Manmatalek ed Salita nen Jehova

‘Nanmatalek ak ed salitam.’​—Salmo 119:42.

1. Anto so nibaga yo nipaakar ed pakabidbiran tan awawey na nansulat ed Salmo 119?

 SAY salita nen Jehova so pinabpabli na nansulat ed Salmo 119. Nayarin sikato si Prinsipen Hezekias na Juda. Saray liknaan a nibalikas ed sayan impuyan a kanta so mitukoyan ed awawey nen Hezekias, a “pinmeket ed Jehova” sanen manlilingkor bilang ari na Juda. (2 Arari 18:3-7) Sakey a bengatla so segurado: Say nansulat et sinononot ed pankaukolan to ed espiritual.​—Mateo 5:3.

2. Anto so tema na Salmo 119, tan panon so inkaalasir na sayan kanta?

² Say manunan punto ed Salmo 119 et say kablian na salita odino mensahe na Dios. * Ta pian mainomay lagin natandaan, say managsulat so maalasir ya anibukel ed sayan kanta. Say 176 a bersikulo na satan so nauksoy unong ed impantutumbokay letra na Hebreon alpabeto. Diad orihinal a Hebreo, kada sakey ed 22 ya estansa na salmo so walaan na 8 a linya ya onggagapo ed parehon letra. Sayan salmo so manutukoy ed salita, saray ley, panonot, daladalan, bilibilin, regulasyon, ganggan, hudisyal iran desisyon, tan pananontonan na Dios. Diad sayan artikulo tan ed ontumbok, singbaten so Salmo 119 unong ed suston patalos na teksto na Hebreon Biblia. Say pandalepdep ed saray na-eksperiensya na saray lingkor nen Jehova nensaman tan natan so nepeg a mamaaralem ed pakatalos tayo ed sayan kanta a pinuyanan na Dios tan mamabulaslas ed panamabli tayo ed nisulat a Salita to, say Biblia.

Unoren so Salita na Dios Pian Manliket

3. Ipaliwawa tan iyilustra no anto so kabaliksan na pagmaliw ya andiay-pankulangan.

³ Say tuan liket so akadepende ed pankurang tayo unong ed ganggan na Dios. (Salmo 119:1-8) No gawaen tayo itan, sikatayo so ipasen nen Jehova bilang andiay-pankulangan odino ‘ayadyari ed dalan tayo.’ (Salmo 119:1) Say pagmaliw ya andiay-pankulangan et agmankabaliksan ya ayadyari itayo la, balet ipapabitar na satan a panggugunaetan tayon gawaen so linawa nen Jehova a Dios. Si Noe et “nagnap ed saray kapolian to” bilang sakey a too ya “akiulop-ulop ed Dios.” Sayan matoor a patriarka tan say pamilya to so akaliktar ed Delap lapud tinumbok to so kurang na bilay ya indatak nen Jehova. (Genesis 6:9; 1 Pedro 3:20) Mipadpara, say kiliktar tayo ed anggaan na sayan mundo so akadepende ed ‘maseet a pangunor ed saray ganggan na Dios,’ ta pian diad ontan et nagawaan tayo so linawa to.​—Salmo 119:4.

4. Say liket tan italona tayo so akadepende ed anto?

⁴ Sikatayo so agbalot ikaindan nen Jehova no sikato so ‘pisalamatan tayo tekep na maptek a puso tan mantultuloy a mangunor ed saray pananontonan to.’ (Salmo 119:7, 8) Agpinaulyanan na Dios so Israelitan lider a si Josue, ya angiyaplika ed simbawan basaen odino ‘umamengen so libro na ganggan ed agew tan labi ta pian nagawa to so amin a nisulat ed satan.’ Lapud satan et sikato so tinmalona tan kinmiwas a makabat. (Josue 1:8)  Sanen asingger lay ipatey nen Josue, sikato so siansia nin mangitatandoro ed Dios tan oniay impanonot to ed saray Israelita: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo.” (Josue 23:14) Singa si Josue tan say nansulat ed Salmo 119, nayarian tayo so manliket tan ontalona diad pangidayew ed si Jehova tan panmatalek ed salita to.

