Atateng, Protektaan Yo so Mabmablin Tawir Yo

“Say kakabatan sikato so sakey a sakurong . . . kawaloen to so bilay na walaan ed sikato.”​—ECLESIASTES 7:12.

1. Akin a nepeg ya ipasen na atateng so ananak da bilang regalo?

 INTAROK na atateng diad mundo so balon mabilay a too a walaan na saray pisikal a kalareker tan personalidad a mipadpara ed sikara. Saratan ya angkekelag ni et tinawag na Biblia bilang “tawir a nanlapud si Jehova.” (Salmo 127:3, NW) Lapud si Jehova so tuan Manangiter-Bilay, talagan inmatalek to ed atateng no anto so petepeteg a kien to. (Salmo 36:9) Atateng, panon yon ipapasen so impangawat yo ed satan a mablin regalo a nanlapud Dios?

2. Panon so inkiwas nen Manoa sanen naamtaan to a sikato so magmaliw ya ama?

² Segurado a satan a regalo et nepeg ya awaten tekep na kapaabebaan tan apresasyon. Masulok a 3,000 taon lay apalabas, ontan so inkiwas na Israelitan si Manoa sanen say akulaw to et pinakabatan na anghel a sikato so manlukon. Sanen nadngel nen Manoa itan a maong a balita, oniay impikasi to: “O Katawan, pikasik ed sika, yabuloy mo a say laki na Dios a sikato so imbakim onla lamet ed sikami, tan ibangat to kami no anto so gawaen mi ed ugaw a nianak.” (Uko-ukom 13:8) Atateng, anto so naaralan yo ed alimbawa nen Manoa?

No Akin a Nakaukolan Natan so Tulong na Dios

3. Akin a mas nakaukolan natan so tulong na Dios diad panamabaleg ed ananak?

³ Mas lalo la natan, saray atateng so mankaukolan na tulong nen Jehova diad panamabaleg ed ananak da. Say rason? Si Satanas a Diablo tan saray anghel to so nibasileng diad dalin a  manlapud tawen. Oniay impasakbay na Biblia: “Kasi la ra so dalin tan dayat: ta say Diablo inmakseb ed sikayo, a wala ed baleg a sanok to, ya amta to a daiset la so panaon to.” (Apocalipsis 12:7-9, 12) Insalaysay na Biblia a si Satanas et “singa omoang a leon a mananap na buagen to.” (1 Pedro 5:8) Say kaslakan a bibiktimaen na saray leon et saray andiay-depensan ayayep, a mabetbet et saramay malangwer ni. Makabat sirin ya onkerew na direksion iray Kristianon atateng ed si Jehova pian naprotektaan so ananak da. Panoy pansasagpot yon panggawa ed satan?

4. (a) Anto so nepeg a gawaen na atateng no walay leon a manteteyengteyeng ed lugar da? (b) Anto so nakaukolan na ananak pian naprotektaan ira?

⁴ No amta yo a walay leon a manteteyengteyeng diad lugar yo, seguradon say unonan gawaen yo et salimbengan so ananak yo. Si Satanas et managbiktima. Panggugunaetan ton impluensyaan so totoo na Dios pian sikara so magmaliw ya agmakanepegan ed panangabobon na Dios. (Job 2:1-7; 1 Juan 5:19) Saray ananak et mainomay a puntiryaen. Pian naliktaran na ananak iray patit na Diablo, nepeg dan kabaten tan unoren si Jehova. Makanakana so pikakabat a manlalapud Biblia. Inkuan nen Jesus a “saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Niarum ni, saray kalangweran so mankaukolan na kakabatan​—say abilidad a mantalos tan mangiyaplika ed naaaralan da. Lapud “say kakabatan kawaloen [odino, iyagel] to so bilay na walaan ed sikato,” sikayoran atateng so nakaukolan a mangipurek ed katuaan diad kapusoan na ananak yo. (Eclesiastes 7:12) Panon yon nagawaan itan?

5. (a) Panon a ninabang so kakabatan? (b) Panon a deneskribe na Uliran so kakanaan na kakabatan?

