Onggamor na Pikakabat​—Natan tan Diad Ando lan Ando

SI Ulrich Strunz, a sakey a doktor ya Aleman, so nansulat na saray serye na libron apauloan na Forever Young. Inkuan to ed saratan a say ehersisyo, nutrisyon, tan maabig ya estiloy panagbilay so makatulong ed pakawalaan na mabunigas a laman tan posiblin mangitonton ed andukdukey a bilay. Balet, agto impaseguro ed saray managbasa a literal iran makapambilay na andi-angga diad panumbok da ed simbawa to.

Anggaman ontan, walay sakey a klase na pikakabat a mangipapaseguro na bilay ya andi-anggaan. Siempre, no andi-angga so pambilay mo, makagamor ka na makanakanan pikakabat ed andi-angga. Oniay impikasi nen Jesus ed Dios: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti [si] Jesu-Kristo.” (Juan 17:3) Talosan tayo pa nin unona so terminon “andi-anggaan a bilay” insan linewen tayon maong no antoy lalanoren na sayan pikakabat tan no panon mon nagamoran itan.

Unong ed Biblia, say dalin so magano lan pagmaliwen na Manamalsa a literal a paraiso, a matukotukoy parad andukey a bilay. Nalalanor so pirmin ikiwas pian niwala itan a Paraiso, a singa ginawa diad samay Delap ed panaon nen Noe. Ipapabitar na Mateo kapitulo 24, bersikulo 37 anggad 39 ya inkompara nen Jesus so panaon tayo ed “saray agew nen Noe,” a saray totoo et “agda akabkabatan” odino inimano so mapeligron situasyon da. Agda met dinengel so mensahe ya impulong nen Noe. Insan sanen sinmabi so ‘agew a linmoob si Noe ed biong,’ amin iramay angipulisay ed sayan pikakabat so niyanep na  Delap. Si Noe tan saramay kaiba to ed loob na biong so akaliktar.

Impabitar nen Jesus ya onsabi so ontan met ya “agew” diad panaon tayo. Saramay ontatalineng ed pikakabat a nisiglaot ed sayan ebento so aglabat makapanilalon niliktar noagta manbilay met ya andi-angga. Nilikud ed satan, saray inaatey a walad pakanodnonotan na Dios so napaoli ed bilay tan nawalaan na ilalo ya aglan balot ompatey. (Juan 5:28, 29) Imanoen no panon ya imbalikas nen Jesus iyan duaran punto. Sanen mitotongtong ed si Marta nipaakar ed kioli na saray inaatey, inkuan to: “Say manisia ed siak, anggan inatey la, nabilay ni; tan siopaman a manbilay tan manisia ed siak agbalot ompatey.” Ipapatnag na amin ya ebidensya ya asingsingger la iyan “agew,” a mankabaliksan a nayarin sikay ‘aglan balot ompatey.’​—Juan 11:25-27.

Insan tinepetan nen Jesus si Marta: “Sisiaen mo ya?” Inmebat si Marta: “On, Katawan.” No bilang ta ontan so itepet nen Jesus ed sika natan, anto kasi iyebat mo? Nayarin mairap mon panisiaan a posible so aglan balot ipatey. Balet anggano ontan so reaksion mo, andi-duaruwa a labay moy nakombinse ed satan. Isipen pa ya agaylan karakel so naaralan mo no ‘agka lan balot ompatey’! Ilitratom pa’d nonot mo a panggagayagaan mo la so amin a bengatla a pipirawaten mon naaralan tan nagawaan natan balet ta anggapon balot so panaon mon gawaen iratan! Tan isipen pa labat a nakaibam lamet iray inad-arom ya inaatey! Anton pikakabat so nayarin manggawan posible ed saratan a bengatla, tan panon mon nagamoran itan?

Walay Kapasidad Tayon Onggamor na Manangiter-Bilay a Pikakabat

Kasin walaan itayoy kapasidad ya onggamor na pikakabat ed Dios tan ed si Kristo? Wala. Tua ya agmanampot so pikakabat nipaakar ed saray kimey na Manamalsa. Ingen, sanen insiglaot nen Jesus so “pikakabat” ed “andi-anggaan a bilay,” agto tutukoyen so nipaakar ed astronomya odino arum niran lawak na siensia. Ipapabitar na Uliran kapitulo 2, bersikulo 1 tan 5 a “saray salita” tan “ganggan” a naromog ed Biblia so manunan kabiangan ed mismon “pikakabat ed Dios.” Tan no nipaakar ed si Jesus, ipapabitar na Juan 20:30, 31 a magenap la iray bengatlan nisulat ed Biblia pian “nawalaan [itayo] na bilay.”