Linisan Itayo na Salita nen Jehova

5. (a) Ipaliwawa no panon a posible so pansiansian malinis ed espiritual. (b) Anto so makatulong ed sakey a kalangweran ya akagawa na ambelat a kasalanan?

⁵ Magmaliw itayon malinis ed espiritual no mantultuloy itayon manimano unong ed salitay Dios. (Salmo 119:9-16) Posible itan anggano saray atateng tayo et agmangipapatnag na maabig ya ehemplo. Anggaman say ama to et managtalintao, si Hezekias so nanlinis odino ‘amalin ed basbas to,’ a posiblin manlapud saray paganon impluensya. Ipasen pan walay kalangweran natan a manlilingkor ed Dios ya akagawa na ambelat a kasalanan. Say panagbabawi, pikakasi, tulong na atateng, tan say maaron pananulong na Kristianon mamatatken so ontulong ed sikato pian naalig to si Hezekias tan ‘napalinan toy basbas to tan mantultuloy a manimano.’​—Santiago 5:13-15.

6. Sioparan bibii so nanlinis odino ‘amalin ed basbas da tan nantultuloy ya angimano unong ed salitay Dios’?

⁶ Anggaman nambilay si Rahab tan Rut sakbay nin nisulat so Salmo 119, ‘nilinisan da so basbas da.’ Si Rahab et sakey a Canaanitan balangkantis, balet sikato so akabkabat lapud pananisia to bilang managdayew ed si Jehova. (Hebreos 11:30, 31) Say Moabitan si Rut so angitalirak ed saray dirios to, nanlingkor ed si Jehova, tan angunor ed Ganggan na Dios ed Israel. (Rut 1:14-17; 4:9-13) Sarayan aliwan Israelita so ‘nantultuloy a nanimano unong ed salitay Dios’ tan awalaan na alay abig a pribilehyon magmaliw ya inmunan atateng nen Jesu-Kristo.​—Mateo 1:1, 4-6.

7. Panon ya impatnag di Daniel tan say taloran Hebreon tobonbalo so maabig ya alimbawa na panamasiansia ed kalinisan ed espiritual?

⁷ ‘Say panag-isisip na puso na too so mauges a nanlapud inkaugaw to,’ balet nayarian na saray kalangweran so ontumbok ed malinis a basbas, anggan diad sayan mauges a mundon kokontrolen nen Satanas. (Genesis 8:21; 1 Juan 5:19) Bilang kautibo ed Babilonia, si Daniel tan say talora nin Hebreon tobonbalo so ‘nantultuloy a nanimano unong ed salitay Dios.’ Singa bilang, agda labay a dutakan so inkasikara diad “saray kanen na ari.” (Daniel 1:6-10) Saray taga-Babilonia et mamangan na marutak iran ayayep, a sebel ed Mosaikon Ganggan. (Levitico 11:1-31; 20:24-26) Agda ipapatedter so dala na pinartin ayayep, tan say pangaakan day ag-aparalaan a karne so sumlang ed ganggan na Dios nipaakar ed dala. (Genesis 9:3, 4) Agla pankelawan no akin ya aglabay a kanen na apatiran Hebreo iray kakanen na ari! Pinansiansia na sarayan maridios a tobonbalo so kalinisan ed espiritual, kanian nipatnag da so maabig ya alimbawa.

 Say Salitay Dios et Sakey a Tulong ed Panagmatoor

8. Anton awawey tan pikakabat so nakaukolan tayo ta pian natebek tan niyaplika tayo so ganggan na Dios?

⁸ Say pankaliktan ed salitay Dios so manunan makatulong ed pansiansia tayon matoor ed si Jehova. (Salmo 119:17-24) Singa met say pinuyanan a salmista, pampilalekan tayon talosan so ‘makapakelkelaw iran pamaakaran’ ed ganggan na Dios. Sikatayo so naynay a ‘mantindek ed saray panangis-isip [odino hudisyal iran desisyon] nen Jehova’ tan ipatnag tayo so ‘pankaliktan ed saray panamintuaan’ odino panonot to. (Salmo 119:18, 20, 24) No agano ni labat so inkidedika tayo ed si Jehova, kasin ‘babayuboan tayo so pampilalek ed ag-alaokan a gatas a nipaakar ed salita’? (1 Pedro 2:1, 2, NW) Nakaukolan tayon talosan so manuna iran bangat na Biblia ta pian lalo tayon natebek tan niyaplika so ganggan na Dios.

