Saray Pankokolkol​—Akin a Makapasakit Iratan?

“Iner so panlapuan na bakal tan sepakan ed sikayo?”​—SANTIAGO 4:1.

AG-ITAN itetepet na managsulat na Biblian si Santiago ed saray armada na Roma, a mibabakal nensaman pian manakop; nisay susukayan to iray motibo ed gerilyan pilalaban na saray Judion Sicario odino Totoon De-yuro, nen inmunan siglo K.P. Say tutukoyen to et saray sangsangan a pakalalanoray duaran too odino onsulok ni. Akin? Lapud singa saray pambabakal, saray personal a panlalaban et makaderal. Imanoen pa irayan salaysay ed Biblia.

Saray ilalak na patriarkan si Jacob so pirmin nambusol ed agi ran si Jose kanian sikatoy inlako ra ed inkaaripen. (Genesis 37:4-28) Diad saginonor, nanggunaetan nen Arin Saul na Israel a pateyen si David. Akin? Lapud panibegan toy David. (1 Samuel 18:7-11; 23:14, 15) Nen inmunan siglo, agulo met so interon kongregasyon lapud balingaan na duaran Kristianon bibii, a di Euodias tan Sintique.​—Filipos 4:2.

Diad mas agano niran panaon, saray totoo so nanresolbi ed saray siblangan da panamegley na duwelo, a sikaray man-espadaan odino manpaltogan. Mabetbet a say sakey ed sikara so ompatey odino nabaldado. Balet, saramay mansesebeg natan so kaslakan lan manguusar na makapasakit iran salita bilang armas. Anggaman anggapoy nipapaagus a dala, saray insalitan panangataki so makapasakit tan makaderal ed reputasyon. Mabetbet a natatalo ed oniaran ‘pambabakal’ odino pankokolkol iray andian na kasalanan.

Konsideraen pa so agawa diad apalabas a pigaran taon sanen inakusaan na sakey a parin Anglikano so sananey a pari ya aliway panguusaran to kuno ed pundo na simbaan. Akabatan na publiko so kolkolan da, tan naapag-apag iray parokyanon panseserbian da. Walaray membro ya agmimisa no samay kabusol dan pari so mangidaulo. Pirmi so pambusol da ed sakey tan sakey lapud ag-ira manbabanoan sano wala ra’d simbaan pian mandayew. Lalon pinmetang so balingaan da sanen say mangaakusan pari a mismo et naakusaan na mabanday a kondukta ed sekso.

 Impatawag na Arsobispo na Canterbury so duaran pari, a tinukoy to so panlalaban da a singa sakit a “kanser” tan “sakey ya iskandalo a mamapabanday ed ngaran na Katawan Tayo.” Nen 1997 et inmabuloy lan manretiro so sakey ed saray pari. Balet, say sakey so nansiansia ed puesto to ya anggad kaukolan lan onekal lapud asabi to lay edad a kapilitan lan manretiro. Anggaman ontan, sikatoy nansiansia ni anggad sankaunoran a bekta, a nanretiro sanen koma-70 ya agew na inkianak to, nen Agosto 7, 2001. Sinalambit na The Church of England Newspaper a say agew na impanretiro to et piesta na “Santo” a si Victricius. Siopa si San Victricius? Sikatoy sakey ya obispo nen komapat a siglo ya unong ed report et nilalatiko lapud agto labay so milaban ed militar. Diad pangipapaimano ed mandumaan ya awawey, oniay inkuan na peryodiko: “Say agpanlabay a mibiang ed eklesiastikon pibabakal so ag-ugali na [say manretiro lan pari].”

Agla komon asakitan na saratan a pari so inkasikara ontan met ed arum no inyaplika ra so simbawa diad Roma 12:17, 18: “Aleg ya itumang yo ed anggan siopa so mauges ed mauges. Pansesegan yo so saray bengatla a makapagalang ed arap na ganagana a too. No nayari, dia ed anganggaan na nayarian yo, manayam kayo ed kareenan ed ganaganay totoo.”

Komusta ka balet? No walay akaopendi ed sika, kasin misangsangan ka lapud impakasakitan mo? Odino paliisan mo so pansalita na makapasakit tan akaparaan kan mikareenan? No wala so naopendim, kasin sikatoy paliisan mo tan ilaloan mon nalingwanan to la so problema diad ilabas na panaon? Odino alisto kan onkerew na dispensa? Balanglan sika so onkekerew na perdona odino mameperdona ed sakey, sika so mas maliket no panggunaetan moy mikareenan. Natulongan itayo na simbawa ed Biblia pian naresolbi so anggan saray abayag lan balingaan, a singa ipapabitar na onggendan ya artikulo.