Abuloyan so Salitay Dios a Manliwawa ed Dalan Yo
Abuloyan so Salitay Dios a Manliwawa ed Dalan Yo
“Say salitam sikato so . . . sakey a liwawa ya onkana ed basbas ko.”—SALMO 119:105.
1, 2. Diad antoran kipapasen a liwawaan na salita nen Jehova so dalan tayo?
SAY dalan tayo so liwawaan na salita nen Jehova no abuloyan tayo itan a nagawa. Pian nagunggonaan itayo ed satan ya espiritual a liwawa, nepeg a maseet tayon aralen so nisulat a Salitay Dios tan iyaplika so simbawa na satan. No gawaen tayo itan, naeksperiensya tayo iray liknaan na salmista: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.”—Salmo 119:105.
2 Konsideraen tayo natan so Salmo 119:89-176. Agaylan karakel ya impormasyon so naromog ed sarayan bersikulo, ya inuksoy ed 11 ya estansa! Saraya so makatulong ed sikatayo pian mansiansia ed dalan ya ompugta ed andi-anggaan a bilay.—Mateo 7:13, 14.
Akin a Mankaliktan ed Salitay Dios?
3. Panon ya ipapatnag na Salmo 119:89, 90 a makapandependi itayo ed salitay Dios?
3 Say pankaliktan ed salita nen Jehova so manresulta ed mabiskeg ya espiritualidad. (Salmo 119:89-96) Oniay inkanta na salmista: “Lawas lan lawas, O Jehova, ya akaletneg so salitam ed tawen. . . . Sika impaletneg mo so dalin, tan sikato mansiansia.” (Salmo 119:89, 90) Diad panamegley na salitay Dios—‘saray uksoy to nipaakar ed saray tawen’ salanti, saray bengatlan walad tawen so ontetelek a mauk-uksoy diad saray orbit da tan say dalin so malet a niletneg diad andi-anggaan. (Job 38:31-33; Salmo 104:5) Makapandependi itayo ed kada salita a manlalapud sangi nen Jehova; say ibabaga na Dios so talagan “onaligwas” diad pakasumpal na gagala to.—Isaias 55:8-11.
4. Anto so epekto na panliket ed salitay Dios parad saray lingkor ton maniirap?
4 Say salmista so ‘atawtaw la komon lapud inkaermen to no agto nanliketan so ganggan na Dios.’ (Salmo 119:92) Aliwan saray taga-arum a bansa so mamapairap ed sikato; noag saray Israelitan mananumlang ed ganggan a mamubusol ed sikato. (Levitico 19:17) Balet satan so ag-anaeg ed sikato, lapud pinabpabli to so salitay Dios ya amabiskeg ed sikato. Diad Corinto, si apostol Pablo so niiyan ed “saray kaatapan ed saray pakalala [odino, palso] ya agagi” a nayarin mangilaktip ed “manunaan ya apostoles” a mangaakusa ed sikato. (2 Corinto 11:5, 12-14, 26) Ingen, akaliktar si Pablo ed espiritual a paraan lapud nanliketan to so salitay Dios. Lapud panliliketan tayo so nisulat a Salita nen Jehova tan iyaaplika tayo no anto so ibabaga na satan, naaaro tayo so agagi tayo. (1 Juan 3:15) Anggaman ed panagbusol na mundo et agtayo nalingwanan so dinanman ed saray bilin na Dios. Mantultuloy tayon gawaen so linawa to diad maaron pikasakey ed saray agagi tayo legan tayon tatalaranan so andi-anggaan tan maliket a panaglingkor ed si Jehova.—Salmo 119:93.
