Siopa so Mantagano ed Mundo?

UNONG ed saray kalkulasyon na World Food Programme, ya ahensia na Nasyones Unidas parad pangontra ed eras, walay 800 milyon a naeerasan a totoo a kaslakan et ugugaw. Diad agano ni et inkuan na satan ya ahensia a saray pundo tan panangasikaso a nepeg komon a panlegpet na dakel a maaligwas a bansa parad sayan situasyon so asamsam na arum niran problema, a singa say terorismo. Say inkayat na makaalis iran sakit so amaloor ni ed problema. Oniay inkuan na Global School Feeding Report na ahensia nipaakar ed saray bansa ed Aprika a kasmak so AIDS: “Sakey ya interon henerasyon na atateng so naaandi. Saray natataynan dan anak so kaukolan a manlegpet ed inkasikaran dili, a maslak et andiay magenap a pikakabat ed panagdalus tan dunong ed panagbilay a kaslakan lan nipapasa ed mantutumbokan a henerasyon.”

Ipapaseseg na World Food Programme so panagboluntaryo pian mangitarya na anggan sakey a panangan kada agew diad saray eskuelaan. Say gagala et pian aglabat nabawasan so naeerasan noagta pian pakiwasen met panamegley na regular ya edukasyon, so arum a programa a denesinyo pian naamper so ikayat na HIV/AIDS diad limog na saray kalangweran.

Diad saray pasen a ginapoan la so panagboluntaryo et natatagano laray ugugaw, nipapasal la nipaakar ed kalinisan na laman, tan wala niray arum a tulong. Naimano met a diad saray lugar a walay impanguman ed kondukta na totoo, dinmaiset so bilang na saray naaalisan na HIV/AIDS.

Makapaermen, ta say pansasagpot na totoo et samet labat tan agmantutultuloy. Balet say Biblia so mangiiter na makaligliwan sipan nipaakar ed permanentin solusyon ed probleman eras. “Wala so daakan ya ilik ed tapew na dalin,” so inkuan na Salmo 72:16. Diad silong na uley na Panarian na Dios, nibaga na totoo so onia nipaakar ed si Jehova a Dios: “Dalawen mo so dalin, tan salogen mo . . . Sika iparaanan mo ra na bukel no imparaan mo la so dalin.”​—Salmo 65:9.

[Picture Credit Line ed pahina 32]

WFP/Y. Yuge