‘Asaliw Kayo ed Sakey a Bili’
‘Asaliw Kayo ed Sakey a Bili’
‘Asaliw kayo ed sakey a bili: kanian igalang yo so Dios.’—1 CORINTO 6:20.
1, 2. (a) Unong ed Mosaikon Ganggan, panon so nepeg a pantrato ed saray aripen ya Israelita? (b) Anto so nayarin pilien nensaman na aripen a mangaaro ed katawan to?
“SAY panangaripen et kasmak tan inkalapagan lan aawaten ed mundo nensaman,” so inkuan na Holman Illustrated Bible Dictionary. Oniay inyarum na satan: “Say ekonomya na Ehipto, Gresya, tan Roma so akadepende ed panagpatrabaho ed saray aripen. Nen inmunan siglo a nambilay iray Kristiano, sakey ed kada taloran too diad Italya tan sakey ed kada limara ed arum nin bansa et sakey ya aripen.”
2 Anggaman niwala la so panangaripen diad kadaanan ya Israel, nipurek ed Mosaikon Ganggan a protektaan iray aripen a Hebreo. Singa bilang, kinaukolan na Ganggan a say sakey ya Israelita et makapanlingkor bilang aripen ed ag-onsulok ya anem taon. Diad komapiton taon, sikato so “ompaway a bulos ya anggapo so bayaran to.” Balet saray totontonen nipaakar ed panagtrato ed saray aripen so makatunongan tan mapangasin tuloy lapud ta say Ganggan nen Moises so angidatak ed onian probisyon: “No say aripen et inkuan to a malinlinew, Inarok si katawan ko, say asawak a bii tan saray ana’ko; agko labay so ompaway a nabulos. Satan si katawan to yakar to ed Dios, tan yakar to ed pinto, odino angga ed patukok na pinto; tan si katawan to tebengen to so layag na aripen na sakey ya eser; et manserbi la ed sikato ya angga ed angga.”—Exodo 21:2-6; Levitico 25:42, 43; Deuteronomio 15:12-18.
3. (a) Anton nengneng na inkaaripen so inawat na saray inmunan-siglon Kristiano? (b) Anto so mamakiwas ed sikatayon manlingkor ed Dios?
3 Say probisyon a boluntaryon panagserbi so angitarya na pagpaunan panangiparungtal ed nengneng na inkaaripen ya awaten na saray tuan Kristiano. Alimbawa, impabidbir na saray managsulat na Biblia a di Pablo, Santiago, Pedro, tan Judas ya ariripen ira na Dios tan nen Kristo. (Tito 1:1; Santiago 1:1; 2 Pedro 1:1; Judas 1) Impanonot nen Pablo ed saray Kristianon taga-Tesalonica a sikaray ‘angibeneg ed panaglingkor ed saray talintaoy dirios pian makapanlingkor ed tua tan mabilay a Dios.’ (1 Tesalonica 1:9, Maung a Balita) Anto so amakiwas ed saratan a Kristiano pian manlingkor odino magmaliw a mabulos ya ariripen na Dios? Anto ta so mamapakiwas ed sakey ya Israelitan aripen pian italirak so personal a kawayangan to? Agta say panangaro to ed katawan to? Say panserbi bilang Kristiano et nibase ed panangaro ed Dios. Sano nakabat tan naaro tayo so tua tan mabilay a Dios, sikatayo so napakiwas a manlingkor ed sikato ‘ed amin a puso tayo tan ed amin a kamarerwa tayo.’ (Deuteronomio 10:12, 13) Balet, anto so lalanoren na pagmaliw ya ariripen na Dios tan nen Kristo? Panon itan a mangapekta ed inagew-agew a kabibilay tayo?
