Saray Ananak Tayo et Mablin Tawir
Saray Ananak Tayo et Mablin Tawir
“Nia! Saray ananak et tawir a nanlapud si Jehova; say bunga na eges et sakey a tumang.”—SALMO 127:3, NW.
1. Panon a niyanak so inmuna-unan ugaw?
NODNONOTEN pa iray makapakelkelaw ya ebento a ginawan posible nen Jehova a Dios diad paraan na impamalsa to ed inmunan laki tan bii. Say ama, si Adan, tan say ina, si Eva, so walaan na betang ed inkaporma na sakey a selula ya atibukel ed loob na panag-anakan nen Eva pian magmaliw a sigpot a balon too, salanti, say inmuna-unan ugaw. (Genesis 4:1) Anggad natan, say pangilukon tan pangiyanak ed sakey ya ugaw so pankelkelawan tayo tan dedeskribien itan na dakel a totoo bilang peteg a milagro.
2. Akin a nibaga yon milagro so nagagawa ed loob na panag-anakan na malukon a bii?
2 Diad loob na manga 270 ya agew, say orihinal a selula ya atibukel ed loob na ina a resulta na impiakdol to ed ama so ombaleg bilang ugaw a tugyopen na trilyones a selula. Niprograma ed satan a mismon orihinal a selula iray totontonen a nakaukolan pian mamawala na masulok a 200 a klase na selula. Diad panumbok ed saratan a makapakelaw a totontonen, ya agnatalosan na too, sarayan komplikadon maong a selula so natitibukel ed suston uksoy tan paraan pian naporma so balon mabilay a too!
3. Akin a mipakna so dakel a manonot a totoo a say Dios so nanggawan posible ed kianak na sakey a balon mabilay a too?
3 Siopa so nibaga yon peteg a nanggawa ed ugaw? Seguradon samay Sakey ya amalsa ed mismon bilay. Oniay inkanta na salmista ed Biblia: “Amtaen yo a si Jehova sikato so Dios: sikato so nanggawa ed sikatayo.” (Salmo 100:3) Atateng, kabkabat yo ya aliwan lapud nikadkaduman abilidad yo so impakapawala yo ed satan a mabmablin bilay. Say Dios lambengat a walaan na agnatukor a kakabatan so makapanggawa ed satan a mamilagron pakatibukel na balon mabilay a too. Diad loob na nilibo lan taon, bibidbiren na saray manonot a totoo a say Baleg a Manamalsa so manitibukel ed sakey ya ugaw ed loob na panag-anakan na ina. Ontan met kasi so panmoria yo?—Salmo 139:13-16.
4. Anton kalilingoan na too so agbalot nibaga nipaakar ed si Jehova?
4 Balet, kasin si Jehova et andiay-liknaan a Manamalsa a nanggawa labat na sakey a biolohikon proseso pian makapan-ilalak so lalaki tan bibii? Say arum a totoo et andian na pililikna, balet aliwan ontan si Jehova. (Salmo 78:38-40) Oniay inkuan na Biblia diad Salmo 127:3, unong ed New World Translation: “Nia! Saray ananak et tawir a nanlapud si Jehova; say bunga na eges et sakey a tumang.” Konsideraen tayo natan no anto so tawir tan no anto so papaneknekan na satan.
Sakey a Tawir tan Tumang
5. Akin a saray ananak et sakey a tawir?
5 Say tawir et singa sakey a regalo. Saray atateng so mabetbet a mansasagpot a maong pian walay nipatawir da ed ananak da. Nayarin satan et kuarta, kayarian, odino pinabpablin bengatla. Antokaman itan, pakapatnagan itan na panangaro na ateng. Ibabaga na Biblia ya inter na Dios ed atateng so ananak da bilang tawir. Sikara so maaron regalo to. No sakey kayon ateng, nibaga yo kasi a saray kiwas yo et mangipatnag a momoriaen yo iray ananak yo bilang regalo ya inmatalek ed sikayo na Manamalsa na uniberso?