Kanian, say pikakabat ed si Jehova tan ed si Jesu-Kristo a naromog ed Biblia so magenap la pian nipanengneng ed sika no panon mon nagamoran so bilay ya andi-anggaan. Nikadkaduman libro so Biblia. Say Manamalsa so mapangasin angipuyan ed satan diad paraan ya anggan saray abebay-aral a totoo a limitadoy pankanawnawa ra et makala na magenap a pikakabat pian nagamoran day bilay ya andi-anggaan. Ontan met natan, siopaman a mainomay a makaaral tan walaan na dakel a panaon tan pakasarag so lawas makaaral na balon bengatla manlapud impuyan a Kasulatan. Say pakabasam ed sayan artikulo et paneknek lan mismo a walay kapasidad mon makaaral, balet panon so nepeg mon pangusar ed satan a kapasidad?

Unong ed eksperiensya na totoo ed sankamundoan, say sankaepektiboan a paraan pian nagamoran iyan pikakabat et diad personal a panagaral ed Biblia ya ikokondukta na sakey a makakatalos la ed satan. No panon a nanggunaetan nen Noe ya innabang so pikakabat ed saray kapanaonan to, mabulos met iray Tasi nen Jehova ya onla ed abung yo pian isingbat ed sika so Biblia. Nayarin usaren da so brosyur ya Anto so Kakaukolanen na Dios ed Sikatayo? odino say melag a libron matukotukoy ya apauloan na Pikakabat a Mangitonton ed Andi-Anggaan a Bilay. * Anggaman mairap mon panisiaan so ideya a saray matoor a totoo et ‘aglan balot  ompatey’ diad mangaraldalin a Paraiso, naaralan moy manmatalek ed sayan sipan panamegley na saray diskusyon ed Biblia. Kanian no labay moy manbilay ya andi-angga odino labay mo labat a seguroen no kasin makatunongan so panisia a posible itan, anto so nepeg mon gawaen? Nepeg mon awaten iyan pankanawnawan manaral na Biblia.

Panon kabayag itan? Say asalambit a brosyur, a 32 pahina tan wala la ed nilasus a lenguahe, so walaan labat na 16 ya antitikey a leksion. Odino no nayarian moy mangigana na anggan sakey oras kada simba, diad loob na pigaran bulan labat et naaralan mo la iray importantin pamaakaran ed Biblia, diad pangusar na libron Pikakabat a Mangitonton ed Andi-Anggaan a Bilay. Sarayan publikasyon so akatulong ed dakel a totoo a makagamor na malaknab a pikakabat tan makabayubo na aralem a panangaro ed Dios. Tumangan na Manamalsa iramay peteg a mangaaro ed sikato tan tulongan to ira a nawalaan na bilay ya andi-anggaan.

Say manangiter-bilay a pikakabat et talagan nagamoran tayo, tan mainomay itan a naala. Say interon Biblia odino say kabiangan na satan, so nipatalos la ed masulok a 2,000 a lenguahe. Saray Tasi nen Jehova ed 235 a daldalin so maliket ya ontulong ed sika a personal tan mangitarya na saray publikasyon a nibase’d Biblia ta pian lalon naaruman so pikakabat mo.

Personal a Panagaral

Say relasyon mo ed Dios et personal a pamaakaran ed baetan mo tan say Manamalsa. Ipagamor to ed sika so bilay ya andi-anggaan daput no napansiansiam tan napaelet mo itan a relasyon. Sirin, nepeg mon itultuloy so personal a panaral ed nisulat a Salita to. Nayarin mas mainomay moy mangigana na panaon parad panaral no walay regular ya ondalaw ed abung yo.

Lapud lugan na Biblia tan saray katulongan ed panagaral ed Biblia so “[mismon] pikakabat ed Dios,” manepenepeg a simpitan mo iratan. (Uliran 2:5) Nakayarian mo iratan ed loob na saray taon. No sikay manaayam diad mairap a bansa, nayarin agka angusar na dakel a libron-panaralan diad eskuelaan, balet ta akaaral ka diad impantalineng tan impanobserba labat. Alimbawa, diad Benin et masulok lan 50 a lenguahe so uusaren. Kaslakan la iray indibidual a marlas a makapansalita na apatira odino limaran lenguahe, anggaman agni ra awalaan na personal a kopya na libron-panaralan ed sarayan lenguahe. Say abilidad mon makaaral diad italineng, panobserba, tan pangiteen na imano et sakey a langkap. Anggaman ontan, nayarin moriaen mon makatulong a maong iray libro diad panaral mo.