‘Gawa Yon Amin ed Kigloriaan na Dios’
4. Panon itayon magmaliw ya ariripen na Dios tan nen Kristo?
4 Say aripen et inukeran bilang “sakey a toon legal a kayarian na sananey odino arum tan sikato so nepeg a sigpot ya ontulok.” Sikatayo so nagmaliw a legal a kayarian nen Jehova sanen indedika tayo ed sikato so bilay tayo tan nampabautismo. ‘Aliwa a sikayo so makankien ed sikayon dili, ta sikayo, asaliw kayo na sakey a bili,’ so insalaysay nen apostol Pablo. (1 Corinto 6:19, 20) Siempre, satan a bili et say dondon bagat nen Jesu-Kristo, lapud nibase ed satan so pangawat na Dios ed sikatayo bilang ariripen to, balanglan alanaan itayon Kristiano odino kakaiba ra a walaan na mangaraldalin ya ilalo. (Efeso 1:7; 2:13; Apocalipsis 5:9) Kanian, manlapud inkabautismoan tayo, “kien itayo na Katawan.” (Roma 14:8) Lapud asaliw itayo panamegley na mablin dala nen Jesu-Kristo, nagmaliw itayo met ya ariripen to tan obligasyon tayon sumpalen iray ganggan to.—1 Pedro 1:18, 19.
5. Bilang ariripen nen Jehova, anto so manunaan ya obligasyon tayo, tan panon tayon nasumpal itan?
5 Nepeg ya unoren na ariripen so katawan da. Say panagserbi tayo et boluntaryo tan say aro tayo ed Katawan so mamapakiwas ed sikatayo. “Saya so aro na Dios,” so kuan na 1 Juan 5:3, “a sumpalen tayo so saray ganggan to: tan saray ganggan to aliwa ran ambelat.” Parad sikatayo sirin, say katutulok tayo so paneknek na panangaro tayo ontan met ed say panagpasakop tayo. Napatnagan itan ed amin a gagawaen tayo. “Anggan mangan kayo sirin, odino oninum, odino antokaman a gawaen yo,” so inkuan nen Pablo, “gawa yo ya amin ed gloria na Dios.” (1 Corinto 10:31) Diad inagew-agew a panagbilay, anggan diad angkelag iran paraan, labay tayon ipatnag a sikatayo so ‘lingkor na Katawan.’—Roma 12:11.
6. Panon a say pagmaliw ya ariripen na Dios so mangapekta ed saray desisyon tayo ed bilay? Iyilustra iya panamegley na sakey ya alimbawa.
6 Alimbawa, sano mandedesisyon, labay tayon nodnonoten a maong so linawa na mangatatawen a Katawan tayo, si Jehova. (Malaquias 1:6) Saray mairap a desisyon so nayarin manubok ed katutulok tayo ed Dios. Diad ontan, kasin talinengen tayo so simbawa to imbes a tumboken iray inklinasyon na “manamalingo” tan “mapalalo a mauges” a puso tayo? (Jeremias 17:9) Si Melisa, sakey a Kristianon walad kasuloan, so agano nin abautismoan sanen walay balolaki a kinmaraw ed sikato. Ompatnag a desente imay laki tan papaiyaralan la na Biblia ed saray Tasi nen Jehova. Anggaman kuan, akitongtong so sakey a matatken ed si Melisa nipaakar ed kakabatan na panumbok ed ganggan nen Jehova a miasawa “dia ed linawa na Katawan lambengat.” (1 Corinto 7:39; 2 Corinto 6:14) “Aliwan mainomay ed siak so ontumbok ed satan a simbawa,” so inaksobi nen Melisa. “Balet denesidik a lapud nanggawa ak na dedikasyon ko ed Dios pian gawaen so linawa to, unoren ko iray malinew a ganggan to.” No nanonotan to so agawa, oniay inkuan to: “Malikeliket ak ta inunor ko iman a simbawa. Agnambayag et tinmunda lan nanaral imay laki. No intultuloy ko iman a relasyon, akapiasawa ak ed sakey ya agmananisia.”
7, 8. (a) Akin ya agtayo nepeg a pampagaan a maong so pamaliket ed totoo? (b) Iyilustra no panon a nadaeg so takot ed too.
