Sakey ya Ebento a Nepeg a Nodnonoten

ANTO iyan ebento? Say impatey na sakey a too, ngalngali la 2,000 taon lay apalabas. “Iter ko so bilay ko, pian sikatoy alaen ko lamet,” so inkuan to. “Anggapo so mangekal ed siak na bilay ko, ingen sikato so iter ko manlapu ed inkasiak.” (Juan 10:17, 18) Satan a too et si Jesu-Kristo.

Binilin nen Jesus iray babangatan to a selebraan so Memoryal na masakripisyon impatey to. Natatawag met itan ya okasyon bilang ‘pangdem na Katawan.’ (1 Corinto 11:20) Say Memoryal ya inggapo nen Jesus pian nodnonoten so impatey to so selebraan na saray Tasi nen Jehova tan saray kakaaro ra no Huebes, Marso 24, 2005, kaselek na agew.

Ipalinew na sakey a paliwawa a base ed Biblia so kabaliksan na andi-lebaduran tinapay tan ambalangan alak ya uusaren ed satan ya okasyon. (Mateo 26:26-28) Ebatan met na paliwawa iray tepet a singa saraya: Kaunongan kabetbet so nepeg a panselebra na saray Kristiano ed sayan ebento? Sioparay manepeg a mangan tan oninum ed embleman tinapay tan alak? Siopara so nagunggonaan ed impatey nen Jesus? Sayan importantin selebrasyon so ontulong ed amin pian natalosan so gagala na bilay tan impatey nen Jesus.

Naabrasa kayo ed Memoryal na impatey nen Jesus. Ipangasin pitepet yo ed saray Tasi nen Jehova ed lugar yo no iner tan no antoy oras na panggawa ed satan.