6. Anto so gagala na Dios sanen inter to ed totoo so pakayarin manilalak?
6 Say gagala nen Jehova no akin ya inter to iyan regalo et pian natooan so dalin panamegley na saray ilalak nen Adan tan Eva. (Genesis 1:27, 28; Isaias 45:18) Aliwan sansakey so impamalsa nen Jehova ed kada too, a singa impanggawa to ed minilyon ya anghel. (Salmo 104:4; Apocalipsis 4:11) Imbes, denesidi na Dios a palsaen iray totoo a walaan na pakasarag a manilalak, a magmaliw a kaul-ulibay na atateng da. Agaylan abig a pribilehyo itan parad sakey ya ina tan ama a manilalak tan mangasikaso ed satan a balon too! Bilang atateng, kasin pisasalamatan yo si Jehova lapud ginawa ton posible parad sikayo a panggayagaan iyan mablin tawir?
Makaaral ed Ehemplo nen Jesus
7. Midumaan ed gagawaen na arum ya atateng, panon ya impatnag nen Jesus so interes tan panangabagey ed ‘ananak na totoo’?
7 Makapaermen ta aliwan amin ya atateng et mangipapasen ed ananak da bilang sakey a tumang. Dakel so agmangipapatnag na panangabagey ed ananak da. Saratan ya atateng so agmangaalig ed awawey nen Jehova odino ed awawey na Anak to. (Salmo 27:10; Isaias 49:15) Diad pidumaan, nodnonoten pa so interes nen Jesus ed saray ugugaw. Sakbay ni na inyakar nen Jesus diad dalin bilang too—sanen sikato so sakey a makapanyarin espiritun persona ed tawen— ibabaga la na Biblia a say ‘gayaga to et walad ananak na totoo.’ (Uliran 8:31) Inararo ton maong iray totoo kanian mabulos ton inter so bilay to bilang dondon ta pian nagamoran tayo so andi-anggaan a bilay.—Mateo 20:28; Juan 10:18.
8. Panon ya inletneg nen Jesus so maabig ya ehemplo parad atateng?
8 Legan a wadiad dalin, inletneg nen Jesus so agaylan abig ya ehemplo parad atateng. Nodnonoten pa so ginawa to. Sikato so angigana na panaon parad ugugaw, anggan sanen sikato so okupadon tuloy tan nadedetdetan. Binantayan to ira a manggagakgalaw diad tindaan tan inusar to ed pambabangat to iray kakikiwas da. (Mateo 11:16, 17) Diad kaunoran lan impanbiahe nen Jesus ed Jerusalem, amta ton sikato so pairapen tan pateyen. Kanian sanen inawit na totoo ed si Jesus iray angkekelag ya ananak da, agpinaasingger na saray babangatan to iray ugugaw, a nayarin agda labay a naaruman so pakakadetdetan nen Jesus. Balet ta binaat nen Jesus iray babangatan to. Diad impangipatnag to na ‘gayaga’ ed saray angkekelag ya ugugaw, oniay inkuan to: “Paulyan yo so saray angkekelag ya ugugaw ya ondago ed siak.”—Marcos 10:13, 14.
9. Akin a mas importante ni so gagawaen tayo nen say ibabaga tayo?
9 Makaaral itayo ed ehemplo nen Jesus. Sano onasingger ed sikatayo iray ananak, panon so ikikiwas tayo—anggano okupado itayo? Singa kasi ed ginawa nen Jesus? Say lalon nakaukolan na ananak ed atateng da et say panaon tan atension, a mabulos ya inter nen Jesus ed saray ugugaw. Tua, importante iray salitan “inaro ta ka.” Ingen, mas epektibo iray gawa nen saray salita. Aglambengat napatnagan so panangaro yo ed ibabaga yo noagta mas napatnagan itan ed gagawaen yo. Nipatnag itan diad pangiter yo na panaon, atension, tan panangasikaso ed ananak yo. Balet, anggano gagawaen yo la itan ya amin, nayarin agnapawala a tampol so mabitar iran resulta unong ed iilaloan yo. Nakaukolan so pananos. Makaaral itayon mananos no aligen tayo so impideneng nen Jesus ed saray babangatan to.
Say Panag-anos tan Panangaro nen Jesus
10. Panon ya imbangat nen Jesus ed saray babangatan to so leksion nipaakar ed kapaabebaan, tan kasin epektibo itan a tampol?