7 Bilang ariripen na Dios, ag-itayo nepeg a magmaliw ya ariripen na totoo. (1 Corinto 7:23) Tua, anggapo ed sikatayo so malabay a busolen na arum, balet nepeg tayon tandaan a midumaan iray estandarte na saray Kristiano ed saray taga-mundo. Oniay intepet nen Pablo: “Seseetan ko kasi so pamaliket ed saray totoo?” Say ebat to et: “No paliliketen ko ni totoo, aliwa ak komon ya aripen nen Kristo.” (Galacia 1:10) Agtayo labat labay so onsuko ed pananesdes na saray kalimog tan magmaliw a managpaliket ed totoo. Anto sirin so nagawaan tayo sano nipaarap itayo ed saray pananesdes a mikompormi?
8 Ikonsidera pa so alimbawa nen Elena, sakey a kalangweran a Kristiano diad España. Walaray kaklase to ya angidonar na dala ra. Amta ra a si Elena, a sakey a Tasi nen Jehova, so agmangidodonar odino manpapasaksak na dala. Sanen linmesa so pankanawnawan ipaliwawa nen Elena diad arap na interon klase so talindeg to, sikato so namboluntaryon mangiter na sakey a presentasyon. “Diad tua et mannerbiyos ak a maong a manggawa ed saman,” so insalaysay nen Elena. “Balet siak so namparaan a maong, tan makapasurprisa iray resulta. Siak so nirespeto na dakel ed saray kaparak ya estudyante, tan imbaga ed siak na maestrok a pandinayewan to so kimey a ginawak. Manuna ed amin, maliket ak ta nidepensak so ngaran nen Jehova tan nipaliwawak a malinew iray rason na Makasulatan a talindeg ko.” (Genesis 9:3, 4; Gawa 15:28, 29) On, bilang ariripen na Dios tan nen Kristo, sikatayo so duma. Balet, mabetbet a sikatayo so respetoen na totoo no akaparaan itayon mangidepensa ed saray sisiaen tayo ed marespeton paraan.—1 Pedro 3:15.
9. Anto so naaralan tayo ed anghel a pinmayawar ed si apostol Juan?
9 Natulongan itayo met a magmaliw a mapaabeba no nodnonoten tayo ya ariripen itayo na Dios. Diad aminsan ya inkagawa, nandinayewan a maong nen apostol Juan so alay dakep a pasingawey na mangatatawen a Jerusalem kanian sikato so dinmakmomo pian idayew so anghel a nanlingkor bilang pinagkasangiyan na Dios. “Nengneng mo,” so inkuan na anghel ed sikato. “Agmo gawaen itan, ta aripen ak met a kaparam tan kapara na saray agagim a propeta, tan saray mangunor ed saray salita na saya a libro: igalang mo so Dios.” (Apocalipsis 22:8, 9) Seguradon agaylay abig ya alimbawa so impatnag na anghel parad amin ya ariripen na Dios! Walaray Kristiano a nayarin walaan na nikaduman responsabilidad ed loob na kongregasyon. Anggaman ontan, oniay imbaga nen Jesus: “Siopaman a labay toy magmaliw a baleg ed sikayo sikato naani managlingkor yo. Tan siopaman a labay toy unaan ed sikayo sikato naani aripen yo.” (Mateo 20:26, 27) Bilang papatumbok nen Jesus, amin tayo et ariripen.
“Ginawa Mi so Nepeg Mi a Gawaen”
10. Mangiter na saray alimbawa ed Kasulatan a mangipatnag a saray matoor a lingkor na Dios so naiirapan no maminsan a manggawa na linawa to.