5. Panon ya inanap nen Arin Asa si Jehova?
5 Diad pangibalikas ed debosyon tayo ed si Jehova, nayarin oniay ipikasi tayo: “Kien mo ak, ilaban mo ak; ta inanap ko so bilibilin mo.” (Salmo 119:94) Inanap nen Arin Asa so Dios tan sigpot ton inekal so apostasya diad Juda. Diad baleg a pandaragup nen koma-15 a taon na uley nen Asa (963 K.K.P.), saray manaayam ed Juda so ‘linmoob ed sipanan ya anapen day Jehova.’ Inabuloyan na Dios a ‘sikatoy naromog da’ tan ‘inikdan to ira na painawa ed manliberliber.’ (2 Awaran 15:10-15) Sayan alimbawa so nepeg a mamaseseg ed siopaman a kinmasipa ed Kristianon kongregasyon pian anapen da lamet so Dios. Bendisyonan tan protektaan to iramay mangituloy lamet ed aktibon pililimog da ed totoo to.
6. Anton kurang so manalimbeng ed sikatayo manlapud espiritual a desyang?
6 Say salita nen Jehova so panlapuan na kakabatan a makasalimbeng ed sikatayo manlapud espiritual a desyang. (Salmo 119:97-104) Saray ganggan na Dios so manggawa ed sikatayon mas makabat nen saray kabusol tayo. Say italineng ed saray panonot to so mangiter ed sikatayo na aralem a pakatalos, tan ‘say pangunor ed bilibilin to so ontulong pian dakdakel so natalosan tayo nen saray daan a totoo.’ (Salmo 119:98-100) No saray salita nen Jehova et ‘masamsamit ed sangi tayo nen say dilo,’ busolen tan paliisan tayo so “aliwaliwa a kagagawa.” (Salmo 119:103, 104) Saya so manalimbeng ed sikatayo manlapud espiritual a desyang no napidenengan tayo iray mapaatagey, mapasang, tan agmaridios a totoo ed sarayan kaunoran ya agew.—2 Timoteo 3:1-5.
Sakey a Silewan ed Salisali Tayo
7, 8. Pian makapitunosan ed Salmo 119:105, anto so nakaukolan tayon gawaen?
7 Say salitay Dios et lapuan na ag-onsaew ya espiritual a liwawa. (Salmo 119:105-112) Balanglan alanaan itayon Kristiano odino kakaiba da itayon “arum a karnero,” oniay iyaabawag tayo: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.” (Juan 10:16; Salmo 119:105) Say salita na Dios et singa silewan a manliliwawa ed dalan tayo, ta pian ag-itayo naparukol tan natumba ed espiritual. (Uliran 6:23) Ingen ta nepeg ya abuloyan tayon mismo so salita nen Jehova a magmaliw a silewan ed salisali tayo.
8 Nakaukolan itayon magmaliw a mapekder a singa say nansulat ed Salmo 119. Sikato so determinado ya ag-onkasipa ed saray pananontonan na Dios. Inkuan to: “Sinambaan ko, et sikato so pinaletan ko, ya unoren ko so matunong a bilibilin mo [Jehova].” (Salmo 119:106) Agtayon balot leleglemewen so kaimportantian na regular a panagaral na Biblia tan say pibibiang ed saray Makristianon pantitipon.
9, 10. Panon tayon amta a saray indibidual a dedikado ed si Jehova et nayarin ‘onsian ed saray bilibilin to,’ balet panon itan a napaliisan?
9 Say salmista so ‘agsinmian ed saray bilibilin na Dios,’ bangta nayarin nagawa itan ed sakey a dedikado ed si Jehova. (Salmo 119:110) Si Arin Solomon so sinmian, anggaman sikato so kabiangan na nasyon a dedikado ed si Jehova tan datin onkikiwas unong ed inter na Dios a kakabatan. “Sikato [so] impankasalanan na saray sankaili a bibii” diad impanangguyor da ed sikaton mandayew ed palson dirios.—Nehemias 13:26; 1 Arari 11:1-6.