10 Amta nen Jesus so walan panlalaslasan ed limog na saray babangatan to no siopa so manunaan ed sikara. Sakey ya agew, sanen sikatoy akasabi ed Capernaum a kaiba iray babangatan to, oniay intepet to ed sikara: “Anto so pansasangsangan yo ed dalan? Sikara balet ag-ira inmesel; ta nansasangsangan so sakey tan sakey ed dalan, no siopa so kabalbalgan.” Imbes a pantamian to ira, si Jesus so maanos ya angiter ed sikara na leksion a pakaaralan da pian nibangat to ed sikara so kapaabebaan. (Marcos 9:33-37) Kasin amawala itan na maabig iran resulta? Aliwan tamtampol. Manga anem bulan ed saginonor, sinagyat di Santiago tan Juan so ina ra a kerewen ed si Jesus iray atagey a posisyon ed Panarian. Si Jesus so maanos lamet ya angipetek ed panag-isip da.—Mateo 20:20-28.
11. (a) Anton akaugalian lan kimey so agginawa na saray apostol nen Jesus sanen sinmabi ira ed tagey a silir? (b) Anto so ginawa nen Jesus, tan epektibo kasi ed saman iray sagpot to?
11 Magano lan nagawa ed saman so Paskua na 33 K.P., tan si Jesus so akitipon ed saray apostol to pian manselebra ed satan. Kasabi ra ed tagey a silir, anggapo ed 12 apostoles so nanggawa ed akaugalian lan panag-uras ed marabok a salisali na arum—say abeban kimey na sakey ya aripen odino sakey a bii diad sankaabungan. (1 Samuel 25:41; 1 Timoteo 5:10) Agaylay impanermen nen Jesus sanen anengneng to iray babangatan to a siansia nin pampipilalekan day nawalaan na rangko tan posisyon! Kanian inurasan to so kasalian na kada sakey ed sikara insan masimoon ya inkerew to ed sikara a tumboken da so ehemplo ton manlingkor ed arum. (Juan 13:4-17) Tinumbok da kasi itan? Inkuan na Biblia a diad saman a labi et “agawa met ed sikara so sakey a siblangan no siopa ed sikara so nibilang a kabalbalgan.”—Lucas 22:24.
12. Panon a naalig na atateng si Jesus ed saray sagpot dan mangipasal ed ananak da?
12 Sikayon atateng, kasin namomoria yo so alikna nen Jesus sano ag-onkiwas so ananak yo ed simbawa yo? Tandaan a si Jesus et agtinmundan tinmulong ed saray apostol to, anggaman sikara so matantan a mangipetek ed saray kalilingoan da. Say impananos to so amawala na maabig iran resulta diad saginonor. (1 Juan 3:14, 18) Atateng, nepeg yon aligen so panangaro tan panag-anos nen Jesus, ya agkayon balot ontutundan mangipasal ed ananak yo.
13. Akin ya agnepeg a bugtabugtak ya ibaliwala so pantetepet na anak?
13 Nakaukolan a natebek na ananak a sikara so aaroen tan interesado ed sikara so atateng da. Labay nen Jesus a naamtaan so iisipen na saray babangatan to, kanian sikato so dinmengel ed saray tepet da. Tinepetan to ira no anto so opinyon da ed pigaran pamaakaran. (Mateo 17:25-27) On, say maong a panagbangat so mangilaktip ed atentibon idengel tan puron interes. Nepeg ya ipulisay na ateng so antokaman a tendensian ibaliwala so mantetepet ya anak diad bugtabugtak a pangibagay: “Arawi ka dia! Agmo ta nanenengneng a dakdakel so gagawaen ko?” No talagan okupado so sakey ya ateng, nepeg ya ibaga to ed anak to a pantongtongan da itan ed saginonor. Insan seguroen na atateng a pantongtongan da itan. Diad ontan a paraan, nalikna na anak a talagan interesado ed sikato so ateng to, tan say anak so mas mainomay a mangibesngaw na liknaan to ed ateng.
14. Anto so naaralan na atateng manlapud si Jesus nipaakar ed panangipatnag na panangaro ed ananak da?
14 Manepeg kasi ya ipatnag na atateng so panangaro ra diad panlakap ed ananak da? Saray atateng so makaaral lamet ed si Jesus. Ibabaga na Biblia ya “inala to ra ed saray taklay to, tan benendisyonan to ra, ya intapew to so saray lima to ed sikara.” (Marcos 10:16) Anto so isipen yon inkiwas na saray ugugaw? Maseguron apaligsa so kapusoan da, tan nagmaliw iran maasingger ed si Jesus! No wala so puron panamabli tan panangaro ed baetan yo ya atateng tan saray ananak yo, sikara so mas mainomay ya onkiwas ed saray sagpot yon mandisiplina tan mangibangat ed sikara.
