Tepetepet Manlapud Saray Managbasa

Kasin say impangan nen David tan saray bataan to ed saray tinapay ya inyapay so mangipapatnag a nayarin sumlangen so ganggan na Dios ya agnadusa no walad mairap a kipapasen so sakey?​—1 Samuel 21:1-6.

Unong ed Levitico 24:5-9, saray tinapay ya iyaapay, a sasalatan kada Sabaton, so intalaga a kanen na saray saserdote. Say nalalanor a prinsipyo ed saya et lapud saray tinapay so masanto tan nepeg ya onkanan tagano na lalakin manlilingkor ed Dios​—saray saserdote. Kanian talagan lingo so pangiter ed saraya ed ordinaryon komikimey odino say basta pangan ed saratan pian napesel. Anggaman ontan, agnankasalanan si saserdoten Ahimelec sanen inikdan to si David tan saray bataan to na insaklang a tinapay.

Ompatnag a walay nikaduman angibakian nen Arin Saul ed si David. Sikato tan saray bataan to so narasan. Insan apekderan nen Ahimelec a malinis ira unong ed seremonya. Anggaman lingo so pangan ed saray iyaapay a tinapay no mapeget a surien so ganggan, mitunosan itan ed nidesignan manunan usar na insaklang a tinapay. Lapud sayan impangikonsidera, impuwera ira nen Ahimelec ed totontonen. Si Jesu-Kristo a mismo so angusar ed sayan inkagawa pian ipanengneng so lingo ed mapegpeget a panangiyaplika ed ganggan na Sabaton ya ipapaskar na interpretasyon na saray Fariseo.​—Mateo 12:1-8.

Anggaman ontan, agkabaliksan na satan a nayari lan sumlangen so ganggan na Dios sano nidudunget ed mairap iran kipapasen. Alimbawa, sanen mibabakal iray Israelita ed saray Filisteo, linmesa so ompatnag a mairap a kipapasen. Ingganggan nen Arin Saul: “Naayew komon so laki a mangan na anggan anto a kanen angga ed mankapisdem, tan nibales ak ed saray kabusol ko”! Inkuan na Biblia a: “Kinabil da so saray Filisteos ed saman ya agew.” Abanabanalan ed impibakal tan nadnarasan laray sundalo, kanian ‘say baley amatey na saray ayayep ed dalin, et saratan so kinan da a pati say dala.’ (1 Samuel 14:24, 31-33) Nankasalanan ira ed si Jehova diad impanumlang da ed ganggan nipaakar ed dala. Lapud, agmitunosan so inkiwas da ed alenleneg ya intalaga na Dios ya usar na dala, salanti, “onkana a pananakbong” ed saray kasalanan. (Levitico 17:10-12; Genesis 9:3, 4) Ingen, mapangasin inawat nen Jehova iray nikaduman bagat parad saramay nankasalanan.​—1 Samuel 14:34, 35.

On, iilaloan nen Jehova a tuloken tayo iray ganggan to antokaman iray kipapasen. “Saya so aro na Dios,” so inkuan nen apostol Juan, “a sumpalen tayo so saray ganggan to.”​—1 Juan 5:3.

[Litrato ed pahina 30]

Inyan iray balon tinapay ya iyaapay diad loob na tabernakulo kada Sabaton