10 Say “manangalot” a si Satanas, so mangipapaleg na saray patit. (Salmo 91:3) Singa bilang, say datin managdayew so nayarin manangguyor ed sikatayo ya onkasipa ed basbas na espiritual a liwawa pian onloob ed bilunget na apostasya. Diad saray Kristiano ed Tiatira, wala so “bii a Jezabel,” a posiblin sakey a grupo na bibii a mangibabangat ed arum a mangagamil na panagtalintao tan pilalawanan. Ag-inabuloyan nen Jesus iratan a kaugsan, tan agtayo met nepeg ya abuloyan iratan. (Apocalipsis 2:18-22; Judas 3, 4) Manpikasi itayo sirin parad tulong nen Jehova ta pian ag-itayo onsian ed saray pananontonan to noagta mansiansia itayo ed liwawa na Dios.—Salmo 119:111, 112.
Apabiskeg ed Salitay Dios
11. Unong ed Salmo 119:119, panon so pangipapasen na Dios ed saray marelmeng?
11 No agtayon balot onkasipa ed saray pananontonan na Dios, sikatayo so pabiskegen to. (Salmo 119:113-120) Agtayo abobonan iramay walaan na “nankaduan-kanonotan,” a singa ed ag-impangabobon nen Jesus ed saramay malainem-em, a mankuan a Kristiano natan. (Salmo 119:113; Apocalipsis 3:16) Lapud interon-puso so panlilingkor tayo ed si Jehova, sikato so ‘pansasalimbengan’ tayo tan pabiskegen to itayo. ‘Ipasen ton anggapo so amin a nalilingo ya onsian ed saray panangitontonan to’ diad pangaagamil da na panamalikdo tan katilaan. (Salmo 119:114, 117, 118; Uliran 3:32) Saratan a marelmeng et ipapasen to bilang “dutak”—saray dutak ya inekal ed ankabli iran metal a singa say pilak tan balitok. (Salmo 119:119; Uliran 17:3) Komon ta naynay tayon ipatnag so panamabli ed saray panonot na Dios, lapud ta seguradon agtayo labay so napideral ed saray marelmeng!
12. Akin ya importante so takot ed si Jehova?
12 “Say laman ko manggiwgiw ed takot to ed sika [Jehova],” so inkuan na salmista. (Salmo 119:120) Say pakawalaan tayo na positibon takot ed Dios, a nipatnag diad ipaliis ed saray agto aabobonan, so importante ta pian pabiskegen to itayo bilang lingkor to. Lapud mapagalang a tinmakot si Job ed si Jehova, sikato so nambilay a matunong. (Job 1:1; 23:15) Say maridios a takot so ontulong ed sikatayo pian mantultuloy ed kurang ya aabobonan na Dios antokaman ni so bengatlan nepeg tayon sungdoan. Balet, say panagsungdo so mankaukolan na masimoon iran pikakasi ya imbalikas tekep na pananisia.—Santiago 5:15.
Manpikasi Tekep na Pananisia
13-15. (a) Akin a makapanisia itayo a naebatan iray pikakasi tayo? (b) Anto so nagawa no agtayo amta so ibaga tayo ed pikakasi? (c) Iyilustra no panon a say Salmo 119:121-128 so nayarin misiglaotan ed ‘saray agtayo nibalikas a paningel’ ed pikakasi.
13 Nayarian tayo so manpikasi tekep na pananisia a say Dios et onkiwas ed biang tayo. (Salmo 119:121-128) Singa say salmista, makapanseguro itayo a naebatan iray pikakasi tayo. Akin? Lapud papablien tayo iray ganggan na Dios ya “alabas nen [say] balitok, on, alabas nen say marakep a balitok.” Niarum ni, ‘papablien tayo ya amin so bilibilin na Dios nipaakar ed saray maptek a pamaakaran.’—Salmo 119:127, 128.
14 Dedengelen nen Jehova iray kerekerew tayo lapud manpipikasi itayo tekep na pananisia tan maalwar tayo met ya uunoren iray bilibilin to. (Salmo 65:2) Balet panon to no sagpaminsan et walaan itayoy makapawetwet iran problema ya agtayo amta so ibalikas tayo ed pikakasi tayo? Diad ontan et “say dili ya espiritu gawaen to so panangyesel a nipaakar ed sikatayo ed agnibalikas a paningel.” (Roma 8:26, 27) Diad saratan a pankanawnawa, ipapasen na Dios iray balikas a naromog ed Salita to bilang saray pikakasi a manasaglawi ed saray pankaukolan tayo.
