Report na Saray Manangiyabawag na Panarian

Panag-anap ed Saramay Makana Diad Niarawin Kaumaan na Australia

SAKEY a maawang a parte na Australia so kabkabat bilang niarawin kaumaan. Say arum iran parte na sayan niarawin pasen so agnin balot apulongan ed loob na 12 a taon. Kanian saray Tasi nen Jehova ed Darwin, say kabiseran syudad na Amianen a Teritorya, so angorganisa na malaknab a kampanyan panagpulong ed loob na siameran agew pian anapen iray makana.​—Mateo 10:11.

Ginmapo so maalwar ya impanplano 12 a bulan ni antis na kampanya, pati say impanggawa na saray mapa parad masulok a 800,000 a kilometro kuadrado, sakey a lugar a mamitlon danay a kabaleg na New Zealand. Pian nawalaan itayo na ideya no panon kaarawi iyan maawang a teritorya, isipen pa a say promedyon karukey na dalan manlapud wangalan anggad arap na abung a walad rantso et masulok a 30 kilometro! Niarum ni, arum iran rantso so walaan na 300 a kilometro odino onsulok ni.

Walay dagup a 145 a boluntaryon Tasi ya akibiang ed kampanya. Arum so nanlapu ni ed ararawin lugar a singa diad Tasmania. Walaray de-luganan ya angawit na saray uusaren ed panag-camping, reserba iran kagawaan tan gasolina. Inulor met na arum iray kagawaan da diad panamegley na saray trailer. Niarum ni, duaran bus a makapangilugan na 22 a totoo so inarkila parad saramay andiay mabiskeg a luganan. Inyapasakey na saramay akalugan ed bus so pampulong ed saray manaayam ed angkelag iran baley na apilin teritorya.

Antis iran ombuat, saray agagin lalaki so angiyuksoy na saray paliwawa tan demostrasyon pian nitarya iray totontonen no panon ya iparungtal so maong a balita ed sayan nikaduman teritorya. Bilang alimbawa, pian epektibon makapanpulong ed komunidad na saray Aborigine, mabetbet a nakaukolan so itumbok ed paraan na kakikiwas da tan pangamta ed saray kustombre ra. Apantongtongan met so nipaakar ed pankaabigan na kaliberliber pian ontulong a naprotektaan so bilay na saray maatap ya ayep tan tanaman.

Apanggayagaan da so dakel a matalonggaring iran eksperiensya. Singa bilang, diad sakey a panaayaman  na saray Aborigine, angiyareglo iray agagin lalaki na sakey a mapublikon paliwawa a nibase’d Biblia. Say biin lider (headlady) na komunidad so mismon angipakabat ed satan diad saray totoo. Kayari na paliwawa, 5 a libro tan 41 a brosyur so nipalima ed saray inmatendi. Diad sananey a pasen, sakey ya Aborigine so akatongtong. Wala ingen so dilin Biblia to, sakey a dagdaan tan apilatpilat a King James Version. Sanen sikatoy tinepetan no amta to lay ngaran na Dios, sikatoy inmesel tan inala to’d bulsa na dyakit to so daan ya isyu na Say Panag-Bantayan. Imbasa to so walad magasin, ya inaon ed Marcos 12:30, a mankuan: “Sika aroen mo so Katawan [“Jehova,” NW] a Dios mo ed amin a pusom.” Insan inkuan to: “Labalabay ko iyan teksto.” Kayari na malaknab ya impantongtong nipaakar ed Biblia, inawat to so sakey a balon Biblia tan sananey nin nibase’d Biblia a literatura.

Diad asingger ed Gulpo na Carpentaria, say lakin lider (headman) na sakey a maaw-awang a rantso so angipanengneng na interes ed mensahe na Panarian. Sanen nipanengneng ed sikato iray publikasyon a singa say My Book of Bible Stories tan Pikakabat a Mangitonton ed Andi-Anggaan a Bilay, * intepet to no walay literatura tayo ed lenguahen Kriol. Sayan kerew et nikadkaduma lapud ta anggano dakel ya Aborigine so mansasalitay Kriol, daiset so makabasa ed satan. Diad saginonor et naamtaan ya amin a 50 trabahador ed saman a rantso so makabasa manayay Kriol. Aliketan so lakin lider diad impakala to na literatura na Biblia ed Kriol, tan maliket ton inter so numero na telepono to pian sikatoy natawagan.

Legan na siameran agew a malaknab ya impanpulong, nipalima so dagup a 120 a Biblia, 770 a libro, 705 a magasin, tan 1,965 a brosyur. Niarum ni, walay 720 a panagpawil ya agawaan, tan 215 a panangiyaral na Biblia so nigapo.

Petepeteg, say pakakaerasan ed espiritual na dakel a makanan totoo a manaayam ed sayan maaw-awang a pasen so napepenek a siansia.​—Mateo 5:6.

[Paimano ed leksab]

[Mapa ed pahina 30]

(Parad aktual a format, nengnengen so publikasyon)

AUSTRALIA

AMIANEN A TERITORYA

Darwin

Gulpo na Carpentaria

Sydney

TASMANIA