“Matoor Anggan Sano Nasusubok”

DIAD kagapo na Abril 1951, say mabiskeg a gobierno na Sobyet so biglan angataki ed inosentin grupo na saray Kristiano diad mamasagur a Sobyet Unyon, salanti, saray Tasi nen Jehova. Nilibo-libo a pamilya​—a kaiba iray ankekelag ya ugugaw, mamalukon, tan mamatakken​—so impanseseksekan ya inlugan ed saray bagon pian manbiahe ed makapapunaw a 20-agew ed tren a mamaarap ed Siberia. Sikaray asentensiaan na permanentin pakadestiero ed kalawakan tan kasupokan.

Nen Abril 2001, sinelebraan ed Moscow so koma-50 anibersaryo na sayan maawaran ya ebento diad impangipaway ed video a mangipapanengneng ed pigaran dekadan impamairap ed saray Tasi nen Jehova diad datin Sobyet Unyon. Diad dokumentaryo et insalaysay na saray manag-awaran tan saray akatasi no panon ya akaliktar tan binmulaslas ni ingen iray Tasi anggaman alablabas so pananesdes.

Sayan dokumentaryo a Faithful Under Trials​—Jehovah’s Witnesses in the Soviet Union, so abantayan la na minilyon ed Russia tan ed arum niran pasen, tan saya so pandinayewan na publiko tan saray manag-awaran. Nia so duaran komento na Ruson iskolar a manaayam ed pasen ya angibantakan ed karaklan a Tasin pamilya:

“Agusgustoan ko iyan palabas. Nensaman ni et labalabay ko la iray manangilaman na relihyon yo, balet sanen abantayan ko iyan palabas, lalon dinmakep so impresyon ko ed sikayo. Propesyonal a tuloy so inkagaway palabas! Say nagkalautlan agustoan ko ed saya et say paraan na impangipresenta yo ed kada indibidual. Anggaman sakey ak ya Ortodokso tan agko planon salatan so relihyon ko, naliliketan ak ed saray Tasi. Labay kon nawalaan na kopya na sayan palabas so faculty mi. Apandesisyonan mi na saray kaparak a propesor a pabantayan iya ed saray estudyante mi tan ilaktip iya ed kurikulum.”​—Propesor Sergei Nikolayevich Rubtsov, dean na faculty of history na State Pedagogical University, Irkutsk, Russia.

“Aliketan ak ed impaway na sayan palabas. Sano manggagawa so sakey na pelikula nipaakar ed panameget, kaslakan lan mair-irap a palaknaben so istorya diad lohikal a paraan. Balet ta agawaan yo itan. Iyawitan yo ak pa labat na arum ni ran palabas yo.”​—Propesor Sergei Ilyich Kuznetsov, dean na faculty of history na Irkutsk State University, Russia.

Saray Tasi nen Jehova a manaayam ed Siberia so angapresya met a maong ed sayan dokumentaryo. Niraya so alimbawa na reaksion da:

“Diad samay panaon a nagagawa iray ebento ya impanengneng ed sayan palabas, dakel ed Russia so walaay lingon panmoria ed kimkimey na saray Tasi nen Jehova. Balet sanen abantayan da so palabas, atebek da a say organisasyon tayo et aliwan sakey lambengat a sekta, a singa datin abaloan da. Saray arum ya agano nin nagmaliw a Tasi so angikuan: ‘Walara manayay Kristianon agagi  ed limog tayo tan kaiba tayon mankikimey a nantepel a maong!’ Kayarin abantayan na sakey a Tasi so palabas, imbesngaw toy pilalek ton magmaliw a sigpot-panaon a ministro.”​—Anna Vovchuk, ya indestiero ed Siberia.

“Sanen nipanengneng ed palabas so sekreton polis ya ontotoktok ed puerta na sakey a Tasi, ginmiwgiw ak. Singa onman imay toktok ed puerta mi, tan nanonotan ko ni so inkuan nen nanay kon: ‘Ompan walay pool ed asingger.’ Balet ta nipanonot met na palabas ed siak a mas nanirap nin maong manaya so dakel a Tasi nen say siak. Amin iyan impormasyon so mamapabiskeg a maong tan mamapaseseg ed sikatayo pian mantultuloy a manlingkor ed si Jehova.”​—Stepan Vovchuk, ya indestiero ed Siberia.

“Anak ak na saray Tasi ya adestiero. Kanian, abaloan kon dakel lay amtak nipaakar ed saraman a panaon. Balet sanen abantayan ko iyan palabas, amoriak a ngalngali anggapo manayay amtak. Legan kon tatalinengen iray interbio, manluwaluwa ak. Parad siak natan et aliwa labat lan istorya iray eksperiensya noagta tudtuan agawa. Say palabas so amaelet na relasyon ko ed Dios tan angiparaan ed siak pian sungdoan so amin a kairapan ed arapen.”​—Vladimir Kovash, Irkutsk.

“Parad siak, sayan palabas so mas mabiskeg nen say nisulat a salaysay. Sanen abantayan tan nadngel ko iray interbio ed saray agagi, say pakaliknak et singa naeksperiensyak met lan amin so sinagmak da. Say ehemplo na agin laki a nandrowing na saray postcard parad ugugaw nin ilalak ton bibii legan a walad prisoan so anagyat ed siak a panggunaetan ya ipurek ed kapusoan na dilin ananak ko iray katuaan ed Biblia. Salamat! Sayan palabas so lalon angipalikna ed saray Tasi nen Jehova diad Russia a kabiangan ira na sankamundoan ya organisasyon nen Jehova.”​—Tatyana Kalina, Irkutsk.

“Say diparan a, ‘Magmaong ni so maminsan a pakanengneng nen say maminlasus a pakadngel’ so talagan onaplika ed sayan palabas. Saya so mabilabilay, tudtua, tan walay pikonektaan to ed sikami! Kayarik itan ya abantayan, kinaukolan koy dakel a panaon pian mannonot. Tinulongan ak na palabas a molimolien so bilay na saramay adestiero a Tasi. Natan sano ipapareng ko iray kipapasen ko ed sikara, natutulongan ak a nawalaan na duman panmoria ed saray kaplesan a problema tayo.”​—Lidia Beda, Irkutsk.

Diad kaplesan et wala la so Faithful Under Trials diad 25 a lenguahe tan satan so inawat ed interon mundo. * Say interon dokumentaryo so imbrodkas ed saray istasyon na telebisyon diad St. Petersburg, Omsk, tan arum niran syudad ed Russia, ontan met ed saray syudad na Ukraine a Vynnytsya, Kerch, Melitopol tan diad rehyon na Lviv. Akaawat met itan na saray premyo manlapud internasyonal a grupo na managrepaso ed pelikula.

Say biskeg na mensahe na sayan dokumentaryo so napatnagan ed saray ehemplo na nilibon ordinaryo a totoo ya angipanengneng na nikadkaduman pakpel tan biskeg ed espiritual diad andukey a taotaon na panamasegsegang. Peteg a pinaneknekan na saray Tasi nen Jehova diad Sobyet Unyon a sikaray matoor anggan sano nasusubok. No kaliktan yon bantayan iyan dokumentaryo, maliket iray Tasi nen Jehova a mangitarya na satan parad sikayo. Ipangasin asinggeran so sakey ed sikara diad lugar yo.

[Paimano ed leksab]

[Picture Credit Line ed pahina 8]

Stalin: U.S. Army photo

[Picture Credit Line ed pahina 9]

Stalin: U.S. Army photo