Balet, sarayan makpel a ministro so manaanap na bengatlan mabmabli nen say nasamsam. Sikaray maseet a manaanap na totoo a “tinandaan ed bilay ya andi-anggaan.”—Gawa 13:48.
Say maong a balita na Panarian na Dios so primeron akasabi diad isla nen Hunyo 22, 1952, sanen dinmaong ed baybay na Saba so 59-piye a barkon Sibia ya inusar na saray Tasi nen Jehova. (Mateo 24:14) Saray misionaryo a di Gust Maki tan Stanley Carter so tinmatdang ed The Ladder, sakey a dalan a walaan na masulok a 500 a baton balitang ya anggad The Bottom, a kabisera na Saba. * Diad loob na pigaran siglo, satan a mainget a dalan so alenleneg a paraan pian nasabi iray manaayam ed isla.
Say primeron opisyal a report a nipalapag nipaakar ed panagpulong a kimey na Kristiano ed Saba et pinmaway diad 1966 Yearbook of Jehovah’s Witnesses. Unong ed satan a report, wala labat so saksakey ya aktibon Tasi diad interon isla. Diad saginonor, sakey a pamilya a nanlapud Canada so pigay taon a nanayam ditan pian ipulong so maong a balita. Diad agano ni, si Russel tan Kathy, a retirado lan sanasawa a taga Estados Unidos, so linma ed Saba tan akibiang ira ed panagpulong ditan. Imanoen so insalaysay da.
Imbisita Diad Saba
Sikami nen akulaw ko so akakar diman panamegley na eroplano bilang sankaili nen Ronald, a bukbukor toy Tasi diad isla legan na interon dekada lawari na 1990. Sikami so tinalaranan to diad airport. Nanliketan to so melag a kahon a nankargay pisipising ya impaabet mi ed sikato, lapud anggapo so mantatanem pian manlako diad isla. Linmugan kami ed melag a trak tan nankalkalna kamin tinmatdang ed paliku-likon dalan ed gilig na Mount Scenery anggad toktok na sayan inaktibo lan bolkan.
Tinmunda kami ed baryo na Hell’s Gate tan ninengneng nen Ronald so information board parad publiko pian seguroen no akapeket ni so imbitasyon parad paliwawa ed publiko diad Simba. Makapaliket ta naamtaan min akapeket ni. Sikatoy sinmapat lamet ed trak, tan tinmuloy kamin tinmatdang diad sankaawangan a purok ed isla a Windwardside. Unong ya isusuheri na ngaran na satan, sayan marakdakep a lugar so nibanda ed sisiplogan na dagem, a walad manga 400 a metro kaatagey manlapud dantal na dayat. Kaloob mi ed wangalan na abung nen Ronald, anengneng mi so makolor a karatula diad arap a beranda ya akasulat so Kingdom Hall of Jehovah’s Witnesses.
Legan na panangugto, intepet ko so bengatlan sengegan na imbisita mi, “Panon kan nagmaliw a manangiyabawag na Panarian diad Saba?”
Oniay inkuan nen Ron: “Sanen asumpal so konstruksion ed sanga na saray Tasi nen Jehova ed Puerto Rico nen 1993, pinirawat min sanasawa so mansiansia ed asainmin ed arum a bansa. Nensaman et binmisita kami ed Saba a kaiba so sakey nin sanasawan payunir tan naamtaan mi a wala so 1,400 a manaayam dia balet ta anggapoy Tasi. Kanian akitongtong kami ed Komite na Sanga ed Puerto Rico nipaakar ed panpirmi mi dia.
“Maabig iray nansumpalan, tan diad kaunoran et naaprobaan kami a manpirmi dia. Balet, makapaermen ta graben nansakit so akulaw ko kalabas na duay taon, kanian pinmawil kami ed California. Kayari na impatey to, siak so pinmawil ed Saba lapud agko labay a gapoan so sakey a bengatla ya agko sumpalen.”
Impanpulong ed Kabkaabungan Diad Saba
Say balkonahe na sanlasus-taon lan abung nen Ron so uusaren met bilang Kingdom Hall. * Legan kamin man-aalmusal tan manpaparaan ya onlan manpulong, say uran a nanlapud onlalabas a lurem so anebseb ed lutuan ya andian na atep. Kayari min nan-almusal, pinmikal kami pian manpulong ed kabkaabungan diad The Bottom, anggaman medyo malurem. Ibabano nen Ron so kada unabung ed kangaranan da. Say tongtongan mi so niyapasakey ed agano niran balita ed lokal. Si Ron so kabkabat na maslak a totoo ontan met ed ministeryo to, tan dakel so mabulos ya angawat na literatura ed Biblia.
Nayarin mairap so pangisimpen na rekord na saramay interesado ed mensahe na Panarian no agmo kabisado iray taga-baryo. Akin? Lapud “kakaukolanen na ley a parepareho so kolor na amin ya abung,” so kuan nen Ron. Ontan a tua, ta sanen ninmengneng ak ed kaliberliber, naimanok ya amin a kaabungan ed Saba et amputi tan say atep et ambalanga.
Kayari min itongtong so nipaakar ed Biblia, imbitaan mi so unabung ya onatendi ed paliwawa parad publiko a nibase ed Biblia a gagawaen ed Simba diad Kingdom Hall. Sano ag-onalis si Ron diad isla, sikatoy sinimban manpapaliwawa ed publiko. Diad kaplesan et wala so 17 ya iyaaralan na Biblia ed Saba. Duamplo so inmatendi ed Memoryal na impatey nen Kristo nen 2004. Tan anggaman ompatnag a dagdaiset itan a bilang, irerepresenta na satan so 1 porsiento ed interon populasyon na Saba!
On, saray Tasi nen Jehova so mansasagpot a tuloy pian nipasabi ed dakel nin totoo anggad posible so mensahe na Dios nipaakar ed kilalaban. Balanglan diad melag ya isla a singa say Saba odino diad interon kontinente, saray Tasi nen Jehova so matoor a manusumpal ed kimey a niganggan ed sikara a ‘manggawa na saray babangatan ed amin a nasyones.’—Mateo 28:19.
Makapaermen ta asumpal la so imbisita mi. Manpapayapay kami legan ya onsasapat ed eroplano. Agmin balot nalingwanan so imbisita mi ed Saba tan say panaon na intatdang mi ed The Bottom!
[Saray paimano ed leksab]
^ par. 3 Ompatnag a tinawag itan na saray pirata a “The Bottom” lapud inisip dan wala itan ed leksab na sangab na bolkan.
^ par. 12 Nen Setyembre 28, 2003, linma ed Saba iray boluntaryo a nanlapud Florida, E.U.A., tan inuman da so sakey a bilding diad asingger, ya uusaren la natan bilang Kingdom Hall.
[Saray mapa ed pahina 10]
(Parad aktual a format, nengnengen so publikasyon)
PUERTO RICO
[Picture Credit Line ed pahina 10]
Background: www.sabatourism.com