Say Isyu a No Kaunongan Karakel a Panaon so Usaren
15, 16. Anto so kabkabat ya ideya nipaakar ed panamabaleg ed ananak, tan anto so mapatnag a sengegan no akin ya inyalibansa itan?
15 Panduaruwaan na arum no talaga kasin nakaukolan na ananak so mas dakel a panaon tan maaron atension na atateng da. Say ideya nipaakar ed panamabaleg ed ananak a marundunong ya iyaalibansa et samay tatawagen a de-kalidad a panaon (quality time). Ibabaga na saramay mangiyaalibansa ed satan ya agnakaukolan na ananak so dakel a panaon na atateng daput no say limitadon panaon ya inusar ed sikara et makabaliksan, imparaan, tan implanon maong. Kasin maabig so ideyan de-kalidad a panaon, a ginetma parad pankaabigan na saray kalangweran?
16 Inkuan na sakey a managsulat ya akapitongtong ed dakel ya ananak a say “labay da ed atateng da et say dakel a panaon,” laktip lay “agnaapag ya atension.” Makatantanda, oniay imbaga na sakey a propesor ed kolehyo: “Say termino [a de-kalidad a panaon] so apawala lapud amoria na atateng so kakulangan da. Ikakatunongan na totoo so pangusar na daiset a panaon parad ananak da.” Kaunongan karakel a panaon so nakaukolan ya usaren na atateng parad ananak da?
17. Anto so nakaukolan na ananak ed atateng da?
17 Anggapo so ibabaga na Biblia nipaakar ed satan. Balet ta pinaseseg iray Israelitan atateng a mitongtong ed ananak da sano wala ira ed abung da, sano manaakar ira ed dalan, sano akadukol ira, tan sano ombangon ira. (Deuteronomio 6:7) Satan so malinew a mankabaliksan a nakaukolan na atateng so mitalosan ed ananak da tan naynay da ran bangatan diad kada agew.
18. Panon ya inanamot nen Jesus iray pankanawnawan mangipasal ed saray babangatan to, tan anto so naaralan ed satan na saray atateng?
18 Si Jesus so matalonan angipasal ed saray babangatan to sanen sankakaiba ira a mamangan, manbabaroy, tan anggan sanen manpapainawa ira. Inanamot to so kada pankanawnawa pian bangatan ira. (Marcos 6:31, 32; Lucas 8:1; 22:14) Ontan met, nepeg ya alisto iray Kristianon atateng a mangusar ed kada pankanawnawa pian iletneg tan pansiansiaen so maabig a pitatalosan ed ananak da tan ed panangipasal ed sikara unong ed saray paraan nen Jehova.
No Anto so Ibangat tan No Panon Itan ya Ibangat
19. (a) Anto so nakaukolan nilikud ed pangusar na panaon ed saray ananak? (b) Anto so lalon nakaukolan ya ibangat na atateng ed saray ananak?
19 Say basta pangusar na panaon ed saray ananak tan anggan say pambangat ed sikara et agni magenap pian maaligwas so pamabaleg ed sikara. Importante met no anto so ibabangat. Imanoen pa so impangidanet na Biblia ed no anto so nepeg ya ibangat. Oniay inkuan na Biblia: “Saraya a salita, ya iganggan ko ed sika ed sayan agew, . . . nepeg mo ya ibangat iraya a sankakulian ed saray anak mo.” Anto so ‘sarayan salita’ a nepeg ya ibangat ed ananak? Mapatnag, saratan so salita ya asalambit lan unona, salanti: “Aroen mo si Jehova a Dios mo ed amin a pusom tan dia ed amin a kamarerwam, tan dia ed amin a pakayarim.” (Deuteronomio 6:5-7) Imbaga nen Jesus a satan so sankaimportantian ed amin a ganggan na Dios. (Marcos 12:28-30) Saray atateng so lalon nakaukolan a mangibangat ed saray ananak nipaakar ed si Jehova, ya ipaliwawa ra no akin a sikato labat so makanepegan ed interon-kamarerwan panangaro tan debosyon tayo.