⁵ Nayarian yon ibasa so Salitay Dios ed ananak yo tan nepeg yon gawaen itan. Balet, say panulong ed sikara a mangaro tan mangunor ed si Jehova so aglambengat nagawaan ed pangibasa, noagta nakaukolan met a natalosan da itan. Bilang ilustrasyon: Sakey ya ugaw so nayarin niganggan ya ag-ombabaliw ed karsada no agto ni ninmengneng ed biek tan biek. Balet ta walaray ugugaw ya agmanguunor ed satan. Akin? Nayarin agnipaliwawan maong ed sikara iray pansumpalan na pakatalapos odino diad paraan a mangipurek ed kapeligroan na satan, pian paliisan so “inkaatiw” a mansumpal ed aksidente. Say pananginabang ed kakabatan so mankaukolan na panaon, ontan met ed inkaanos. Balet say kakabatan so makanakana! Oniay inkuan na Biblia: “Saray dalan to sikara so dalan a makapaliket, tan amin iray basbas to sikara so deen. Sikato so sakey a kiew na bilay ed saray ompeket ed sikato: tan mapalar so balang sakey a mamemben ed sikato.”​—Uliran 3:13-18; 22:15.

Say Panagbangat a Manginanabang na Kakabatan

6. (a) Akin a mabetbet ya agmakabat so ikikiwas na ananak? (b) Anton pipupuligesgesan so nagagawa?

⁶ Mabetbet et makakagawa na kalilingoan iray kalangweran, aliwan lapud ag-ira nibangat ed no anto so maptek, noagta lapud say bangat et agsinmabi ed puso ra, diad akindalem da. Pambabanikelan na Diablo a kontrolen so puso na saray kalangweran. Getma ton nipaarap ira ed agmaridios iran impluensya na sayan mundo. Sasalien to met ya anamoten so atawir dan makasalanan a tendensia a manggawa na mauges. (Genesis 8:21; Salmo 51:5) Nakaukolan a bidbiren na saray atateng a walay peteg a pipupuligesgesan pian nakontrol so puso na ananak da.

7. Akin ya aliwan magenap so pangibaga ed anak no anto so maptek odino makapuy?

⁷ Kaslakan ya ibabaga na atateng ed anak no anto so maptek odino makapuy, ya iisipen dan walay moral a prinsipyo a nibangat da. Nayarin ibaga ra ed anak da a makapuy so mantila, mantakew, odino seksual a relasyon ed siopaman ya ag-asawa. Balet, say nakaukolan na anak et mas mabiskeg a panamakiwas no akin ya ontulok, ya aliwan lapud ta imbaga itan na atateng to. Saratan so ganggan nen Jehova. Nepeg a naaralan na anak a makabat so pangunor ed saray ganggan na Dios.​—Uliran 6:16-19; Hebreos 13:4.

8. Anton klase na bangat so makatulong ed ananak pian onkiwas ira a makabat?

⁸ Saray bengatla a singa say inkakomplikado na uniberso, pandurumaan na saray mabilay a bengatla, tan panguman-uman na tiempo so ontulong ed sakey a malangwer ya anak a makatalos ed kiwawala na sakey a sankakabatan a Manamalsa. (Roma 1:20; Hebreos 3:4) Niarum ni, nepeg a nibangat ed anak a sikato so aaroen na Dios tan intarya To so probisyon diad panamegley na bagat  na Anak To pian nagamoran to so bilay ya andi-anggaan tan nayarian na anak a paliketen so Dios diad pangunor ed ibabaga To. Diad ontan et nayarin desidien la na anak so manserbi ed si Jehova, anggaman ed saray getma na Diablo a mangamper ed sikato.​—Uliran 22:6; 27:11; Juan 3:16.

9. (a) Anto so nakaukolan ed manangiliktar-bilay a panagbangat? (b) Anto so niganggan a gawaen na kaamaan, tan anto so lalanoren na satan?

⁹ Say klase na panagbangat a manalimbeng ed sakey ya anak tan mamakiwas ed sikaton manggawa na maptek et mankaukolan na panaon, atension, tan panagplano. Nakaukolan ya awaten na atateng so panangiwanwan na Dios. Ibabaga na Biblia: “Sikayo ya atateng, . . . bangatan yo [so ananak yo] ed kadudusa tan panamilin na Katawan.” (Efeso 6:4) Anto so kabaliksan na satan? Say “panamilin,” diad orihinal a Griego, so mangipapabitar ed ideya a “pangipaslep ed kanonotan.” Kanian saray kaamaan sirin so napaseseg ya ipaslep ed ananak da so kanonotan nen Jehova. Agaylan proteksion itan parad saray kalangweran! No nipaslep ed ananak so kanonotan na Dios, salanti, say paraan na panag-isip To, tan nipurek itan ed kanonotan da, nasalimbengan ira manlapud pakapanggawa na kasalanan.

