Say Impangitarya na Pankaukolan Diad Macedonia
Say Impangitarya na Pankaukolan Diad Macedonia
“GALA ed Macedonia [tan] tulongan mo kami.” (Gawa 16:9) Ipaparungtal na satan a balikas na sakey a laki a pinmayawar ed pasingawey ed kinen apostol Pablo a nakaukolan a niyabawag so maong a balita na Panarian na Dios diad sakey a balon teritorya, diad saray syudad a natan et sakop na Gresya
Diad bansan Macedonia natan et wala labat so 1 a Tasi nen Jehova diad kada 1,840 a populasyon. Dakel a totoo so agnin balot akadngel na nipaakar ed si Jehova a Dios. On, talagan kakkaukolan na saray totoo ed sayan bansa a narengelan so mensahe nipaakar ed kareenan.—Mateo 24:14.
Say Dios so angilukas na dalan pian napenek itan a pankaukolan. Sakey ya agew nen Nobyembre 2003, say sangan opisina na saray Tasi nen Jehova ed Macedonia diad Skopje so akaawat na ag-inilaloan a tawag ed telepono. Nanlapu iman ed Macedonian Center for International Cooperation, a mangiimbita ed saray Tasi a mangipaalagey na sakey a melag a puesto pian ipaliwawa iray sisiaen da legan na taloy-agew ya eksibisyon a ginmapo nen Nobyembre 20. Talagan baleg a pankanawnawa itan pian nasabi so nilibon totoo ya agnin balot akadngel ed maong a balita na Panarian!
Nansagpot a maong iray boluntaryo pian niparaan tan niyuksoy so kiparungtal na nanduruman publikasyon na saray Tasi nen Jehova diad lenguahen Macedonian. Imparungtal so pigaran klase na sayan literatura ta pian makala na kopya iray bisita no interesado ra. Saratan a literatura so angiter na pankanawnawa ed dakel a totoo pian makala na makarepreskon espiritual a danum ya anggapoy bayar.—Apocalipsis 22:17.
Say nagkalautlan inanap na saray bisita et saray publikasyon a mangaapekta ed kabibilay da, a singa say Questions Young People Ask—Answers That Work tan Say Sekreto na Liket ed Pamilya. * Walay 98 a totoo ya angiter na address da pian pabisita ed saray Tasi nen Jehova. Dakel so paborablin nankomento nipaakar ed maabig a kimey na saray Tasi nen Jehova tan ed kalidad na literatura.
Walay sakey a laki ya inmasingger diad puesto a sankatabin toy melag ya anak ton laki. Nantepet so ama no walay literatura a parad ugugaw. Impanengneng na saray Tasi ed sikato so libron My Book of Bible Stories. * Binukay to itan insan malikeliket a nantepet no sampiga itan. Sanen naamtaan to a say edukasyonal a kimey na saray Tasi nen Jehova et sigpot a susuportaan na boluntaryo iran donasyon, sikatoy lalon aliketan. (Mateo 10:8) Impanengneng toy libro ed anak to insan inkuan to: “Marakdakep iyan libro! Ibasaan ta ka na sakey ya istorya kada agew!”
Walay propesor na pilosopiya ya inmasingger ed puesto. Sikatoy interesadon maong ed amin a relihyon balet nagkalautla ed saray Tasi nen Jehova. Legan ton nenengnengen so lugan na libron Mankind’s Search for God, * oniay inkuan to: “Talagan lohikal so inkipresenta na materyal! Onian mismo so nononoten kon paraan a nepeg a kipresenta na saratan.” Diad saginonor et linma met ed puesto so pigaran estudyante to tan kinmerew ira na personal a kopya na libron naawat na propesor. Labay dan aralen itan a libro lapud inisip dan usaren to itan diad klase ra.
Lapud eksibit et awalaan na primeron pankanawnawa so pigaran totoo a nabasa tan narengel iray katuaan manlapud Kasulatan. Walay sakey a grupo na emel iran tin-edyer a nannengneng na saray paninteresan da. Sakey ed saray Tasi so akitongtong ya agano ed sikara, diad tulong na sakey a biin angipatalos ed tongtongan da diad sign language. Inusar na Tasi so libron The Greatest Man Who Ever Lived, * ya impaliwawa to a pinaabig nen Jesus iray mansasakit, pati saray emel. Aliketan ira lapud naamtaan da so sipan na Biblia a magano met lan paabigen nen Jesus iray totoon manaayam ed dalin natan. Pigara ed sikara so maliket ya angawat na nibase ed Biblian literatura, tan ginawa iray uksoyan pian nadalaw ira na sakey a Tasi a makaamta na sign language.
Nilikud ed lenguahen Macedonian, wala met iray literatura diad lenguahen Albania, Ingles, tan Turko. Sakey a laki ya agmakapansalitay Macedonian so kinmerew na pigaran literatura ed Ingles. Kayari ton naawat iray isyu na magasin a The Watchtower tan Awake!, inkuan to a Turko so salita to. Sanen impanengneng ed sikato so literatura ed dilin salita to, agto makapanisia ed anengneng to! Atebek to a labay na saray Tasi nen Jehova a tulongan so amin a totoo.
Agaylan abig a pantasi so niiter ed satan ya okasyon, tan agaylan makapaseseg so pakanengneng ed dakdakel a totoo a mangipapatnag na interes ed katuaan ed Biblia! On, si Jehova so angilukas na dalan pian nikayat a nagkalalo so maong a balita na Panarian diad Macedonia.
[Saray paimano ed Leksab]
^ par. 6 Impalapag ya amin na saray Tasi nen Jehova.
^ par. 7 Impalapag ya amin na saray Tasi nen Jehova.
^ par. 8 Impalapag ya amin na saray Tasi nen Jehova.
^ par. 9 Impalapag ya amin na saray Tasi nen Jehova.
[Kahon/Saray litrato ed pahina 9]
SAKEY A MAKATANTANDAN PANANGUMAN!
Saray sagpot pian nikayat so maong a balita na Panarian na Dios a ginawa nen Mayo 17, 2003 et gapoan la na baleg ya iyaaligwas. Diad Skopje et indedika so balon sangan opisina na saray Tasi nen Jehova. Impaalagey itan ed loob na duay taon, ya amipat a danay a pinaawang iray datin pasilidad.
Wala so taloran nandudumaan a bilding a kawalaan na saray opisina na administrasyon tan panagpatalos pati saray kuarton panugipan, kusina, tan panagpesakan. Si Guy Pierce, a membro na Mananguley ya Ulop na Saray Tasi nen Jehova, so nampaliwawa parad dedikasyon. Walaray bisitan inmatendi ed programa na dedikasyon a nanlalapud samploran bansa. Amin so aliketan ed impakanengneng ed mararakep a balon bilding.
[Mapa ed pahina 8, 9]
(Parad aktual a format, nengnengen so publikasyon)
BULGARIA
MACEDONIA
Skopje
ALBANIA
GRESYA
[Litrato ed pahina 8]
Skopje, Macedonia