15 Say Kasulatan so walaan na dakel a pikakasi tan kanonotan a misiglaotan ed ‘saray agnibalikas a paningel’ tayo. Alimbawa, konsideraen pa so Salmo 119:121-128. Say paraan na inkibalikas na saray bengatla ditan et nayarin mitukoyan ed saray kipapasen tayo. Singa bilang, no natatakot itayon napalikdo, nayarin onkerew itayo na tulong ed Dios a singa ed paraan na salmista. (Sal 119 Bersikulo 121-123) Ipasen pa a nakaukolan tayo so manggawa na mair-irap a desisyon. Diad satan et nayarin ipikasi tayo a tulongan itayo na espiritu nen Jehova pian nanonotan tan niyaplika iray panonot to. (Sal 119 Bersikulo 124, 125) Anggaman ‘kagula tayo so ganagana ya aliwliwan kagagawa,’ nayarin nakaukolan itayon patulongan ed Dios pian nalabanan so tukson manumlang ed ganggan to. (Bersikulo 126-28) No inagew-agew tayon basaen so Biblia, saratan a makatulong a teksto so nipanonot ed sikatayo sano manpikasi itayo ed si Jehova.
Atulongan ed Saray Panonot nen Jehova
16, 17. (a) Akin a nakaukolan tayo iray panonot na Dios, tan panon so nepeg tayon pangipasen ed saratan? (b) Panon so nayarin pangipasen ed sikatayo na arum a totoo, balet anto so mas importante?
16 Pian dengelen na Dios iray pikakasi tayo tan panggayagaan so panangabobon to, nepeg tayon talinengen iray panonot to. (Salmo 119:129-136) Lapud malingwan itayo, nakaukolan tayo so alay abig iran panonot nen Jehova ta pian nanonotan tayo iray bilin tan ganggan to. Siempre, apresyaen tayo so espiritual a liwawa a nisisindag ed kada balon pakatalos ed saray salita na Dios. (Salmo 119:129, 130) Misalsalamat itayo met a si Jehova et ‘pinasindag to so lupa to ed sikatayo’ tekep na panangabobon, anggaman ‘saray ilog na danudanum so inmagus ed mata tayo’ lapud susumlangen na arum so ganggan to.—Salmo 119:135, 136; Numeros 6:25.
17 Makaseguro itayo a mantultuloy so panangabobon na Dios ed sikatayo no tumboken tayo iray matunong a panonot to. (Salmo 119:137-144) Bilang lingkor nen Jehova, bibidbiren tayo a sikato so walaay kanepegan a mangipaimano ed sikatayo ed saray matunong a panonot to tan manilalo ya unoren tayo iratan a ganggan. (Salmo 119:138) Bangta tinulok na salmista iray ganggan na Dios, akin ya imbaga ton: “Siak melag ak tan minudmora ak.” (Salmo 119:141) Ompatnag a tutukoyen to so paraan na impanmoria ed sikato na kakabusol to. No pansiansiaen tayo so agmikompromison talindeg tayo parad inkatunong, arum so nayarin manmudmora ed sikatayo. Ingen say talagan importante et aabobonan itayo nen Jehova lapud manbibilay itayo unong ed saray matunong a panonot to.
Maligen tan Walad Kareenan
18, 19. Antoray resulta no unoren tayo iray panonot na Dios?
18 Mansiansia itayon maapit ed Dios no tumboken tayo iray panonot to. (Salmo 119:145-152) Lapud tatalinengen tayo iray panonot nen Jehova, amta tayo a nayarian tayo so ontawag ed sikato diad interon puso tayo, tan nailaloan tayo a dengelen to iratan. Nayarin naliing itayo ed “ipelnak na kabuasan” tan oney-ey parad tulong. Agaylan abig a panaon itan pian manpikasi! (Salmo 119:145-147) Say Dios so asingger met ed sikatayo lapud papaliisan tayo so malukak a kondukta tan ipapasen tayo so salita to bilang katuaan, a singa ed impangipasen nen Jesus ed satan. (Salmo 119:150, 151; Juan 17:17) Say relasyon tayo ed si Jehova so mamabiskeg ed sikatayo diad sayan makapagonigon a mundo tan ontulong itan pian naliktaran tayo so baleg a bakal na Armagedon.—Apocalipsis 7:9, 14; 16:13-16.