Pilalek ya Apakiwas na Aro

10. Pian epektibon nibangat so anak yo, anto so importantin amtaen yo?

¹⁰ Balet, ta pian napenek so pilalek yo a pabalegen so ananak ed suston paraan, saray sagpot yo so nakaukolan ya apakiwas na aro. Say importantin bengatla et say maong a pitatalosan odino komunikasyon. Amtaen yo no anto so nagagawa ed bilay na anak yo tan no anto so panmoria to ed saratan. Diad komportablen kipapasen, mataktikan paibesngaw ed anak yo so kanonotan to. No maminsan, nayarin nabigla kayo ed ibaga to. Balet manalwar kayon maong pian aliwan alablabas so reaksion yo. Imbes, sikayoy ontalineng tekep na simpatya.

11. Panon a nipaslep na ateng so kanonotan na Dios ed sakey ya anak?

¹¹ Tua, nayarin ibabasa yo ed anak yo so ibabaga na Biblia nipaakar ed saray ganggan na Dios a mangisesebel ed seksual ya imoralidad, a maminpiga yo ni ingen iratan a basaen. (1 Corinto 6:18; Efeso 5:5) Nayarin satan so mangipaslep ed ananak yo no anto so makapaliket tan agmakapaliket ed si Jehova. Balet, wala ni so nakaukolan pian nipaslep so kanonotan nen Jehova ed sakey ya anak. Nakaukolan na ananak so tulong pian naamtaan da so rason no akin ya importante iray ganggan nen Jehova. Nakaukolan a nakombinse ira a saray ganggan to so duga tan makagunggona tan say pangunor ed saratan so manepeg tan maaron gawaen. Nibaga labat ya ipapaslep yo so kanonotan na Dios ed ananak yo no mikakatunongan kayo ed sikara manlapud Kasulatan ta pian awaten da so panmoria na Dios ed saray pamaakaran.

12. Panon a natulongan na ateng so anak to pian nawalaan na matukoy a panmoria ed pirerelasyon ed sekso?

¹² Sano totongtongen so nipaakar ed sekso, nayarin oniay itepet yo, “Kasin onabobon ka a nasisibletan na liket so sakey a too no uunoren to so ganggan nen Jehova ya agmirerelasyon ed sekso sakbay a mangasawa odino miasawa?” Pasesegen so anak yon mangipaliwawa ed ebat to. Kayari yon repasoen so makapakelaw a probisyon na  Dios ed pamapawala na ugaw, onia so nayarin itepet yo: “Antoy nibagam, kasin say maaron Dios tayo et manggawa na saray ganggan a mangisiblet ed sikatayo na liket ed bilay? Odino isipen mo a nitarya iray ganggan to pian magmaliw itayon maliket tan protektado?” (Salmo 119:1, 2; Isaias 48:17) Amtaen so walad isip na anak yo nipaakar ed saya. Insan nayarin ipaimano yo iray alimbawa no panon a say seksual ya imoralidad so nanresulta ed ermen tan problema. (2 Samuel 13:1-33) Diad pikatunongan yo ed anak yo ta pian natalosan to tan awaten to so panmoria na Dios, balbaleg lay nagawaan yo pian nipaslep ed sikato so kanonotan na Dios. Balet, wala ni so bengatlan nagawaan yo.

13. Anto so kaukolan a natalosan na anak a nagkalalon mamakiwas ed sikato a mangunor ed si Jehova?

¹³ Diad makabat a paraan, agyo lambengat nibangat ed anak yo so nipaakar ed saray pansumpalan na agpangunor ed si Jehova noagta nipaliwawa yo met no panon a naapektoan a mismo si Jehova ed paraan na panagbilay tayo. Ipanengneng yo ed anak yo manlapud Biblia a nasakitan si Jehova sano agtayo gawaen so linawa to. (Salmo 78:41) Nayarin itepet yo, “Akin ya agmo labay a nasakitan si Jehova?” tan ipaliwawa: “Ibabaga na kabusol na Dios a si Satanas a manlilingkor itayo ed si Jehova lapud sinisiblet iran rason, aliwan lapud sikatoy inaro tayo.” Insan ipaliwawa no panon a diad impansiansian matoor nen Job et apaliket to so Dios, tan akapangitarya na ebat ed palson akusasyon nen Satanas. (Job 1:9-11; 27:5) Nakaukolan a natalosan itan na anak a nayarin napaermen to odino napaliket to si Jehova diad panamegley na saray kiwas to. (Uliran 27:11) Saya tan dakel niran importantin leksion so nibangat ed ananak diad pangusar ed libron Manaral Manlapud Sankamaongan a Managbangat. *