9. Panon so nepeg ya ikiwas tayo sano walay pansumlangan na ganggan na Dios tan saray ganggan na too?

⁹ Nayarin kalkaliktan tayo iray panonot na Dios, balet panon to no “saray prinsipe” et mansalita sumpad sikatayo lapud sakey a rason? (Salmo 119:23, 24) Natan, saray totoon walaan na autoridad so mabetbet a mamapaskar ed sikatayo ya iyuna iray ganggan na too nen say ganggan na Dios. Sano walay pansumlangan ed baetan na saray ganggan na too tan say linawa na Dios, anto so gawaen tayo? Say pankaliktan tayo ed salitay Dios so ontulong pian mansiansia itayon matoor ed si Jehova. Singa saray apasegsegang ya apostol nen Jesu-Kristo, ibaga tayon: “Nakaukolan ya unoren mi so Dios, nen saray totoo.”​—Gawa 5:29.

10, 11. Iyilustra no panon tayon napansiansia so integridad tayo ed si Jehova anggaman ed mair-irap iran kipapasen.

¹⁰ Nayarian tayo so mansiansian matoor ed si Jehova anggaman ed mair-irap iran kipapasen. (Salmo 119:25-32) Ta pian makapansiansia itayon matoor ed Dios, nepeg a mabulos itayon paibangat tan masimoon a manpikasi parad panangiwanwan to. Nepeg met a pilien tayo so dalan odino “kagagawa na katooran.”​—Salmo 119:26, 30.

¹¹ Si Hezekias, a nayarin angisulat ed Salmo 119, so amili ed “kagagawa na katooran.” Ginawa to itan anggaman sikatoy apaliberan na saray palson managdayew tan nayarin niludlurey na saray membro na maarin korte. Maseguro a say ‘kamarerwa to et apunaw [odino agmakaugip] ed pakakadetdetan’ lapud saratan a kipapasen. (Salmo 119:28) Balet ta nanmatalek si Hezekias ed Dios, sikato so maong ya ari, tan ginawa to so ‘maptek ed imaton nen Jehova.’ (2 Arari 18:1-5) Diad panmatalek tayo ed Dios, makapansungdo itayo met ed saray subok bilang manamemben na katooran.​—Santiago 1:5-8.

Say Salitay Dios et Mamapakpel

12. Panon tayon niyaplika a mismo so Salmo 119:36, 37?

¹² No tumboken tayo so panangigiya na salitay  Dios, magmaliw itayon makpel pian natalonaan iray subok ed bilay. (Salmo 119:33-40) Mapaabeba tayon anapen iray bilin nen Jehova ta pian natumbok tayo so ganggan to ed ‘sankasimoonan a puso.’ (Salmo 119:33, 34) Singa say salmista, oniay ikerew tayo ed Dios: “Ikiling mo so pusok ed saray panamintuaan mo, et aleg ed kaagapan.” (Salmo 119:36) Singa si apostol Pablo, “man-ugali itayon matua diad amin a bengatla.” (Hebreos 13:18, NW) No walay agmatuan ipagawa ed sikatayo na sakey ya amo, manpakpel itayon ontumbok ed saray panangidirehi na Dios​—tan si Jehova so lawas mamendisyon ed ontan a kurang. Diad tua, tutulongan to itayon nakontrol so amin a mauges a tendensia. Oniay ipikasi tayo sirin: “Yarawim so matamatak ed pannengneng na andi-kakanaan.” (Salmo 119:37) Agtayon balot labay a nengnengen so antokaman ya andi-kakanaan a bengatla a kagula na Dios. (Salmo 97:10) Sakey ed saray bengatla a nitulong na satan a pikakasi et napakiwas itayon ompaliis ed pornograpiya tan ed saray espiritistikon agamil.​—1 Corinto 6:9, 10; Apocalipsis 21:8.

