Kasin Agtayo la Nasabaan so Pikakabat?

Banbantagen na sanasawan misionaryo a manyudyurong ed gilig na dayat ed Sagur ya Aprika so managaag a bulan. “Kaunongan karakel la kasi so amta na too nipaakar ed bulan, tan kaunongan karakel ni kasi so amtaen da?” so inumameng na asawan laki.

Nansalita met so asawan bii: “Isipen pa a naiimatonan tayoy itetelek na dalin a singa pakakaimaton tayo ed bulan​—kaunongan karakel la kasi so pikakabat na totoo nipaakar ed dalin, tan kaunongan karakel ni kasi so aralen da? Tan isipen pa labat iya! Aliwan say dalin labat so onliliber ed banwa noagta onggagalaw met so interon solar system tayo. Kabaliksan na saya a nayarin ag-itayo lan balot makapawil dia ed sayay eksakton kawalaan tayo natan ed uniberso. Diad tua et amta tayo so kawalaan tayo natan ed liwang unong labat ed saray kabisado tayo la ran palsa ed tawen, salanti, say banwa tan saray bitewen. Malaklaknab so pikakabat tayo ed pigaran bengatla, balet agtayo anggan amta no iner so eksakton kawalaan tayo!”

SARATAN a kanonotan so manasaglawi ed pigaran manunan katuaan. Ompatnag a dakdakel so nepeg tayon aralen. Siempre, kada sakey ed sikatayo so makakaaral na balo iran bengatla kada agew. Balet, anggan dakdakel la so naaaralan tayo, ompatnag ya agtayo nin siansia amta iray labay tayon amtaen.

Tua a nilikud ed abilidad tayon makagamor na balon impormasyon, inmaligwas lan tuloy so kapasidad tayon mangisimpen na pikakabat. Dakdakel a pikakabat so nagagamoran na katooan lapu ed teknolohiya. Saray hard disk na kompyuter natan et walaan na abalbaleg a kapasidad, a kinaukolan so pamawala na balo iran termino ed matematika a maneskribe ed saratan. Say simplin CD-ROM so makapangisimpen na dakerakel ya impormasyon, tan say kapasidad na satan so idedeskribe bilang 680 a megabytes odino onsulok ni. Say kaslakan a DVD et makapangisimpen na ngalngalin maminpito a karakel na CD-ROM, tan napapawala so arum a klase a walaan na mas babaleg a kapasidad.

Saray modernon uusaren na too pian nipasabi so impormasyon et ngalngalin agtayo natalosan. Diad panamegley na saray rotary press a mapmaples ya onaandar et napapawala iray peryodiko, magasin, tan liblibro. Parad sakey a manguusar na Internet, dakerakel ya impormasyon so naala ton tampol diad panamegley na simsimplin proseso. Diad saraya tan ed dakel niran paraan, mas maples so panangipasabi na impormasyon nen say pakaaral ed saratan. Sayan kinarakel na impormasyon so niyaaliling no maminsan ed dayat, a lapud kinaawang et nepeg tayon aralen so onlangoy ditan, a singa panangibaga, balet agtayo salien ya inumen ya amin itan. Lapud ontan lan karakel na  impormasyon, napaskar itayon magmaliw a mapili.

Say sakey nin rason no akin a magmaliw itayon mapili et lapud aliwan naynay a makana so dakdakel ya impormasyon. Diad tua et aliwa ni ingen a makapainteres tan makagunggonan amtaen so arum ed satan. Tandaan a misiglaotan so pikakabat ed impormasyon​—balanglan maong odino mauges, positibo odino negatibo. Tan mas makapawetwet laingen lapud say pigaran bengatla ya ipapasen na dakel bilang katuaan et aliwan talagan susto. Agaylan mabetbet a napapaneknekan diad kaunoran a lingo, odino palso, iray ibabaga na anggan saray dederlengen ya autoridad! Singa bilang, nonoten pa so nipaakar ed sekretaryo na syudad na Efeso nensaman, a sikatoy binidbir na totoo bilang makabat a tuloy ya opisyal. Inkuan to: “Siopay toon agmakapikabat a say syudad na Efeso et manag-asikaso na temploy matalonggaring ya Artemis, tan say masanton baton [odino imahen] naplag a nanlapud tawen?” (Gawa 19:35, 36, Maung a Balita) Anggaman ompatnag ya ontan so amta na karaklan tan imbaga ra ni ingen ya ag-itan nasuppiat, aliwan tua a say imahen et naplag a nanlapu ed tawen. Kanian makatunongan so pasakbay na Masanton Biblia ed saray Kristiano a manalwar ira sumpad samay “ningaran a kakabatan balet aliwa a tua.”​—1 Timoteo 6:20.

Say mabiskeg a rason no akin a magmaliw itayon mapili nipaakar ed pikakabat et lapud antiktikey so panat na panaon a pambilay tayo. Tan anggan panon lay katakken yo, maseguro a dakel nin klase na pikakabat so labay yon aralen, balet ta namomoria yon antiktikey so bilay yo pian nagawaan itan.

Naresolbi ni kasi iyan manunan problema? Kasin niwala ni so klase na pikakabat a mamarukey ed bilay, a maando ni ingen? Kasin wala la itan a klase na pikakabat? No ontan, kasin nipagamor itan ed amin a totoo? Onsabi ni kasi panaon ya amin lan impormasyon et katuaan, unong ya iilaloan tayo? Samay misionaryon sanasawa ya asalambit ed gapo so akaromog na makapenek iran ebat ed saratan a tepet, tan naromog mo met iratan. Ipangasin basaen so onsublay ya artikulo, a mangiyopresi ed sika na pankanawnawan onggamor na pikakabat ed ando lan ando.