20. Anto so ingganggan na Dios nensaman ed saray atateng ya ibangat da ed ananak da?
20 Anggaman ontan, ‘sarayan salita’ a nipaseseg ed saray atateng ya ibangat ed ananak da et aglabat mangilaktip ed pangaro ed Dios diad interon puso, kamarerwa, tan pakayari. Naimano yo a diad akadkaunan kapitulo na Deuteronomio et imbinsabinsa nen Moises iray ganggan ya insulat na Dios ed saray tapyas na bato—say Samploran Ganggan. Saratan so mangilaktip ed saray ganggan ya agmantitila, agmantatakew, agmamapatey, tan agmikakalugoran. (Deuteronomio 5:11-22) Kanian nipurek ed saray atateng nensaman a nakaukolan ya ibangat iray ananak da nipaakar ed moral iran estandarte. Nakaukolan ya itarya na Kristianon atateng natan ed ananak da so mipadparan bilin ta pian natulongan da ira a nawalaan na maligen tan maliket ya arapen.
21. Anto so kabaliksan na bilin na Dios ya ‘ibangat a sankakulian’ so salita na Dios ed saray ananak?
21 Imanoen pa a niganggan ed saray atateng no panon dan ibangat ‘iratan a salita,’ odino saray ganggan, ed saray ananak da: ‘Nepeg mo ya ibangat iratan a sankakulian.’ Say kabaliksan na salitan ‘ibangat a sankakulian’ odino ipurek et “manbangat odino mangipaslep diad mabetbet a pangulit odino pamilin: pasesegen odino ipurek ed kanonotan.” Kanian peteg ya ibabaga na Dios ed saray atateng a mangiletneg ira na implanon programa na panagbangat manlapud Biblia a walaay espisipikon gagala ya ipurek iray espiritual a pamaakaran ed kanonotan na ananak da.
22. Anto so niganggan ed saray Israelitan atateng no ibabangat da so ananak da, tan anto so kabaliksan na satan?
22 Say ontan ya implanon programa so mankaukolan na determinasyon ed biang na saray atateng. Oniay inkuan na Biblia: “Ibedber mo ra ed limam ya onkana a sakey a panamirbiran, tan manayam ira ed parungtal ed nanleetan na saray matamatam. Tan isulat mo ra naani ed saray lusek na kapot na abung mo, tan saray pinto ed pulong.” (Deuteronomio 6:8, 9) Ag-iya mankabaliksan a saray Ganggan na Dios et nepeg a literal ya isulat na saray ateng diad saray lusek tan wangalan na abung da, ibedber da ed lima na ananak da, tan ipeket da ed leet na mata ra. Imbes, say punto na satan et nepeg ya ipanonot a naynay na atateng ed ananak so nipaakar ed saray bangat na Dios. Say pangibangat ed ananak da so nepeg a gawaen ed regular tan tuloytuloy a paraan a singano saray bangat na Dios et walad arapan a naynay na ananak.
23. Anto so aralen tayo ed ontumbok a simba?
23 Anto so pigaran importantin tuloy a bengatla a nakaukolan ya ibangat na atateng ed ananak da? Akin ya importante natan a nibangat tan nipasal so ananak a protektaan day inkasikara? Anton tulong so nitarya natan parad atateng pian epektibon nibangat da so ananak da? Saratan tan arum niran tepet a paninteresan na dakel ya atateng so konsideraen ed ontumbok ya artikulo.
Panon Yon Ebatan?
• Akin a nepeg ya ipasen na atateng a mabmabli so ananak da?
• Anto so naaralan na atateng tan arum ni ra manlapud si Jesus?
• Kaunongan karakel a panaon so nakaukolan ya iter na atateng ed ananak da?
• Anto so nepeg ya ibangat ed ananak, tan panon so nepeg a pangibangat ed satan?
[Tepetepet Parad Panagaral]
[Litrato ed pahina 10]
Anto so naaralan na atateng ed paraan na panagbangat nen Jesus?
[Saray litrato ed pahina 11]
Kapigan tan panon so pangibangat na Israelitan atateng ed ananak da?
[Saray litrato ed pahina 12]
Nepeg ya ipanonot a naynay na atateng ed ananak da so nipaakar ed saray bangat na Dios