Makapaliket Iran Resulta

14, 15. (a) Dinan iran leksion ed libron Managbangat so mamapakiwas ed ananak? (b) Antoran maabig a resulta so agamoran yo diad impangusar yo ed satan a libro? (Nengnengen met so kahon ed pahina 18-19.)

¹⁴ Insulat na sakey a masiken a taga-Croatia so imbaga ed sikato na pitoy-taon ya apo to, ya ibabasaan to na libron Managbangat: “Walay ipapagawa ed siak nen Mommy, balet agko labay a gawaen. Insan anonotan ko imay kapitulon ‘Proteksion ed Sika so Katutulok,’ kanian pinmawil ak ed sikato tan imbagak ya unoren ko la imay imbaga to.” Nipaakar ed kapitulon “No Akin ya Ag-itayo Mantila,” oniay inkuan na sakey a sanasawa ed Florida, E.U.A.: “Walaray tepet na satan a mamapaseseg ed ananak a mangibalikas ed liknaan da tan mamidbir ed saray kalilingoan da ya agda aminen.”

¹⁵ Say libron Managbangat so walaan na masulok a 230 a litrato, tan wala so kapsion, odino deskripsion, parad kada litrato odino grupo na saray litrato. “Mabetbet a kuninengen na ana’ko so  sakey a litrato tan agto labay ya ibukay ed arum a pahina,” so inkuan na maapresyan ina. “Aliwa lambengat a saray litrato so makapasagyat noagta walaray leksion met ya ibabangat na saratan, odino anggan panon et mamakiwas ed ananak a mantepet. Nipaakar ed sakey a litrato a walay ugaw a manbabantay na telebisyon diad ambilunget a kuarto, oniay intepet na ana’ko, ‘Mommy, anto so gagawaen na sayay ugaw?’ diad tonada na boses a pakapatnagan ya amta ton walay bengatlan makapuy.” Oniay nabasa ed kapsion na litrato: “Siopa so makanengneng ed amin a gagawaen tayo?”

Say Importantin Edukasyon Natan

16. Anto so importantin nibangat ed ananak natan, tan akin?

¹⁶ Nakaukolan a naamtaan na ananak so manepeg tan agmanepeg ya usar na saray pribadon parte na laman da. Balet, aliwan mainomay so pangitongtong ed satan. Oniay imbaga na sakey a kolumnista na peryodiko a sikato so binmaleg ed panaon ya ipapasen a mabanday so pangusar ed saray salitan manutukoy ed seksual a kayarian. Nipaakar ed panangibangat ed ananak da, oniay insulat to: “Nakaukolan kon talonaan so pakababaingan ko.” On, lapud nababaingan iray atateng et papaliisan dan tongtongen so nipaakar ed sekso, balet ta ag-itan manalimbeng ed anak. Aanamoten na saray managmolestya ed sekso so inka-ignorante na ugaw. Satan a tema so sisingbaten na Manaral Manlapud Sankamaongan a Managbangat diad makagunggona tan mapagalang a paraan. No ipaliwawa ed ananak so nipaakar ed sekso, ag-itan mangekal ed inka-inosente ra, bangbalet naandi itan ed sikara no ag-itan nipaliwawa ed sikara.

17. Panon a makatulong ed atateng so libron Managbangat pian nibangat so ananak da nipaakar ed sekso?

¹⁷ Diad kapitulo 10, sano singbaten so nipaakar ed saray mauges ya anghel a linma diad dalin tan nanilalak, oniay itepet ed anak, “Anto so pakaamtam nipaakar ed pisekso?” Say libro so angiter na simpli tan mapagalang ya ebat. Diad saginonor, impaliwawa na kapitulo 32 no panon a naprotektaan so ananak manlapud seksual a managmolestiya. Dakel a sulat so angireport ya importante so ontan a panagbangat. Oniay inkuan na sakey ya ina: “Nen imbeneg a simba sanen linma kami na ana’kon si Javan ed doktor to, tinepet to no kasin impaliwawa mi la ed si Javan so suston pangusar ed pribadon parte na laman. Sikato so mandinayew a maong lapud agawaan  mi la itan diad impangusar mi ed balon libro tayo.”