19 Lapud aralem a panagrespeto tayo ed salitay Dios, panggagayagaan tayo so peteg a kaligenan. (Salmo 119:153-160) Aliwan singa saray marelmeng, ‘ag-itayo sinmian ed saray panamintuaan nen Jehova.’ Papablien tayo iray bilibilin na Dios kanian akaseguro itayo ed maaron-kaabigan to. (Salmo 119:157-159) Saray panamintuaan odino panonot nen Jehova so mamaalerto ed memorya tayo ta pian nanonotan iray kakaukolanen to ed sikatayo diad espisipiko iran kipapasen. Diad biek a dapag, saray pananontonan na Dios et manangiwanwan, tan mabulos tayon bidbiren so kanepegan na Manamalsa tayo a mangiwanwan ed sikatayo. Lapud sikakabat itayo a ‘say katiponan na salita na Dios et katuaan’ tan agtayo nayarian ya iwanwan a bukor so dilin kurakurang tayo, maliket tayon awaten so panangiwanwan na Dios.—Salmo 119:160; Jeremias 10:23.
20. Akin a walaan itayo na “abalbaleg a kareenan”?
20 Say panamabli tayo ed ganggan nen Jehova so mangitarok ed sikatayo na daakan a kareenan. (Salmo 119:161-168) Agnaandi ed sikatayo so agnaparaan a “deen na Dios” anggaman ed panamasegsegang. (Filipos 4:6, 7) Ontan lay panamabli tayo ed saray pananontonan nen Jehova kanian sikato so mabetbet ya idaydayew tayo, a ‘maminpito ed sanagew.’ (Salmo 119:161-164) “Abalbaleg a kareenan so wala ed saray mangaro na ganggan mo,” so inkanta na salmista, “tan anggapo a balot so sengegay kigapolan da.” (Salmo 119:165) No sikatayo bilang indibidual et mangaro tan mangunor ed ganggan nen Jehova, ag-itayo nigapol na siopaman odino antokaman diad espiritual a paraan.
21. Antoran Makasulatan ya alimbawa so mangipatnag ya ag-itayo nakaukolan a nagapol sano walaray probleman onlesa ed loob na kongregasyon?
21 Dakel ya indibidual a nikurit ed Biblia so ag-angiyabuloy ed antokaman a magmaliw a permanentin pakagapolan da. Singa bilang, say Kristianon laki a si Gaio so agnigapol noagta nantultuloy a ‘nanakar ed katuaan’ anggaman ed agmaridios a kondukta nen Diotrefes. (3 Juan 1-3, 9, 10) Sinimbawa nen Pablo so Kristianon bibii a si Euodias tan Sintique, a ‘manpara ira ed nonot ed Katawan,’ lapud nayarin walay agda akapantalosan. Ompatnag ya atulongan ira a manresolbe ed problema ra, kanian akapantultuloy ira ed matoor a panaglingkor ed si Jehova. (Filipos 4:2, 3) Kanian ag-itayo nakaukolan a nagapol no walaray problema ya onlesa ed loob na kongregasyon. Iyapasakey tayoy imano tayo ed panumbok ed saray pananontonan nen Jehova, a tandaan ya ‘amin a kagagawa tayo et wala ira ed arapan to.’ (Salmo 119:168; Uliran 15:3) Diad ontan et anggapo so permanentin mangekal ed “abalbaleg a kareenan” tayo.
22. (a) No unoren tayo so Dios, anton pribilehyo so napanggayagaan tayo? (b) Panon so nepeg a panmoria tayo no walaray tinmaynan ed Kristianon kongregasyon?