10 Say panggawa ed linawa na Dios so mairap no maminsan parad saray ag-ayadyarin totoo. Si propetan Moises so masuyat ya ontulok sanen sikato so imbaki nen Jehova a mangibulos ed ananak na Israel manlapud panangaripen na Ehipto. (Exodo 3:10, 11; 4:1, 10) Sanen akaawat si Jonas na asainmin a mangiyabawag na mensahe na panangukom ed totoo na Ninive, sikato so “inmalagey ya ombatik ed Tarsis a nanlapu ed arap nen Jehova.” (Jonas 1:2, 3) Si Baruc, a sekretaryo nen propeta Jeremias, so nanreklamo ed pakakabanalan to la. (Jeremias 45:2, 3) Panon so nepeg tayon ikiwas sano say personal a pilalek odino panlabayan tayo et misumlangan ed panggaway linawa na Dios? Say ilustrasyon nen Jesus so mangiter na ebat.
11, 12. (a) Isalaysay ed antikey so ilustrasyon nen Jesus a nikurit ed Lucas 17:7-10. (b) Anton leksion so naaralan tayo ed ilustrasyon nen Jesus?
11 Sinaglawi nen Jesus so nipaakar ed sakey ya aripen a sanagew lan mangaasikaso ed pulok na katawan to diad kaumaan. Sanen sinmempet so aripen, ya abanalan ed 12 oras ya impasyan kimey, say katawan to so ag-angimbita ed sikato a midungo ed mananam a pangdeman. Imbes, oniay inkuan na katawan: “Mantadia ka na pangdeman ko, tan apiger mo so kawes mo, et manlingkor ka ed siak, angga ed kayarik a mangan tan oninum; et insan mangan ka tan oninum ka?” Naarap labat na aripen iray pankaukolan ton dili no aserbian to la so katawan to. Sinampotan nen Jesus so ilustrasyon diad impangikuan ton: “Ontan kayo met, sano agawa yo so amin a niganggan ed sikayo, kuan yo, Ariripen kami, ya andi kakanaan; ginawa mi so nepeg mi a gawaen.”—Lucas 17:7-10.
12 Ag-inter nen Jesus iyan ilustrasyon pian ipatnag ya ag-aapresyaen nen Jehova so serbisyon gagawaen tayo parad sikato. Malinew so ibabaga na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.” (Hebreos 6:10) Imbes, say punto na parabolo nen Jesus et agnayarian na aripen a paliketen so inkasikaton dili odino iyapasakey so pakainawaan ton dili. Sanen indedika tayoy inkasikatayo ed Dios tan pinili tayo so magmaliw ya ariripen to, inmabobon tayo ya iyuna so linawa to imbes a say linawa tayon dili. Nepeg tayon iyuna so linawa na Dios nen say panlabayan tayo.
13, 14. (a) Diad antoran kipapasen a kaukolan tayon talonaan iray dilin inklinasyon tayo? (b) Akin a nepeg tayon abuloyan ya ontalona so linawa na Dios?
13 Say regular a panaral ed Salitay Dios tan ed saray publikasyon ya itatarya na “matoor tan makabat ya aripen” so nayarin mankaukolan na pirmin panagsagpot ed biang tayo. (Mateo 24:45) Nayarin ontan so kipapasen, nagkalalo la no naiirapan itayon manbasa odino say publikasyon et manisingbat ed ‘aralem iran bengatla na Dios.’ (1 Corinto 2:10) Balet, agta nepeg ya iyeskedyul tayo so personal a panagaral? Nakaukolan tayon disiplinaen so inkasikatayo a mangusar na magenap a panaon ed pambasa na aaralen a materyal. Ingen, no agtayo gagawaen itan, panon tayon nabayuboan so pampilalek ed ‘taganon anawet a parad saray ayadyarin totoo’?—Hebreos 5:14.
14 Komusta balet iray pankanawnawa sano onsempet itayon abanalan ed sanagew ya impantrabaho? Nayarin nakaukolan tayo nin ibunek so inkasikatayo ya onatendi ed saray Makristianon pantitipon. Odino say pampulong ed arum a totoo so aliwan sipor a panlabayan tayo. Binidbir a mismo nen Pablo a walaray panaon sano iyaabawag tayo so maong a balita ya agmitunosan odino ‘andi ed linawa tayo.’ (1 Corinto 9:17) Balet, gagawaen tayo irayan bengatla lapud si Jehova—say mangatatawen a Katawan tayo, ya aaroen tayo—so angiganggan a nepeg tayon gawaen itan. Tan agta lawas tayon nalilikna so inkapnek tan inkarepreskoan kayari tayon nansagpotan so panaral, iyatendi ed saray pantitipon, tan pampulong?—Salmo 1:1, 2; 122:1; 145:10-13.