18. Panon a siningbat na libron Managbangat so panagsaludo ed saray bandira?

¹⁸ Say sananey nin kapitulo et manasaglawi ed salaysay na Biblia nipaakar ed taloran Hebreon tobonbalo a si Sidrac, Mesac, tan Abdenago, ya agdinmakmomo ed sakey ya imahen a mangirerepresenta ed Estado na Babilonia. (Daniel 3:1-30) Nayarin ag-isiglaot na arum a totoo so idakmomo ed imahen diad panagsaludo ed bandira, a singa ed impangipabitar na libron Managbangat. Balet, imanoen pa so imbaga nen autor a si Edward Gaffney diad interbio ed sikato na U.S. Catholic. Sinalambit to a sanen imbaga ed sikato na anak ton bii a diad primeron agew ed publikon eskuelaan et walay naaralan ton “balon pikakasi diad eskuelaan,” impaulit to itan ed anak to. “Intapew na ana’ko so lima to ed pagew to,” so kuan nen Gaffney, “tan maliket ton imbaga, ‘panmatooran ko so bandira . . .’” Intuloy to: “Insan biglan walay amoriak. Susto iray Tasi nen Jehova. Wala so aspekto na relihyon na nasyon ya iyaalibansa ed saray eskuelaan tayo diad masakbay a tuloy ya edad​—sakey ya agnasuppiat tan andiay limitasyon a katooran.”

Makagunggona so Amin a Sagpot

19. Antoray tumang no ibangat iray ananak?

¹⁹ On, makagunggona so amin a sagpot yo a mangibangat ed ananak yo. Akanangis so sakey ya ina a taga-Kansas, E.U.A., sanen sikatoy akaawat na sulat manlapud anak ton laki. Oniay insulat na  anak to: “Siak so mapalar a tuloy lapud impamabaleg yo ed siak ya akatulong pian magmaliw ak a mabiskeg tan balanse ed emosyonal a paraan. Sikayo nen Daddy so manepeg a komendaan.” (Uliran 31:28) Say Manaral Manlapud Sankamaongan a Managbangat so makatulong ed dakel niran atateng a mangibangat ed ananak da ta pian naprotektaan ira bilang mabmablin tawir.

20. Anto so nepeg a naynay a tandaan na atateng, tan anto so nepeg ya epekto na satan ed sikara?

²⁰ Saray ananak tayo et makanepegan na amin a panaon, atension, tan sagpot a niiter tayo ed sikara. Malangwer ira ed antikey labat a panaon. Anamoten so amin a pankanawnawa pian nakaiba ira tan natulongan ira. Agyon balot pagbabawian itan, ta sikayo so mas aroen da. Lawas tandaan a saray anak yo et regalo na Dios ed sikayo. Mabmabli ira a tawir! (Salmo 127:3-5) Kanian asikasoen ira bilang mabmablin tawir, a singano walay eebatan yo ed Dios diad paraan na pamapabaleg yo ed sikara, ta diad tua et walan talaga so eebatan yo.

[Paimano ed leksab]

Panon Yon Ebatan?

• Akin a mas nakaukolan natan a protektaan na atateng so ananak da?

• Anton klase na panagbangat so manginanabang na kakabatan?

• Antoran importantin isyu natan so itongtong yo ed ananak yo?

• Panon a natulongan na libron Managbangat so atateng pian nibangat so ananak da?

[Tepetepet Parad Panagaral]

[Kahon/Saray Litrato ed pahina 18, 19]

Sakey a Libro a Parad Amin

Intarya so libron Manaral Manlapud Sankamaongan a Managbangat pian natulongan so atateng odino arum niran wala la’d edad a mangibasa tan mangisingbat ed saray bangat nen Jesu-Kristo ed saray ugugaw. Ingen, saray wala la’d edad ya akabasa ed libro so angibalikas na masimoon ya apresasyon ed naaralan da.

