Tepetepet Manlapud Saray Managbasa

Nayari kasin ikdan na Kristiano na tip odino regalo so empleyado na gobierno parad saray serbisyo to, odino ipapasen itan a panagpasuksok?

Inerman so panaayaman na saray Kristiano, panggugunaetan dan agamilen so praktikal a kakabatan sano nidudunget ira ed nanduruman situasyon ed lugar da, a tatandaan dan say naawat tan legal ed sakey a bansa et nayarin sigpot ya agnaawat tan ilegal ed arum. (Uliran 2:6-9) Siempre, nepeg a lawas tandaan na Kristiano a siopamay malabay a “manayam ed tabernakulo” nen Jehova so nepeg a mangipulisay ed panagpasuksok.​—Salmo 15:1, 5; Uliran 17:23.

Anto ta so panagpasuksok? Unong ed The World Book Encyclopedia, say “panagpasuksok et mankabaliksan na pangiter odino pangiyopresi na mablin bengatla ed . . . toon walad posisyon, a bilang kasalat et manumlang ed obligasyon to odino ed ganggan pian minabang so angiter.” Kanian, inerman so panaayaman na sakey, peteg a panagpasuksok so pangiter na kuarta odino regalo ed ukom odino polis pian pikeweten so hustisya, odino ed inspektor pian palampasen so impakalingo odino impakasumlang. Sakey met a panagpasuksok so panregalo pian asikasoen a maong, a singa say pangiyuna ed ngaran diad listaan na saray manaalagar odino pamasalet ed pila. Ipapatnag na satan a kagagawa so inkaandiay panangaro.​—Mateo 7:12; 22:39.

Balet, panagpasuksok kasi so pangiter na regalo odino tip ed, ipasen lan, empleyadoy gobierno pian legal a napanlingkoran odino pian napaliisan so panaglabi? Alimbawa, diad arum a bansa et ag-ipalista na saray opisyal so ugugaw ed eskuelaan, agmangawat na pasyente ed ospital, odino agmantatak ed saray dokumento ed immigration anggad ag-ira makaawat na tip. Odino nayarin ipaleen day pangiproseso na saray aplikasyon parad pamasimbalo ed saray lisensia tan permit.

Say panag-tip tan say kaslakan a panmoria ed satan et manduruma ed kada bansa. Diad saray pasen a niyugali la odino iilaloan la iratan a panagbayar, nayarin inisip na arum a Kristiano ya anggapoy nasusumlang da iran prinsipyo ed Biblia no unong met ed ley so pangiiter day tip ed sakey ya opisyal pian gawaen so kimey to. Diad arum a bansa et ipapasen ni ingen na totoo iratan a panagbayar bilang regalo pian makaarum ed melag a sueldo na empleyadoy gobierno. Tandaan a walay baleg a pandumaan na panregalo parad legal a serbisyo tan pampasuksok pian paboran anggaman nasusumlang so ganggan.

Diad biek a dapag, anggan sano unong ed ley so kerew, arum a Tasi nen Jehova so agmangiiter na tip ed saray inspektor, opisyal na customs, odino ed arum ni, anggano kaslakan la itan a nagagawa. Lapud kabkabat iray Tasi ed pangaagamil day kaptekan tan inkamatua, naeeksperiensya ra no maminsan so maabig a pitotoo a nasasali lambengat na maslak a totoo diad pambabayar da.​—Uliran 10:9; Mateo 5:16.

Bilang sumaryo, nepeg a desisyonan a dili na balang lingkor nen Jehova no kasin sikatoy mangiter na tip pian legal a napanlingkoran odino pian napaliisan so panaglabi. Manuna ed amin, nepeg ton gegemtanen so kurang ya agto pakakonsiensiaan, agmamabanday ed ngaran nen Jehova, tan agpakagapolan na arum.​—Mateo 6:9; 1 Corinto 10:31-33; 2 Corinto 6:3; 1 Timoteo 1:5.