Aglilingawen ‘Iray Bengatla a Binenegan la’
15. Panon ya impatnag nen Jesus so alimbawa nipaakar ed panagpasakop ed Dios?
15 Impatnag nen Jesu-Kristo so panagpasakop to ed mangatatawen ya Ama to diad matalonggaring a paraan. “Linmasur ak a nanlapu ed tawen, aliwan piano gawaen ko so linawak a dili, noag say linawa na angibaki ed siak.” (Juan 6:38) Sanen sikatoy nagogonigon a maong diad hardin na Getsemani, oniay impikasi to: “O Amak, no nayari onlabas komon so sayan kopa ed siak; anggaman ontan, aliwan unong ed kaliktan ko, ingen unong ed kaliktan mo.”—Mateo 26:39.
16, 17. (a) Panon so nepeg a panmoria tayo ed saray bengatlan intalirak tayo la? (b) Ipabitar no panon a nagmaliw a realistiko si Pablo diad impanmoria to ed saray ilalo na mundo bilang “andi-kakanaan a dutak.”
16 Labay nen Jesu-Kristo a mansiansia itayon matoor ed desisyon tayon magmaliw ya ariripen na Dios. Inkuan to: “Anggapo so too a sano inyan to so lima to ed araro, et onlingay ed beneg, et makana ed panarian na Dios.” (Lucas 9:62) Agmanepeg so naynay a pannonot ed binenegan tayo la sano manlilingkor itayo ed Dios. Imbes, nepeg tayon pablien no anto so agamoran tayo la diad impandesisyon tayon magmaliw ya ariripen na Dios. Oniay insulat nen Pablo ed saray taga-Filipos: “Ibilang ko ra so ami’ bengatla ya onlereg nipaakar ed ontan la a karlangan na pikakabat ed Kristo Jesus a Katawan ko: a lapud sikato intepel ko so inkalereg na ganagana tan ibilang ko ra ya andi-kakanaan a dutak, pian nagamoran ko si Kristo.”—Filipos 3:8.
17 Isipen pa so amin a bengatlan impasen nen Pablo ya andi-kakanaan a dutadutak tan intalirak to nisesengeg ed espiritual iran tumang bilang aripen na Dios. Aliwa lambengat a saray pakainawaan ed mundo so intalirak to noag pati say posibilidad a magmaliw a lider na Judaismo. No intultuloy nen Pablo ya agamilen so Judaismo, nayarin sikato so awalaan na posisyon a mipadpara ed si Simeon ya anak na maestro nen Pablo, a si Gamaliel. (Gawa 22:3; Galacia 1:14) Anggaman walaray panduaruwaan nen Simeon, sikato so nagmaliw a lider na saray Fariseo tan awalaan na prominentin betang ed impanrebelde na saray Judio sumpad Roma nen 66-70 K.P. Diad satan a panlalaban et sikato so apatey na balanglan saray Judion panatiko odino saray Romanon sundalo.
18. Mangiter na sakey ya alimbawa no panon a mangitarok na dakel a tumang so maespiritual iran gegemtan.
18 Dakel a Tasi nen Jehova so tinmumbok ed alimbawa nen Pablo. “Diad loob na pigaran taon kayarik a naneskuela, akapantrabaho ak bilang manunan sekretarya na sakey a prominentin abogado diad London,” so inkuan nen Jean. “Nanliketan ko so trabahok tan akatipon ak na dakel a kuarta, balet diad pusok et amtak a mas dakel ni so nagawaan ko ed panlingkor ed si Jehova. Diad kaunoran et inderew ko so sulat pian onekal ak la tan ginmapo ak a nampayunir. Misalsalamat ak ta ginawak itan a kundang ngalngali 20 a taon lay apalabas! Say sigpot-panaon a panlilingkor ko so amabulaslas ed kalidad na bilay ko a nagkalalo ni nen say antokaman a nagamoran ed trabaho bilang sekretarya. Anggapo lay makapangiter na babaleg a liket nen say pakanengneng ed no panon a papasimbaloen na Salita nen Jehova so bilay na sakey a too. Alay abig so pakapibiang ed satan. Mas baleg so nagamoran tayo ed si Jehova nen say niiter tayo ed sikato.”