22 No naynay tayon unoren si Jehova, napribilehyoan itayon mantultuloy a mangidayew ed sikato. (Salmo 119:169-176) No manbilay itayo unong ed saray pananontonan na Dios, agtayo lambengat panggayagaan so espiritual a kaligenan noagta ‘saray bibil tayo et mangibesngaw na panangidayew ed si Jehova.’ (Salmo 119:169-171, 174) Saya so sankabalegan a pribilehyon niwala ed sikatayo diad sarayan kaunoran ya agew. Labay na salmista so mantultuloy a manbilay tan mangidayew ed si Jehova, balet ta diad ag-amtan paraan et sikato so ‘nantulostulos a singa abalang a karnero.’ (Salmo 119:175, 176) Nayarin walaray tinmaynan ed Kristianon kongregasyon a mangaaro nin siansia ed Dios tan labay day mandayew ed sikato. Gawaen tayo sirin so anggaay nayarian tayo a tulongan ira ta pian naeksperiensya ra lamet so espiritual a kaligenan tan liket ed panangidayew ed si Jehova a kaiba so totoo to.—Hebreos 13:15; 1 Pedro 5:6, 7.
Magnayon a Liwawa ed Dalan Tayo
23, 24. Antoran gunggona so agamoran yo ed Salmo 119?
23 Say Salmo 119 so pakagunggonaan tayo ed nanduruman paraan. Singa bilang, satan so ontulong pian mas manmatalek itayo ed Dios, lapud ipapatnag na satan a say tuan liket et resulta na ‘panakar ed ganggan nen Jehova.’ (Salmo 119:1) Ipapanonot ed sikatayo na salmista a say ‘katiponan na salita na Dios et katuaan.’ (Salmo 119:160) Saya so seguradon mamabulaslas ed apresasyon tayo ed interon nisulat a Salita na Dios. Say pandalepdep ed Salmo 119 so mamakiwas ed sikatayo pian maseet a manaral ed Kasulatan. Oniay aminpigan inkerew na salmista ed Dios: “Ibangat mo ed siak so saray panangitontonan mo.” (Salmo 119:12, 68, 135) Inkerew to met: “Bangatan mo ak na maong a panangis-isip, tan kakabatan; ta sinisiak so saray ganggan mo.” (Salmo 119:66) Ontan met so nepeg tayon ipikasi.
24 Posible so pakawalaan na maapit a relasyon ed si Jehova lapud saray bangat to. Aminpigan tinawag na salmista so inkasikato bilang lingkor na Dios. Diad tua et oniay makapatenyeg ya imbaga to ed si Jehova: “Kien mo ak.” (Salmo 119:17, 65, 94, 122, 125; Roma 14:8) Agaylan pribilehyo so panlingkor tan pangidayew ed si Jehova bilang sakey ed saray Tasi to! (Salmo 119:7) Kasin malikeliket kayon manlilingkor ed Dios bilang manangiyabawag na Panarian? No ontan, makaseguro kayo a si Jehova so mantultuloy ya ontulong tan mamendisyon ed sikayo ed sayan nikadkaduman kimey no naynay kayon manmatalek ed salita to tan abuloyan yo itan a manliwawa ed dalan yo.
Panon Yon Ebatan?
• Akin a nepeg itayon mankaliktan ed salitay Dios?
• Panon itayon napapabiskeg ed salitay Dios?
• Diad antoran paraan a natulongan itayo na saray panonot nen Jehova?
• Akin a saray totoo nen Jehova et maligen tan walad kareenan?
[Tepetepet Parad Panagaral]
[Litrato ed pahina 16]
Say salitay Dios et lapuan na espiritual a liwawa
[Litrato ed pahina 17]
No papablien tayo iray panonot nen Jehova, agto itayon balot ipasen a “dutak”
[Saray litrato ed pahina 18]
No inagew-agew tayon babasaen so Biblia, mainomay tayon nanonotan iray makatulong a teksto sano manpikasi itayo