Oniay inkuan na sakey a laki ed Texas, E.U.A.: “Mapuersa so libron Manaral Manlapud Sankamaongan a Managbangat lapud inkasimpli na satan, a mamakiwas ed sikatayo antokaman so edad tayo​—anggan diad saray manedad na 76, a singa siak. Misalsalamat ak a tuloy bilang sakey a manlilingkor ed si Jehova manlapu la’d inkaugaw.”

Oniay inkuan na sakey a managbasa a taga-London, Inglatera: “Saray mararakep a litrato et seguradon manasagyat ed namparan atateng tan ananak. Balibali iray tepet tan say inkaalasir na saratan, tan alay abig so impaningbat ed saray sensitibon pamaakaran, a singa diad kapitulo 32, a ‘No Panon ya Aprotektaan si Jesus.’” Oniay impangisampot to: “Anggaman sayan libro et mabitar a manunan denesinyo parad ananak na saray Tasi nen Jehova, isipen ko a naliketan a maong iray managbangat tan arum ni ra no nawalaan met ira na kopya. Iilaloan kon nausar ko iya diad ­arapen iran bulan tan ­taotaon.”

Wala met so sakey a bii ed Massachusetts, E.U.A. a nankomento nipaakar ed “dakel a ninonot a maong iran litrato.” Insulat to: “Naimanok ya anggaman denesinyo so libro parad ugugaw, saray teman siningbat et makatulong met ed sikatayoran wala la’d edad a nonoten so personal a relasyon tayo ed si Jehova.”

“Agaylan abig itan a libro!” so inkuan na sakey a biin taga-Maine, E.U.A. “Aliwa labat itan a parad ugugaw noagta parad sikatayon amin ya ananak na Dios. Asabi na satan so akindalem a liknaan ko tan siak so pinaligsa tan pinakalma na satan, kanian mareen so liknaan ko. Liknaen kon maap-apit ak ed si Jehova bilang Amak. Pinaandi to so amin ya ot-ot ya abayag lan liliknaen ko tan impalinew ton maong ed siak so gagala to.” Oniay impangisampot to: “Papasesegen ko so amin ya, ‘Ipangasi yon basaen itan.’”

Inkuan na sakey a biin taga-Kyoto, Hapon, a sanen ibabasa toy libro ed saray apo to, nantetepet ira ed sikato a kuan da: “‘Antoy gagawaen na satay ugaw a laki? Akin et pampapasnokan da’tay ugaw a bii? Antoy gagawaen na sayay nanay ey? Saya balet so leon ey?’ Ibabangat na satan iray bengatlan makapainteres ed sikatayo, kanian labalabay ko itan nen say antokaman nin libro a walad librarya.”

Inkuan na sakey ya ama ed Calgary, Canada, a sanen naawat toy libro, ginapoan ton imbasa itan ed anem-taon ya anak ton bii tan ed siam-taon ya anak ton laki. “Tampol ya agustoan dan maong itan,” so insalaysay to. “Madengedengel iray ana’ko tan impapuson eebatan da iray tepet. Nalilikna ran kabiangan ira ed panagaral, tan angiter itan ed sikara na pankanawnawan nibesngaw so liknaan da. Nagmaliw iran maligligsa, tan inkuan na ana’kon bii a labay toy manaral ed sayan balon libro a nilabilabi.”

Kayari na sakey ya impanaral, oniay inkuan na ama: “Pigay oras kamin nantongtong na ana’kon laki nipaakar ed si Jehova tan ed saray gagala to. Dakdakel so tepet to manlapud libro. Akalua ak sanen inkuan to’d siak a maabig a labi tan kinerew ton, ‘Tay, nayarin iyaralan yo ak lamet? Amayamay so tepet ko, tan labay kon naamtaan so amin a nipaakar ed si Jehova.’”

[Litrato ed pahina 15]

Atateng, anto so naaralan yo ed alimbawa nen Manoa?

[Litrato ed pahina 16]

Sikayoran kalangweran, anto so naaralan yo ed alimbawa na taloran Hebreo?

[Saray litrato ed pahina 17]

Saray litrato tan kapsion ed libron ”Managbangat” so epektibon uusaren ed panagbangat

Antoy tilan imbaga nen Ananias ed si Pedro?

Siopa so makanengneng ed amin a gagawaen tayo?