19. Anto so nepeg a determinasyon tayo, tan akin?
19 Saray kipapasen tayo so manguman diad ilalabas na panaon. Balet, agmanguuman so dedikasyon tayo ed Dios. Sikatayo so siansia nin ariripen nen Jehova, tan aabuloyan to itayon mandesidi no panon tayon usaren ed sankaabigan a paraan so panaon, biskeg, talento, tan arum niran walad sikatayo. Kanian, saray desisyon a gawaen tayo nipaakar ed saya so pakapatnagan na panangaro tayo ed Dios. Ipapatnag met na saratan so kalaknab na inkamabulos tayon mansakripisyo. (Mateo 6:33) Antokaman so kipapasen tayo, agta nepeg a determinado itayon iter ed si Jehova so sankaabigan tayo? Oniay insulat nen Pablo: “No wadtan so kasiglatay linawa, naawat so unong na wala ed sakey a too, aliwa ya unong na anggapo ed sikato.”—2 Corinto 8:12.
‘Nawalaan Kayo na Bunga’
20, 21. (a) Antoran positibon resulta so napawala ed pagmaliw ya ariripen na Dios? (b) Panon a tumangan nen Jehova iramay mangiiter ed sikato na sankaabigan da?
20 Aliwan panamairap so pagmaliw ya ariripen na Dios. Diad pisunian, satan so pakainawaan tayo manlapud manamairap a nengneng na panangaripen a mangeekal ed liket tayo. ‘Diad inkibulos yo ed kasalanan, tan impagmaliw yon ariripen na Dios,’ so insulat nen Pablo, ‘awalaan kayo na bunga ed kasantosan, tan say kasumpalan et bilay ya andi-anggaan.’ (Roma 6:22) No manpaaripen itayo ed Dios, mamawala itan na positibo iran resulta diad kasantosan, lapud nagamoran tayo iray gunggona ed masanto, odino malinis ed moral, a kondukta. Niarum ni, satan so mangitonton ed andi-anggaan a bilay diad arapen.
21 Si Jehova so mabunlok ed saray ariripen to. Sano gawaen tayo so sankaabigan tayo ed panaglingkor ed sikato, lukasan to ed sikatayo so “saray pinto na tawen” tan ipagamor to ed sikatayo so “sakey a bendisyon, ya anggapo naani so pasen a makasarag a mangawat ed sikato.” (Malaquias 3:10) Agaylan makapaliket so pantultuloy tayon manlingkor bilang ariripen nen Jehova ed andi-anggaan!
Kasin Natandaan Yo?
• Akin a nagmaliw itayon ariripen na Dios?
• Panon tayon nipatnag so panagpasakop tayo ed linawa na Dios?
• Akin a nepeg itayon akaparaan a mangiyuna ed linawa nen Jehova imbes a say panlabayan tayon dili?
• Akin ya ag-itayo nepeg ya ‘onlingaw ed saray binenegan tayo la’?
[Tepetepet Parad Panagaral]
[Litrato ed pahina 16, 17]
Say probisyon a boluntaryon panagserbi diad Israel so pagpaunan panangiparungtal ed panlingkor na saray Kristiano
[Litrato ed pahina 17]
Magmaliw itayon ariripen na Dios sano nabautismoan itayo
[Saray litrato ed pahina 17]
Saray Kristiano so mangiyuuna ed linawa na Dios
[Litrato ed pahina 18]
Si Moises so masuyat a mangawat ed asainmin to