13. Panon a nagmaliw a makpel iray apasegsegang a babangatan nen Jesus diad impanpulong da?

¹³ Say suston pikakabat ed salitay Dios so mangiter ed sikatayo na kompiyansa a manpulong tekep na inkakpel. (Salmo 119:41-48) Tan nakaukolan tayo so pakpel ta pian ‘naebatan so mamabalaw ed sikatayo.’ (Salmo 119:42) No maminsan, nayarin magmaliw itayon singa saray apasegsegang a babangatan nen Jesus, ya angipikasi: “[Jehova], . . . yabuloy mo ed saray aripen mo a salitaen da a makmakpel so salitam.” Anto so resulta? “Napno ra ya amin na espiritu santo, et sinalita ra so salita na Dios a makmakpel.” Sikatayo so pagmaliwen met na Soberanon Katawan a makpel a mangiyabawag ed salita to.​—Gawa 4:24-31.

14. Anto so ontulong ed sikatayo pian makpel a makapanpulong, a singa ginawa nen Pablo?

¹⁴ Magmaliw itayon makpel a manpulong, ya andiay takot a napabaingan, no pablien tayo so “salita na katuaan” tan ‘unoren a lanang so ganggan na Dios.’ (Salmo 119:43, 44) Say maseet a panaral ed nisulat a Salita na Dios so manginlong ed sikatayo pian ‘salitaen iray panamintuaan to ed arap na saray arari.’ (Salmo 119:46) Say pikakasi tan say espiritu nen Jehova so ontulong met ed sikatayo pian nibaga iray matukoy a bengatla diad suston paraan. (Mateo 10:16-20; Colosas 4:6) Si Pablo so makpel a nansalita nipaakar ed saray panonot na Dios diad saray manuley nen inmunan siglo. Alimbawa, pinulongan to so Romanon Gobernador a si Felix, a ‘dinmengel ed sikato nipaakar ed pananisia ed Kristo Jesus.’ (Gawa 24:24, 25) Pinulongan met nen Pablo si Gobernador Festo tan si Arin Agripa. (Gawa 25:22–26:32) Diad tulong nen Jehova, magmaliw itayo met a makpel iran tasi, ya agtayon balot ‘ibaing so ebanghelyo.’​—Roma 1:16.

Say Salitay Dios et Manligliwa ed Sikatayo

15. Panon a makaligliwa so Salitay Dios sano babalawen itayo na arum?

¹⁵ Itatarya na Salitay Dios so napanmatalkan a pakaligliwaan. (Salmo 119:49-56) Walaray panaon a kakkaukolan tayo so naligliwa. Anggaman makpel itayon mansasalita bilang Tasi nen Jehova, no maminsan et ‘saray manbalegbalegan,’ salanti, saramay onkikiwas a mapalakbat ed Dios, so ‘mapalalon manluludlurey ed sikatayo.’ (Salmo 119:51) Balet, legan itayon manpipikasi, walaray positibon nanonotan tayo, tan diad ontan et ‘nataliwa’ odino naligliwa itayo. (Salmo 119:52) Diad pampipikasi tayo, nayarin nanonotan tayo so sakey a ganggan odino prinsipyo ed Kasulatan a mangiter ed sikatayo na ligliwa tan inkakpel a nakaukolan diad makapadesdes a kipapasen.

16. Anto so agginawa na saray lingkor na Dios anggaman ed panamasegsegang?

¹⁶ Saray mapalakbat a totoo ya amalaw ed salmista et saray Israelita​—saray membro na nasyon a dedikado ed Dios. Agaylan makapabaing! Balet, aliwan singa sikara, magmaliw itayon determinado ya agbalot onkasipa ed ganggan na Dios. (Salmo 119:51) Sanen naeksperiensya ra so panamasegsegang na Nazi tan arum niran miparan panagmaltrato diad loob na dakel a taon, nilibon lingkor na Dios so agbalot kinmasipa ed saray ganggan tan prinsipyo a naromog ed Salitay Dios. (Juan 15:18-21) Tan agmakapabelat so pangunor ed si Jehova, lapud saray pananontonan to et singa makaligliwa iran kanta ed sikatayo.​—Salmo 119:54; 1 Juan 5:3.