Anggaman masupit so panaayaman mo, panggunaetan moy nawalaan na matukoy a pananginan na Bibliam tan saray nibase’d Biblian publikasyon. Isinop iratan ed pasen a kakaala tan diad pasen ya agnaderal.

Panagaral Bilang Pamilya

No sakey kan ateng, nepeg mon paninteresan so panulong ed ananak mo ya onggamor na parehon pikakabat a nagagamoran mo. Diad saray mairap a bansa, mabetbet a niyugali la na saray ateng so pangibangat ed ananak da na dakel a dunong a makanakana ed bilay. Nayarin laktipen na saya so panagluto, panagtipon na itungo, panag-asul na danum, panagdalus, panagsigay, tan panaglako diad tindaan. Makanakana itan a panangibangat parad pambilay. Anggaman ontan, dakel ya ateng so agmangibabangat ed pikakabat a makapangitonton ed bilay ya andi-anggaan.

Antokaman so situasyon mo, nayarin isipen mo ya anggapo so malaem a panaon a nausar mo. Amta met itan na Manamalsa. Imanoen so inkuan to nensaman ni no panon a nibangat ed ananak iray dalan to: “Nepeg mo ya ibangat iraya a sankakulian ed saray anak mo, tan nepeg mo ra a tongtongen kapag no manyurong ka ed abung mo, tan kapag no manaakar ka ed dalan, tan kapag no mandukdukol ka tan kapag no ombangon ka.” (Deuteronomio 6:7) Unong ed satan a simbawa, akin ya agmo salien so manggawa na dilin programam ed panagbangat, a singa say onggendan:

1. “Kapag no manyurong ka ed abung mo”: Pambanikelan mo so regular a pitongtong ed saray anak mo nipaakar ed Biblia diad abung, a nayarin sinimba, no panon ya ontan so ginawa ed sika na arum. Saray Tasi nen Jehova so mangitatarya na saray nibase’d Biblian publikasyon a  matukoy parad pangibangat ed saray anak antokaman so edad da.

2. “Kapag no manaakar ka ed dalan”: Mitongtong ed saray anak mo diad impormal a paraan nipaakar ed si Jehova, no panon ya ibabangat mo ed sikara iray nakaukolan ed bilay odino bibilinen ira diad impormal a paraan.

3. “Kapag no mandukdukol ka”: Manpikasi a kaiba iray anak mo kada labi.

4. “Kapag no ombangon ka”: Naeeksperiensya na dakel a pamilya iray makagunggonan resulta na kinabuasan a pangokonsidera ed sakey a teksto ed Biblia. Saray Tasi nen Jehova so manguusar na bokletan Usisaen so Kasulatan ya Inagew-agew  * bilang basiyan da.

Diad mairap iran bansa, dakel ya ateng so pinasyan mansasagpot pian naseguro ra a sakey ed ananak da so makala na maabig a sekular ya edukasyon. Diad ontan a paraan et nayarian na anak ya asikasoen so atateng to sano ontakken la ra. Anggaman ontan, no manaaral ka na Biblia tan tutulongan moy amin ya anak mo a manggawa met na ontan, nagamoran mo so pikakabat ya ontulong ed sika tan ed interon pamilyam pian makapambilay ya andi-angga.

Onsabi kasi so panaon a naamtaan tayo so amin a bengatla? Andi. Legan a mantutultuloy ya ontetelek so dalin tayo diad agmanampot ya uniberso, sikatayoy mantultuloy met ya onggamor na pikakabat. Diad tua et oniay ibabaga na Eclesiastes 3:11: “Ginawa na [Dios] so balang bengatla a marakep ed panaon to: ontan met impasen to so kaandoan ed puso ra, anggan ontan say too agto natontonan so gawa a ginawa na Dios a manlapu ed gapo angga ed sampot.” Say igamor na pikakabat so makapaliket tan agbalot mangangga.

[Saray Paimano ed Leksab]

[Blurb ed pahina 5]

“Saya sikato so andi-anggaan a bilay,

a naamtaan da . . .”

[Saray litrato ed pahina 7]

Tulongan mo so pamilyam ya onggamor na pikakabat natan tan diad ando lan ando