 Misalsalamat Lapud Salitay Dios

17. Say panamabli ed salitay Dios so mamakiwas ed sikatayon manggawa na anto?

¹⁷ Napaneknekan tayo so pisasalamat tayo ed salitay Dios diad pangunor tayo ed satan. (Salmo 119:57-64) Say salmista so angisipan odino ‘angibaga ya unoren to iray salita nen Jehova’ tan anggan ‘diad pegley-labi et sikato so binmangon a mangiyapay na pisasalamat ed Dios nisengeg ed matunong a bilibilin to.’ No aliing itayo ed labi, agaylan abig itan a pankanawnawa pian ibalikas so pisasalamat tayo ed Dios diad pikakasi! (Salmo 119:57, 62) Say panamabli tayo ed salitay Dios so mamakiwas ed sikatayon amtaen so bangat to tan manggawa ed sikatayon maliket a ‘kakaiba na saramay ontatakot ed si Jehova’​—saray indibidual a walaan na mapagalang a takot ed Dios. (Salmo 119:63, 64) Wala ni kasi so magmaong iran kalimog a naromog tayo ed dalin?

18. Panon ya eebatan nen Jehova iray pikakasi tayo sano ‘say lubilubir na saray marelmeng et akapaliber ed sikatayo’?

¹⁸ Sano manpikasi itayo diad interon puso tayo tan mapaabeba itayon paibangat ed si Jehova, ‘napalemek tayo so lupa to’ diad pantalos a panggayagaan tayo so panangabobon to. Lalon nakaukolan tayo so manpikasi sano ‘say mismon lubilubir na saray marelmeng et akapaliber ed sikatayo.’ (Salmo 119:58, 61, NW) Nayarian nen Jehova a pakseten iray lubir a pamupuger na kabusol tan ibulos to itayo pian nitultuloy tayo so panangipulong ed Panarian tan panaggaway-babangatan a kimey. (Mateo 24:14; 28:19, 20) Saya so aminpigan apatnagan diad saray bansa a sebel so kimey tayo.

Panisiaan so Salitay Dios

19, 20. Panon a magmaliw a maong so napaermen odino napairap?

¹⁹ Say pananisia ed Dios tan ed salita to so ontulong ed sikatayo pian nasungdoan so irap tan nagawaan so linawa to. (Salmo 119:65-72) Anggaman saray mapalakbat et ‘nanggawa ed sikato na katilaan,’ oniay inkanta na salmista: “Maong met ya apaermen ak.” (Salmo 119:66, 69, 71) Panon a magmaliw a maong parad siopaman a lingkor nen Jehova so panagmak na ermen odino kairapan?

²⁰ Sano manirap itayo, seguradon masimoon itayon manpikasi ed si Jehova, tan onapit itayo ed sikato lapud satan. Nayarin mas malaem a panaon so usaren tayo diad panagaral ed nisulat a Salitay Dios tan mas panggunaetan tayon iyaplika itan. Manresulta iya ed mas maliket a bilay. Balet panon to no say reaksion tayo ed kairapan et pakapatnagan na agmanepeg iran ugali, a singa say ag-inkamaanos tan inkamapaatagey? Diad masimoon a pampikasi tan diad tulong na Salita tan espiritu na Dios, natalonaan tayo iratan a kakapuyan tan sigpot tayon ‘nisulong so balon inkatoo.’ (Colosas 3:9-14) Niarum ni, napabiskeg so pananisia tayo sano susungdoan tayo so kairapan. (1 Pedro 1:6, 7) Agunggonaan si Pablo ed saray kairapan ya asagmak to lapud sikato so lalon nandependi ed si Jehova. (2 Corinto 1:8-10) Kasin aabuloyan tayo so kairapan a nawalaan na maabig ya epekto ed sikatayo?

Lawas Manmatalek ed si Jehova

21. Anto so nagawa sano iyan na Dios ed kababaingan iray mapalakbat?

²¹ Say salitay Dios so mangiter ed sikatayo na makatunongan a basiyan pian manmatalek ed si Jehova. (Salmo 119:73-80) No talagan manmamatalek itayo ed Manamalsa tayo, anggapo so rason tayo pian ombaing. Balet lapud gagawaen na arum, nakaukolan tayo so ligliwa tan nayarin oniay labay tayon ipikasi: ‘Nabaingan komon iray manbalegbalegan’ odino mapalakbat. (Salmo 119:76-78) Sano sikara so iyan nen Jehova ed kababaingan, manresulta itan ed kiwalwal na mauges a daladalan da tan napasanto so masanton ngaran to. Makapanseguro itayo ya anggapon balot so nagunggona na saray mamapasegsegang ed totoo na Dios. Alimbawa la, agdan balot ayarian​—tan agdan  balot nayarian​—ya upoten iray Tasi nen Jehova, a manmamatalek ed Dios ed interon puso ra.​—Uliran 3:5, 6.

22. Diad anton pantalos a say salmista et “singa sakey a katat a puronggo ed asewek”?

²² Pabiskegen na salitay Dios so panagmatalek tayo ed sikato sano napapasegsegang itayo. (Salmo 119:81-88) Lapud say salmista et papasegsegangen na saray mapalakbat, say pakalikna to et sikatoy “singa sakey a katat a puronggo ed asewek.” (Salmo 119:83, 86) Diad panaon na Biblia, saray puronggo odino bote a gawa ed katat na ayep so uusaren a kargaan na danum, alak, tan arum niran likido. No ag-iratan nausar, saratan a kargaan so nayarin onkebet sano nadangdang diad loob na silir ya anggapoy pasngawan na asewek. Kasin nalilikna yo a “singa [kayo] sakey a katat a puronggo ed asewek” sano naiirapan odino napapasegsegang kayo? No ontan, manmatalek ed si Jehova, tan manpikasi: “Pabilay mo ak unong ed maaro ya abig na linawam; pian dia ed ontan unoren ko so panamintuaan [odino panonot] na sangim.”​—Salmo 119:88.

23. Anto so akonsidera tayo diad impanrepaso ed Salmo 119:1-88, tan anto so nayarin itepet tayo ed inkasikatayo legan tayon tatalaranan so panaral tayo ed Salmo 119:89-176?

²³ Say akonsidera tayo ed unonan kapaldua na Salmo 119 so mangipapabitar a si Jehova so mangaagamil na maaron-kaabigan ed saray lingkor to lapud manmamatalek ira ed salita to tan panliliketan da iray pananontonan, panonot, ganggan, tan ley to. (Salmo 119:16, 47, 64, 70, 77, 88) Sikato so manliket lapud saramay dedikado ed sikato et mantutultuloy a maniimano unong ed salita to. (Salmo 119:9, 17, 41, 42) Legan yon tatalaranan so panaral ed arum a kabiangan na sayan alay dakep a salmo, nayarin tepetan yo so inkasikayo, ‘Peteg kasin aabuloyan ko so salita nen Jehova a manliwawa ed dalan ko’?

[Paimano ed Leksab]

Panon Yon Ebatan?

• Say tuan liket so akadepende ed anto?

• Panon a say salita nen Jehova et mamasiansia ed sikatayon malinis ed espiritual?

• Diad antoran dalan a mangiter na inkakpel tan ligliwa so salitay Dios?

• Akin a nepeg itayon nawalaan na pananisia ed si Jehova tan ed salita to?

[Tepetepet Parad Panagaral]

[Saray litrato ed pahina 11]

Si Rut, Rahab, tan saray Hebreon tobonbalo ya adestiero ed Babilonia so ‘nantultuloy a nanimano unong ed salitay Dios’

[Litrato ed pahina 12]

Si Pablo so makpel a ‘nansalita nipaakar ed saray panamintuaan na Dios diad arapan na saray arari’